ລາວ-ຈີນ ຫາລືກັນ ເລື່ອງການສົ່ງໝາກຖົ່ວລຽນທີ່ປູກຢູ່ລາວ ໄປຈີນ

ໝາກຖົ່ວລຽນ ເປັນນຶ່ງໃນສິນຄ້າກະເສດ ທີ່ຕະຫລາດຈີນຕ້ອງການຫຼາຍ ເຮັດໃຫ້ນັກລົງທຶນຈີນ ເຂົ້າມາສໍາປະທານທີ່ດິນຊາວບ້ານ ປູກຖົ່ວລຽນຫຼາຍ ເພື່ອສົ່ງອອກໄປຂາຍຢູ່ຈີນ ໃນຂະນະທີ່ປະຊາຊົນລາວ ກໍເລີ້ມຫັນມາປູກຖົ່ວລຽນນໍາ ຍ້ອນຫວັງວ່າ ຈະໄດ້ສົ່ງໝາກຖົ່ວລຽນ ໄປຂາຍໃຫ້ຈີນ ຊຶ່ງທາງການລາວ ກໍສົ່ງເສີມ.  

ແຕ່ເຖິງຢ່າງໃດກໍຕາມ ເມື່ອທຽບໃສ່ກັນແລ້ວ ກໍຍັງເຫັນວ່າ ການປູກຖົ່ວລຽນຂອງກະເສດຕະກອນລາວ ກໍຍັງບໍ່ຫຼາຍທໍ່ນັກລົງທຶນຈີນປູກ ແລະທັງບໍ່ມີເຕັກນິກແລະວິຊາການ ໃນການປູກຫລາຍ, ແລະໝາກຖົ່ວລຽນ ຍັງບໍ່ໄດ້ມາດຕະຖານ ທີ່ຈີນກໍາໜົດ, ເຮັດໃຫ້ບໍ່ສາມາດສົ່ງຜົນລະປູກຂອງພວກຕົນ ອອກໄປຂາຍໃຫ້ຈີນໄດ້ເທື່ອ, ອີງຕາມຄໍາເວົ້າ ຂອງປະຊາຊົນ ຜູ້ປູກຖົ່ວລຽນ ຢູ່ເມືອງບາຈຽງຈະເລີນສຸກ ແຂວງຈໍາປາສັກ ນາງນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 24 ຕຸລາ 2024 ນີ້.

“ເມືອງບາຈຽງປູກຫລາຍ ແບບວ່າເຂດທີ່ບໍ່ເຄີຍປູກ ສ່ວນຫລາຍເປັນຄົນຈີນ ຄົນລາວເຮົາເອງກໍປາກົດເຫັນບໍ່ຫລາຍວ່າຊັ້ນສາ ຈີນນີ້ປູກຫລາຍເລີຍ ຕະຫລາດເຂົາເອງ ເຂົາມີບ່ອນສົ່ງອອກ ບໍ່ ຄົນລາວຍັງສົ່ງບໍ່ໄດ້ ສ່ວນຫລາຍກໍຄຸນນະພາບນີ້ແຫລະ ການເບິ່ງແຍງດູແລຫັ້ນນ່າ ໝາກຖົ່ວລຽນຍັງບໍ່ໄດ້ເກດ ສົ່ງອອກບໍ່ໄດ້ ເຮົາປູກແບບບໍ່ມີຄວາມຮູ້ ການໃສ່ປຸ໋ຍອີ່ຫຍັງຫັ້ນນ່າ.”

ຢູ່ນະຄອນຫຼວງວຽງຈັນ ຊາວກະສິກອນລາວຜູ້ນຶ່ງ ກໍເວົ້າໃນມື້ດຽວກັນນີ້ວ່າ ປັດຈຸບັນ ທາງການລາວ ກໍາລັງຫາລື ກັບທາງການຈີນ ເພື່ອໃຫ້ໝາກຖົ່ວລຽນ ທີ່ປູກຢູ່ປະເທດລາວ ສາມາດສົ່ງອອກໄປຕະຫຼາດຈີນໄດ້ ໃນຂະນະທີ່ຊາວກະສິກອນລາວສ່ວນນຶ່ງ ຍັງມີຄວາມກັງວົນວ່າ ຖົ່ວລຽນ ທີ່ຄົນລາວປູກເອງ ໂດຍບໍ່ໄດ້ຮັບທຶນສົ່ງເສີມ ຄືໃນທຸກມື້ນີ້ນັ້ນ ອາດຈະສົ່ງອອກໄປຂາຍຕ່າງ ປະເທດບໍ່ໄດ້ຫຼາຍ, ດຽວນີ້ ສ່ວນຫຼາຍຂາຍຢູ່ພາຍໃນປະເທດ ດັ່ງທີ່ທ່ານກ່າວວ່າ.

“ກໍສິກັງວົນຢູ່ດອກ ກໍຊິສົ່ງໄປຈີນເນາະ ບໍລິສັດມັນກະຊິຖືກກ່ອນ ມັນຈະເປັນບໍລິ ສັດສ່ວນຫລາຍ ປະຊາຊົນກໍປູກຫລາຍ ແຕ່ກໍບໍ່ເຖິງກັບບໍລິສັດຫັ້ນນ່າ ບໍລິສັດມັນຈະສໍາປະທານ 200-300 ເຮັກຕ້າ ແຕ່ດຽວນີ້ສ່ວນຫລາຍເຮົາຂາຍພາຍໃນ ຫລາຍກ່ອນ ມັນຍັງຕອບສະໜອງພາຍໃນຢູ່ ແຕ່ໃນອະນາຄົດ ໜ້າຊິສົ່ງອອກຫລາຍຢູ່.”

ແລະຊາວກະສິກອນ ປູກຖົ່ວລຽນຢູ່ເມືອງປາກຊ່ອງ ແຂວງຈໍາປາສັກ ຜູ້ນຶ່ງກໍເວົ້າຕໍ່ວິທຍຸເອເຊັຽເສຣີ ໃນມື້ວັນທີ 24 ຕຸລານີ້ວ່າ ລັດຖະບານລາວ ກໍສົ່ງເສີມໃຫ້ຊາວກະສິກອນລາວ ປູກຖົ່ວລຽນ ພັນໂມຊານຄິງ ແລະພັນໜາມດໍາ ຊຶ່ງເປັນພັນຖົ່ວລຽນ ທີ່ຕະຫລາດຈີນ ຕ້ອງການຫຼາຍ ແລະບໍລິສັດຈີນເອງ ກໍປູກຖົ່ວ ລຽນພັນທີ່ວ່ານີ້. ເມື່ອຜະລິດຜົນໄດ້ແລ້ວ ກໍຈະສົ່ງໄປຂາຍຢູ່ຈີນທັງໝົດ. ທ່ານເວົ້າວ່າ ເຖິງແມ່ນຈະບໍ່ໄດ້ຂາຍໄປຈີນ ແຕ່ກໍບໍ່ໄດ້ກັງວົນ ຍ້ອນຍັງມີຕະຫຼາດ ອື່ນໆຮອງຮັບ ເພາະໝາກຖົ່ວລຽນ ສາມາດແປຮູບເປັນສິນຄ້າໄດ້ຫຼາຍຢ່າງ.

“ຕົວນັ້ນບໍ່ໄດ້ກັງວົນເລື້ອງປູກຖົ່ວລຽນ ມີແຕ່ວ່າປູກໃຫ້ມັນໄດ້ຫັ້ນນ່າ ປູກໃຫ້ມີຜົນຜະລິດ ປູກໜາມດໍາ ປູກໂມຊັນຄິງເປັນຕົວຫລັກເລີຍ ເພາະລັດຖະບານເຂົາສົ່ງເສີມ ຄົນຈີນຕ້ອງການຫລາຍ ສົ່ງຈີນຢ່າງດຽວ ຈີນຮັບບໍ່ອັ້ນຫັ້ນນ່າ ພວກຈີນມັນປູກເອງ ສົ່ງອອກ.”

ມາເຖິງປັດຈຸບັນ ຖົ່ວລຽນທີ່ປູກໃນປະເທດລາວ ກໍຍັງບໍ່ສາມາດ ສົ່ງໄປຂາຍຢູ່ຈີນໄດ້ ຍ້ອນລາວ ແລະຈີນ ຍັງບໍ່ມີບົດບັນທຶກຄວາມເຂົ້າໃຈກັນ ຫລື MOU ກ່ຽວກັບການສົ່ງໝາກຖົ່ວລຽນ ທີ່ປູກຢູ່ລາວ ໄປຈີນນັ້ນເທື່ອ ແລະຈີນກໍຍັງບໍ່ຮັບໝາກຖົ່ວລຽນ ຈາກປະເທດລາວເທື່ອ ຊຶ່ງຊາວກະສິກອນລາວ ຕ້ອງໄດ້ຮຽນຮູ້ເລື້ອງການປູກຖົ່ວລຽນ ໃຫ້ຖືກເຕັກນິກ ແລະວິຊາການ ເພື່ອສົ່ງອອກ ໃຫ້ໄດ້ມາດຕະຖານກ່ອນ.

ແຕ່ເຖິງຢ່າງໃດກໍຕາມ ກຸ່ມຊາວກະສິກອນ ທີ່ປູກຖົ່ວລຽນໃນລາວ ກໍຄາດວ່າ ຖ້າ 2 ປະເທດ ລາວ-ຈີນ ບັນລຸຂໍ້ຕົກລົງກັນໄດ້ແລ້ວ ກໍຈະສາມາດ ສົ່ງໝາກຖົ່ວລຽນ ຈາກລາວ ໄປຈີນໄດ້ພາຍໃນປີໜ້າ, ດັ່ງເຈົ້າໜ້າທີ່ ສະມາຄົມທຸລະກິດກະສິກໍາລາວ ຂະແໜງຖົ່ວລຽນທ່ານນຶ່ງ ເວົ້າຕໍ່ວິທຍຸເອເຊັຽເສຣີໃນມື້ວັນທີ 24 ຕຸລານີ້ວ່າ ປັດຈຸບັນ ລາວຍັງບໍ່ສາມາດສົ່ງໝາກຖົ່ວລຽນອອກໄປຈີນໄດ້.

“ໃນປະເທດລາວນີ້ ບໍ່ມີສວນໃດສາມາດທີ່ສົ່ງໄປຈີນໄດ້ ຍ້ອນຍັງ 1. MOU ເຮົາບໍ່ໄດ້ເຊັນ ອັນທີ 2. ຈີນຍັງບໍ່ທັນຮັບຮອງຖົ່ວລຽນລາວແດ່ ທີ່ຈະສົ່ງອອກໄປຈີນຫັ້ນ ປີໜ້າສົ່ງໄປຈີນໄດ້  ປີນີ້ບໍ່ສາມາດສົ່ງໄປຈີນໄດ້ ຕ້ອງແລ່ນເອກກະສານກ່ອນ ອັນທີ 2 ຕ້ອງຮຽນຮູ້ກ່ຽວກັບການທໍາ ຖົ່ວ ລຽນສົ່ງອອກກ່ອນ ເຖິງສາມາດສົ່ງອອກໄດ້.”

ລັດຖະບານລາວ ໄດ້ເລີ້ມສົ່ງເສີມ ແລະລະດົມໃຫ້ຊາວກະເສດຕະກອນລາວ ຫັນມາປູກຖົ່ວລຽນຫຼາຍຂຶ້ນ. ຕາມຂໍ້ມູນ ຈາກສະຖິຕິຂອງພະແນກກະສິກໍາ ແລະປ່າໄມ້ ໃນແຕ່ລະແຂວງ, ປັດຈຸບັນ ທົ່ວປະເທດລາວ ມີຜູ້ປະກອບການທັງຄົນລາວ ແລະຕ່າງປະເທດ ປູກຖົ່ວລຽນ ໃນເນື້ອທີ່ຢ່າງໜ້ອຍ 3,000 ປາຍເຮັກຕາ ຊຶ່ງໃນນັ້ນ ມີທັງຄົນລາວ, ຫວຽດນາມ ແລະຈີນ. ເວົ້າສະເພາະບໍລິສັດຈິນກົວ ຂອງນັກລົງທຶນຈີນ ໄດ້ປູກຖົ່ວລຽນໄປແລ້ວ ຫຼາຍກວ່າ 50,000 ຕົ້ນ. 

ຫາກມີການສົ່ງເສີມການປູກຖົ່ວລຽນຫຼາຍຂຶ້ນ ລາວ ກໍອາດຈະເປັນໜຶ່ງໃນ 4 ຂອງ 10 ປະເທດ ສະມາຊິກອາຊຽນ ແລະອາດຈະໄດ້ສົ່ງໝາກຖົ່ວລຽນ ໄປຂາຍຕ່າງປະເທດ ຫຼາຍຂື້ນໃນໃນອະນາຄົດ.