ບໍຣິສັດເອກຊົນ ສໍາຣວດ ໂຄງການເຂື່ອນ 4 ແຫ່ງ

ຈໍາປາທອງ
2021.09.21
Share on WhatsApp
Share on WhatsApp
ບໍຣິສັດເອກຊົນ ສໍາຣວດ ໂຄງການເຂື່ອນ 4 ແຫ່ງ ພິທີເຊັນບົດບັນທຶກ ຄວາມເຂົ້າໃຈ ຈະສ້າງເຂື່ອນໄຟຟ້າ 4 ແຫ່ງ ຢູ່ແຂວງບໍຣິຄໍາໄຊ ແລະ ແຂວງເຊກອງ ລະຫວ່າງ ກະຊວງແຜນການ ແລະ ການລົງທຶນ ກັບບໍຣິສັດ ພົງຊັບທະວີກໍ່ສ້າງຂົວ-ທາງ, ເຄຫາສະຖານ ແລະ ຊົລປະທານຈໍາກັດ.
ພາບປະກອບ: ໜັງສືພິມ ເສຖກິຈການຄ້າ

ກະຊວງແຜນການ ແລະການລົງທຶນຂອງລາວ ໄດ້ລົງນາມໃນບົດບັນທຶກຄວາມເຂົ້າໃຈກັນ ກັບບໍຣິສັດ ພົງຊັບທະວີກໍ່ສ້າງຂົວ-ທາງ, ເຄຫາສະຖານ ແລະຊົລປະທານຈໍາກັດ ທີ່ນະຄອນຫຼວງວຽງຈັນ ໃນມື້ວັນທີ 16 ກັນຍາ 2021 ກ່ຽວກັບການອະນຸຍາດ ໃຫ້ສຶກສາ ສໍາຣວດ ໂຄງການເຂື່ອນໄຟຟ້າ 4 ແຫ່ງ ຊຶ່ງຈະສ້າງຢູ່ແຂວງເຊກອງ ແລະ ແຂວງບໍຣິຄໍາໄຊ.

ຢູ່ແຂວງເຊກອງ ມີແຜນທີ່ຈະສ້າງເຂື່ອນໄຟຟ້າ 2 ແຫ່ງຢູ່ເມືອງດາກຈຶງ ຄືເຂື່ອນເຊຂະໝານ 2A ແລະ 2B. 2 ເຂື່ອນນີ້ ຈະຕັ້ງຢູ່ ລະຫວ່າງ ເຂື່ອນເຊຂະໝານ 1 ແລະ ເຊຂະໝານ 3 ດັ່ງເຈົ້າໜ້າທີ່ຢູ່ ເມືອງດາກຈຶງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 20 ກັນຍາ ນີ້ວ່າ:

“ເຂົາກະເຊັນແລ້ວ ເຊັນ MOU ຢູ່ເທິງເຂື່ອນ ເຊກະໝານ 1 ຕາມພວກເຮົາສໍາຣວດ ແຕ່ກີ້ນີ້ ນໍ້າຈະຍຶ່ງຂຶ້ນ ຢູ່ປະມານ 7 ແມັດ ສ່ວນຫຼາຍນີ້ ມັນບໍ່ມີດອກບ້ານຄົນນີ້.”

ທ່ານກ່າວຕື່ມວ່າ ໂຄງການສ້າງເຂື່ອນ 2 ແຫ່ງທີ່ວ່ານີ້ ບໍຣິສັດຈີນເຄີຍໄດ້ສຶກສາສໍາຣວດມາແລ້ວ ເມື່ອປີ 2012 ແຕ່ໄດ້ຍົກເລີກໄປ. ເຂື່ອນ 2 ແຫ່ງນີ້ ຕາມການສຶກສາສໍາຣວດທີ່ຜ່ານມາ ຖ້າຖືກສ້າງຂຶ້ນ ຈະເຮັດໃຫ້ຣະດັບນໍ້າໜ້າເຂື່ອນເຊຂະໝານ 2A ແລະ 2B ສູງຂຶ້ນປະມານ 7 ແມັດ ແລະຈະກະທົບໃສ່ຣະບົບນິແວດ ປ່າໄມ້ຢ່າງໜັກໜ່ວງ. ແຕ່ເຖິງຢ່າງໃດກໍຕາມ ບໍຣິສັດພົງຊັບທະວີກໍ່ສ້າງ ຂົວ-ທາງ ກໍຈະສືບຕໍ່ສຶກສາສໍາຣວດໂຄງການນີ້.

ແຕ່ສໍາລັບເຣື່ອງຜົລກະທົບຕໍ່ປະຊາຊົນ ຍັງບໍ່ທັນສາມາດຣະບຸໄດ້ວ່າ ຈະກະທົບໃສ່ໜ້ອຍຫຼາຍເທົ່າໃດ, ຕ້ອງໄດ້ລໍຖ້າຜົນການສຶກສາ ສໍາຣວດນັ້ນກ່ອນ, ແຕ່ເທົ່າທີ່ສັງເກດ ບ່ອນທີ່ຈະສ້າງເຂື່ອນນັ້ນ ມີບ້ານຂອງປະຊາຊົນປະມານ 50 ຄອບຄົວ.

ສ່ວນໂຄງການເຂື່ອນໄຟຟ້າອີກ 2 ແຫ່ງ ຢູ່ແຂວງບໍຣິຄໍາໄຊ ຄືເຂື່ອນນໍ້າເທີນແກ້ງເສືອ ຢູ່ເມືອງຄໍາເກີດ ແລະເຂື່ອນນໍ້າເທີນ 4 ຕອນເທິງ ຢູ່ເມືອງໄຊຈໍາພອນ ກໍຈະມີການສຶກສາສໍາຣວດ ໃນອີກບໍ່ດົນ.

ກ່ຽວກັບເຣື່ອງການສ້າງເຂື່ອນ ຢູ່ແຂວງບໍຣິຄໍາໄຊນີ້ ຊາວບ້ານສ່ວນນຶ່ງ ຍັງບໍ່ທັນໄດ້ຍິນຂ່າວເທື່ອ ແຕ່ພວກເຂົາເຈົ້າບໍ່ຢາກໃຫ້ມີ ການສ້າງເຂື່ອນ ຍ້ອນຢ້ານພັຍທັມມະຊາດເກີດຂຶ້ນ ດັ່ງຊາວບ້ານຜູ້ນຶ່ງ ຢູ່ເມືອງຄໍາເກີດ ເວົ້າຕໍ່ວິທຍຸເອເຊັຽເສຣີໃນມື້ດຽວກັນນີ້ວ່າ:

“ຍັງບໍ່ຮູ້ ເພິ່ນຍັງບໍ່ໄດ້ແຈ້ງມາ ເຂົາກະບໍ່ຕັດຄ້ານໄດ້ນ່າແບບວ່າ ຄັນແມ່ນຜູ້ໃຫຍ່ເວົ້າກະຖືກແລ້ວ ນໍ້າເທີນ 1 ນໍ້າເທີນ 2 ນໍ້າເທີນ 3 ອ້ອມເມືອງຄໍາເກີດລະນໍ໋ ນໍ້າສິບໍ່ເຈື່ອນທັບຫົວຕາຍບໍ່ນໍ໋ ຄົນເມືອງຄໍາເກີດນີ້ນ່າ.”

ເວົ້າເຖິງການສ້າງເຂື່ອນໄຟຟ້າ ຊາວລາວຈໍານວນນຶ່ງ ມີຄວາມຄິດເຫັນ ໄປໃນທິດທາງດຽວກັນນັ້ນ ຄືບໍ່ຢາກໃຫ້ທາງການລາວ ສ້າງ ເຂື່ອນຂຶ້ນມາຕື່ມອີກ ຍ້ອນເຫັນວ່າ ມີເຂື່ອນໄຟຟ້າຈໍານວນຫຼາຍແລ້ວ, ເຖິງສ້າງຂຶ້ນມາຕື່ມ ປະຊາຊົນຢູ່ພາຍໃນປະເທດ ກໍບໍ່ໄດ້ຮັບ ຜົລປະໂຫຍດຫຍັງ ແລະ ຍັງຕ້ອງໄດ້ຈ່າຍຄ່າໄຟຟ້າແພງອີກ ດັ່ງຊາວລາວຜູ້ນຶ່ງ ຢູ່ແຂວງຫຼວງພຣະບາງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 20 ກັນຍານີ້ວ່າ:

“ໂອ໋ຍບໍ່ໄດ້ຫຍັງນ່າ ມີແຕ່ເສັຽເງິນລູກດຽວ ເພິ່ນບໍ່ອໍບໍ່ເອົາມາໃຫ້ເຮົາ ໃຊ້ໂດຍສະເພາະ ເພາະວ່າດຽວນີ້ຣັຖບານ ກໍາລັງຝືດເຄືອງເດ໋.”

ແລະຢູ່ນະຄອນຫຼວງວຽງຈັນ ຊາວລາວຜູ້ນຶ່ງ ກໍເວົ້າໃນທໍານອງດຽວກັນວ່າ ໃນສາຍຕາຂອງປະຊາຊົນ ຫາກຈະສ້າງເຂື່ອນໄຟຟ້າ ເພື່ອຜົລປະໂຫຍດ ໃຫ້ກຸ່ມຄົນໃດກຸ່ມຄົນນຶ່ງ ກໍບໍ່ຄ່ອຍເໝາະສົມ ແລະບໍ່ເຫັນດີໃຫ້ສ້າງຕື່ມອີກ ເພາະຕອນນີ້ ກໍມີເຂື່ອນໄຟຟ້າ ຫຼາຍແລ້ວ ແຕ່ປະຊາຊົນລາວ ຍັງຕ້ອງໄດ້ຈ່າຍຄ່າໄຟຟ້າແພງຢູ່:

“ຄັນສິເຮັດເປັນ 100 ມັນກະຄືເກົ່າຫັ້ນແຫຼະ ຖ້າວ່າເພິ່ນຫັນປ່ຽນລະບົບ ກ່ຽວກັບການຜລິດ ທີ່ແນ່ໃສ່ ແມ່ນຈຸດປະສົງນີ້ ເພື່ອຮັບໃຊ້ ຫຍັງ ຄັນຖ້າຮັບໃຊ້ປະຊາຊົນ ປະຊາຊົນກະຕ້ອງໄດ້ຢູ່ດີກິນດີ ອັນນີ້ມັນບໍ່ແມ່ນແນວນັ້ນອັນນີ້ນີ໋ນ່າ.”

ບໍຣິສັດພົງຊັບທະວີກໍ່ສ້າງຂົວ-ທາງ ທີ່ຈະສຶກສາສໍາຣວດ ໂຄງການເຂື່ອນໄຟຟ້າ 4 ແຫ່ງພ້ອມກັນນັ້ນ ເປັນບໍຣິສັດຖືຮຸ້ນລາຍໃຫຍ່ ອັນດັບ 2 ຄືມີ 403,032,887 ຫຸ້ນ ຫຼືຄິດເປັນ 24% ຂອງຮຸ້ນໃນບໍຣິສັດຜລິດໄຟຟ້າລາວ ທີ່ເປັນບໍຣິສັດໃນເຄືອ ຂອງຣັຖວິສາ ຫະກິຈໄຟຟ້າລາວ, ອີງຕາມຄໍາເວົ້າຂອງເຈົ້າໜ້າທີ່ກະຊວງພະລັງງານ ແລະບໍ່ແຮ່ທ່ານນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 20 ກັນຍານີ້:

“ເພິ່ນ ບໍຣິສັດ ເພິ່ນກະເນັ້ນເຣື່ອງພະລັງງານໄຟຟ້ານີ້ຄືກັນ ແລ້ວເພິ່ນກະເລີຍຖືໂອກາດ ເຂົ້າມາຖືຫຸ້ນອັນຕ່າງໜ້າ ສ່ວນນຶ່ງຂອງ ຣັຖບານຫັ້ນນ່າ.”

ໃນຈໍານວນເຂື່ອນໄຟຟ້າທັງ 4 ແຫ່ງທີ່ວ່ານັ້ນ ມີເຂື່ອນເຊຂະໝານ 2A ຂນາດ 80 ເມກາວັດ, ເຂື່ອນເຊຂະໝານ 2B ຂນາດ 185 ເມກາວັດ, ເຂື່ອນນໍ້າເທີນແກ້ງເສືອ ຂນາດ 60 ເມກາວັດ ແລະເຂື່ອນນໍ້າເທີນ 4 ຕອນເທິງ ຂນາດ 30 ເມກາວັດ.

ແຕ່ທາງການລາວ ແລະບໍຣິສັດຜູ້ລົງທຶນ ບໍ່ໄດ້ເປີດເຜີຍຣາຍລະອຽດ ເຣື່ອງການສ້າງເຂື່ອນໄຟຟ້າທັງ 4 ແຫ່ງວ່າ ຈະມີມູນຄ່າຫຼາຍ ເທົ່າໃດ ແລະຈະຜລິດໄຟຟ້າ ຂາຍໃຫ້ປະເທດໃດ.

ບໍຣິສັດພົງຊັບທະວີ ກໍ່ສ້າງຂົວ-ທາງ, ເຄຫາສະຖານ ແລະ ຊົລປະທານຈໍາກັດ ເປັນບໍຣິສັດຂອງຄົນລາວ ທີ່ໄດ້ເຣີ້ມກໍ່ຕັ້ງມາ ແຕ່ປີ 2001, ປັດຈຸບັນ ໄດ້ລົງທຶນໃນຫຼາຍທຸຣະກິຈ ທັງທຸຣະກິຈ ພະລັງງານ, ກໍ່ສ້າງ, ການຄ້າ, ກະສິກໍາ ແລະ ອະສັງຫາຣິມະຊັບ. ແຕ່ ທຸຣະກິຈທີ່ໂດດເດັ່ນ ແລະສ້າງລາຍໄດ້ ໃຫ້ແກ່ບໍຣິສັດດີ ຄືທຸຣະກິຈພະລັງງານ ຊຶ່ງຕອນນີ້ທາງບໍຣິສັດ ໄດ້ສ້າງເຂື່ອນໄຟຟ້າສໍາເຣັດ ແລ້ວ 7 ເຂື່ອນ, ມີກໍາລັງການຜລິດທັງໝົດ 212 ເມກາວັດ. ບໍຣິສັດນີ້ ມີເປົ້າໝາຍ ທີ່ຈະສ້າງເຂື່ອນໄຟຟ້າ 33 ແຫ່ງ, ພະລັງງານ ລົມ 2 ແຫ່ງ, ພະລັງງານແສງຕາເວັນ 2 ແຫ່ງ, ໂຮງງານຖ່ານຫິນ 1 ແຫ່ງ ແລະ ໂຮງງານສິລິຄອນ 1 ແຫ່ງ ຊຶ່ງຈະມີກໍາລັງການ ຜລິດທັງໝົດ 1,000 ເມກາວັດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ