ໂຄວິດ-19 ມີຜົນກະທົບ ຕໍ່ທຸກ ພາກສ່ວນ

ໄຊຍາ
2021-06-08
Share
ໂຄວິດ-19 ມີຜົນກະທົບ ຕໍ່ທຸກ ພາກສ່ວນ ສະພາບການ ພາຍໃນຕລາດສົດ ທົ່ງຂັນຄຳ ວັນທີ 06 ມິຖຸນາ ບໍ່ມີຄົນມາລົງຕລາດ ມາຊື້ເຄື່ອງຢູ່ຂອງກິນ ດັ່ງທີ່ເຄີຍເປັນມາ.
ນັກຂ່າວພົລເມືອງ

ການຣະບາດຂອງເຊື້ອໂຄວິດ-19 ໃນລາວຮອບສອງ ໄດ້ສ້າງຜົລກະທົບຕໍ່ການດຳຣົງຊີວິດ ຂອງປະຊາຊົນ ແລະ ເສຖກິຈ, ດັ່ງທີ່ ຜ່ານມາຣັຖໄດ້ໃຊ້ມາຕການຄວບຄຸມ ແລະ ສະກັດກັ້ນນັ້ນກໍຄື ການລ໊ອກດາວ ປະຊາຊົນອອກໄປໃສບໍ່ໄດ້, ພາກທຸຣະກິຈກໍຖືກສັ່ງ ປິດຊົ່ວຄາວ ຫຼື ບາງທຸຣະກິຈກໍປິດຖາວອນ ໂດຍສະເພາະຂແນງການທ່ອງທ່ຽວ ແລະການຜລິດ ເພື່ອສົ່ງອອກຕ່າງໆ ກໍໄດ້ຮັບ ຜົລກະທົບໄປຕາມໆກັນ.

ໃນໄລຍະລ໊ອກດາວ ການທໍາມາຫາກິນ ຂອງປະຊາຊົນກໍຝືດເຄືອງ, ອາຫານການກິນທີ່ນຳເຂົ້າ ກໍຂຶ້ນຣາຄາເນື່ອງມາຈາກເງິນເຟີ້ ແລະ ການຜລິດພາຍໃນກໍມີຜົລກະທົບ ເຊັ່ນກັນ. ດັ່ງປະຊາຊົນໃນເຂດນະຄອນຫຼວງວຽງຈັນ ໄດ້ກ່າວຕໍ່ເຊັຽເສຣີ ເມື່ອວັນທີ 04 ມິຖຸນາ ວ່າຜົລກະທົບຈາກ ໂຄວິດ-19 ແມ່ນເຮັດການທໍາມາຫາກິນລຳບາກ. ເດີມຕົນເປັນຄອບຄົວ ທຸກຍາກຫາເຊົ້າກິນຄໍ່າ ແຕ່ ເມື່ອໂຄວິດ-19 ມາເພິ່ນຫ້າມບໍ່ໃຫ້ອອກໄປໃສ ກໍຍິ່ງລຳບາກເພີ່ມຂຶ້ນ ກໍຂໍໃຫ້ຣັຖບານຊ່ອຍເຫຼືອແກ້ໄຂຊີວິດການເປັນຢູ່ໃຫ້ຊາວບ້ານ.

"ແຕ່ຄ່າມາຢູ່ກະບໍ່ໄດ້ອອກໄປໃສ ເພາະເພິ່ນບໍ່ໃຫ້ອອກໄປໃສ ໄປກະຢ້ານສະດວກເຮົາໄປຕລາດຕະລີ ຊື້ຜັກຊື້ໝີ່ມາຂາຍກໍພໍໄດ້້້ ເກັບໄດ້ທ້ອນຢູ່, ກະຂໍໃຫ້ຣັຖບານມາຊ່ອຍແດ່ ສະພາບກໍຂາດເຂີນ."

ສ່ວນຜົລກະທົບຂອງຊາວສວນມັນຕົ້ນ ໃນໄລຍະໂຄວິດ-19 ຣະບາດການຂາຍມັນຕົ້ນ ໃຫ້ກັບເຈົ້າຂອງລານມັນຣາຄາຂຶ້ນໆລົງໆ ບໍ່ປົກກະຕິໃນແຕ່ລະມື້. ໃນຍາມປົກກະຕິ ກໍຂາຍໄດ້ ໂລລະ 2,000 ກີບ ກໍພໍໄດ້ກຳໄລ ແຕ່ມາໄລຍະໂຄວິດ-19 ບາງມື້ໂລ 700 ກີບ ບາງມື້ 1,500 ກີບ ເຖິງແນວໃດກໍຈຳເປັນຕ້ອງຂາຍ ເພາະເຈົ້າຂອງລານມັນ ເພິ່ນໄດ້ກຳນົດມາແລ້ວ ຖ້າບໍ່ຂາຍກໍຂາຍໄປ ບ່ອນອື່ນບໍ່ໄດ້.

"ກະບໍ່ໃຫ້ຫຼຸດຊໍ່ານີ້ແຫຼະ ບາດນີ້ມັນເກີນເດ້ ມັນລົງຈັ່ງຊິລະສິເຮັດຈັ່ງໃດບາດນີ້ ມັນກາສິຈຸບໜີ້ຈຸບສີນ ບໍ່ໜີ້ກະຫຼາຍຈັກໜີ້ຄ້າຂາຍ ຈັກໜີ້ຄ່າຢາພໍໄດ້ຊື້ເຂົ້າຊື້ນໍ້າກິນ ເຂົ້ານໍ້າກະອຶດ ກະໂສຫຼຸບຫັ້ນແຫຼະ ສິໄດ້ຫຼາຍມັນກາບໍ່ໄດ້."

ຜູ້ປະກອບການຂາຍເຂົ້າແຫ່ງນຶ່ງ ນອກຈາກຂາຍພາຍໃນປະເທດ ແລະ ສົ່ງອອກຕ່າງປະເທດກ່າວວ່າ ຜົລກະທົບຈາກໂຄວິດ-19 ນັ້ນກໍແມ່ນເຣື່ອງການສົ່ງອອກເພາະໂຄວິດ-19 ຣະບາດເຮັດໃຫ້ຍອດສັ່ງເຂົ້າຫຼຸດລົງ. ປັຈຈຸບັນກໍແກ້ໄຂຂາຍພາຍໃນປະເທດ ແຕ່ ກໍບໍ່ໄດ້ຂາຍດີ ປານໃດ.

"ກ່ອນໂຄວິດລະແມ່ນໄດ້ຂາຍດີ ຕົກມາຫຼັງໂຄວິດ ລະແມ່ນງຽບລະການຄ້າຂາຍ ເພາະວ່າມັນບໍ່ມີຕ່າງປະເທດ ແມ່ນຫຍັງບໍ່ມີ ໂຮງຈັກໂຮງງານກະບໍ່ໄດ້ເປີດ, ໂຮງຮຽນກະບໍ່ໄດ້ເປີດ ໂຕນີ້ເຮົາຍັງແກ້ໄຂ ຂາຍພາຍໃນກ່ອນ ຖ້າເຂົາເປີດເຮົາຄ່ອຍດຳເນີນໄປໃໝ່."

ຕໍ່ສະພາບການດັ່ງກ່າວ ທັງເຈົ້າໜ້າທີ່ ພາກສ່ວນກ່ຽວຂ້ອງ, ຜູ້ປະກອບການ ແລະ ປະຊາຊົນທີ່ໄດ້ຮັບຜົລກະທົບ ຕ່າງກໍໄດ້ສະທ້ອນ ຄວາມຄິດໄປໃນທຳນອງດຽວກັນວ່າ ຕ້ອງການໃຫ້ຣັຖບານເຂົ້າມາຊ່ອຍວິກິຈ ໃນຄັ້ງນີ້ຖ້າປ່ອຍໃຫ້ສະພາບການ ໂດຍບໍ່ມີການກະຕຸ້ນ ກ້ອນທຶນ ຈາກຣັຖບານເຂົ້າມາຈະເຮັດໃຫ້ ຜູ້ປະກອບການລາວ ແລະ ປະຊາຊົນຈະປະເຊີນກັບວິກິຈນີ້ ໄລຍະຍາວແຕ່ກະບໍ່ຮູ້ແນ່ວ່າ ຈະສິ້ນສຸດເມື່ອໃດເພາະປະເທດອ້ອມຂ້າງ ທີ່ມີເສຖກິຈພົວພັນກັບລາວ ກໍມີການຣະບາດຫຼາຍເຊັ່ນກັນ, ດັ່ງເຈົ້າໜ້າທີ່ອຸດສາຫະກັມ ແລະ ການຄ້າຜູ້ຂໍສງວນຊື່ ໄດ້ກ່າວວ່າ.

"ພຍາດໂຄວິດ-19 ນີ້ໄດ້ສ້າງຜົລກະທົບອັນໃຫຍ່ຫຼວງ ຕໍ່ກັບບັນຫາ ທາງດ້ານເສຖກິຈ ຂອງທ້ອງຖິ່ນກໍຄືຂອງປະເທດຈັ່ງຊັ້ນພວກເຮົາ ຈະຕົກຢູ່ໃນສະພາວະທີ່ ເສຖກິຈທົດຖອຍຢ່າງໜັກ, ເສຖກິຈພວກເຮົາຈະຄ່ອຍຟື້ນໂຕໄດ້ຫຼືບໍ່ ອັນນີ້ກໍແມ່ນມາຕການນຶ່ງ ພວກເຮົາຈະ ໄດ້ເບິ່ງນໍາກັນເພາະມັນກະທົບເປັນວົງກວ້າງ ເປັນລັກສນະຕ່ອງໂສ້. ເມື່ອມັນມີຜົລກະທົບ ມັນກະເວົ້າເຣື່ອງຣາຍຮັບ ຂອງປະຊາຊົນ ທີ່ຈະຕົກຢູ່ໃນຈຸດດັ່ງກ່າວນີ້."

ທ່ານໄດ້ກ່າວຕື່ມວ່າ ຜ່ານມາຣັຖບານລາວ ໄດ້ອອກນະໂຍບາຍ ເພື່ອຊ່ອຍເຫຼືອຜູ້ປະກອບການ ແລະ ປະຊາຊົນເຊັ່ນການຫຼຸດຄ່າ ໄຟຟ້າ, ເປີດກອງທຶນໃຫ້ກູ້ຢືມ, ເລື່ອນການສຳຮະໜີ້ ແລະ ຫຼຸດອັດຕຣາການເກັບພາສີ ເປັນຕົ້ນແຕ່ການປະຕິບັດ ກໍຍັງພົບກັບ ຄວາມຫຍຸ້ງຍາກ ເຊິ່ງມາຕການເລົ່າ ນີ້ຍັງບໍ່ໄດ້ຄວບຄຸມທົ່ວເຖິງປານໃດ.

ໃນຂນະທີ່ ທະນາຄານແຫ່ງ ສປປ ລາວ ກໍໄດ້ອອກຖແລງຂ່າວ ປະກາດນະໂຍບາຍສົ່ງເສີມການຜລິດ ໂດຍໄດ້ເປີດໂອກາດໃຫ້ ຜູ້ປະກອບການເຂົ້າຫາແຫຼ່ງທຶນ ໂດຍຣັຖມີນະໂຍບາຍ ໃຫ້ກູ້ຢືມເພື່ອໃຫ້ສືບຕໍ່ການຜລິດ, ດັ່ງ ທ່ານ ສຸດທະໄຊ ສີວິໄລ ຮອງຜູ້ວ່າ ການທະນາຄານແຫ່ງ ສປປ ລາວ ໄດ້ຖແລງເມື່ອວັນທີ 08 ພຶສພາ ວ່າ.

"ມີຂໍ້ຕົກລົງກ່ຽວກັບໂຄງການສົ່ງເສີມ ຊຸກຍູ້ການຜລິດສິນຄ້າແກ້ໄຂ ຜົລກະທົບໂຄວິດ-19 ຕາມຂໍ້ຕົກລົງເລກທີ 318 ຖືວ່າໃນ ຫ່ວງທຶນ ດັ່ງກ່າວພວກເຮົາຈະໄດ້ອະນຸມັດວົງເງິນ 1,800 ຕືກີບ ໃຫ້ແກ່ບັນດາຫົວໜ່ວຍການຜລິດນຳ ໄປທໍາການຜລິດແກ້ໄຂ ສະພາບຄ່ອງຂອງໂຕ ມາຮອດປັຈຈຸບັນ ນີ້ໄດ້ນໍາໃຊ້ໄປແລ້ວ 1,000 ປາຍຕື້ກີບ."

ທ່ານໄດ້ກ່າວຕື່ມວ່າເງິນກູ້ ທີ່ປ່ອຍໄປຫັ້ນໃນຂແນງການປູກຝັງ ກະສິກັມແລະລ້ຽງສັດ ມີທັງໝົດປະມານ 821 ຕື້ ກວມເອົາ 60%. ນອກຈາກນັ້ນທາງທະນາຄານແຫ່ງ ສປປລາວ ກໍໄດ້ມີການຄົ້ນຄວ້ານະໂຍບາຍໃໝ່ ເພື່ອສົ່ງເສີມການຜລິດສິນຄ້າເພື່ອການສົ່ງອອກ, ການຜລິດສິນຄ້າ ກະສິກັມ ເພື່ອການສົ່ງອອກ ພົບຫຼາຍບັນຫາຈຶ່ງມີຄວາມຫຍຸ້ງຍາກ ເປັນຕົ້ນ ແມ່ນການເຂົ້າຫາແຫຼ່ງທຶນມີຄວາມ ຊັກຊ້າ ແກ່ຍາວມີຄວາມຫຍຸ້ງຍາກ, ການປະຕິບັດນະໂຍບາຍ ການເລື່ອນການຊໍາຮະອັຕຣາດອກເບັ້ຽ ໂດຍສະເພາະການປ່ອຍກູ້ໃໝ່ ໃຫ້ແກ່ ບຸກຄົນ ນິຕິບຸກຄົນ ທີ່ໄດ້ຮັບຜົລກະທົບ ແຕ່ຍັງບໍ່ທັນທົ່ວເຖີງ.

ສ່ວນເງື່ອນໄຂຂອງການກູ້ຢືມນັ້ນວິສາຫະກິຈຂນາດນ້ອຍ ຂນາດກາງຕ້ອງມີການບໍຣິຫານ ມີການຖືບັນຊີຄັກແນ່ເພື່ອຕອບສນອງ ເງື່ອນໄຂໃນການປ່ອຍກູ້. ບັນດາໂຄງການສົ່ງເສີມການຜລິດສິນຄ້າ ກໍເຊັ່ນດຽວກັນຈະຕ້ອງເປັນໂຄງການທີ່ມີປະສິດຕິຜົລ, ບໍ່ໝາຍ ວ່າເມື່ອໄດ້ຮັບຊາບກ່ຽວກັບນະໂຍບາຍຕ່າງໆ ພວກເຮົາໄປຍື່ນ ເອກສານ ພວກເຮົາຈະໄດ້ ອະນຸມັດໂລດອັນນັ້ນເປັນໄປໄດ້ຍາກ.

ໃນການປ່ອຍກູ້ໃນການແບ່ງທຶນກະຕຸ້ນ ເຂົ້າຊູ່ການ ຜລິດທຸຣະກິຈຕ່າງໆ ເບື້ອງທະນາຄານກາງ ບໍ່ສາມາດຈັດຕັ້ງປະຕິບັດໂດຍກົງ ພວກເຮົາດຳເນີນກົນໄກ ຜ່ານທະນາຄານ ທຸຣະກິຈທັງໝົດ. ສະນັ້ນບັນດາ ທະນາຄານທຸຣະກິຈ ກໍຕ້ອງບໍຣິຫານບັນດາຄວາມສ່ຽງ ເຮັດຈັ່ງໃດ ການປ່ອຍກູ້ບໍ່ໃຫ້ກາຍເປັນໜີ້ສິນ.

ນັກເສຖສາດໃນລາວ ໄດ້ອອກບົດຣາຍງານເມື່ອທ້າຍປີ 2020 ວ່າຣັຖບານລາວຄາດວ່າເສຖກິຈ ຈະຂຍາຍໂຕໃນຣະຫວ່າງ 3.3 ຫາ 3.6% ແຕ່ອົງການສາກົລກັບ ຄາດຄະເນຕໍ່າ ກວ່ານ້ັ້ນຫຼາຍ ເຊັ່ນອົງການກອງທຶນການເງິນສາກົລ ຫຼື IMF 0,7%, ທະນາຄານ ພັທນາເອເຊັຽ ຫຼື ADB -0,5% ແລະ ທະນາຄານໂລກ -1,8% ຫາ 1.0% ຂຶ້ນກັບສະພາບການ ຣະບາດໃນໂລກ, ພາຍໃນ ປະເທດ ແລະ ມາຕການຄວບຄຸມ ແລະ ປ້ອງກັນການແຜ່ຣະບາດ. ອີງຕາມສະພາບຄວາມເປັນຈິງ ໃນເວລາເກືອບ 06 ເດືອນ ຜ່ານມາບົດຣາຍງານ ເສຖກິຈ ຂອງຣັຖບານຊຸດໃໝ່ ປະກົດວ່າເສຖກິຈລາວ ມີການຂຍາຍໂຕຕໍ່າຫຼາຍ ຍິ່ງມາພົບການຣະບາດ ຮອບສອງນີ້ ທຸຣະກິຈຫຼາຍຂແນງ ຖືກສັ່ງປິດຊົ່ວຄາວ ຕາມການສຳຣວດຂອງ ສະພາການຄ້າ ແລະ ທະນາຄານພັທນາເອເຊັຽ ພົບວ່າ ພາກການທ່ອງທ່ຽວ ມີການປິດກິຈການຖາວອນ, ຊົ່ວຄາວ ແລ້ວແຕ່ສະພາບເຖິງ 70% ທົ່ວປະເທດ.

ພ້ອມນີ້ບໍຣິສັດຜລິດສິນຄ້າ ສົ່ງອອກ ການສັ່ງສິນຄ້າຫຼຸດລົງຈຳນວນນຶ່ງ ບໍ່ສາມາດຜລິດປົກກະຕິໄດ້ ເນື່ອງຈາກຜົລກະທົບຕ່ອງໂສ້ ສົ່ງຜົລໃຫ້ເກີດການຫວ່າງງານ ເຊິ່ງປະເມີນວ່າ 7 ເດືອນ ຕົ້ນປີ 2020 ສູງເຖິງ 23,4% ແລະ ດຶງຍາວຈົນມາເຖິງປັຈຈຸບັນ.

ວິຊາການສອນພາກວິຊາການ ບໍຣິຫານທຸຣະກິຈກ່າວວ່າ ແນວໃດເສຖກິຈລາວ ກໍເຂົ້າສູ່ພາວະຖົດຖອຍ ຢ່າງຫີກລ້ຽງບໍ່ໄດ້. ສະນັ້ນ ຣັຖບານຕ້ອງແກ້ໄຂສະພາບການ ຕໍ່ໜ້າເຊັ່ນ ການຈັດຫາວັກຊິນ ໃຫ້ຄວບຄຸມທົ່ວເຖິງຢ່າງນ້ອຍຕ້ອງ 70% ຂອງປະຊາກອນເພື່ອ ສ້າງຄວາມໝັ້ນໃຈ ດັ່ງຫຼາຍປະເທດ ປະສົບຜົລສຳເຣັດ.

ຄຽງຄູ່ກັນນີ້ຣັຖບານຕ້ອງໃຊ້ງົບປະມານກະຕຸ້ນ ໃຫ້ຜູ້ປະກອບການພາຍໃນປະເທດໝາຍເຖິງຄົນລາວ ເຊິ່ງການກະຕຸ້ນໂດຍໃຫ້ເງິນ ຊ່ອຍເຫຼືອສ່ວນນຶ່ງ ແລະ ໃຫ້ນະໂຍບາຍກູ້ຢືມ ບໍ່ມີດອກເບັ້ຽສ່ວນນຶ່ງ ອີງໃສ່ສະພາບ.

ເຖິງແນວໃດກໍຕາມ ນັບແຕ່ການຣະບາດຮອບນຶ່ງ ຈົນມາເຖິງຮອບສອງ ຈາກຣັຖບານຊຸດເກົ່າປ່ຽນມາເປັນຊຸດໃໝ່ ກໍຍັງບໍ່ໄດ້ປະກາດ ນະໂຍບາຍອອກມາຊັດເຈັນວ່າປະຊາຊົນ ແລະ ຜູ້ປະກອບການຈະໄດ້ຮັບການຊ່ອຍເຫຼືອ ໃນຮູບແບບໃດ.

ສ່ວນປະຊາຊົນກໍບໍ່ກ້າທີ່ຈະໄປຮຽກຮ້ອງ ກັບຣັຖບານເຊັ່ນດຽວກັບ ຜູ້ປະກອບການກໍມິດງຽບ ໄດ້ແຕ່ລໍຖ້າຟັງວ່າເມື່ອໃດຣັຖບານຈະສົ່ງ ສັນຍານວ່າຈະມີການຊ່ອຍເຫຼືອ ເພື່ອແບ່ງເບົາ ຜົລກະທົບອັນໜັກໜ່ວງທີ່ປະເຊີນຢູ່.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ