ເງິນກີບຍັງອ່ອນຄ່າ ແລະລາຄາສະບຽງອາຫານຍັງສູງ

ປະເທດລາວ ປະສົບກັບຄວາມຫຍຸ້ງທາງດ້ານເສດຖະກິດ ແລະການເງິນໜັກໜ່ວງມາໄດ້ຫຼາຍປີ ເຮັດໃຫ້ເງິນກີບອ່ອນຄ່າ, ເງິນກີບເຟີ້, ລາຄາສິນຄ້າທຸກຢ່າງແພງ, ຄ່າຄອງຊີບຖີບຕົວສູງຂຶ້ນ, ຊີວັດການເປັນຢູ່ຂອງປະຊາຊົນ ຮວມໄປເຖິງພະນັກງານ-ລັດຖະກອນ ໄດ້ຮັບຄວາມຫຍຸ້ງຍາກ ລໍາບາກ ຂາດເຂີນກ. ສິນຄ້າທີ່ວ່ານັ້ນ ຮວມທັງນໍ້າມັນເຊື້ອໄຟ ທີ່ມີລາຄາສູງຂຶ້ນ. ໃນມື້ວັນທີ 28 ຕຸລາ 2024 ນີ້ ຢູ່ນະຄອນຫຼວງວຽງຈັນ ນໍ້າມັນແອັດຊັງທໍາມະດາ ລິດນຶ່ງ 21,920 ກີບ, ແອັດຊັງພິເສດ ລິດນຶ່ງ 29,250 ກີບ ແລະ ກາຊວນ ລິດນຶ່ງ 18,920 ກີບ.

ລາຄາຄໍາໃນມື້ວັນທີ 28 ຕຸລານີ້ ຢູ່ຮ້ານຄໍາພູວົງ, ຄໍາຮູບປະພັນ ລາຄາຂາຍ 1 ບາດ 29,669,000 ກີບ, ລາຄາຊື້ 1 ບາດ 28,760,000 ກີບ ແລະຄໍາແທ່ງ ລາຄາຂາຍ 1 ບາດ 29,560,000 ກີບ, ລາຄາຊື້ 1 ບາດ 29,030,000 ກີບ.

ອັດຕາແລກປ່ຽນເງິນຕາ ປະຈໍາວັນທີ 28 ຕຸລາ 2024 ນີ້ ຕາມລາຍງານຂອງທະນາຄານການຄ້າຕ່າງປະເທດລາວ, ເງິນໂດລາສະຫະຣັດ ອັດຕາຊື້ 1 ໂດລາສະຫະຣັດ 21,899 ກີບ, ອັດຕາຂາຍ 22,042 ກີບ; ເງິນບາດຂອງໄທ ອັດຕາຊື້ 1 ບາດ 646,99 ກີບ, ອັດຕາຂາຍ 659,92 ກີບ; ເງິນຢວນຂອງຈີນ ອັດຕາຊື້ 1 ຢວນ 3,049 ກີບ, ອັດຕາຂາຍ 1 ຢວນ 3,110 ກີບ ແລະ ເງິນດົງຂອງຫວຽດນາມ ອັດຕາຊື້ 1 ດົງ 0,8973 ກີບ, ອັດຕາຂາຍ 1 ດົງ 0,9152 ກີບ.     

ເງິນກີບເຟີ້ ມີມາດົນແລ້ວ ແລະພະນັກງານ-ລັດຖະກອນລາວ ກໍຮຽກຮ້ອງໃຫ້ລັດຖະບານ ປັບຂຶ້ນເງິນເດືອນມາໂດຍຕະຫຼອດ ເພື່ອໃຫ້ສອດຄ່ອງກັບຄ່າຄອງຊີບໃນແຕ່ລະໄລຍະ. ເຖິງແມ່ນໃນເດືອນຕຸລາ 2024 ນີ້ ເງິນກີບເຟີ້ຈະຫຼຸດລົງ ມາຢູ່ໃນລະດັບ 20,73% ແຕ່ກໍຍັງເຟີ້ສູງກວ່າທີ່ສະພາແຫ່ງຊາດ ໄດ້ກໍານົດໄວ້ ໃຫ້ຢູ່ໃນລະດັບບໍ່ເກີນ 9% ເຮັດໃຫ້ຊີວິດການເປັນຢູ່ຂອງພະນັກງານ-ລັດຖະ ກອນໃນທົ່ວປະເທດ ໂດຍສະເພາະຜູ້ທີ່ໄດ້ຮັບເງິນເດືອນໜ້ອຍ ໄດ້ຮັບຄວາມຫຍຸ້ງຍາກຮຸນແຮງ ຈົນວ່າເຮັດໃຫ້ພວກເຂົາເຈົ້າຈໍານວນນຶ່ງ ເປັນຕົ້ນໃນຂະແໜງການສຶກສາ, ແລະພະນັກງານບໍລິຫານ ປະຈໍາຫ້ອງການຕ່າງໆ ລາອອກຈາກການ ຊຶ່ງເຈົ້າໜ້າທີ່ຫ້ອງການກໍາມະບານ ແຂວງຫຼວງພະບາງທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 28 ຕຸລາ 2024 ນີ້ວ່າ ຖ້າໃຫ້ 2 ລ້ານກີບ ກໍເຮັດບໍ່ໄຫວ, ຢ່າງໜ້ອຍສຸດ ແມ່ນເລີ່ມຕົ້ນ ຕ້ອງ 2 ລ້ານເຄິ່ງ ຫຼື 3 ລ້ານກີບຕໍ່ເດືອນ ໃນຂະນະທີ່ລັດຖະບານລາວ ເຫັນດີໃນດ້ານຫຼັກການ ທີ່ຈະປັບເງິນ ເດືອນຂຶ້ນ ໃຫ້ພະນັກງານ-ລັດຖະກອນຕື່ມໃນປີ 2025, ອີງຕາມລາຍງານໃນກອງປະຊຸມສະໄໝສາມັນຂອງລັດຖະບານ ປະຈໍາເດືອນຕຸລາ ໃນມື້ວັນທີ 24 ຕຸລາ 2024 ນີ້.