ປ່ຽນຜູ້ອໍານວຍການ ລັດວິສາຫະກິດໄຟຟ້າລາວ ຫວັງແກ້ວິກິດໜີ້ສິນ

ກະຊວງພະລັງງານ ແລະບໍ່ແຮ່ ປະກາດແຕ່ງຕັ້ງ ທ່ານ ອາຄົມເດດ ວົງໄຊ ຫົວໜ້າກົມແຜນການ ແລະການຮ່ວມມື ກະຊວງພະລັງງານ ແລະບໍ່ແຮ່ ເປັນຜູ້ອໍານວຍການໃຫຍ່ລັດວິສາຫະກິດໄຟຟ້າລາວຄົນໃໝ່ ແທນທ່ານ ວົງສະກຸນ ຍິ່ງຍົງ ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ ທີ່ໄດ້ອອກບໍານານ ແລະໄດ້ມີການສັບປ່ຽນພະນັກງານການນໍາອີກຫຼາຍຕໍາແໜ່ງ ຢູ່ພາຍໃນລັດວິສາຫະກິດນັ້ນ ໂດຍໄດ້ທາບທາມເອົາຄົນຢູ່ໃນກະຊວງ ຊຶ່ງເຈົ້າໜ້າທີ່ລັດວິສາຫະກິດໄຟຟ້າລາວ ທ່ານນຶ່ງກ່າວຕໍ່ວິທຍຸເອເຊັຽເສຣີ ໃນມື້ວັນທີ 24 ຕຸລານີ້ວ່າ ມັນເປັນເກມການເມືອງ.

“ເພິ່ນກະທາບທາມເອົາຄົນຢູ່ໃນກະຊວງ ມັນກະເປັນເກມການເມືອງນໍາ ມັນກະມີຜົນປະໂຫຍດຫລາຍຢູ່ໃນລັດຖະບານ ແລ້ວລັດຖະບານກະມີຫລາຍພາກສ່ວນ ທີ່ມີຜົນປະໂຫຍດນໍາ ລັດ ຖະບານເປັນຄົນຈັບຄົນນີ້ມາ ເປັນຄາດໝາຍນຶ່ງທີ່ໆເພິ່ນວາງໄວ້.”

ຕາມການຕົກລົງຂອງຄະນະເລຂາທິການ ສູນກາງພັກປະຊາຊົນປະຕິວັດລາວ ກ່ຽວກັບການຈັດຕັ້ງການພັກຜ່ອນຮັບອຸດໜູນບໍານານ ແຕ່ງຕັ້ງ-ສັບຊ້ອນພະນັກ ງານນໍາພາ-ຄຸ້ມຄອງກະຊວງພະລັງງານ ແລະບໍ່ແຮ່ ຊຶ່ງກະຊວງພະງານ ແລະບໍ່ແຮ່ ໄດ້ປະກາດ ໃນມື້ວັນທີ 22 ຕຸລາ 2024 ນັ້ນ ທ່ານ ທອງພັດ ອິນທະວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ ໄດ້ຖືກໃຫ້ອອກຈາກຕໍາແໜ່ງ ແລະຮັບອຸດໜູນບໍານານ.

ປະກາດແຕ່ງຕັ້ງທ່ານ ດາວວຽງ ສຸນັນທະລາດ ຮອງຜູ້ອໍານວຍການ ບໍລິສັດຜະລິດໄຟຟ້າລາວມະຫາຊົນ ເປັນຜູ້ຮັກສາການ ຜູ້ອໍານວຍການບໍລິສັດດັ່ງກ່າວ ແລະປະກາດແຕ່ງຕັ້ງນາງ ໂຄຕະມີ ຈັນທະມາລິນ ຮອງຫົວໜ້າກົມແຜນການ ແລະການຮ່ວມື ກະຊວງພະລັງງານ ແລະບໍ່ແຮ່ ເປັນຜູ້ຮັກສາການຫົວໜ້າກົມນີ້.ການປັບປ່ຽນໜ້າທີ່ທັງໝົດ ມີຜົນບັງຄັບໃຊ້ ຕັ້ງແຕ່ວັນທີ 22 ຕຸລານີ້ເປັນຕົ້ນໄປ.

ນັບຕັ້ງແຕ່ປີ 2020 ມານີ້ ລັດຖະບານລາວ ໄດ້ແຕ່ງຕັ້ງຜູ້ອໍານວຍການ ລັດວິສາຫະກິດໄຟຟ້າລາວ ແລະສັບປ່ຽນຕໍາແໜ່ງ ຢູ່ໃນການຈັດຕັ້ງລັດວິສາຫະກິດນີ້ຫຼາຍຄົນແລ້ວ ຄືໄດ້ແຕ່ງຕັ້ງທ່ານ ຈັນທະບູນ ສຸກອາລຸນ ຫົວໜ້າກົມແຜນການ ແລະການມ່ວມມື ກະຊວງພະລັງງານ ແລະບໍ່ແຮ່ ເປັນຜູ້ອໍານວຍການລັດວິສາຫະກິດໄຟຟ້າລາວ ແທນທ່ານ ບຸນອູ້ມ ສີວັນເພັງ ໃນມື້ວັນທີ 16 ມິຖຸນາ 2020; ໄດ້ແຕ່ງຕັ້ງທ່ານ ວົງສະກຸນ ຍິ່ງຍົງ ເປັນຜູ້ອໍານວຍການແທນທ່ານ ຈັນທະບູນ ສຸກອາລຸນ ໃນມື້ວັນທີ 16 ກຸມພາ 2024 ແລະໄດ້ປະກາດການແຕ່ງຕັ້ງທ່ານ ອາຄົມເດດ ວົງໄຊ ຫົວໜ້າກົມແຜນການ ແລະການຮ່ວມມື ກະຊວງພະລັງງານ ແລະບໍ່ແຮ່ ເປັນຜູ້ອໍານວຍການໃຫຍ່ລັດວິສາຫະກິດໄຟຟ້າລາວຄົນໃໝ່ ແທນທ່ານ ວົງສະກຸນ ຍິ່ງຍົງ ໃນມຶື້ວັນທີ 22 ຕຸລາ 2024 ນີ້.

ກ່ຽວກັບເລື່ອງການປັບປ່ຽນບຸກຄົນ ເຂົ້າຮັບຕໍາແໜ່ງດັ່ງກ່າວ ເຈົ້າໜ້າທີ່ທ້ອງຖິ່ນ ຢູ່ແຂວງສະຫວັນນະເຂດທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ເຖິງມີການແຕ່ງຕັ້ງ ແລະສັບປ່ຽນຕໍາແໜ່ງ ຢູ່ໃນລັດວິສາຫະກິດໄຟຟ້າລາວຄັ້ງນີ້ ກໍຈະບໍ່ມີການປ່ຽນແປງນະໂຍບາຍໃດ ເນື່ອງຈາກພະນັກງານ ທີ່ຖືກໃຫ້ຂື້ນມາຮັບຕໍາແໜ່ງໃໝ່ນັ້ນ ລ້ວນແລ້ວແຕ່ເປັນພະນັກງານ ທີ່ເຮັດວຽກຢູ່ໃນກະຊວງພະລັງງານ ແລະບໍ່ແຮ່ນັ້ນຢູ່ແລ້ວ ດັ່ງທີ່ທ່ານກ່າວວ່າ:

“ແມ່ນ ຍາກຄືເກົ່າຫັ້ນແລ້ວ ເວົ້າເລື້ອງນະໂຍບາຍນີ້ ໄຜຂຶ້ນມາກະຄືເກົ່າ ເພາະວ່າມັນມີໜີ້ມາແຫລະ ມັນບໍ່ມີຜູ້ຊໍາລະເດ້ ມັນເວົ້າເລື້ອງຄວາມໂປ່ງໃສນໍາກັນນ່າ ບາດເວົ້າເລື້ອງຜົນກະທົບມັນໄດ້ຮັບມາ ພັດຄືເວົ້ານີ້ແລ້ວ.”

ແລະປະຊາຊົນລາວ ຢູ່ນະຄອນຫຼວງວຽງຈັນຜູ້ນຶ່ງກໍເວົ້າ ໃນມື້ວັນທີ 24 ຕຸລານີ້ວ່າ ຫາກມີການປ່ຽນແປງຜູ້ບໍລິຫານ ແລະຕໍາແໜ່ງຢູ່ພາຍໃນໜ່ວຍງານໃດນຶ່ງ ກໍຕ້ອງປ່ຽນເພື່ອຊຸກຍູ້ໃຫ້ອົງການນັ້ນ ແລະພະນັກງານຢູ່ໃນອົງການນັ້ນ ໄດ້ຮັບການພັດທະນາດີຂື້ນ ບໍ່ແມ່ນວ່າ ຈະປ່ຽນຄົນມາດໍາລົງຕໍາແໜ່ງ ເພື່ອສວຍໂອ ກາດ ຫາຜົນປະໂຫຍດໃຫ້ໂຕເອງ ແລະພວກພ້ອມ ສໍ້ລາດບັງຫຼວງ. ແລະວ່າ ຖ້າປ່ຽນຄົນ ບໍ່ປ່ຽນແນວຄິດ ມັນກໍໃຊ້ການບໍ່ໄດ້ ດັ່ງທີ່ທ່ານກ່າວວ່າ:

“ຄັນຖ້າປ່ຽນໃໝ່ ກະຕ້ອງປ່ຽນດ້ວຍຄວາມບໍລິສຸດໃຈ ເນາະປ່ຽນຄົນແລ້ວ ແນວຄິດຍັງບໍ່ທັນປ່ຽນນີ້ ມັນກະໃຊ້ການບໍ່ໄດ້ຫັ້ນແຫລະ ບໍ່ແມ່ນເພື່ອການສໍ້ລາດບັງຫລວງ ເພື່ອການສວຍໂອ ກາດອັນນີ້ມັນກະບໍ່ຖືກແລ້ວອັນນີ້.”

ຕໍ່ການປ່ຽນແປງທີ່ວ່ານີ້ ເຈົ້າໜ້າທີ່ທະນາຄານພັດທະນາອາຊີ ຫລື ADB ປະຈໍາລາວ ກໍກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຖືເປັນເລື້ອງປົກກະຕິ, ແຕ່ການບໍລິຫານງານໃນອົງການ ໂດຍສະເພາະອົງການ ທີ່ມີຂະ  ໜາດໃຫຍ່ ຄື ລັດວິສາຫະກິດໄຟຟ້າລາວ ຊຶ່ງເປັນອົງການ ທີ່ກໍາໜົດນະໂຍ ບາຍ ແລະແຜນພະລັງງານແຫ່ງຊາດ ຮວມໄປເຖິງການລົງທຶນ ໃນດ້ານພະລັງ ງານນັ້ນ ບໍ່ຄວນຈະຖືກຄວບຄຸມໂດຍລັດຖະບານ ຈົນເກີນໄປ, ມັນມີບັນຫາເລື່ອງສະ ພາບໂຄງສ້າງ ດັ່ງທີ່ທ່ານກ່າວວ່າ:

“ມັນກະໄດ້ປັບ ແຕ່ວ່າມັນກະຍາກຢູ່ ຄືໄຟຟ້າ ສິບໍລິຫານແນວໃດ ມັນກະມີຂໍ້ຈໍາກັດ ບໍ່ແມ່ນຄົນບໍ່ມີຄວາມຮູ້ ຄວາມສາມາດບໍລິ ຫານດອກ ກະພໍໄດ້ຢູ່ ແຕ່ວ່າ ມັນເປັນບັນຫາເລື້ອງສະພາບໂຄງສ້າງ.”

ສະເພາະປີ 2023 ທີ່ຜ່ານມາ ບໍລິສັດຜະລິດໄຟຟ້າລາວມະຫາຊົນ (EDL-Gen) ຊຶ່ງເປັນບໍລິສັດ ທີ່ຖືກສ້າງຕັ້ງຂື້ນ ໂດຍລັດວິສາຫະກິດໄຟຟ້າລາວ (EDL) ສ້າງລາຍຮັບໄດ້ປະມານ 3,100 ຕື້ປາຍກີບ ແລະມີລາຍຈ່າຍປະມານ 4,200 ຕື້ປາຍກີບ ໝາຍຄວາມວ່າ ບໍລິສັດນີ້ ຂາດທຶນປະມານ 1,100 ຕື້ປາຍກີບ.

ພ້ອມດຽວກັນນັ້ນ ລັດວິສາຫະກິດໄຟຟ້າລາວ ກໍມີໜີ້ສິນກັບຕ່າງປະເທດ ກວມເອົາ 30% ຂອງໜີ້ສາທາລະນະ ຄືປະມານ 4,300 ລ້ານໂດລາສະຫະລັດ. ໜີ້ສິນຂອງລັດວິສາຫະກິດໄຟຟ້າລາວ ເກີດຂື້ນຈາກ ການກູ້ຢືມເງິນຈາກຕ່າງ ປະເທດ ເພື່ອນໍາມາລົງທຶນສ້າງເຂື່ອນໄຟຟ້າ ຫລືແຫຼ່ງພະລັງງານອື່ນໆ, ຈາກ ການກູ້ຢືມເງິນຢູ່ພາຍໃນປະເທດ ເພື່ອຮ່ວມລົງທຶນ ໃນໂຄງການພະລັງງານ ແລະຈາກການສໍ້ລາດບັງຫຼວງ ຂອງເຈົ້າໜ້າທີ່ ລັດວິສາຫະກິດໄຟຟ້າລາວ.

ແຕ່ປີ 2020 ເປັນຕົ້ນມາ ລັດຖະບານລາວໄດ້ປະຕິຮູບລັດວິສາຫະກິດໄຟຟ້າລາວ ເພື່ອແກ້ໄຂບັນຫາຢູ່ໂຄງສ້າງພາຍໃນ, ແກ້ໄຂບັນຫາໜີ້ສິນ, ປ້ອງກັນການຮ້ອງຟ້ອງ, ຈົນກ້າວໄປຮອດການລົ້ມລະລາຍ ເນື່ອງຈາກເປັນລັດວິສາຫະກິດນີ້ ໄດ້ສ້າງພາລະໜີ້ສິນ ໃຫ້ລັດຖະບານຢ່າງມະຫາສານ.