ປໍ້ານໍ້າມັນ ຢູ່ຫຼວງພຣະບາງ ສ່ວນຫຼາຍ ປິດບໍຣິການ

ຈຳປາທອງ
2022.05.26
Share on WhatsApp
Share on WhatsApp
ປໍ້ານໍ້າມັນ ຢູ່ຫຼວງພຣະບາງ ສ່ວນຫຼາຍ ປິດບໍຣິການ ຮູບໂຕຢາງ: ປ້ຳນຳ້ມັນແຫ່ງນຶ່ງ ໃນນະຄອນຫຼວງວຽງຈັນ ທີ່ປິດໃຫ້ບໍຣິການ ຍ້ອນນຳມັນຂາດປ້ຳ. ຮູບຖ່າຍເມື່ອ ເດືອນພຶສພາ ປີ 2022.
ນັກຂ່າວ ພົລເມືອງ

ຢູ່ນະຄອນຫລວງພຣະບາງ ແຂວງຫລວງພຣະບາງ ມີປໍ້ານໍ້າມັນທັງໝົດ 38 ແຫ່ງ. ໃນນັ້ນມີເຖິງ 33 ແຫ່ງ ທີ່ບໍ່ສາມາດເປີດໃຫ້ບໍຣິການໄດ້ຕາມປົກກະຕິ ຍ້ອນມາຕການຄຸ້ມຄອງລາຄານໍ້າມັນ ຂອງທາງການ ເຮັດໃຫ້ປໍ້ານໍ້າມັນ ຂາຍນໍ້າມັນຂາດທຶນປະມານ 1,000 ກີບຕໍ່ລິດ; ເຈົ້າຂອງປໍ້ານໍ້າມັນ ໄດ້ເອົາເງິນກີບປ່ຽນເອົາເງິນຕຣາຕ່າງປະເທດ ໃນຕລາດມືດໃນອັດຕຣາແລກປ່ຽນສູງ ແລ້ວໄປຊື້ນໍ້າມັນເຂົ້າມາໃນລາຄາແພງ, ແຕ່ຕ້ອງຂາຍໃນລາຄາຖືກ ທີ່ທາງການກໍານົດ. ເມື່ອເປັນຄືແນວນັ້ນ ປໍ້ານໍ້າມັນຫລາຍແຫ່ງຈຶ່ງຖືກປິດ ເພາະມັນຂາດທຶນ ດັ່ງດຽວກັນກັບປໍ້ານໍ້າມັນໃນເມືອງ ແລະແຂວງອື່ນໆຂອງລາວ, ອີງຕາມຄໍາເວົ້າຂອງເຈົ້າຂອງປໍ້ານໍ້າມັນ ແຫ່ງນຶ່ງໃນນະຄອນຫລວງພຣະບາງ ຕໍ່ວິທຍຸເອເຊັຽເສຣີໃນມື້ວັນທີ 26 ພຶສພານີ້.

ແມ່ນໆ ຍັງມີບາງປໍ້າກໍປິດຢູ່ ເຂົາປິດເນ່ ເຂົາບໍ່ມີນໍ້າມັນ ບໍ່ຢາກຊື ເຮັດລາຄາສູງເນາະ. 2 ມາກໍນີ້ນ່າ ເຂົາເອີ້ນວ່ານໍ້າມັນບໍ່ພຽງພໍຫັ້ນນ່າ ກໍຕົ້ນທຶນມັນຢາກສູງ ແລ້ວກໍແຕ່ຂາຍທາງພີ້ມັນຖືກແນ່ຫັນນ່າ ສິນຶ່ງພັນກີບຫັ້ນແຫລະແມ່ນໆ ກໍ 2 ບາດພຸ້ນແຫລະ.

ສໍາລັບປໍ້ານໍ້າມັນທີ່ຍັງເປີດໃຫ້ບໍຣິການຢູ່ນັ້ນ ສ່ວນຫລາຍຈະຢູ່ໃນເຄືອຂ່າຍຂອງ ຣັຖວິສາຫະກິຈນໍ້າມັນເຊື້ອເພີງຂອງລາວ ແລະປໍ້ານໍ້າມັນໃນເຄືອຂ່າຍບໍຣິສັດ ພີທີລາວຈໍາກັດ ດັ່ງເຈົ້າໜ້າທີ່ຜແນກອຸດສາຫະກັມ ແລການຄ້າທ່ານນຶ່ງ ກ່າວຕໍ່ວິທຍຸເອເຊັຽເສຣີໃນມື້ດຽວກັນນີ້ວ່າ:

ອັດຕຣາແລກປ່ຽນແດ່ ທັງຫລາຍ ອັນທີ່ມາກະທົບໃສ່ຫັ້ນ ແລ້ວກໍເຮັດໃຫ້ຂະເຈົ້າ ອັນຕົ້ນທຶນຫັ້ນນ່າ ເພາະວ່ານໍ້າມັນີ້ ຣັຖບານລາວເປັນຜູ້ຄຸ້ມຄອງລາຄາເນາະ ຕ້ອງຂາຍຕາມລາຄາທີ່ຣັຖໃຫ້ ຂະເຈົ້າບໍ່ໄດ້ກໍາໄລຍາດນີ້ນະຂະເຈົ້າເລີຍບໍ່ຂາຍບໍ່ສົ່ງ ນໍ້າມັນປິດລົງ ປໍ້າທີ່ຍັງເຫລືອອັນທີ່ເປັນຣັຖວິສາຫະກິຈ ຂອງລາວນີ້ນ່າ ຂະເຈົ້າຈະໄດ້ນໍ້າມັນຈາກຕຣົງນີ້ແລ້ວ ຂະເຈົ້າກໍມາຈໍາໜ່າຍ.

ຊາວນະຄອນຫລວງພຣະບາງ ທ່ານນຶ່ງເວົ້າຕໍ່ວິທຍຸເອເຊັຽເສຣີໃນມື້ວັນທີ 26 ພຶສພານີ້ວ່າ ເມື່ອປໍ້ານໍ້າມັນສ່ວນຫລາຍ ບໍ່ສາມາດເປີດໃຫ້ບໍຣິການຕາມປົກກະຕິ ໄດ້ ຍ້ອນຕົ້ນທຶນຊື້ນໍ້າມັນສູງຂຶ້ນນັ້ນ ກໍເຮັດໃຫ້ປະຊາຊົນປະສົບກັບຄວາມຫຍູ້ງຍາກ ໃນການໃສ່ນໍ້າມັນຣົຖ, ຈໍາເປັນຕ້ອງໄດ້ລຽນຄິວ ເພື່ອລໍຖ້າໃສ່ນໍ້າມັນເປັນເວລາດົນໃນແຕ່ລະຄັ້ງ ເປັນຕົ້ນໃນໄລຍະ 4-5 ມື້ມານີ້.

ປໍ້າປະມານກາຍເຄິ່ງນີ້ເປີດ ມີບາງປໍ້າເອົານໍ້າມັນມາໄດ້ໜ້ອຍນຶ່ງ ກໍພາກັນ ແຫ່ກັນໄປຊື້ຫັ້ນນ່າ ແລ້ວກໍເຮັດໃຫ້ນໍ້າມັນບໍ່ພໍ ...ຫວ່າງນີ້ຣົຖແລ່ນໜ້ອຍ ເລີຍບໍ່ປານໃດຕີ໋ ເຣື່ອງແກ້ໄຂນີ້ນ່າ ເພາະວ່າເຫັນມີແຈ້ງການວ່າ ແບບສິເພີ່ມການນໍາເຂົ້ານໍ້າມັນອີ່ຫຍັງຫັ້ນນ່າ ບໍ່ເຫັນເລີຍນ່າ ມີແຕ່ພວກການຄ້າເພິ່ນ ຫ້າມບໍ່ໃຫ້ປະຊາຊົນໄປຊື້ແລ້ວມາໃສ່ຕຸກນ້ອຍ ແລ້ວຂາຍເອົາກໍາໄລສໍ່ານັ້ນຊື່ໆນີ໋.

ເມື່ອວັນທີ 19 ພຶສພານີ້ ກະຊວງອຸດສາຫະກັມ ແລະການຄ້າ ໄດ້ອອກແຈ້ງການປັບຂຶ້ນລາຄານໍ້າມັນຂາຍຍ່ອຍທຸກຊນິດໃນທົ່ວປະເທດ. ໃນນັ້ນ ແຂວງຫລວງພຣະບາງ ປັບລາຄານໍ້າມັນແອັດຊັງພິເສດ ຈາກ 22,560 ກີບເປັນ 24,140 ກີບຕໍ່ລິດ, ແອັດຊັງທັມມະດາ ຈາກ 17,670 ກີບເປັນ 18,940 ກີບ ແລະກາຊວນ ປັບຂຶ້ນຈາກ 18,200 ກີບເປັນ 18,530 ກີບ. ການຫໍປັບຂຶ້ນລາຄານໍ້າມັນຄັ້ງນີ້ ເປັນຄັ້ງທີ 12 ໃນປີນີ້. ຍ້ອນການຂາດເຂີນ ແລະລາຄານໍ້າມັນແພງຄືແນວນັ້ນ ຈຶ່ງເຮັດໃຫ້ປະຊາຊົນ ຫລຸດຜ່ອນການເດີນທາງ ແລະອອກຈາກເຮືອນໃນເວລາທີ່ຈໍາເປັນເທົ່ານັ້ນ.

ດັ່ງຊາວນະຄອນຫລວງພຣະບາງ ນາງນຶ່ງ ເວົ້າວ່າ:

ຫາກໍ່ມີມື້ວານກັບມື້ນີ້ ແຕ່ວ່າບາງປໍ້າກໍປິດເນາະ ປໍ້າໃດບໍ່ມີນໍ້າມັນເຕີມ ຄົນກໍຖືວ່າບໍ່ໄດ້ໄປໃສເລີຍ ກໍໄປໄດ້ເນາະ ໄປໄດ້ມີແຕ່ສົ່ງລູກໄປໂຮງຮຽນ ແລ້ວກໍໄປສົ່ງເຄື່ອງລູກຄ້າອິຫຍັງຫັ້ນ ແບບທ່ຽວໃນເມືອງນີ້ກໍໄປໄດ້ ກໍຕ້ອງປຢັດສຸດໆຫັ້ນແຫລະ ຕົ້ນທຶນເພີ່ມຫລາຍໆ ລາຍຈ່າຍຫລາຍ.

ເມື່ອເບິ່ງຄືນເຖິງລາຄານໍ້າມັນ ທີ່ຂາຍຫຍ່ອຍໃນປີ 2018 ນໍ້າມັນແອັດຊັງພິເສດ  10,630 ກີບຕໍ່ລິດ, ນໍ້າມັນແອັດຊັງທໍາມະດາ 9,430 ກີບ ແລະນໍ້າມັນກາຊວນ 8,680 ກີບ.

ແຕ່ເຖິງຢ່າງໃດກໍຕາມ ຜູ້ປະກອບການນໍາທ່ຽວຢູ່ນະຄອນຫລວງພຣະບາງ ທ່ານນຶ່ງເວົ້າຕໍ່ວິທຍຸເອເຊັຽເສຣີໃນມື້ວັນທີ 26 ພຶສພານີ້ວ່າ ໜ່ວຍງານທີ່ກ່ຽວຂ້ອງ ຄວນເລັ່ງແກ້ໄຂບັນຫາລາຄານໍ້າມັນທີ່ແພງຂຶ້ນຢ່າງຕໍ່ເນື່ອງນີ້ ແລະຫລຸດບັນຫາຄວາມຫຍຸ້ງຍາກໃນການໃສ່ນໍ້າມັນ ເພື່ອອໍານວຍຄວາມສະດວກໃຫ້ແກ່ປະຊາ ຊົນລາວ ແລະນັກທ່ອງທ່ຽວຕ່າງປະເທດ ທີ່ມີແນວໂນ້ມເຂົ້າມາລາວຫລາຍຂຶ້ນ.

ດັ່ງທີ່ທ່ານກ່າວວ່າ:

ເອີ ຫລວງພຣະບາງນີ້ ຍັງມີການຕໍ່ແຖວລຽນຄີວ ໃນການຊື້ນໍ້າມັນຢູ່ຫັ້ນນ່າ ກໍມີຜົນກະທົບບາງສ່ວນ. 1 ມາກໍຄື ສໍາຄັນລະກໍເຮົາສິໄປໃສມາໃສ  ມັນຕ້ອງໄດ້ພາຫານະເນາະ ມີພາຫານະແລ້ວ  ເຮົາກໍຕ້ອງໄດ້ມີນໍ້າມັນ ຖ້າຂາດນໍ້າມັນແລ້ວ ກໍຖືວ່າພາຫານະໄປບໍ່ໄດ້ຊີ້ນ່າ ມັນກໍມີຜົນກະທົບອ້ອມຂ້າງຫັ້ນແຫລະ.

ເມື່ອວັນທີ 23 ພຶສພານີ້ ຂແນງການຄ້າພາຍໃນ ຜແນກອຸດສາຫະກັມແລະການຄ້າ ແຂວງຫລວງພຣະບາງ ໄດ້ອອກແຈ້ງການ ໃຫ້ເຈົ້າໜ້າທີ່ທີ່ກ່ຽວຂ້ອງ ຕິດຕາມກວດກາການຈໍາໜ່າຍນໍ້າມັນເຊື້ອເພີງ ທີ່ບໍ່ຖືກຕ້ອງຕາມລະບຽບການ ໂດຍສະເພາະແມ່ນການນໍາເອົານໍ້າມັນ ເຊື້ອເພີງ ໃສ່ຕຸກນໍ້າດື່ມມານັ່ງຂາຍຕາມແຄມທາງ ຊຶ່ງມີຄວາມສ່ຽງທີ່ຈະເກີດອັກຄີພັຍ. ພ້ອມດຽວກັນນັ້ນ ກໍຫ້າມບໍ່ໃຫ້ພໍ່ຄ້າຊາວຂາຍ ແລະເຮັດຄືແນວນັ້ນເດັດຂາດ. ຖ້າຫາກເຈົ້າໜ້າທີ່ກວດພົບ ຈະຖືກຍຶດ ແລະປັບໃໝຕາມລະບຽບກົດໝາຍ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ