ຈີນ ລອງເປີດດ່ານ ບໍ່ຫານ-ບໍ່ເຕັນ, ຂົນສົ່ງ ສິນຄ້າ ຄືນໃໝ່

ຈຳປາທອງ
2021-11-22
Share
ຈີນ ລອງເປີດດ່ານ ບໍ່ຫານ-ບໍ່ເຕັນ, ຂົນສົ່ງ ສິນຄ້າ ຄືນໃໝ່ ຣົດ ຂົນສົ່ງສິນຄ້າ ຈອດຢູ່ດ່ານບໍ່ເຕັນ ແຂວງຫຼວງນ້ຳທາ, ວັນທີ 5 ພຶສພາ 2020.
ນັກຂ່າວ ພົລເມືອງ

ທາງການຈີນ ທົດລອງເປີດດ່ານຊາຍແດນ ບໍ່ຫານ-ບໍ່ເຕັນ ເພື່ອຂົນສົ່ງສິນຄ້າ ລະຫວ່າງຈີນ ແລະລາວ ຄືນໃໝ່ ຫຼັງຈາກທີ່ໄດ້ປິດມາຕັ້ງແຕ່ມື້ວັນທີ 5 ຕຸລາ ທີ່ຜ່ານມາ ຍ້ອນຄົນຂັບຣົດຈີນຕິດເຊື້ອໂຄວິດ-19. ໃນການເປີດດ່ານຄັ້ງນີ້ ທາງການຈີນໄດ້ກໍານົດ ມາຕການຕ່າງໆ ຢ່າງເຂັ້ມງວດ ເພື່ອປ້ອງກັນການ ຣະບາດຂອງ ໂຄວິດ-19 ກ່ອນທີ່ຈະຂົນສົ່ງ ຜ່ານຊາຍແດນນັ້ນໄດ້ ດັ່ງເຈົ້າໜ້າທີ່ຜແນກ ໂຍທາທິການ ແລະຂົນສົ່ງ ແຂວງຫຼວງນໍ້າທາ ກ່າວ ຕໍ່ວິທຍຸເອເຊັຽເສຣີ ໃນມື້ວັນທີ 22 ພຶສຈິການີ້ວ່າ:

ດຽວນີ້ຂ້າພະເຈົ້າກໍເປີດແບບວ່າ ອີງຕາມຄວາມພ້ອມຂອງຈີນເນາະ. ຖ້າຈີນໃຫ້ຈັກຄັນ ເຮົາກໍຈະສາມາດເອົາເຂົ້າໄດ້ທໍ່ນັ້ນຄັນ ອີງຕາມຈໍານວນທີ່ຈີນສາມາດໃຫ້ເຮົາໄດ້ເນາະ ຄືວ່າໃຫ້ລາວເຂົ້າ 40 ບໍ່ຈັ່ງຊີ້ ເຮົາກະໄດ້ເຂົ້າສໍ່ານັ້ນ.

ອີງຕາມການຣາຍງານຂອງໜັງສືພິມວຽງຈັນທາມ ວັນທີ 22 ພຶສຈິການີ້ ຄົນລາວທີ່ຂັບຣົດຂົນສົ່ງສິນຄ້າໄປຈີນ ເມື່ອຮອດດ່ານຊາຍແດນບໍ່ເຕັນແລ້ວ ໃຫ້ໄປກວດຫາເຊື້ອໂຄວິດ-19 ກ່ອນ ແລະຕ້ອງຖືກກັກຕົວ 21 ມື້ ຢູ່ບໍຣິເວນໜ້າດ່ານຊາຍແດນ, ເມື່ອຖືກກັກຕົວຄົບກໍ່ນົດແລ້ວ ກ່ອນຈະມອບຣົດບັນທຸກສິນຄ້າໃຫ້ຄົນຈີນຂັບຕໍ່ໄປ ຣົດນັ້ນຕ້ອງໄດ້ຖືກຂ້າເຊື້ອ ແລະຄົນຂັບຣົດຕ້ອງໃສ່ຊຸດປ້ອງກັນເຊື້ອໂຄວິດ-19. ຖ້າຫາກກວດພົວວ່າ ຄົນລາວ ແລະຄົນຈີນຜູ້ຂັບຣົດນັ້ນຕິດເຊື້ອຕື່ມ ກໍຈະສັ່ງໃຫ້ປິດດ່ານອີກ ເພື່ອປ້ອງກັນບໍ່ໃຫ້ໂຄວິດ-19 ຣະບາດຕື່ມອີກ.

ມາຕການປ້ອງກັນໂຄວິດ-19 ຂອງທາງການຈີນທີ່ວ່ານັ້ນ ເຮັດໃຫ້ບໍຣິສັດຂົນສົ່ງສິນຄ້າ ຂອງລາວທັງຫຼາຍ ບໍ່ມີທາງເລືອກ ຈໍາເປັນຕ້ອງໄດ້ຂົນສິນຄ້າ ໄປລໍຖ້າຢູ່ສາງ ເພື່ອຂົນຕໍ່ໄປຈີນ ຊຶ່ງຢ່າງໜ້ອຍຕ້ອງໄດ້ໃຊ້ເວລາປະມານ 1-2 ເດືອນ ແລະຕ້ອງໄດ້ຢູ່ພາຍໃຕ້ ມາຕການຄວບຄຸມ ແລະປ້ອງກັນ ໂຄວິດ-19 ຂອງທາງການຈີນເທົ່ານັ້ນ, ມາຕການດັ່ງກ່າວອາຈເຮັດໃຫ້ສິນຄ້າ ກະສິກັມ ຈາກລາວໄປຈີນ ເສັຽຫາຍ ຄຸນນະພາບຫລຸດລົງ ຫຼືເນົ່າເປື່ອຍ.

ກ່ຽວກັບເຣື່ອງນີ້ ຄົນລາວທີ່ຂັບຣົດຂົນສົ່ງ ສິນຄ້າຂອງ ບໍຣິສັດ ນຶ່ງ ເວົ້າຕໍ່ ວິທຍຸເອເຊັຽເສຣີໃນມື້ດຽວກັນນີ້ວ່າ ມາຕການດັ່ງກ່າວ ແມ່ນທາງການຈີນຝ່າຍດຽວ ເປັນຜູ້ກໍານົດທຸກຢ່າງ ໂດຍທີ່ທາງການລາວ ບໍ່ສາມາດຕໍ່ລອງ ແລະຊ່ອຍຫຍັງໄດ້, ເຮັດໃຫ້ເສັຽເວລາດົນ:

ເປີດຢູ່ ຫາກບໍ່ໄດ້ເປີດປົກຕິເທື່ອ, ສົ່ງຢູ່ດ່ານພາສີລາວກະຄົນຈີນ ກະເຂົ້າມາຮັບຄືເກົ່າຫັ້ນແຫຼະ. ສິນຄ້າທີ່ເຂົາເຈົ້າເອົາມາຢູ່ໜ້າດ່ານ ນີ້ກໍຫຼາຍ ເຂົາຄ້າງຢູ່ນີ້ເປັນເດືອນ 2 ເດືອນກໍມີນິ. ຂ້ອຍກໍເກືອບໄດ້ເອົາຖິ້ມນິ ຂ້ອຍມາແຕ່ວັນທີ 2 ພຸ້ນ ຫາກໍ່ໄດ້ຂ້າມໄປວ່າງ 2-3 ມື້ຫຼັງນີ້.

ຜູ້ຕາງໜ້າສະມາຄົມ ຢາງພາຣາ ແຂວງຫຼວງນໍ້າທາ ກ່າວຕໍ່ ວິທຍຸເອເຊັຽໃນ ມື້ວັນທີ 22 ພຶສຈິກາ ນີ້ວ່າ ເຖິງມີການເປີດດ່ານຊາຍແດນ ບໍ່ຫານ-ບໍ່ເຕັນ ແຕ່ສິນຄ້າຕ່າງໆ ຈາກປະເທດລາວ ທີ່ຈະສົ່ງອອກໄປປະເທດຈີນ ຍັງຄ້າງສາງເປັນຈໍານວນຫຼາຍ ແລະສິນຄ້າກະສິກັມ ມັກຈະໄດ້ຮັບຄວາມເສັຽຫາຍໜັກ ຍ້ອນມັນເນົ່າ ເປື່ອຍ ເປັນຕົ້ນ ກ້ວຍ ແລະຢາງພາລາ. ດັ່ງນັ້ນ ຈຶ່ງຢາກໃຫ້ທາງການລາວ ເລັ່ງເຈຣະຈາກັບທາງການຈີນ ເພື່ອເປີດໃຫ້ການຂົນສົ່ງ ສິນຄ້າໄດ້ຕາມປົກກະຕິ ເພື່ອບໍ່ໃຫ້ສິນຄ້າ ຂອງລາວໄດ້ຮັບຜົລກະທົບ:

ເຮົາຕ້ອງພົວພັນ ມີຜູ້ຮັບເນາະ ແລ້ວເຮົາຈັ່ງສົ່ງໄປເນາະ ກໍມີຢູ່ ມີຄວາມຫຍູ້ງຍາກຢູ່ ແຕ່ວ່າຖ້າເຮົາມີຜູ້ຮັບຜູ້ສົ່ງ ກໍໄດ້ຄືກັນ ກະບໍ່ໄດ້ຕາມໃຈຫັ້ນແຫຼະ ສະດວ ກຕາມໃຈນີ້ບໍ່ໄດ້ປານໃດ ແຫຼະຫັ້ນນ່າ ອາທິດມານີ້ ຄ້າໝົດນ່າຢູ່ຫຼວງນໍ້າທາ ຄ້າງໝົດນ່າ ມັນບໍ່ເປີດເທື່ອນ່າ.

ເວົ້າເຣື່ອງການຂົນສົ່ງ ສິນຄ້າຜ່ານດ່ານຊາຍແດນນັ້ນ ຜູ້ປະກອບການ ຂົນສົ່ງສິນຄ້າລາວ-ຈີນຢູ່ນະຄອນຫຼວງວຽງຈັນ ເວົ້າຕໍ່ ວິທຍຸເອເຊັຽເສຣີໃນມື້ດຽວກັນນີ້ວ່າ ປັດຈຸບັນ ມີສະເພາະແຕ່ການຂົນສົ່ງສິນຄ້າ ຈາກຈີນມາລາວ. ສ່ວນການຂົນສົ່ງສິນຄ້າທົ່ວໄປ ຈາກລາວ ໄປຈີນ ແມ່ນຍັງບໍ່ທັນມີເທື່ອ ເນື່ອງຈາກດ່ານຊາຍແດນນັ້ນ ບໍ່ທັນເປີດເປັນປົກກະຕິ ແລະຝ່າຍຈີນ ກໍານົດໃຫ້ຂົນສົ່ງສິນຄ້າຜ່ານຊາຍແດນບໍ່ເຕັນເຂົ້າໄປຈິນ ສະເພາະສິນຄ້າຈໍາເປັນເທົ່ານັ້ນ:

ຈາກລາວໄປຈີນ ຊ່ວງນີ້ມັນຍັງບໍ່ສາມາດຂົນສົ່ງໄດ້ ເຈົ້າ ເນື່ອງຈາກວ່າທາງດ່ານບໍ່ເຕັນ ຂະເຈົ້າຍັງປິດຢູ່ ເຈົ້າ ຂະເຈົ້າຍັງບໍ່ເປີດ ເຈົ້າ ເຈົ້າ ໄດ້ສະເພາະເຄື່ອງຈາກຈີນມາລາວຊື່ໆ ເຈົ້າ.

ເຈົ້າໜ້າທີ່ປະຈໍາດ່ານສາກົລ ແຂວງຫຼວງນໍ້າທາ ກ່າວຕໍ່ວິທຍຸເອເຊັຍເສຣີໃນມື້ວັນທີ 22 ພຶສຈິການີ້ວ່າ ຍັງບໍ່ທັນເປີດດ່ານສາກົລ ບໍ່ເຕັນ ຢ່າງເປັນທາງການເທື່ອ, ແຕ່ໄລຍະນີ້ ເປັນການທົດລອງເປີດດ່ານຊາຍແດນ ສະເພາະການຂົນສົ່ງ ສິນຄ້າຈໍາເປັນເທົ່ານັ້ນ:

ໂອ໋ ບໍ່ທັນໄດ້ເປີດເທື່ອ ມີແຕ່ທົດລອງຣົດບັນທຸກ ເຂົ້າ-ອອກ ເລັກໆ ນ້ອຍໆນີ້ແຫຼະ.

ໄລຍະການທົດລອງ ເປີດດ່ານຊາຍແດນ ລາວ-ຈີນ ຕັ້ງແຕ່ມື້ວັນທີ 15-17 ພຶສຈິກາ ຈົນມາຮອດມື້ນີ້ ເຫັນວ່າມີຣົດຂົນສົ່ງ ສິນຄ້າ ຂ້າມຊາຍແດນສເລັ່ຍ 60 ຄັນຕໍ່ມື້ ຂະນະທີ່ຣົດຂົນສົ່ງ ສິນຄ້າລາວ ຍັງຄ້າງຢູ່ສາງ ບໍຣິເວນດ່ານບໍ່ເຕັນ ລໍຖ້າຂົນສົ່ງໄປຈີນ ເກືອບ 300 ຄັນ, ຊຶ່ງສ່ວນຫຼາຍເປັນຣົດຂົນສົ່ງ ແຮ່ທາດຕ່າງໆ, ຜລິຕພັນຈາກແຮ່ທາດ, ຢາງພາລາ ແລະຜົລຜລິດກະສິກັມ.

ອີງຕາມການຣາຍງານ ຂອງກະຊວງກະສິກໍາ ແລະປ່າໄມ້ ວັນທີ 5 ພຶສຈິການີ້, ໃນໄລຍະ 10 ເດືອນຕົ້ນປີ 2021 ນີ້ ປະເທດລາວ ສົ່ງສິນຄ້າກະສິກັມອອກໄປຕ່າງປະເທດ ໃນມູນຄ່າ 890 ລ້ານໂດລາຣ໌ສະຫະຣັຖ. ໃນນັ້ນ 80% ແມ່ນສົ່ງອອກໄປຈີນ ແລະທາງການລາວ ຍັງພະຍາຍາມເຈຣະຈາ ກັບທາງການຈີນ ເພື່ອຂໍເປີດດ່ານສາກົນ ບໍ່ເຕັນ-ບໍ່ຫານ ໃຫ້ໄວທີ່ສຸດ ເພື່ອໃຫ້ມີການຂົນສົ່ງສິນຄ້າ ແລະການຄ້າຂາຍຊາຍແດນ ໄດ້ຕາມປົກກະຕິ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ