ເປີດຣົດໄຟ ລາວ-ຈີນ ທ່າມກາງວິກິຈ ຫຼາຍດ້ານ

ໄຊຍາ
2021-11-29
Share
ເປີດຣົດໄຟ ລາວ-ຈີນ ທ່າມກາງວິກິຈ ຫຼາຍດ້ານ ສະຖານີຣົດໄຟລາວ-ຈີນ ທີ່ນະຄອນຫຼວງວຽງຈັນ, ວັນທີ 29 ພຶສຈິກາ 2021.
ນັກຂ່າວ ພົລເມືອງ

ປັຈຈຸບັນຣັຖບານລາວ ກຳລັງປະເຊີນກັບ ໂຄວິດ-19 ທີ່ຣະບາດໜັກ ສົ່ງຜົລໃຫ້ເສຖກິຈ ຖົດຖອຍ ແລະ ປະຊາຊົນ ກໍຫາກິນລຳບາກ ແຕ່ຣັຖບານລາວກໍໃຫ້ບູຣິມະສິດ ໂຄງການກໍ່ສ້າງທາງຣົດໄຟ ລາວ-ຈີນ ຈົນສຳເຣັດກາຍ 90% ພ້ອມເປີດຢ່າງເປັນທາງການ ທີ່ນະຄອນຫຼວງວຽງຈັນ ໃນວັນທີ 2 ທັນວາ 2021 ແລະ ເປີດໃຫ້ການບໍຣິການ ຖ້ຽວທຳອິດໃນວັນທີ 3 ທັນວາ 2021.

ໂຄງການທາງຣົດໄຟ ລາວ-ຈີນ ທີ່ເປັນສ່ວນນຶ່ງ ຂອງເຄືອຂ່າຍຣົດໄຟ ໂດຍສານ ແລະຣົດໄຟບັນທຸກສິນຄ້າ ຂົນສົ່ງທີ່ມີໄລຍະທາງ 3,000 ກິໂລແມັດທີ່ເຣີ້ມຕົ້ນຈາກ ນະຄອນຄຸນມິງ ມົນທົນຢູນານຂອງຈີນຜ່ານປະເທດລາວ ແລະຈະເຊື່ອມໄປຍັງໄທຍ, ມາເລເຊັຽ ເຂົ້າຊູ່ສິງກະໂປ. ທ່ານ​ໂພໄຊ ໄຂ​ຄຳ​ພິ​ທູນ ຮອງ​ຣັ​ຖ​ມົນ​ຕ​ຣີ​ ກະ​ຊວງ​ການ​ຕ່າງ​ປະ​ເທດ ຄ​ະນະ​ຊີ້​ນຳ​ໂຄງ​ການ ​ກໍ່​ສ້າງ​ທາງ​ຣົດ​ໄຟ​ ລາວ-ຈີນ ໄດ້​ກ່າວ​ຕໍ່​ສື່ມວນ​ຊົນ​ພາຍ​ໃນ​ເມື່ອ​ວັນ​ທີ 18 ພຶສ​ຈິ​ກາ ບາງ​ຕອນ​ສຳ​ຄັນ​ວ່າ:

ຜ່ານການໄປສຳຣວດ ເບິ່ງໂຕຈິງຢູ່ເຂ ທີ່ຈະສ້າງດ່ານສາກົ ທາງຣົດໄຟລາ-ຈີນ ສະຖານີ ບໍເຕັນ ຮວມເຖິງໄດ້ຟັງຣາຍງານ ຈາກພາກສ່ວນຕ່າງໆ ໃນກອງປະຊຸມ ກໍສາມາດຕີຣາຄາ ໄດ້ວ່າ ການກະກຽມພື້ນຖານໂຄງຮ່າງ ກໍຄືການກະກຽມ ວຽກງານຕ່າງໆ ເພື່ອຮອງຮັບໃຫ້ແກ່ ການເປີດນຳໃຊ້ທາງຣົດໄຟ ລາ-ຈີນ ມີຄວາມພ້ອມ 100%. ເບື້ອຕົ້ນຈະໃຫ້ການ ບໍຣິການ ສະເພາະຜູ້ໂດຍສານພາຍໃນປະເທດ ຈາກນະຄອນຫຼວງວຽງຈັນ ຫາ ແຂວງຫຼວງນ້ຳທາ ມື້ລະສອງຖ້ຽວ, ສ່ວນການຂົນສົ່ງສິນຄ້າ ລະຫວ່າງ ລາວ-ຈີນ ຈະເຣີ່ມຕັ້ງແຕ່ມືຶ້ເປີດບໍຣິການ ໄປເລີຍ ມື້ລະ 2 ຖ້ຽວ, ຖ້ຽວລະ 2,000-3,000 ຕັນ.” ໃນ​ຂ​ນະ​ທີ່​ ທ່ານ ຈຸ້ຍ​ໂກ​ຈຽງ​ ປະ​ທານ​ບໍ​ຣິ​ສັດ​ທາງ​ຣົດ​ໄຟ ​ລາວ-​ຈີນ ​ໄດ້​ກ່າວ​ເມື່ອ​ວັນ​ທີ 21 ພຶ​ສ​ຈິ​ກາ ​ທີ່​ຜ່ານ​ມາ​ວ່າ ການ​ທົດ​ລອງ​ແລ່ນ​ເປັນ​ເວ​ລາ 17 ວັນ​ເພື່ອກວດ​ກາ ​ເຕັກ​ນິກ ເຄື່ອນ​ທີ່​ຮອບ​ດ້ານ​ ແລະ​ໄດ້​ສຳ​ເຣັດ​ການກວດ​ກາ ​ວຽກ​ງານ​ທັງ​ໝົດ​ເມື່ອ​ວັນ​ທີ 20 ພຶ​ສ​ຈິ​ກາ​ ຜ່ານ​ມາ​ ທຸກ​ໜ້າ​ວຽກ​ໄດ້​ສຳ​ເຣັດ​ໂດຍ​ພື້ນ​ຖານ ​ຍັງ​ເຫຼືອ​ແຕ່​ວຽກ​ຕົບ​ແຕ່ງ​ ແລະ​ສິ່ງ​ອຳ​ນວຍ​ຄວາມສະ​ດວກ ​ຂອງ​ຜູ້​ໂດຍ​ສານ​ ຮວມ​ທັງ​ວາງ​ມາ​ຕ​ການ​ປ້ອງ​ກັນ​ ຄວບ​ຄຸມ​ການ​ຣະ​ບາດ​ ຂອງ​ພະ​ຍາດ ໂຄວິດ-19.

ທ່ານ​ໄດ້​ກ່າວ​ຕື່ມ​ວ່າ ພວກ​ເຮົາ​ໄດ້​ຮ່ວມ​ມື​ຢ່າງ​ໃກ້​ຊິດ​ ກັບ​ຣັ​ຖ​ບານ​ລາວ​ ກໍ​ຄື​ມະ​ຫາ​ວິ​ທ​ຍາ​ລັຍ ແຫ່ງ​ຊາດ​ເພື່ອ​ຝຶກ​ອົບ​ຮົມ ​ບຸກ​ຄະ​ລາ​ກອນ​ ມາ​ຮັບ​ໃຊ້​ຜູ້​ໂດຍ​ສານ​ຣົດ​ໄຟ​ ລະ​ຫວ່າງ​ປະ​ເທດ​ ໂດຍຄາດ​ວ່າ​ຈະ​ຮັບ​ເອົາ​ພະ​ນັກ​ງານ​ທີ່​ເປັນ​ຄົນ​ລາວ​ ບໍ​ຣິ​ການ​ເທິງ​ຣົດ​ໄຟ 2,500 ຄົນ.

ຕໍ່​ກັບ​ຂ່າວ​ການ​ເປີ​ດ​ ບໍ​ຣິ​ການ ​ຣົດ​ໄຟ ​ລາ​ວ-ຈີນ ຢ່າງ​ເປັນ​ທາງ​ການ ​ປະ​ຊາ​ຊົນ​ລາວ​ໄດ້​ໃຫ້​ຄຳ​ເຫັນ​ວ່າ ​ທາງ​ຣົດ​ໄຟ​ນີ້​ຈະ​ມາ​ສ້າງ​ຄວາມ​ຈ​ະ​ເຣີນ​ຮຸ່ງ​ເຮືອງ ​ໃຫ້​ກັບ​ປະ​ເທດ​ຊາດ. ດັ່ງ​ປະ​ຊາ​ຊົນ ຊາວ​ນະ​ຄອນ​ຫຼວງວຽງ​ກ່າວ​ຕໍ່ ວິທຍຸເອເຊັຽເສຣີ ໃນ​ວັນ​ທີ 22 ພຶ​ສ​ຈິ​ກາ​ ວ່າ ມັນ​ສ້າງ​ຄວາມ​ສະ​ດວກ​ ໃຫ້​ຫຼາຍ​ຢ່າງ​ທັງ​ການ​ທ່ອງ​ທ່ຽວ​ ແລະ​ການ​ຂົນ​ສົ່ງ.

ເພາະວ່າມັນກໍມີຄວາສະດວກ ຫຼາຍຢ່າງບໍ່ວ່າຈະເປັນ ການທ່ອງທ່ຽວ ການຄົມມະນາຄົມ ມັນເຮັດໃຫ້ການພົວພັນ ໄປມາໄດ້ສະດວກຂື້ນ ການສົ່ງສິນຄ້າກໍໄວຂື້ນ ການນຳທ່ຽວກໍໄວຂື້ນ ແລະເຮັດໃຫ້ປະຊາຊົນມີລາຍຮັບເພີ່ມຂື້ນຫຼາຍ.”

ສ່ວນ​ປະ​ຊາ​ຊົນ​ ຊາວ​ແຂວງວຽງ​ຈັນ ​ກໍ​ໄດ້​ໃຫ້​ຄວາມ​ເຫັນ​ວ່າ​ ຖ້າ​ຣົດ​ໄຟ​ ລາວ-​ຈີນ ​ມາ​ນີ້​ມັນ​ກໍ​ສ້າງ​ຜົ​ລ​ດີ​ຫຼາຍ​ຢ່າງ ​ເຊັ່ນ​ການ​ຂົນ​ສົ່ງ​ສິນ​ຄ້າ​ ກໍ​ປະ​ຢັດ​ເງີນ​ຫຼາຍ​ຂື້ນ.

ກາທາງຣົດໄຟມານີ້ ກໍເຮັດໃຫ້ຄວາມໝັ້ນໃຈ ຂອງປະຊາຊົນລາວເພີ່ມຫຼາຍຂື້ນ ໃນການຂົນສົ່ງສີນຄ້າແລະ ການໄປມາທ່ອງທ່ຽວ ມີຄວາມສະດວກສະບາຍເກີດຂື້ນ ກໍປະຢັດເວລາ ປະຢັດຄ່າໃຊ້ຈ່າຍໄດ້ຫຼາຍຂື້ນ.”

ໃນ​ຂະ​ນະ​ທີ່​ ປະ​ຊາ​ຊົນ​ ທ່ານ​ນຶ່ງ​ກັບ​ເຫັນ​ວ່າ ​ການ​ສ້າງ​ທາງ​ຣົດ​ໄຟ​ ລາວ-ຈີນ ໂດຍ​ທີ່​ຣັ​ຖ​ບານ​ລາວ ໄດ້​ໃຊ້​ຂໍ້​ອ້າງວ່າ​ ເປັນ​ການ​ສ້າງ​ຄວາມ​ຈະ​ເຣີນ​ ໃຫ້​ກັບ​ປະ​ເທດ​ ແຕ່​ໃນ​ຄວາມ​ຈິງ​ແລ້ວ​ຣັ​ຖ​ບານ​ ໄດ້​ເພີ່ມ​ໜີ້​ສາ​ທາ​ຣະ​ນະ ​ຂື້ນ​ໃຫ້​ກັບ​ປະ​ເທດ.

ຄຳວ່າໜີ້ສີນ ສາທາຣະນະໃຜເປັນຜູ້ສ້າງຂື້ນ ບໍ່ໄດ້ແມ່ນປະຊາຊົນໃດເປັນຜູ້ສ້າງຂື້ນ​tນະພັກ​tນະຣັເປັນຄົນໄປກູ້ໄປຢືມຕ່າງປະເທດເຂົາມາເປັນຜູ້ສ້າງໜີ້ສ້າງສິນໃຫ້ປະຊາຊົນ ແລ້ວມັນເກີດໜີ້ຄົງຄ້າງຂອງຕ່າງປະເທດເຂົາ ທະນາຄານໂລກເຂົາ ແລະມັນຊິຍົກຂື້ນມາເປັນຂໍ້ອ້າງ ປະເທດຊາດບໍພັນາ ຍ້ອນໜີ້ໂຕນີ້ເຮົາກາໄດ້ແຕ່ຟັງ ເຮົາເປັນປະຊາຊົນ.”

ໃນ​ຂ​ນ​ະ​ດຽວ​ກັນ ການຈ່າຍເງິນຄ່າຊົດເຊີຍ ໃຫ້ກັບຜູ້ທີ່ໄດ້ຮັບກະທົບ​ ປະຊາຊົນເຫັນວ່າບໍ່ຄຸ້ມຄ່າ. ປະຊາຊົນ ຕ້ອງໄດ້ຍ້າຍອອກເພື່ອໃຫ້ຣັຖພັທນາ ໂດຍຜູ້ທີ່ໄດ້ຮັບຜົລກະທົບ ມີຄວາມສ່ຽງຕໍ່ການສູນເສັຍທີ່ດິນ ຫຼືອາດຈະບໍ່ໄດ້ເງິນຄ່າຊົດເຊີຍ ກໍເປັນໄດ້.  ດັ່ງ​ຊາວ​ບ້ານ​​ທີ່​ແຂວງ​ຫຼວງ​ນ້ຳ​ທາທ່ານ​ນຶ່ງ ທີ່ບໍ່​ປະ​ສົງ​ອອກ​ຊື່ໄດ້​ກ່າວ​ວ່າ:

ຮ້ານຂ້ອຍຖືໂຄງການຣົໄຟຂໍຣັບານ ເພິ່ນບໍ່ຈ່າຍເງິນໃຫ້ ຊິໃຫ້ ຂ້ອຍມ້າງເຮືອຖິ້ມລ້າໆ.”

ໂຄງການ ກໍ່ສ້າງທາງຣົດໄຟ ລາວ-ຈີນ ໄດ້ສ້າງຜົລກະທົບໃຫ້ປະຊາຊົນ 167 ບ້ານ ທີ່ຂື້ນກັບ 13 ເມືອງ, 4 ແຂວງ ແລະ ນະຄອນຫຼວງວຽງຈັນ. ໃນນີ້ນະຄອນຫຼວງວຽງຈັນ ມີ 34 ບ້ານຢູ່ໃນເມືອງນາຊາຍທອງ,ເມືອງໄຊທານີ, ແຂວງວຽງຈັນມີ 60 ບ້ານຂື້ນກັບ 4 ເມືອງ, ເມືອງໂພນໂຮງ,ເມືອງຫິນເຫີບ, ເມືອງວັງວຽງ ແລະ ເມືອງກາສີ  . ແຂວງຫຼວງພຣະບາງມີ 28 ບ້ານ ຂື້ນກັບ 3 ເມືອງ ເມືອງຊຽງເງິນ, ນະຄອນຫຼວງພຣະບາງ , ເມືອງຈອມເພັດ. ແຂວງອຸດົມໄຊມີ 11 ບ້ານຂື້ນກັບ 3 ເມືອງ ເມືອງງາ, ເມືອງນາໝໍ້, ເມືອງໄຊ ແລະ ແຂວງຫຼວງນໍ້າທາ ມີ 4 ບ້ານຂື້ນກັບ ເມືອງຫຼວງນໍ້າທາ.

ທ່ານ ຈັນ​ຕຸ​ລາ ພາ​ລະ​ນາ​ສີ ຫົວ​ໜ້າ​ກົມ​ຄຸ້ມ​ຄອງ​ ການກໍ່​ສ້າງ​ທາງ​ຣົດ​ໄຟ ​ລາ​ວ-ຈີນ ໄດ້​ແຈ້ງວ່າ ຜ່ານ​ມາ ການ​ຈ່າຍຄ່າ​ຊົດ​ເຊີຍ​ ໄດ້​ຈ່າຍ​ໄປ​ທັງ​ໝົດ 1,488.59 ຕື້​ກີບ. ໃຫ້​ກັບ​ບັນ​ດາ​ແຂວງ ແລະ ນະ​ຄອນ​ຫຼວງວຽງ​ຈັນ. ໃນ​ນີ້​ໄດ້​ໃຊ້​ບ້ວງ​ເງິນ​ງົບ​ປະ​ມານ​ຂອງ​ຣັ​ຖ 808.72 ຕື້​ກີບ ແລະ ບ້ວງ​ເງິນ ຈາກ​ບໍ​ຣິ​ສັດ​ ທາງ​ຣົດ​ໄຟ​ ລາວ-ຈີນ 679.87 ຕື້​ກີບ. ສຳ​ລັບ​ການ​ເວນ​ຄືນ​ທີ່​ດິນ ​ແລະ​ຊົດ​ເຊີຍສິ່ງ​ກີ​ດ​ຂວາງ​ຂອງ​ໂຄງ​ການ​ ປີ 2021 ກະ​ຊວງ​ໂຍ​ທາ​ທິ​ການ​ ແລະ​ຂົນ​ສົ່ງ​ ໄດ້​ສ​ເນີ​ໃຫ້ກະ​ຊວງ​ແຜນ​ການ ​ແລະ​ການ​ລົງ​ທືນ ແລະ ກະ​ຊວງ​ການ​ເງິນ​ເພື່ອ ​ຂໍ​ອະ​ນຸ​ມັດ​ແຜນ​ງົບ​ປະ​ມານ ມາ​ຮັບ​ໃຊ້​ວຽກ​ງານ ​ເວນ​ຄືນ​ທີ່​ດິນ ແລະ ຊົດ​ເຊີຍ​ ສິ່ງ​ກີດ​ຂວາງ 465.07 ຕື້​ກີບ. ແນວໃດກໍ່ຕາມ ເຈົ້າໜ້າທີ່ ທີ່ກ່ຽວຂ້ອງກັບເສຖກິຈ ລະຫວ່າງປະເທດ ທີ່ຂໍສງວນຊືຶ່ແລະສຽງໃຫ້ຄວາມເຫັນຕໍ່ໂຄງການນີ້ວ່າ ໂຄງການກໍ່ສ້າງ ທາງຣົດໄຟ ລາວ-ຈີນ ນີ້ຖືວ່າລາວໄດ້ຮັບຜົລປໂຍດນ້ອຍຫຼາຍ. ເພາະເສັ້ນທາງສາຍນີ້ມຸ້ງ ໄປທີ່ປະເທດໄທຍ, ມາເລເຊັຽ ແລະ ສິງກະໂປ ຊຶ່ງມີຂນາດເສຖກິຈ ທີ່ໃຫຍ່ ແລະມີກຳລັງຊື້ຫຼາຍກວ່າລາວ. ທັງການລົງທຶນເທື່ອນີ້ ບໍ່ແມ່ນການຊ່ອຍເຫຼືອລ້າ. ລາວມີສ່ວນຮ່ວມ ໃນການລົງທຶນ ໂດຍຈີນຮັບພາລະເປັນໜີ້ ທີ່ກູ້ຢືມຈາກທະນາຄານ ສົ່ງອອກ ນຳເຂົ້າຂອງຈີນ ປະມານ 2,480 ລ້ານໂດລາສະຫະຣັຖ ແລະ ລາວເປັນໜີ້ປະມານ 1,060 ລ້ານໂດລາຣ໌ສະຫະຣັຖ. ສ່ວນເງິນລົງທຶນອີກ 2,300 ລ້ານໂດລາ ຈີນຮັບໄປ 70% ແລະ ລາວຮັບ 30% ຊຶ່ງກໍເປັນເງິນກູ້ຢືມ ຈາກຈີນໂດຍເອົາບໍ່ແຮ່ 5 ບໍ່ຄໍ້າປະກັນ.

ສ່ວນຈຸດຄຸ້ມທືນ ກໍຍັງບໍ່ມີຫຍັງແນ່ນອນເທື່ອ ເພາະວ່າໄລຍະການຣະບາດ ຂອງໂຄວິດ-19 ນີ້ ເສຖກິຈລາວໄດ້ຮັບຜົລກະທົບໜັກຫຼາຍ. ຜູ້ປະກອບການທີ່ຕິດພັນ ກັບຣົດໄຟຫຼັກໆ ກໍ່ຄື ກິຈການການທ່ອງທ່ຽວ ຖືວ່າຍັງບໍ່ມີຊ່ອງທາງ ຈະຟື້ນໄດ້ແນວໃດ. ອີກດ້ານນຶ່ງທາງການ ກໍປະກາດໃຫ້ການບໍຣິການ ໂດຍສານມື້ນຶ່ງສອງຖ້ຽວ ຖ້າສະພາບຍັງແກ່ຍາວແບບນີ້ ບໍ່ຮູ້ວ່າຜົລປະກອບການ ຈະເປັນແນວໃດ. ຊຶ່ງຈະອາສັຍແຕ່ຂົນສົ່ງສິນຄ້າກະສິກັມ ທີ່ຈີນມາລົງທືນຢູ່ລາວແລ່ນຂ້າມຊາຍແດນ ໄດ້ເປັນກໍຣະນີພິເສດ.

 ອີກດ້ານນຶ່ງໂຄງການຣົດໄຟສາຍນີ້ຈະເຊື່ອມຕໍ່ໃສ່ໄທຍ  ດ່ານທຳອິດແມ່ນ ນະຄອນຫຼວງວຽງຈັນ-ໜອງຄາຍ ໂດຍສະເພາະການເຈຣະຈາທັງສາມຝ່າຍທີ່ຈະສ້າງຂົວ ທາງຣົດໃໝ່ເພື່ອໃຫ້ເຂົ້າກັບຂນາດຂອງຣົດໄຟລາວ-ຈີນກໍຍັງບໍ່ບັນລຸຂໍ້ຕົກລົງໄດ້. ຫຼ້າສຸດ ໂຄງການຣົດໄຟໄທຍ-ຈີນ ຈາກບາງກອກ-ໜອງຄາຍມີກຳນົດຈະສ້າງໄລ່ເລັ່ຍກັບລົດໄຟລາວ-ຈີນ ຫາກໍ່ສ້າງໄດ້ 3,5 ກິໂລແມັດ ຈາກໄລຍະທາງ 255 ກິໂລແມັດ. ນີ້ກໍເປັນສາເຫດທີ່ລາວໄດ້ຮັບປໂຍດນ້ອຍຫຼາຍໃນໂຄງການນີ້.

ຕາມສື່ທາງການລາວ ໄດ້ຣາຍງານເມື່ອວັນທີ 25 ພຶສຈິກາ ນີ້ວ່າ ໂຄງການຣົດໄຟ ລາວ-ຈີນ ແມ່ນໄດ້ອອກແບບ ເປັນຣົດໄຟ ມາຕຖານ ຊັ້ນນຶຶ່ງ ແລະປະເພດເສັ້ນທາງດຽວ, ຄວາມໄວ 160 ກິໂລແມັດຕໍ່ຊົ່ວໂມງ, ມີຄວາມຍາວທັງໝົດ 426,5 ກິໂລແມັດ. ນັບແຕ່ບໍ່ເຕັນ ແຂວງຫຼວງນໍ້າທາ ເຖິງນະຄອນຫຼວງວຽງຈັນ ມີຄວາມຍາວ 417 ກິໂລແມັດ ແລະ ຕໍ່ໃສ່ສະຖານີວຽງຈັນໃຕ້ ທ່ານາແລ້ງ 9 ກິໂລແມັດ. ໂດຍມີທັງໝົດ 33 ສະຖານີ ຈະເປີດນຳໃຊ້ພຽງ 21 ສະຖານີ ສ່ວນອີກ 12 ສະຖານີ ຈະເປີດນໍາໃຊ້ໃນໄລຍະຕໍ່ໄປ. ສ່ວນຂະບວນຣົດໄຟ ໃນເບື້ອງຕົ້ນມີ 18 ຂະບວນ ໃນນັ້ນຂົນສົ່ງໂດຍສານ 4 ຂະບວນ ແລະ ຂົນສົ່ງສິນຄ້າ 14 ຂະບວນ ຊຶ່ງສາມາດແລ່ນໄດ້ 23 ຖ້ຽວຕໍ່ວັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ