ລັດຖະກອນຂໍໃຫ້ຂຶ້ນເງິນເດືອນ ສ່ວນລັດຕຽມຫຼຸດພະນັກງານລົງ ໃນປີ 2025

ເຖິງວ່າ ອັດຕາເງິນເຟີ້ໃນລາວ ຈະຫລຸດລົງມາຢູ່ ໃນລະດັບ 20.73% ໃນເດືອນ ຕຸລາ 2024 ນີ້ ແຕ່ກະຍັງສູງກວ່າ ສະພາແຫ່ງຊາດລາວຮັບຮອງ ໃຫ້ຢູ່ໃນລະດັບບໍ່ເກີນ 9%, ສົ່ງຜົນຕໍ່ຊີວິດການເປັນຢູ່ ຂອງພະນັກງານ-ລັດຖະກອນໃນທົ່ວປະເທດ ໂດຍສະເພາະ ຜູ້ທີ່ໄດ້ຮັບເງິນເດືອນໜ້ອຍ ຕ້ອງພະເຊີນກັບຄວາມຫຍຸ້ງຍາກ ແລະ ມີຈໍານວນນຶ່ງ ຂໍລາອອກ ຈາກການເປັນພະນັກງານ-ລັດຖະກອນ. ດັ່ງ ເຈົ້າໜ້າທີ່ຫ້ອງການກໍາມະບານ ແຂວງຫລວງພຣະບາງ ທ່ານນຶ່ງ ກ່າວຕໍ່ ວິທະຍຸ ເອເຊັຽເສຣີ ໃນມື້ວັນທີ 28 ຕຸລາ ນີ້ວ່າ:

“ກະຢາກໃຫ້ ພະນັກງານຢູ່ລອດ ຕາມແນວທາງນະໂຍບາຍຂອງລັດ ເງິນເດືອນເລີ້ມຕົ້ນນີ້ ຢ່າງໜ້ອຍສຸດ ສອງລ້ານຫ້າ ຫລື ສາມລ້ານ ເລີ້ມຕົ້ນຈັ່ງຊີ້ ເຂົາກະພໍໄປໄດ້ໜ້ອຍນຶ່ງ ຄັນໃຫ້ ສອງລ້ານ ກະເຮັດບໍ່ໄຫວດອກ ຊໍ່ານີ້ເຂົາກໍບໍ່ເຮັດແລ້ວ.”

ທ່ານກ່າວອີກວ່າ ຫາກລັດຖະບານລາວ ຍັງບໍ່ປັບຂຶ້ນເງິນເດືອນ ໃຫ້ກັບ ພະນັກງານ-ລັດຖະກອນໃນປີນີ້ ຫລື ປີ 2025 ອາດຈະເຮັດໃຫ້ກຸ່ມ ພະນັກງານ-ລັດຖະກອນ ຂໍລາອອກຫລາຍຂຶ້ນ ເຊິ່ງອາດຈະສົ່ງຜົນກະທົບ ຕໍ່ວຽກງານຕ່າງໆ ຂອງລັດຖະບານລາວ ໂດຍສະເພາະ ໃນຂະແໜງການສຶກສາ ແລະ ເຈົ້າໜ້ທີ່ຝ່າຍບໍລິຫານ ປະຈໍາຫ້ອງການ ເຊິ່ງພວກເຂົາເຈົ້າ ໄດ້ຮັບເງິນທາງດຽວ.

ພະນັກງານ-ລັດຖະກອນ ປະຈໍາຫ້ອງການສຶກສາທິການ ແລະ ກິລາ ເມືອງເຊບັ້ງໄຟ ແຂວງຄໍາມ່ວນ ກ່າວວ່າ ການປັບຂຶ້ນເງິນເດືອນໃຫ້ ພະນັກງານ-ລັດຖະກອນ ຖື ເປັນຄວາມຫວັງຂອງຍານາງ ລາຍໄດ້ໃນປັດຈຸບັນ ບໍ່ສອດຄ່ອງກັບຄ່າຄອງຊີບ ທີ່ນັບມື້ ຈະແພງຂື້ນເລື້ອຍໆ ຍິ່ງຄົນໃນຄອບຄົວຢູ່ກັນຫລາຍຄົນ ແຮງພະເຊີນກັບ ຄວາມຫຍຸ້ງຍາກຢ່າງໜັກ. ດັ່ງເຈົ້າໜ້າທີ່ ນາງນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ໂດຍ....ພໍໃຊ້ໄປແຕ່ລະມື້ຫັ້ນແຫລະອ້າຍ ຜົວເອື້ອຍພັດຍັງເປັນ ພະນັກງານອາສາ ໄດ້ເງິນແຕ່ຫ້ວງດຽວວ່າຊັນສ່າ ແລະ ເງິນເດືອນມີແຕ່ ລ້ານສີ່ແສນປາຍ ມັນກໍບໍ່ພໍຢູ່ພໍກິນແຫລະ  ຄັນໄດ້ແຫລະ ຄວາມຫວັງຂອງໄທເຮົາ.”

ເຈົ້າໜ້າທີ່ ປະຈໍາຫ້ອງການແນວລາວສ້າງຊາດ ແຂວງສາລະວັນ ກ່າວວ່າ ຫລາຍປີມານີ້ ພະເຊີນກັບຄວາມຫຍຸ້ງຍາກ ທາງດ້ານການເງິນຫລາຍສົມຄວນ ເພາະລາຍໄດ້ຕໍ່ເດືອນ ບໍ່ກຸ້ມກິນ ເຖິງວ່າຈະມີການປັບຕົວ ໂດຍການຫໍ້ເຂົ້າມາກິນຢູ່ຫ້ອງການ ແຕ່ວັດຖຸດິບ ແລະ ເຄື່ອງໃຊ້ປະຈໍາວັນ ກະເປັນຕ້ອງໄດ້ຊື້ ບໍ່ສາມາດຫລີກລ້ຽງໄດ້ ໂດຍສະເພາະ ຄ່ານໍ້າມັນລົດແພງຂຶ້ນຫລາຍ. ດັ່ງເຈົ້າໜ້າທີ່ ນາງນີ້ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ຖືເຂົ້າ ຖືຫຍັງມາກິນຫ້ອງການເລີຍ ເພາະວ່ານໍ້າມັນມັນກະແພງ ກັບໄປກໍບໍ່ໄດ້ ຄອບຄົວຢູ່ໄກຫັນນ່າ ກະຫຍຸ້ງຍາກແຫລະ ພົບບັນຫາຫລາຍຫັ້ນແຫລະ ຄືຢູ່ແຖວທ້ອງຖິ່ນ ພະນັກງານສ່ວນໃຫຍ່ ມັນກະບໍ່ແມ່ນຢູ່ກັບຕົວເມືອງຫັ້ນນ່າ ຕ້ອງໄດ້ເດີນທາງເຂົ້າມາເຮັດວຽກຢູ່ພີ້ (ຫ້ອງການ) ຫັ້ນນ່າ.”

ເຈົ້າໜ້າທີ່ຫ້ອງການປົກຄອງເມືອງແກ່ນທ້າວ ແຂວງໄຊຍະບູລີ ກ່າວວ່າ: ຄ່າຄອງຊີບຢູ່ເມືອງຊາຍແດນລາວ-ໄທ ມີລາຄາແພງຫລາຍ ສິນຄ້າທຸກຢ່່າງ ຖືກຕີລາຄາເປັນເງິນບາດທັງໝົດ, ອັດຕາແລະປ່ຽນກະແພງກວ່າທຸກແຂວງໃນລາວ ເຮັດໃຫ້ລາຍໄດ້ຂອງ ພະນັກງານ-ລັດຖະກອນ ບໍ່ກຸ້ມຢູ່ກຸ້ມກິນ. ດັ່ງເຈົ້າໜ້າທີ່ ນາງນີ້ ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຕາມຢູ່ນອກລະ ຂະເຈົ້າໄລ່ 700 ເລີຍ ເຮົາໄປຊື້ຍ່ອຍນໍາ ໄປແລກຂະເຈົ້າກະໄລ່ 60 ຂະເຈົ້າໄລ່ເປັນເງິນບາດ ແຕ່ເຮົາຊໍ່າວ່າ ໄດ້ເປັນເງິນກີບມາຈ່າຍເປັນລາດ ແລະມັນບໍ່ໄຫວ.”

ຫລ້າສຸດນີ້ ຢູ່ກອງປະຊຸມ ສມັຍສາມັນ ຂອງລັດຖະບານລາວ ປະຈໍາເດືອນຕຸລາ 2024 ນີ້ ລັດຖະບານລາວ ມອບໃຫ້ພາກສ່ວນທີ່ກ່ຽວຂ້ອງ ໄປຄົ້ນຄວ້າການເພີ່ມເງິນເດືອນໃຫ້ພະນັກງານ-ລັດຖະກອນ ແລະ ໂຄຕ້າລັດຖະກອນ ປະຈໍາປີ 2025 ສາມາດຕອບສະໜອງທາງດ້ານການງົບປະມານ ໃນການເບີກຈ່າຍເງິນເດືອນ ແລະ ເງິນນະໂຍບາຍຕ່າງໆ ເພື່ອປັບປຸງຊີວິດການເປັນຢູ່ຂອງ ພະນັກງານ-ລັດຖະກອນ ໃຫ້ສອດຄ່ອງກັບ ສະພາບເສດຖະກິດໃນປັດຈຸບັນ ເຊິ່ງຍັງບໍ່ທັນມີລາຍລະອຽດວ່າ ຈະເພີ່ມເງິນເດືອນຂຶ້ນ ຫລາຍໜ້ອຍປານໃດ.

ໃນເດືອນດຽວກັນນີ້ ກະຊວງພາຍໃນ ແລະ ກະຊວງການເງິນ ຍັງໄດ້ຫາລືຮວ່ມກັນໃນການຕັດເງິນເດືອນພະນັກງານ ທີ່ໄປຍົກລະດັບການສຶກສາຢູ່ຕ່າງປະເທດ ໂດຍສະເພາະ ຄວນຈະມີການໃຫ້ນະໂຍບາຍເພີ່ມ ຫລື ບໍ່ໃຫ້ມີການຕັດເງິນ.

ຂະນະດຽວກັນ ລັດຖະບານລາວ ກະຂາດເຂີນງົບປະມານຢ່າງໜັກ ຈຶ່ງມີຄວາມຈໍາເປັນທີ່ຈະຫລຸດຈໍານວນພະນັກງານ-ລັດຖະກອນ ຈາກ 2.4% ໃຫ້ເຫລືອພຽງ1.8% ຂອງຈໍານວນພົນລະເມືອງ ໃນປີ 2025 ນີ້ ເພື່ອຫລຸດຜ່ອນ ພາລະຄ່າໃຊ້ຈ່າຍຂອງລັດຖະບານ ດ້ວຍການຫລຸດຈໍານວນ ໂຄຕ້າລັດຖະກອນ ໃຫ້ໜ້ອຍລົງໃນປີໜ້າ.