ມ.ສນາມໄຊ ຜູ້ຮັບເຄາະ ເຂື່ອນແຕກ ຍັງລໍາບາກ

ສິດນີ
2021-06-08
Share
ມ.ສນາມໄຊ ຜູ້ຮັບເຄາະ ເຂື່ອນແຕກ ຍັງລໍາບາກ ເຮືອນຖາວອນ ທີ່ ບໍຣິສັດ ເຊປຽນ-ເຊນໍ້ານ້ອຍ ສ້າງໃຫ້ ຜູ້ປະສົບພັຍເຂື່ອນແຕກ ເມືອງສນາມໄຊ ແຂວງອັດຕະປື.
ນັກຂ່າວພົລເມືອງ

ໃກ້ຈະຮອດມື້ຄົບຮອບ 3 ປີ ຂອງເຂື່ອນ ເຊປ່ຽນ-ເຊນ້ຳນ້ອຍແຕກ ໃນມື້ວັນທີ 23 ກໍຣະກະດາ ປີ 2018 ແຕ່ຊາວບ້ານທີ່ໄດ້ຮັບຜົລ ກະທົບຢູ່ເມືອງສນາມໄຊ ສ່ວນໃຫຍ່ ຍັງໃຊ້ຊິວິດ ລຳບາກ ແລະຍັງຕ້ອງໄດ້ອາສັຍເງິນອຸດໜູນ ແລະເຂົ້າກິນຈາກທາງການຢູ່. ດັ່ງ ຊາວບ້ານສມອງໃຕ້ ຜູ້ທີ່ໄດ້ຮັບຜົລກະທົບ ຈາກເຂື່ອນແຕກ ຢູ່ເມືອງສນາມໄຊ ນາງນຶ່ງ ກ່າວຕໍ່ ເອເຊັຽ ເສຣີ ໃນມື້ວັນທີ 8 ມິຖຸນາ ປີ 2021 ນີ້ວ່າ:

“ຍັງຊ້ຳສູນອຶ່ນຫັ້ນ ດົງບາກ ຕະມໍຢອດ ອີ່ສັງຫັ້ນໄດ້ຫມົດແລ້ວ ຍັງແຕ່ສູນບ້ານນ້ອງນີ້ແຫຼະ ບ້ານສມອງໃຕ້ ຍັງບໍ່ທັນເຮັດເຂົາກຳລັງ ເອົາເຄື່ອງອີ່ສັງມາຈັກໜ່ອຍ ເຂົາກະຊີ່ເລີ້ມແຫຼະ ເງິນຊ່ອຍເຫຼືອໄດ້ຢູ່ ແຕ່ວ່າດົນໆ ຈຶ່ງໄດ້ເທຶ່ອນື່ງ ດຽວນີ້ເຂົ້າຫັ້ນ ແຕ່ກ່ອນນັ້ນເຂົາ ໃຫ້ຫຼາຍ ແຕ່ວ່າດຽວນີ້ກະຫຼຸດລົງແຫຼະ”

ຊາວບ້ານຜູ້ນີ້ກ່າວຕຶ່ມວ່າ ນັບຕັ້ງແຕ່ເຂຶ່ອນແຕກ ມາຮອດປັດຈຸບັນ ກະຍັງພັກອາສັຍຢູ່ເຮືອນພັກຊົ່ວຄາວນີ້ຢູ່ ເພາະທາງການຍັງບໍ່ ທັນໄດ້ສ້າງເຮືອນຖາວອນ ໃຫ້ແກ່ບ້ານສມອງໃຕ້ເທຶ່ອ ຊຶ່ງເພິ່ນຫາກໍມາບຸກເບີກເນຶ້ອທີ່ ເມື່ອບໍ່ດົນມານີ້ ສ່ວນການໃຊ້ຊິວິດໃນໄລຍະ ຜ່ານມານັ້ນ ກໍລຳບາກຫຼາຍ ໂດຍສະເພາະຄອບຄົວ ທີ່ຍັງເພີ່ງພາອາສັຍເງິນອຸດໜູນ ແລະ ເຂົ້າກິນຈາກທາງການ ຍ້ອນທາງການ ແຈກຍາຍໃຫ້ຊ້າ ແລະ ດົນໆຈື່ງຈະໄດ້.

ຊາວບ້ານອີກຜູ້ນຶ່ງ ທີ່ໄດ້ຮັບຜົລກະທົບຈາກເຂຶ່ອນແຕກ ຢູ່ເມືອງສນາມໄຊ ກ່າວວ່າດຽວນີ້ ຊາວບ້ານຈຳນວນນຶ່ງໄດ້ຍ້າຍໄປຢູ່ເຮືອນ ຖາວອນແລ້ວ ແລະໄດ້ຮັບທີ່ດິນສຳລັບການຜລິດ ຊຶ່ງຊາວບ້ານກຸ່ມນີ້ ຈະບໍ່ໄດ້ຮັບເງິນອຸດໜູນຣາຍເດືອນ ແລະ ເຂົ້າກິນຕໍ່ໄປອີກ ຍ້ອນຖືວ່າ ສາມາດກຸ້ມໂຕເອງໄດ້ແລ້ວ.

ແຕ່ຫຼາຍຄົນ ກໍບໍ່ເຫັນດີນຳປານໃດ ຍອ້ນວ່າ ເຖິງແມ່ນວ່າຈະມີເຮືອນຢູ່ຖາວອນ ແລະ ມີດິນປູກຝັງກໍຍັງທຸກຢູ່ ຍັງບໍ່ມີອາຊີບ ແລະ ຣາຍໄດ້ໝັ້ນຄົງ ແຕ່ຄັດຄ້ານທາງການບໍ່ໄດ້.

“ບໍ່ມີແລ້ວ ບໍ່ມີອັຕຣາກິນ ເຂົ້າກິນບໍ່ມີແລ້ວ ໃຫ້ປະຊາຊົນລ້ຽງຕົນເອງ ບາດນີ້ຍັງ 70 ປາຍຄອບຄົວ ເຂົາບໍ່ໄດ້ເຮັດນາຫັ້ນ ມັນບໍ່ມີ ເນື້ອທີ່, ເນື້ອທີ່ກໍບໍ່ທັນໄດ້ສົມບູນ ທັນໄດ້ປົວແປງ ເພາະວ່າພັກຣັດນີ້ປະກາດວ່າ ມີແຕ່ໃຫ້ປູກຝັງລ້ຽງສັດ ແລະກິຈກັມອຶ່ນໆ, ສ່ວນ ເຂົ້່ານີ້ຍັງ ພັກຣັດຊີ່ລ້ຽງ ເພີ່ນລະວ່າແນວນັ້ນ.”

ຊາວບ້ານຄົນນີ້ກ່າວຕຶ່ມວ່າ ດຽວນີ້ທາງການ ໄດ້ຈັດສັນເນື້ອທີ່ການຜລິດ ເພຶ່ອໃຫ້ຊາວບ້ານເຮັດນາ ແຕ່ມິີພຽງ 2 ບ້ານເທົ່ານັ້ນ, ດັ່ງ ບ້ານທ່າແສງຈັນ ແລະ ບ້ານທ່າຫີນ, ສ່ວນອີກ 3 ບ້ານ ຄຶບ້ານໃຫມ່, ບ້ານຕາມໍຢອດ ແລະ ບ້ານສມອງໃຕ້ນັ້ນ ຍັງບໍ່ໄດ້ຮັບການ ຈັດສັນທີ່ດິນເທຶ່ອ ຊາວບ້ານຍັງໄດ້ຮັບເງິນ ອຸດຫນູນແລະເຂົ້າກິນ ຈາກທາງການຢູ່.

ຊາວບ້ານດົງບາກຜູ້ນຶ່ງ ທີ່ໄດ້ຮັບຜົນກະທົບ ຈາກເຂື່ອນແຕກ ແລະໄດ້ຍ້າຍໄປຢູ່ເຮືອນຖາວອນແລ້ວ ກ່າວວ່າ ຫລັງຈາກຍ້າຍໄປຢູ່ ເຮືອນຖາວອນ ແລະໄດ້ຮັບພຶ້ນທີ່ການຜລິດ ກໍເຮັດໃຫ້ຊີວິດຂອງຕົນ ດີກ່ວາເກົ່າ, ມີວຽກເຮັດງານທຳ ມີຣາຍໄດ້ພໍກຸ້ມຕົນເອງ ແລະ ຄອບຄົວ ບໍ່ໄດ້ລຳບາກຄືເມື່ອກອ່ນ.

“ແມ່ນໆ ພໍໄດ້ຢູ່ໄດ້ກິນ ເພາະວ່າ ແຕ່ລະຄອບຄົວເພີ່ນກະເຮັດເດ້ ໂດຍສະເພາະເຮັດສວນມັນຕົ້ນ ອີ່ຫຍັງນີ້ແຫຼະ ຕາມເທົ່າທີ່ເຮັດໄດ້ ພໍໄດ້ເຈືອຈູນກັນກັບພໍ່ແມ່ພີ່ນ້ອງ ປະຊາຊົນ ພວກເຮົາຫັ້ນນ່າ.”

ຊາວບ້ານຜູ້ນີ້ເວົ້າວ່າ ເຂດພື້ນທີ່ເຮືອນຖາວອນ ມີສິ່ງອຳນວຍຄວາມສະດວກ ທຸກຢ່າງ ເປັນຕົ້ນໄຟຟ້ານ້ຳປະປາ ຖນົນຫົນທາງ ແລະ ບາງບ້ານ ກໍຢູ່ຣະຫວ່່າງການສ້າງວັດໃຫມ່ ໃຫ້ອີກ. ກ່ຽວກັບເຣຶ້ອງນີ້ ເຈົ້າໜ້າທີ່ແຂວງອັດຕະປື ທ່ານນຶ່ງ ກ່າວຕໍ່ເອເຊັຽເສຣີ ໃນມຶ້ ດຽວກັນນີ້ວ່າ ເຮືອນຖາວອນທັງໝົດມີຈຳນວນ 811 ຫຼັງ ແຍກອອກເປັນ 45 ຫຼັງ ຣັຖບານໄທຍຊ່ອຍສ້າງ ແລະ 66 ຫຼັງ ແມ່ນ UN-Habitat, ຈາກປະເທດຍິ່ປຸ່ນ ຊ່ອຍສ້າງ ທັງຫມົດ ສ້າງສຳເຣັດແລ້ວ ໂດຍມີຊາວບ້ານ ບ້ານດົງບາກ ແລະ ບ້ານທ່າແສງຈັນ ຈຳນວນນຶ່ງໄດ້ ເຂົ້າໄປຢູ່ອາສັຍແລ້ວ.

ແນວໃດກໍ່ຕາມດຽວນີ້ກຳລັງເລັ່ງສ້າງ ເຮືອນຖາວອນອີກຈຳນວນ 700 ຫຼັງ ໃຫ້ສຳເຣັດໄວເທົ່າທີ່ຈະໄວໄດ້ ຊື່ງໃນຈຳນວນດັ່ງກ່າວ ຄາດວ່າ 182 ຫລັງຈະສ້າງໃຫ້ແລ້ວພາຍໃນ ທ້າຍປີ 2021, ສ່ວນທີ່ເຫຼືອ ຈະໃຫ້ສຳເຣັດ ໃນປີ 2022.

“ກະຕາມແຜນນີ້ ກຳນົດແລ້ວໃນປີ 2021 ແຕ່ກະບໍ່ໝາຍຄວາມວ່າ ໃຫ້ມັນແລ້ວບາດນຶ່ງບາດດຽວ ໂຕໃດທີ່ແລ້ວກ່ອນມອບໃຫ້ ປະຊາຊົນ ນີ້ ຂຶ້ນຢູ່ກ່ອນ ປະຊາຊົນກະເຂົ້າໄປຢູ່ ຫຼາຍເຕີບແລ້ວ ໂຕໃດຍັງບໍ່ທັນແລ້ວ ກະໃຫ້ຢູ່ເຮືອນຊົ່ວຄາວ ໄປກ່ອນເຮັດແນວ ນັ້ນແຫຼະ.”

ອິງຕາມການຣາຍງານ ຂອງກອງປະຊຸມຄະນະກັມມະການຄຸ້ມຄອງ ພັຍພິບັດຂັ້ນສູນກາງ ຢູ່ກະຊວງປ້ອງກັນປະເທດໃນວັນທີ 7 ມິຖຸນາ 2021 ຣະບຸວ່າ ການກໍ່ສ້າງເຮືອນຖາວອນ ຈຳນວນ 700 ຫຼັງ ແມ່ນບໍຣິສັດເຊປ່ຽນ-ເຊນ້ຳນ້ອຍ ເປັນຜູ້ໃຫ້ເງິນໃນການ ສ້າງຈຳນວນ 24.5 ລ້ານໂດລາ ສະຫະຣັຖ. ໂດຍທາງການລາວ ເປັນຜູ້ຈັດສັນພຶ້ນທີ່ ແລະ ຮ່ວມຈ້າງ ບໍຣິສັດ ວັນແສງພັທນາ ຈຳກັດ ເປັນຜູ້ຮັບເໝົາກໍ່ສ້າງ ເຮືອນຖາວອນທັງໝົດ.

ມາຮອດປັດຈຸບັນ ສາມາດລົງມືກໍ່ສ້າງແລ້ວ 505 ແລະ ຍັງບໍ່ທັນລົງມືສ້າງ 195 ຫຼັງ, ຖ້າທຽບໃສ່ແຜນການສ້າງເຮືອນທັງໝົດ 700 ຫຼັງຕົກຢູ່ປະມານ 61.18% ຄາດຄະເນໃນທ້າຍປີ 2021 ນີ້ ຈະໃຫ້ສຳເຣັດ ແລະ ມອບໃຫ້ປະຊາຊົນຢູ່ອາສັຍ ຈຳນວນ 182 ຫຼັງ.

ສຳລັບເງິນອຸດໜູນ 250,000 ກີບຕໍ່ຄົນຕໍ່ເດືອນນັ້ນ ຈະໃຫ້ສະເພາະຄອບຄົວ ທີ່ບໍ່ສາມາດກຸ້ມຕົນເອງໄດ້ເທຶ່ອ ດັ່ງຄອບຄົວທີ່ຫົວໜ້າ ຄອບຄົວເປັນແມ່ຍິງ, ຜູ້ພິການ ແລະ ຜູ້ສູງອາຍຸ ໃນຄອບຄົວທຸກຍາກ, ເດັກກຳພ້າ-ກຳພອຍ ສ່ວນເຂົ້າກິນຈະຫຼຸດລົງ ຈາກ 20 ກິໂລ ຕໍ່ຄົນຕໍ່ເດືອນ ມາເປັນ 12 ກິໂລ ຕໍ່ຄົນຕໍ່ເດືອນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ