ສສຊ ຮຽກຮ້ອງໃຫ້ລັດຖະບານ ຊ່ວຍຮັກສາສະຖານະ ເມືອງມໍລະດົກ

ຢາກສະເໜີໃຫ້ລັດຖະບານ ກໍຄືກະຊວງທີ່ກ່ຽວຂ້ອງຕ່າງໆນີ້ ຊ່ວຍແຂວງຫຼວງພະບາງໃນການຈະປົກປັກຮັກສາສະຖານະນະຄອນຫຼວງພະບາງ ເປັນເມືອງມໍລະດົກໂລກ ເພາະມັນມີ 3 ບັນຫາ.”

ນີ້ແມ່ນຄໍາຄິດເຫັນຕໍ່ບົດລາຍງານລັດຖະບານ ທີ່ທ່ານ ສົມພອນ ສີອູດົມພັນ ສສຊ ເຂດເລືອກຕັ້ງທີ 6 ໄດ້ເວົ້າຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 9 ໃນວັນທີ 19 ພະຈິກ 2024.

“ບັນຫາທີ 1 ນີ້ ກ່ຽວກັບການສ້າງເຂື່ອນໄຟຟ້ານໍ້າຂອງຫຼວງພະບາງ ບັນຫາທີ 2 ນີ້ແມ່ນບັນຫາການຍຸບຜະແນກມໍລະດົກ ບັນຫາທີ 3 ນີ້ບັນຫາການປ່ຽນແປງວິຖີຊີວິດຢູ່ໃນເຂດມໍລະດົກ ກໍຄືຄວາມແອອັດ.”  

ກ່ຽວກັບເລື່ອງນີ້ ພະນັກງານນໍາທ່ຽວຢູ່ນະຄອນຫຼວງພະບາງ ແຂວງຫຼວງພະບາງທ່ານໜຶ່ງກ່າວຕໍ່ວິທຍຸເອເຊັຽເສຣີ ໃນມຶ້ວັນທີ 22 ພະຈິກນີ້ວ່າ ໂຄງການເຂື່ອນໄຟຟ້າຫຼວງພະບາງ ກໍອາດສົ່ງຜົນກະທົບຕໍ່ສະຖານະເມືອງມໍລະດົກໂລກ ຍ້ອນວ່າບ່ອນກໍ່ສ້າງຢູ່ບໍ່ຫ່າງໄກ ຈາກນະຄອນຫຼວງພະບາງຫຼາຍ ປານໃດ ສ່ວນເລື່ອງວັດທະນະທໍາ ແລະບັນຫາຄວາມແອອັດຂອງນັກທ່ອງທ່ຽວ ເຫັນວ່າເປັນບັນຫາທີ່ສາມາດ ຄວບຄຸມໄດ້ຢູ່.

“ເວົ້າເລື່ອງຮູບແບບວັດທະນະທໍາ ເຮົາກໍຍັງຮັກສາໄດ້ ແຕ່ວ່າມັນເວົ້າເລື່ອງສະພາບແວດລ້ອມນີ້ ໂດຍສະເພາະມັນເວົ້າເລື່ອງເຂື່ອນນະ ແມ່ນມັນມີສ່ວນ ເພາະວ່າມັນໃກ້ຕົວເມືອງຫຼວງພະບາງໂພດຫັ້ນນະ ຄັນທີ່ວ່າມີຜົນກະທົບຕໍ່ການທ່ອງທ່ຽວກໍແມ່ນ ກໍຄືຫຼວງພະບາງ ເມື່ອຄົນມາຫຼາຍ ບາດນີ້ ສສຊ ເພີ່ນວ່ານໍ ບໍ່ມີບ່ອນຈອດລົດ ກໍແມ່ນຄວາມຈິງຢູ່ປະມານ 70% ກໍຍ້ອນມັນມີບ່ອນໃຫ້ຈອດຫຼາຍ ແຕ່ເຂົາບໍ່ໄປ.”

ຂະນະທີ່ຊາວບ້ານຢູ່ນະຄອນຫຼວງພະບາງ ແຂວງຫຼວງພະບາງນາງໜຶ່ງກ່າວວ່າ ຄວາມເປັນເມືອງມໍລະດົກໂລກຂອງນະຄອນຫຼວງພະບາງ ຍັງບໍ່ໄດ້ມີການປ່ຽນແປງແນວໃດ ພຽງແຕ່ເກີດຄວາມແອອັດຈາກການທ່ອງທ່ຽວຊື່ໆ ແຕ່ກໍເປັນຜົນດີຕໍ່ການທ່ອງທ່ຽວ ຍ້ອນຜູ້ປະກອບການ ແລະຊາວບ້ານໄດ້ລາຍຮັບຈາກນັກທ່ອງທ່ຽວຫຼາຍຂຶ້ນ.

“ມັນເປັນເມືອງນ້ອຍຊື່ໆ ມໍລະດົກຂະເຈົ້າກໍຮັກສາໄວ້ຄືເກົ່າ ແຕ່ກໍວ່າຄົນຫຼາຍຂຶ້ນເທົ່ານັ້ນ ມັນກໍບໍ່ມີຫຍັງປ່ຽນແປງ ແຕ່ວ່າຢູ່ໃນເມືອງ ດຽວນີ້ມັນກໍມີການທ່ອງທ່ຽວເກີດຂຶ້ນ ປະຊາຊົນກໍໄດ້ຜົນຕອບແທນ ຄືການຄ້າຂາຍມັນກໍໄດ້ຫຼາຍຂຶ້ນ.”

ວິທຍຸເອເຊັຽເສຣີ ໄດ້ຕິດຕໍ່ໄປຍັງຜະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວຢູ່ແຂວງຫຼວງພະບາງ ເພື່ອຖາມເຖິງເລື່ອງນີ້ ແຕ່ເຈົ້າໜ້າທີ່ຍັງບໍ່ສະດວກໃຫ້ຄວາມເຫັນ ແລະມີແຕ່ໃຫ້ເບິ່ງຕາມຂ່າວ ທີ່ໄດ້ລາຍງານໄປກ່ອນໜ້ານີ້.

“ຕົວນີ້ ມັນກໍມີໃຫ້ໄປເບິ່ງຢູ່ໃນເພດຂ່າວຕົວນັ້ນເດີ ຂ່າວມັນກໍ 8 ບັນຫາ 8 ບັນຫາ ເລື່ອງຂໍ້ຄົງຄ້າງ ທີ່ຈະສຸມໃສ່ວຽກງານທ່ອງທ່ຽວຫັ້ນນະ ມັນກໍລົງຢູ່ໃນເພດຂ່າວລາວພັດທະນາ.”

ສະເພາະ 10 ເດືອນຂອງປີ 2024 ແຂວງຫຼວງພະບາງໄດ້ຮັບນັກທ່ອງທ່ຽວ ຫຼາຍກວ່າ 1 ລ້ານ 7 ແສນປາຍຄົນ ຂອງແຜນການປີ ໃນນີ້ມີນັກທ່ອງທ່ຽວສາກົນ ປະມານ 1 ລ້ານ 1 ແສນປາຍຄົນ ສະເລ່ຍຄ່າໃຊ້ຈ່າຍຂອງນັກທ່ອງທ່ຽວປະມານ 897 ລ້ານໂດລ້າສະຫະລັດ ອີງຈາກຂໍ້ມູນການລາຍງານຂອງ ສຸດາພອນ ຄົມທະວົງ, ຫົວຫນ້າພະແນກຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຫລວງພະບາງ.