ຄົນລາວບໍ່ກ້າກິນກ້ວຍຈີນ ທີ່ປູກຢູ່ລາວ ຍ້ອນຢ້ານສານເຄມີ

ປັດຈຸບັນ ບໍລິສັດຂອງນັກລົງທຶນຈີນ ໄດ້ເຂົ້າມາສຳປະທານທີ່ດິນ ໃນປະເທດລາວ ເພື່ອປູກຫມາກກ້ວຍ ເພື່ອສົ່ງໄປຈີນຫຼາຍ ແຕ່ກໍ່ມີກ້ວຍຈຳນວນໜຶ່ງ ທີ່ບໍ່ໄດ້ມາດຕະຖານຂອງຈີນ ທີ່ຫຼຸດອອກມາຂາຍ ຕາມທ້ອງຕະຫຼາດ ພາຍໃນ.

ເຖິງຢ່າງໃດກໍຕາມ ສຳລັບຄົນລາວແລ້ວ ຫຼາຍຄົນກໍຍັງຢ້ານ ບໍ່ກ້າກິນຫມາກກ້ວຍທີ່ມາຈາກສວນຂອງນັກລົງທຶນຈີນ ຍ້ອນຫມາກກ້ວຍຂອງຈີນ ໃສ່ສານເຄມີຫຼາຍ ແລະຫາກກິນໄປກໍອາດເກີດພະຍາດ ຫຼາຍຢ່າງ . ດັ່ງ ຊາວບ້ານ ຢູ່ເມືອງບໍລິຄັນ ແຂວງບໍລິຄຳໄຊ ທ່ານໜຶ່ງ ກ່າວຕໍ່ ວິທະຍຸເອເຊຍເສຣີ ໃນວັນທີ 23 ຕຸລາ 2024 ນີ້ວ່າ:

"ຢ້ານເຂົາກໍຢ້ານ ມັນມີຢາຫຼາຍເດ້ ເຂົາໃຊ້ຢາຫຼາຍເດ້ ອ້າຍບໍ່ກ້າກິນຫັ້ນນາ ຢ້ານເປັນພະຍາດຫຼາຍແນວ ສີດຢາອັນຕະລາຍເດ້ ຢູ່ຕະຫຼາດ ຂ້າເຈົ້າຮູ້ ຂ້າເຈົ້າກໍບໍ່ຊື້ ຜູ້ບໍ່ຮູ້ກໍໄປຊື້ຫັ້ນແຫຼະ."

ດ້ານເຈົ້າຂອງທຸລະກິດ ກ້ວຍອົບແຫ້ງ ຢູ່ນະຄອນຫຼວງວຽງຈັນ ທ່ານໜຶ່ງ ກ່າວວ່າ ກ້ວຍທີ່ນຳມາໃຊ້ແປຮູບອົບແຫ້ງນັ້ນ ເປັນກ້ວຍຫອມທອງ ທີ່ປະຊາຊົນທົ່ວໄປ ປູກຕາມບ້ານ ຍ້ອນ ມີລົດຊາດຫວານ ມັນ ຂະນະທີ່ກ້ວຍຂອງຈີນ ທີ່ເຄີຍນຳມາແປຮູບນັ້ນ ຈະອອກລົດຊາດສົ້ມ ບໍ່ແຊບເທົ່າກ້ວຍທີ່ໄທບ້ານປູກ ຈຶ່ງບໍ່ນິຍົມມາໃຊ້ແປຮູບ. ດັ່ງທ່ານ ກ່າວວ່າ:

"ຖ້າກ້ວຍຈີນມັນຈະຄ່ອນຂ້າງບໍ່ແຊບ ແມ່ນໆ ກ້ວຍຈີນຈະເປັນກ້ວຍຫອມ ແຕ່ວ່າຈະເປັນກ້ວຍທີ່ໜ່ວຍໃຫຍ່ ເອົາມາທອດຈະບໍ່ແຊບ ຖ້າເປັນກ້ວຍຫອມທອງ ມັນຈະຫວານ ຈະມັນ ແຕ່ວ່າຖ້າເປັນກ້ວຍຈີນ ມັນຈະອອກລົດຊາດສົ້ມ."

ສະເພາະ ຢູ່ແຂວງອັດຕະປື ເຊິ່ງເປັນແຂວງໜຶ່ງ ທີ່ມີສວນກ້ວຍຂອງນັກລົງທຶນຈີນຫຼາຍ ຈະບໍ່ຄ່ອຍເຫັນກ້ວຍຈາກສວນຈີນ ວາງຂາຍຢູ່ຕາມຕະຫຼາດ ປານໃດ ຍ້ອນກ້ວຍຈະຖືກສົ່ງໄປຂາຍຢູ່ທີ່ຈີນເກືອບທັງໝົດ ຫາກກ້ວຍບໍ່ຜ່ານເກຣດຂອງຈີນ ກໍຈະຖືກຖິ້ມຢູ່ໃນສວນກ້ວຍ.

ໃນສວນກ້ວຍຈີນ ຈະມີການໃຊ້ສານເຄມີ ໃນທຸກສ່ວນຂອງຕົ້ນກ້ວຍ ຕັ້ງແຕ່ກົກກ້ວຍ ປີກ້ວຍ ແລະໝາກກ້ວຍ ເມື່ອເກັບກູ້ກ້ວຍແລ້ວ ກໍຈະໃຊ້ສານເຄມີອີກເທື່ອໜຶ່ງ ເພື່ອຮັກສາໃຫ້ກ້ວຍບໍ່ສຸກໄວເກີນໄປ. ດັ່ງ ອະດີດກຳມະກອນ ຢູ່ສວນກ້ວຍຈີນ ຢູ່ເມືອງຊານໄຊ ແຂວງອັດຕະປື ທ່ານໜຶ່ງ ກ່າວວ່າ:

"ແມ່ນ ເລື້ອງເຄມີເຂົາກໍໃຊ້ແທ້ຢູ່ແລ້ວ ປະເພດປຸ໋ຍ ປະເພດຢາ ເຂົາໃຊ້ແທ້ ເລີ້ມຕົ້ນໃສ່ນັບແຕ່ກົກກ້ວຍພຸ້ນ ກໍບໍ່ຮູ້ວ່າຢາແບບໃດ ເຮົາບໍ່ຮູ້ຈັກ ປີກ້ວຍ ແລ້ວກໍໃສ່ກ້ວຍ ແມ່ນ ທຸກຂັ້ນຕອນໃສ່ຢາເບີດ ຕ່າງແຕ່ມັນເປັນຢາຂ້າແມງ ຢາບຳລຸງ ຫຼືວ່າ ຢາອີຫຍັງ."

ສານເຄມີ ທີ່ໃຊ້ໃນສວນກ້ວຍຈີນ ເຮັດໃຫ້ຄົນງານໃນສວນກ້ວຍ ປ່ວຍຫຼາຍ ໂດຍອາການທີ່ພົບເຫັນເລື້ອຍໆ ໃນຄົນງານທີ່ເຮັດສວນກ້ວຍ ຄື ໄຂ້ສູງ ຕົວເຫຼືອງ ແລະມີຜື່ນແດງຕາມໂຕ ຄົນງານຈະປ່ວຍກັນຫຼາຍ ໃນໄລຍະໜ້າຮ້ອນ ລະຫວ່າງ ເດືອນມີນາ ຫາ ເດືອນພຶດສະພາ ໃນໄລຍະນີ້ເຊິ່ງອາກາດເລີ່ມເຢັນ ຈະບໍ່ມີຄົນເຈັບຫຼາຍ ເທົ່າໄລຍະໜ້າຮ້ອນ. ດັ່ງ ເຈົ້າໜ້າທີ່ຜູ້ຂໍສະຫງວນຊື່ ແລະ ຕຳແໜ່ງ ຢູ່ໂຮງໝໍແຫ່ງໜຶ່ງ ໃນແຂວງອັດຕະປື ທ່ານໜຶ່ງ ກ່າວວ່າ:

"ຕາມທີ່ເຫັນກໍມີຫຼາຍຢູ່ ສ່ວນຫຼາຍຄົນເຈັບເຂົ້າມາຈະມີອາການໄຂ້ ແລ້ວກໍໂຕນໂຕເຫຼືອງ ແລ້ວກໍມີຕຸ່ມຕາມໂຕ ຫັ້ນນາ ເປັນແບບພະຍາດພູມແພ້ ຈັ່ງຊີ້ນາ ບາງຄົນກໍເຂົ້າມາແບບຫາຍໃຈຝືດ ມັນເປັນໄລຍະ ຍາມຮ້ອນນີ່ແຫຼະ ໄລຍະເດືອນ 3 ເດືອນ 4 ເດືອນ 5 ນີ່ ສ່ວນຫຼາຍຄົນເຈັບ ຈະມາໄລຍະນີ້ຫຼາຍ."

ກ່ອນໜ້ານີ້ໃນປີ 2021 ເກີດເຫດຄົນງານລາວເສຍຊີວິດ 2 ຄົນໃນສວນກ້ວຍຈີນ

ຢູ່ ບ້ານທ່າເຮືອ ເມືອງບໍລິຄັນ ແຂວງບໍລິຄໍາໄຊ ຍ້ອນພະຍາດກ່ຽວກັບ ລະບົບທາງເດີນຫາຍໃຈ ຊຶ່ງຄົນງານທີ່ເຮັດວຽກນໍາກັນ ເຊື່ອວ່າອາດເປັນຍ້ອນ ສານເຄມີ ທີ່ໃຊ້ໃນສວນກ້ວຍສະສົມ ໃນຮ່າງກາຍຫຼາຍເກີນໄປ ແລະ ເປັນເວລາດົນນານ.

ກ່ຽວກັບການໃຊ້ສານເຄມີ ໃນພາກການກະເສດ ໃນລາວ ກ່ອນໜ້ານີ້ ລັດຖະບານລາວ ກໍໄດ້ປະກາດໃຊ້ກົດໝາຍ ວ່າດ້ວຍ ການຄວບຄຸມການໃຊ້ສານເຄມີ. ແຕ່ໃນພາກປະຕິບັດຕົວຈິງ ກົດໝາຍທີ່ວ່ານີ້ ກໍຍັງບໍ່ຮັດກຸມເທົ່າທີ່ຄວນ ແລະ ຍັງຂາດກົນໄກຕິດຕາມ ກວດກາແລະ ການປະເມີນຜົລການໃຊ້ ກົດໝາຍ ໂດຍສະເພາະ ໃນສວນກ້ວຍຈີນ ທີ່ມີຂ່າວວ່າ ໃຊ້ສານເຄມີ ຢູ່ເລື້ອຍໆ.