ຊາວກະສິກອນລາວ ຍັງບໍ່ສົ່ງສິນຄ້າຜ່ານທາງລົດໄຟ ລາວ-ຈີນ

ປັດຈຸບັນ ສປປ ລາວ ມີການສົ່ງສິນຄ້າປະເພດກະສິກຳໄປຂາຍຈີນ ຜ່ານເສັ້ນທາລົດໄຟລາວ-ຈີນ ຈຳນວນ 6 ລາຍການ ເປັນຕົ້ນ ຢາງພາລາ, ເຂົ້າສານ, ໝາກເດືອຍ, ສາລີ, ມັນຕົ້ນແຫ້ງ ກວ້ຍແລະຖົ່ວຫຼືອງ, ແຕ່ເຖີງຢ່າງໃດກໍຕາມ ສ່ວນໃຫຍ່ ເປັນຂອງນັກລົງທຶນຈີນ ສຳລັບກະສິກອນລາວນັ້ນ ຍັງບໍ່ສາມາດສົ່ງໄດ້ຍ້ອນຂາດຄຸນນະພາບ ແລະຕົ້ນທຶນການຜລິດສູງ ເຮັດໃຫ້ກະສິກອນລາວ ຈຳເປັນຕ້ອງໃຊ້ລົດບັນທຸກ ສົ່ງສິນຄ້າໄປຈີນເໝືອນເດີມ. ດັ່ງຊາວກະສິກອນປູກຢາງພາລາ ຢູ່ເມືອງວຽງພູຄາ ແຂວງຫຼວງນ້ຳທາງ ທ່ານນື່ງກ່າວຕໍ່ເອເຊັຽເສຣີ ວ່າ:

“ຍຸ້ງຍາກຕ້ອງມີເອກກະສານ ອີ່ຫຍັງຕ່າງໆຫັ້ນນ່າ ສ່ວນຫຼາຍເຂົາເຈົ້າສົ່ງອອກໄປທາງຈີນນີ້ເຂົາຊື້ຢາງພາລາແລ້ວ ເຂົາເອົາໄປອັດເປັນແຜ່ນແຫ້ງຫັ້ນນ່າ ເຂົາເຈົ້າເອົາໃສ່ລົດ 22 ລໍ້ຂົນສົ່ງ ສ່ວນລາຍຢູ່ທາງເມືອງລາວເຂົາໃຊ້ລົດພວງ.”

ຢູ່ແຂວງຫຼວງນ້ຳທາ ສະຖານີນາເຕີຍເປັນບ່ອນສົ່ງສິນຄ້າກະສິກຳຈາກລາວໄປຈີນ ແຕ່ສ່ວນໃຫຍ່ ຈະເປັນຂອງນັກລົງທຶນຈີນ  ສ່ວນສິນຄ້າຂອງກະສິກອນລາວນັ້ນ ຍັງສົ່ງຜ່ານທາງບົກດ້ວຍລົດຂົນສົ່ງຢູ່ ໃຊ້ເວລາຫຼາຍມື້ກ່ອນຈະຮອດຈຸດໝາຍປາຍທາງ ສິນຄ້າກະສິີກຳບາງຊະນິດເສັຽຄຸນນະພາບ ກອ່ນຈະເຖີງລູກຄ້າຈີນ. ດັ່ງເຈົ້າໜ້າທີ່ກະສິກຳແລະປ່າໄມ້ຈາກແຂວງຫຼວງນ້ຳທາງ ທ່ານນື່ງກ່າວວ່າ:

“ສ່ວນຫຼາຍເຂົາໃຊ້ລົດ ບໍ ສ່ວນໝາກຖົ່ວໃຊ້ລົດຄອນແທນເນີ ເພາະວ່າ ໄດ້ເກັບຄວາມເຢັນມັນຈື່ງໄດ້ ເພາະວ່າ ມັນຕ້ອງມີຄວາມເຢັນທີ່ວ່າທາງການຈີນກຳນົດໃສ່ລົດໄຟບໍ່ໄດ້ມັນເກັບຄວາມເຢັນບໍ່ໄດ້ ແຕ່ມັນສະດວກ ເຂົາກໍສົ່ງທາງລົດເອົາ ແມ່ນແລ້ວ ຄ່າຕູ້ມັນແພງກວ່າ ສົ່ງທາງລົດ.”

ນອກຈາກແຂວງຫຼວງນ້ຳທາແລ້ວ ກໍຍັງມີແຂວງຫຼວງພະບາງ ທີ່ສົ່ງສິນຄ້າກະສິກຳຜ່ານເສັ້ນທາງລົດໄຟລາວ-ຈີນ ເປັນຕົ້ນ ສາລີ ໝາກເດືອຍ ຢາງພາລາ ແລະແປ້ງມັນຕົ້ນ ແຕ່ ສ່ວນໃຫຍ່ ເປັນຂອງນັກລົງທຶນຈີນ ເໝືອນກັນ.ເຈົ້າໜ້າທີ່ການຄ້າ ທ່ານນື່ງເວົ້າວ່າ.ບັນຫາອີກອັນນື່ງກໍແມ່ນວ່າ ການສົ່ງສິນຄ້າກະສິກຳລາຍຍ່ອຍຈາກລາວຜ່ານເສັ້ນທາງລົດໄຟລາວ-ຈີນໄປຈີນນັ້ນ ກະສິີກອນລາວ ຍັງບໍ່ສາມາດສົ່ງອອກໄດ້ຍ້ອນຂໍ້ກຳນົດສັນຍາການສົ່ງອອກຕ້ອງໄດ້ຜ່ານບໍລິສັດທີ່ເຮັດສັນຍາສົ່ງສິນຄ້າກັບບໍລິສັດລົດໄຟລາວບຈີນເທົ່ານັ້ນ ຊື່ງໃນປັດຈຸບັນ ບໍລິສັດດັ່ງກ່າວຈະເປັນຜູ້ຮັບເໝົາຊື້ ສິນຄ້າກະສິກຳຈາກລາວໄປຈີນເອງດ້ວຍໃນລາຄາຕ່ຳ ເຮັດໃຫ້ພໍ່ຄ້າຂາຍຍ່ອຍສ່ວນໃຫຍ່ ເປັນຄົນລາວ ບໍ່ສາມາດຂາຍໄດ້.

“ບໍ່ໄດ້ (ສົ່ງດ້ວຍຕົນເອງ) ມັນຕ້ອງຂຶ້ນກັບບໍລິສັດເຊັນສັນຍາກັບຈີນຈື່ງສົ່ງໄດ້ ຄົນບໍ່ຂຶ້ນໂຄຕາກັບຈີນແລ້ວສົ່ງຜ່ານທາງລົດໄຟບໍ່ໄດ້ ຖ້າວ່າ ທາງພຸ້ນບໍ່ຮັບແລ້ວ ກໍບໍ່ສາມາດຜ່ານດ່ານໄດ້ ກໍກາຍເເປັນສິນຄ້າລາຍຍ່ອຍ ຕາມຊາຍແດນຊື່ໆ.”

ກ່ຽວກັບເລື່ອງນີ້ ພນັກງານສົ່ງອອກ ສິນຄ້າຜ່ານເສັ້ນທາງລົດໄຟລາວ-ຈີນທ່ານນື່ງເວົ້າວ່າ ການສົ່ງອອກສິນຄ້າຜ່ານເສັ້ນທາງລົດໄຟລາວ-ຈີນ ມີຄ່າບໍລິການຫຼາຍຂັ້ນຕອນ ເປັນຕົ້ນຄ່າເຮັດສັນຍາ  ຄ່າເບີກຕູ້ໃສ່ສິນຄ້າ ເງີນຄ້ຳປະກັນແລະຄ່າຂົນສົ່ງຊື່ງຂຶ້ນຢູ່ກັບສະຖານີຕົ້ນທາງການສົ່ງອອກ ນອກຈາກນີ້ ການສົ່ງອອກໄປຈີນຕ້ອງສົ່ງເປັນໂກຕາ ທີ່ກຳນົດໃຫ້ ຖ້າຫາກບໍ່ຮອດໂກຕາ ກໍຈະຖືກປັບໄໝ ຫຼືອາດຍົກເລີກສັນຍາ ກໍໄດ້. ສຳລັບກະສິກອນສ່ວນໃຫຍ່ ທີ່ມີການຜລິດບໍ່ແນ່ນອນ ກໍຈະບໍ່ກຸ້ມທຶນໃນການສົ່ງສິນຄ້າຜ່ານລົດໄຟລາວ-ຈີນ ດັ່ງທ່ານເວົ້າວ່າ:

“ຄ່າຂົນສົ່ງນີ້ຂຶ້ນກັບເຮົາຊີ່ຢູ່ສະຖານີໃດ ເພາະວ່າໄລ່ເປັນຕູ້ແລ້ວ ເປັນກິໂລແມດແດ່-(ຄ່າຂົນສົ່ງ)- ຄັນວ່າຈາກຫຼວງພະບາງຢາງພາລາ ສົ່ງໄປຈນປະມານ 2 ພັນຢວນຂຶ້ນໄປ (ຕໍ່ຕູ້) ຖ້າຈະເຮົາເຮັດສັນຍາ ຖ້າການຜລິດຂາດໆເຂີນໆ ກໍເຮັດບໍ່ໄດ້ ສະນັ້ນເຮົາຕ້ອງອາໄສບໍລິສັດແມ່ ທີ່ມີສິນຄ້າຢູ່ຕະຫຼອດຈື່ງຈະເຮັດໄດ້.”

ຫົວໜ້າກົມປູກຝັງ ກະຊວງກະສິກຳແລະປ່າໄມ້ ເວົ້າວ່າ ສປປລາວ ຈະສົ່ງສິນຄ້າກະສິກຳ ໄປຈີນຢ່າງນ້ອຍ 5 ລາຍການໃນປີ 2024  ລວມດ້ວຍ ໝາກໂມແລະພືດຕະຕະກຸນຖົ່ວ ທາງການລາວແລະຈີນໄດ້ເຈລະຈາດ້ານສຸກຂະອານາໄມພືດແລະການສົງອອກໄປຈີນທັງໝົດ ໃນ 30 ລາຍການ ໃນອານາຄົດ ແຕ່ພາກສ່ວນກ່ຽວຂ້ອງເວົ້າວ່າ ຍາກທີ່ຈະປະຕິບັດໄດ້ ຍ້ອນ ກະສິກອນລາວ ຍັງບໍ່ສາມາດສິນຄ້າໄດ້ມາດຕະຖານ ໃນການສົ່ງອອກ.

ສປປ ລາວ ຮຽກຮ້ອງໃຫ້ຈີນ ຮັບຊື້ສິນຄ້າກະສິກຳຈາກລາວຫຼາຍຂຶ້ນ, ວ່າງປີຜ່ານມາ ທ່ານ ສອນໄຊ ສີພັນດອນ, ນາຍົກຣັຖມົນຕຣີ ໄດ້ເດີນທາງໄປພົບປະກັບທ່ານ ຫຼານທ່ຽນລີ້ ປະທານເຂດປົກຄອງຕົນເອງ ແຂວງກວາງຊີ ປະເທດຈີນ ເຊິ່ງທັງສອງຝ່າຍເຫັນດີຮ່ວມກັນວ່າ ທາງການລາວ ແລະ ແຂວງກວາງຊີ ຈະມີການຮ່ວມມື ໃນການຊຸກຍູ້ການລົງທຶນ ສ້າງນະໂຍບາຍການຄ້າລາວ-ກວາງຊີ ເພື່ອຂຍາຍຕລາດ ແລະ ສ້າງເງື່ອນໄຂ ຍົກລະດັບສິນຄ້າການກະເສດຂອງທັງສອງຝ່າຍ ໂດຍ ສະເພາະສເນີມີນະໂຍບາຍພິເສດ ໃຫ້ສິນຄ້າດ້ານການກະເສດ ຂອງລາວສາມາດສົ່ງອອກໄປຈຳໜ່າຍ ຢູ່ປະເທດຈີນຫຼາຍຂຶ້ນ ແລະ ໃຫ້ທາງຈີນຊ່ອຍເຫຼືອລາວ ໃນການພັທນາສິນຄ້າ ການກະເສດ ຢູ່ແຂວງຕ່າງໆຂອງລາວ.

ນັກວິຊາການລາວ ທ່ານນື່ງ ເວົ້າວ່າ ການສົ່ງອອກສິນຄ້າ ດ້ານການກະເສດຈາກລາວ ໄປປະເທດຈີນ ກໍມີຢູ່ ແຕ່ບໍ່ຫຼາຍເນື່ອງຈາກວ່າ ນຶກຈາກບັນຫາເລື່ອງຄຸນນະພາບແລ້ວ ຍັງມີບັນຫາເງິນເຟີ້ໃນປັດຈຸບັນນີ້ນຳອີກ  ສົ່ງຜົລກະທົບໃຫ້ຊາວກະສິກອນໃນຫຼາຍທ້ອງຖິ່ນໃນການປູກພືດ ຫຼື ລ້ຽງສັດ ຕ້ອງໃຊ້ງົບປະມານສູງ ສຳລັບຊື້ແນວພັນ ຫຼືອື່ນໆຈາກຕ່າງປະເທດ ເພື່ອການລົງທຶນດ້ານການກະເສດ.

ທ່ານວ່າ ສໍາລັບການຜລິດ ທາງດ້ານການກະເສດ ຢູ່ໃນປະເທດລາວໃນຫຼາຍທ້ອງຖິ່ນກໍຍັງບໍ່ທັນກຸ້ມຕົນເອງເທື່ອ  ແລະ ແຂວງທີ່ມີຊາຍແດນຕິດກັບປະເທດໄທຍ ເປັນຕົ້ນນະຄອນຫຼວງວຽງຈັນ, ໄຊຍະບູຣີ, ສວັນນະເຂດ ແລະ ອື່ນໆ ກໍຍັງອາສັຍການນຳເຂົ້າສິນຄ້າ ດ້ານການກະເສດຈາກປະເທດໄທຍ ເພື່ອນໍາມາບໍຣິໂພກຢູ່ປະເທດລາວ ດັ່ງນັ້ນ ການສົ່ງອອກສິນຄ້າກະເສດໄປຈີນ ຈື່ງມີໜ້ອຍ.

ນັບຕັ້ງແຕ່ເດືອນມັງກອນຈົນເຖິງເດືອນສິງຫາປີ 2024 ປະເທດລາວຂາດດຸນການຄ້າເຖີງ 129 ລ້ານໂດລ້າສະຫະລັດ ເນື່ອງຈາກການນໍາເຂົ້າສິນຄ້າຫຼາຍກ່ວາສົ່ງອອກເຊິ່ງໃນສ່ວນໃຫຍ່ ແມ່ນຂາດດູນກັບຈີນ ອີງຕາມການລາຍງານຂອງສູນຂໍ້ມູນຂ່າວສານທາງດ້ານການຄ້າ ກະຊວງອຸດສາຫະກຳແລະການຄ້າ. ສບາຍດີ.