ຄົນນໍາທ່ຽວຈີນຜິດກົດໝາຍ ພາຄົນຈີນ ທ່ຽວຢູ່ນະຄອນຫຼວງວຽງຈັນ ແລະແຂວງຫຼວງພະບາງ

ຄົນນໍາທ່ຽວຈີນຜິດກົດໝາຍ ພາຄົນຈີນ ທ່ຽວຢູ່ນະຄອນຫຼວງວຽງຈັນ ແລະແຂວງຫຼວງພະບາງ  ເພັດສະຍາມ ລາຍງານ…

”ຈີນກໍມາຫຼາຍຢູ່ເດເຈົ້າ ເສັ້ນທາງການທ່ອງທ່ຽວມັນສະດວກສະບາຍ ເຫັນເຂົາລັກ ເຂົາຫາກເອົາເປັນໄກຂອງເຂົາເລີຍຫັ້ນນະ ເຂົາກະເອົາໄກເຂົາມາເອງຫັ້ນນະ.”

ນີ້ແມ່ນສຽງຈາກຊາວລາວ ໃນນະຄອນຫຼວງວຽງຈັນທ່ານໜຶ່ງ ກ່າວຕໍ່ວິທຍຸເອເຊັຽເສຣີວ່າ ປັດຈຸບັນ ໃນນະຄອນຫຼວງວຽງຈັນ ແລະໃນແຂວງຫຼວງພະບາງ ພົບຄົນຈີນຈໍານວນໜຶ່ງ ລັກລອບເປັນພະນັກງານນໍາທ່ຽວ ໃຫ້ແກ່ນັກທ່ອງທ່ຽວຈີນ ທີ່ເຂົ້າມາທ່ຽວໃນລາວ ແຕ່ພັດບໍ່ໃຊ້ບໍລິການພະນັກງານນໍາທ່ຽວຊາວລາວ.”

”ສຽງພະນັກງານນໍາທ່ຽວຈີນ ລົມກັບນັກທ່ອງທ່ຽວຈີນ ຢູ່ພະທາດຫຼວງວຽງຈັນ”

ກ່ຽວກັບເລື່ອງດັ່ງກ່າວນີ້ ພະນັກງານນໍາທ່ຽວຊາວລາວທ່ານໜຶ່ງກ່າວວ່າ ບັນຫາຄົນຈີນເຂົ້າມາເປັນພະນັກງານນໍາທ່ຽວໃຫ້ຄົນຈີນເອງ ໂດຍບໍ່ມີພະນັກງານນໍາທ່ຽວຊາວລາວ ພານໍາທ່ຽວດ້ວຍກັນນັ້ນ ຖືວ່າເປັນເລື່ອງທີ່ຜິດລະບຽບກົດໝາຍ ຍ້ອນເປັນການເຂົ້າມາຍາດແຍ່ງອາຊີບສະຫງວນຂອງຄົນລາວ ແລະບໍ່ວ່າເລື່ອງເກີດຢູ່ປະເທດໃດ ກໍເປັນເລື່ອງທີ່ຜິດຄືກັນ.

”ຈີນມາແປຈີນເລີຍ ໝາຍຄວາມວ່າ ບໍ່ມີໄກລາວ ມັນກະບໍ່ຖືກ ກໍສະແດງວ່າ ຜິດ ເພາະປະເທດໃດ ໄກກໍເປັນອາຊີບສະຫງວນໃຫ້ກັບຄົນປະເທດນັ້ນໆ ສົມມຸດວ່າ ຄົນລາວໄປທ່ຽວຈີນ ກໍຕ້ອງມີໄກຈີນ ຫຼືວ່າ ໄກລາວຈະໄປເປັນໄກຂອງໄທ ກໍເປັນບໍ່ໄດ້ ປະເທດໃດກໍເປັນຄືກັນໝົດ ບໍ່ແມ່ນແຕ່ສະເພາະລາວ.” 

ຂະນະທີ່ຊາວລາວ ໃນນະຄອນຫຼວງພະບາງທ່ານໜຶ່ງເຫັນວ່າ ປະຕິເສດບໍ່ໄດ້ວ່າ ບໍ່ມີບັນຫາດັ່ງກ່າວນີ້ເກີດຂື້ນ ເນື່ອງຈາກຄົນຈີນຈໍານວນໜຶຶ່ງຍັງສວຍໂອກາດເຂົ້າມາເປັນພະນັກງານນໍາທ່ຽວໃນລາວ ຫຼືເອີ້ນວ່າໄກເຖື່ອນ ເພື່ອນໍາພານັກທ່ອງທ່ຽວຈີນທ່ຽວນໍາກັນ.

”ຄົນຈີນຈະເຂົ້າມາລາວ ມັນຈະຕ້ອງມີໄກລາວເດນໍາພາ ຄັນຖ້າບໍ່ມີໄກລາວ ເພິ່ນຈະບໍ່ອະນຸຍາດໃຫ້ໄປ ຈະບໍ່ມີສິດການເຄື່ອນໄຫວນໍ ຊິໃຫ້ມັນ 100 ແທ້ມັນກະບໍ່ 100 ແລ້ວນໍ ກະຊິຫຼ່ອຍ ຍະເທື່ອນຶ່ງຊີ້ນະ”

ຕໍ່ບັນຫາດັ່ງກ່າວ ເຈົ້າໜ້າທີ່ພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວ ນະຄອນຫຼວງວຽງຈັນທ່ານໜຶ່ງກ່າວວ່າ ຕາມປົກກະຕິແລ້ວ ຢູ່ຕາມສະຖານທີ່ທ່ອງທ່ຽວ ແຕ່ລະແຫ່ງໃນລາວ ກໍຈະມີເຈົ້າໜ້າທີ່ຕໍາຫຼວດທ່ອງທ່ຽວ ປະຈໍາການຢູ່ແຕ່ລະແຫ່ງ ເພື່ອປ້ອງກັນບັນຫາຕ່າງໆ ລວມທັງບັນຫາພະນັກງານນໍາທ່ຽວທີ່ບໍ່ຖືກຕ້ອງ ເຊິ່ງຄັນພົບເຫັນ ເປັນເທື່ອທໍາອິດ ຫຼືສອງເທື່ອ ກໍຈະມີການຕັກເຕືອນ ແຕ່ຄັນເຮັດຫຼາຍເທື່ອ ກໍຈະຕ້ອງໃຊ້ລະບຽບການແກ້ໄຂ ເປັນ ຕັ້ນການປັບໄໝ.

”ຖ້າວ່າບໍ່ມີໄກລາວ ພວກເຮົາຈະມີເຈົ້າໜ້າທີ່ປະຈໍາຢູ່ແຫຼ່ງນໍ ເຈົ້າໜ້າທີ່ຈະຮູ້ໝົດນໍ ເຄື່ອນໄຫວແນວໃດ ບໍ່ຄ່ອຍມີນໍ ເຂົາເຈົ້າກໍຮູ້ລະບຽບຂອງເຮົານໍ ບໍ່ເປັນຫຍັງນໍ ດຸດຸ ເລື້ອຍໆມັນກໍບໍ່ໄດ້ ຈະຕົວະກັນບໍ່ໄດ້ນະ ແມ່ນຈະຮ້ອງບໍລິສັດມາຕັກເຕືອນ ປັບໄໝ.”  

ເຖິງຢ່າງໃດກໍຕາມ ທ່ານ ຄໍາປະເສີດ ເທບວົງສາ ສະມາຊິກສະພາແຫ່ງຊາດ ເຂດເລືອກຕັ້ງທີ 16 ແຂວງເຊກອງ ໄດ້ກ່າວຢູ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ 9 ເມື່ອບໍ່ດົນມານີ້ວ່າ ປັດຈຸບັນ ພົບບັນຫາຄົນຈີນຈໍານວນຫຼາຍ ເຂົ້າມາເຮັດທຸລະກິດດ້ານການທ່ອງທ່ຽວແບບຜິດກົດໝາຍ ໂດຍສະເພາະໃນຫຼວງພະບາງ ໃນລັກສະນະ ເຊົ່າເຮືອນພັກຕໍ່ຈາກຄົນລາວ ແລ້ວເປີດໃຫ້ບໍລິການເອງ ແບບບໍ່ໄດ້ຮັບອະນຸຍາດ ລວມທັງເຮັດທຸລະກິດນໍາທ່ຽວ ນໍາພານັກທ່ອງທ່ຽວຈີນເຂົ້າມາທ່ຽວໃນລາວ ແລ້ວກໍພາທ່ຽວເອງຕາມສະຖານທີ່ຕ່າງໆ ແລະກໍນໍາເງິນກັບປະເທດຕົນເອງ ໃນຮູບແບບທີ່ເອີ້ນວ່າ ທົວສູນຫຼຽນ ໂດຍເງິນຈໍານວນນີ້ ຈະບໍ່ເຂົ້າງົບປະມານຂອງລັດຖະບານ.