ເຈົ້າໜ້າທີ່ໄທ ກວດພົບສາຍສົ່ງອິນເຕີ້ເນັດ ຜິດກົດໝາຍ ຈາກຝັ່ງໄທ ເຂົ້າໄປລາວ

ວັນທີ 20 ຕຸລາ 2024 ເຈົ້າໜ້າທີ່ ຄະນະກຳມະການກິດຈະການກະຈາຍສຽງ, ກິດຈະການໂທລະທັດ ແລະ ການຄົມມະນາຄົມ ແຫ່ງຊາດ (ຂອງໄທ) ຮ່ວມກັບເຈົ້າໜ້າທີ່ຕຳຫລວດໄທ ໄດ້ກວດພົບ ແລະ ຕັດສາຍເຄເບີນອິນເຕີແນັດ ທີ່ຜິດກົດໝາຍ ຄວາມຍາວປະມານ 5 ກິໂລແມັດ ເນັ່ງຜ່ານຂ້າມຂົວມິດຕະພາບ ໄທ-ລາວ ແຫ່ງທີ 2 ລະຫວ່າງ ຈັງຫວັດ ມຸກດາຫານ - ແຂວງສະຫວັນນະເຂດ ໂດຍຄາດວ່າເປັນສາຍອິນເຕີເນັດ ສຳລັບໃຊ້ໃນການກໍ່ອາຊະຍາກຳທາງອິນເຕີເນັດ ຫລື ແກ້ງຄໍເຊັນເຕີ້, ເຊິ່ງຫລ້າສຸດນີ້ ເຈົ້າໜ້າທີ່ຕໍາຫລວດ ກໍາລັງມີການສືບສວນ-ສອບສວນຢູ່ ດັ່ງເຈົ້າໜ້າທີ່ ຄະນະກຳມະການ ກິດຈະການ ຂະຫຍາຍສຽງ ກິດຈະການ ໂທລະທັດ ແລະ ການຄົມມະນາຄົມ ແຫ່ງຊາດໄທ ທ່ານນຶ່ງ ກ່າວຕໍ່ວິທະຍຸ ເອເຊັຽ ເສຣີ ໃນ ວັນທີ 22 ຕຸລາ ນີ້ວ່າ:

(ພາສາໄທ) "ພວກເຮົາໄດ້ໄປຮ້ອງຮຽນຕໍ່ເຈົ້າໜ້າທີ່ຕຳຫຼວດ ສືບສວນ-ສອບສວນແລ້ວ ກໍໜ້າຈະມີການອອກໝາຍຈັບຜູ້ກ່ຽວຂ້ອງໃນອີກບໍ່ດົນນີ້ ເພື່ອໄປໃຫ້ປາກຄຳຕາມຂັ້ນຕອນ ຫຼືສະແດງເອກະສານຕ່າງໆ ເພາະວ່າມີຜູ້ປະກອບການບາງສ່ວນ ທີ່ເຮັດແບບຖືກຕ້ອງຄືກັນ."

ໃນຂະນະທີ່ເຈົ້າໜ້າທີ່ ທີ່ເຮັດວຽກດ້ານໂທລະຄົມ ແລະການສື່ສານ ແຂວງສະຫວັນນະເຂດ ທ່ານໜຶ່ງ ກ່າວວ່າ ໃນເບື້ອງຕົ້ນໄດ້ຮັບຊາບຂ່າວດັ່ງກ່າວ ແລະກໍໄດ້ຮັບແຈ້ງຈາກເຈົ້າໜ້າທີ່ປະຈຳຂົວມິດຕະພາບລາວ-ໄທ ແຫ່ງທີ 2 ແຕ່ກໍຍັງຈະມີການສືບສວນຕື່ມວ່າ ການເຮັດສາຍເຄເບີ້ນອິນເຕີແນັດ ມາຍັງແຂວງສະຫວັນນະເຂດນັ້ນ ແມ່ນເປັນການສະໜອງໃຫ້ແກ່ບໍລິສັດໃດ ຫຼື ທຸລະກິດປະເພດໃດ, ດັ່ງທ່ານກ່າວວ່າ:

"ເຫັນແຕ່ທາງດ່ານເພິ່ນກະແຈ້ງມາຫາ ວ່າເຫັນຢູ່ຂ່າວທີ່ວ່າເຂົາເຈົ້າຕັດ ທາງໄທເນາະລົງມາກວດກາເນາະ ພົບເຫັນໂຕແກ້ງຄໍເຊັນເຕີຫຍັງຫັ້ນ ເຮົາກະບໍ່ແນ່ໃຈເນາະ ແຕ່ວ່າຢູ່ຫັ້ນທີ່ວ່າເພິ່ນກວດມາ ບໍ່ເຫັນມີສາຍເຮົາ."

ສ່ວນເຈົ້າໜ້າທີ່ຢູ່ຂັ້ນສູນກາງ ຫຼາຍກະຊວງທີ່ກ່ຽວຂ້ອງ ກໍໄດ້ຮັບຮູ້ຂ່າວດັ່ງກ່າວຜ່ານການລາຍງານຂ່າວເທົ່ານັ້ນ ແຕ່ຍັງບໍ່ໄດ້ມີການແຕ່ງຕັ້ງຄະນະກຳມະການກວດສອບ ຫຼື ເຮັດແນວໃດເທື່ອ, ດັ່ງເຈົ້າໜ້າທີ່ກະຊວງເຕັກໂນໂລຊີ ສື່ສານ ນາງໜຶ່ງ ກ່າວວ່າ:

"ແມ່ນເພິ່ນມີພະແນກ ຍັງບໍ່ຮູ້ນຳເຈົ້າ ບໍ່ຮູ້ນຳເພິ່ນ ນຳຫົວໜ້າເພິ່ນ ເພິ່ນຊິມີທິດແນວໃດ ຍັງບໍ່ມີຂໍ້ມູນໃຫ້."

ທາງດ້ານຊາວລາວ ທ່ານໜຶ່ງ ທີ່ຮູ້ຂ່າວດັ່ງກ່າວ ກໍເຊື່ອວ່າ ການວາງສາຍເຄເບີ້ນອິນເຕີເນັດ ຈາກຝັ່ງໄທ ມາຍັງ ແຂວງສະຫວັນນະເຂດ ແບບບໍ່ຖືກຕ້ອງນັ້ນ ອາດມີສ່ວນກ່ຽວຂ້ອງກັບທຸລະກິດປະເພດແກ້ງ ຄໍເຊັນເຕີ ເນື່ອງຈາກໄດ້ຍິນຂ່າວວ່າ ນັບແຕ່ແກ້ງຄໍເຊັນເຕີຢູ່ເຂດເສດຖະກິດພິເສດສາມຫຼ່ຽມຄຳ ແຂວງບໍ່ແກ້ວ ໄດ້ຖືກປາບປາມໄປ, ແຕ່ຈຳນວນໜຶ່ງກໍໄດ້ກະແຈກກະຈາຍ ໄປຕັ້ງບ່ອນເຮັດວຽກໃໝ່ ຢູ່ແຂວງຕ່າງໆໃນລາວ ຊຶ່ງອາດລວມທັງແຂວງສະຫວັນນະເຂດ ແລະແຂວງໃກ້ຄຽງທາງພາກໃຕ້, ດັ່ງທ່ານກ່າວວ່າ:

"ແຕ່ເບິ່ງລັກສະນະມັນນີ້ ກະຄໍເຊັນເຕີນີ້ ມັນມານີ້ ພວກກຸ່ມມັນນີ້ກະແມ່ນເບິດຫັ້ນແຫຼະ ຈຸດໃດກະມີແຫຼະ ມັນຢູ່ບ່ອນໃດກະມີບ່ອນຫັ້ນແຫຼະພວກນີ້ ກະຈາຍໄປທົ່ວຂອງເບື້ອງມັນເຮັດວຽກ ເຮົາກະຍັງວ່າ ໂອ ຫາເງິນຈັ່ງໃດວະພວກນີ້."

ເຖິງຢ່າງໃດກໍຕາມ, ອີງຕາມການຖະແຫຼງຂ່າວຂອງເຈົ້າໜ້າທີ່ຕໍາຫຼວດໄທ ລະບຸວ່າ ການລາກສາຍອິນເຕີເນັດດັ່ງກ່າວ ໄປຍັງຝັ່ງແຂວງສະຫວັນນະເຂດນັ້ນ ເຮັດໃຫ້ສາມາດກະຈາຍສັນຍານອິນເຕີເນັດ ຄອບຄຸມພື້ນທີ່ຂະໜາດໃຫຍ່ ແລະ ຮັບຮອງຜູ້ໃຊ້ອິນເຕີເນັດຈຳນວນປະມານ 10,000 ຄົນ ຈຶ່ງອຳນວຍຄວາມສະດວກໃຫ້ແກ້ງຄໍເຊັນເຕີ ທີ່ລັກເຄື່ອນ ໄຫວຢູ່ຝັ່ງລາວ ສາມາດຕົວະຍັ່ງຄົນໄທຍໄດ້ຢ່າງສະດວກ ໂດຍເຮັດໃຫ້ຄົນໄທເຊື່ອວ່າ ກຸ່ມດັ່ງກ່າວເຄື່ອນໄຫວຢູ່ໃນປະເທດໄທ ເພື່ອປົກປິດວ່າເຄື່ອນໄຫວຢູ່ໃນປະເທດລາວ.

ໃນຂະນະດຽວກັນ ທ່ານ ວິໂຣດ ຕະຕ້ອງໃຈ ຜູ້ອໍານວຍການຝ່າຍບໍລິຫານ ຂົວມິດຕະພາບລາວ-ໄທ ແຫ່ງທີ 2 ປະຈຳແຂວງມຸກດາຫານ ກ່າວຕໍ່ສື່ມວນຊົນໄທວ່າ ໃນເບື້ອງຕົ້ນທາງການແຂວງມຸກດາຫານ ໄດ້ກວດສອບ ແລະປະສານງານກັບ ຄະນະກຳມະການ ກິດຈະການ ຂະຫຍາຍສຽງ ກິດຈະການ ໂທລະທັດ ແລະ ການຄົມມະນາຄົມ ແຫ່ງຊາດໄທ ເພື່ອໃຫ້ຕິດຕໍ່ໄປຍັງເຈົ້າຂອງສາຍເຄເບີ້ນອິນເຕີເນັດ ທຸກບໍລິສັດ ໃຫ້ມາກວດ ແລະຊີ້ແຈງວ່າ ສາຍໃດເປັນຂອງແຕ່ລະບໍລິສັດ. ທ່ານກ່າວຕື່ມວ່າ ແຕ່ມີສາຍເຄເບີ້ນຂອງບໍລິສັດໜຶ່ງ ທີ່ບໍ່ມີເຈົ້າຂອງມາຊີ້ແຈງ ແລະໄດ້ກວດສອບແລ້ວພົບວ່າ ເປັນຂອງບໍລິສັດ Net Hub ຈຶ່ງໄດ້ມີການຕັດສາຍ ແລະຈະມີການແຈ້ງຄວາມເພື່ອດຳເນີນຄະດີ ຕາມກົດໝາຍຕໍ່ໄປ.

ສຳລັບພຶດຕິກຳຂອງເຄືອຂ່າຍດັ່ງກ່າວ ແມ່ນເປັນການເຮັດທີ່ໂຈ່ງແຈ້ງ ແລະຜິດກົດໝາຍ ແລະ ຖືເປັນຄວາມຜິດໃນຖານ ປະກອບກິດຈະການໂທລະຄົມມະນາຄົມ ແບບບໍ່ໄດ້ຮັບອະນຸຍາດ ຊຶ່ງຕາມກົດໝາຍໄທແລ້ວ ຖືວ່າ ເປັນຄວາມຜິດຮ້າຍແຮງ ຜູ້ກະທຳຜິດຕ້ອງຮັບໂທດຖືກຈຳຄຸກແຕ່ 5 ປີ ຫຼືປັບໃໝ 10 ລ້ານບາດ ຫລື ທັງຈໍາຄຸກ ທັງປັບ.