ໜີ້ສິນ ສາທາຣະນະ ຂອງລາວສູງຂຶ້ນ 14.5 ຕື້ໂດລ້າຣ໌ສະຫະຣັຖ

ອຸ່ນແກ້ວ
2022.05.16
Share on WhatsApp
Share on WhatsApp
ໜີ້ສິນ ສາທາຣະນະ ຂອງລາວສູງຂຶ້ນ 14.5 ຕື້ໂດລ້າຣ໌ສະຫະຣັຖ ຊາວລາວ ທີ່ພວມຈະໃຊ້ຣົຖໄຟລາວ-ຈີນ ເພື່ອເດີນທາງໄປຍັງພາກເໜືອ
RFA

ໜີ້​ສິນ​ສາ​ທາ​ຣະ​ນະ​ຂອງ​ລາວ ໃນ​ປີ 2021 ມີ​ມູນ​ຄ່າ 14.5 ຕື້​ໂດ​ລ້າຣ໌ ໃນນັ້ນໜີ້​ສິນ​ຂອງ​ຂ​ແນງ​ການ​ໄຟ​ຟ້າ ​ກວມ​ເອົາ 4.35 ຕື້​ໂດ​ລ້າຣ໌ ໃນ​ຂະ​ນະ​ທີ່​ການ​ເກັບ​ລາຍ​ຮັບບໍ່​ທັນ​ໄດ້​ດີ.

ຂໍ້​ມູນ​ທະ​ນາ​ຄານ​ໂລກ ໃນ​ເດືອນ​ເມ​ສາ 2022 ໄດ້​ລະ​ບຸວ່າ ໃນ​ປີ 2019 ໜີ້​ສິນ​ສາ​ທາ​ຣະ​ນະ​ຂອງ​ລາວກວມ​ເອົາ 68 ເປີ​ເຊັນ ຂອງລວມຍອດ​ຜ​ລິດ​ຕະ​ພັນ​ພາຍ​ໃນ ຫຼື GDP ເທົ່າ​ກັບ 12.5 ຕື້​ໂດ​ລ້າຣ໌ ສ່ວນ​ວ່າ ປີ 2021 ໜີ້​ສິ​ນ​ສາ​ທາ​ຣະ​ນະ​ຂອງ​ລາວ ກວມ​ເອົາ 88 ເປີ​ເຊັນ ຂອງ GDP ເທົ່າ​ກັບ 14.5 ຕື້​ໂດ​ລ້າຣ໌.

ໃນ​ຈຳ​ນວນ​ໜີ້​ສິນ 14.5 ຕື້​ໂດ​ລ້າຣ໌ ໃນ​ປີ 2021 ໜີ້​ສິນ​ໃນຂ​ແນງ​ການ​ໄຟ​ຟ້າ​ກວມ​ເອົາ 4.35 ຕື້​ໂດ​ລ້າຣ໌ ຫຼື ເທົ່າ​ກັບ 30 ເປີ​ເຊັນ ອີງ​ຕາມຂໍ້​ມູນ​ຈາກ​ທະ​ນາ​ຄານ​ໂລກ .

ທ່ານ ອາເລັກ ຄຣີເມີ້ຣ໌ (Alex Kremer) ຜູ້​ຕາງ​ໜ້າ ​ຫ້ອງ​ການ​ທະ​ນາ​ຄານ​ໂລກ ປະ​ຈຳ​ປະ​ເທດ​ລາວ ໄດ້​ກ່າວ ຢູ່​ໃນ​ບົດ​ຖ​ແລງ​ຂ່າວ ໃນ​ວັນ​ທີ 13 ພຶ​ສ​ພາ ວ່າ: ສະພາບການໃນລາວ ຍິ່ງທ້າທາຍເປັນພິເສດ ເນື່ອງຈາກບັນຫາໜີ້ສິນສາທາ​ຣນະ ແລະ ການຈັດເກັບລາຍຮັບທີ່ຍັງບໍ່ທັນດີ ດັ່ງນັ້ນ ບູລິມະສິດ ແມ່ນຄວນເລັ່ງໃສ່ການເກັບລາຍຮັບ ໂດຍ ການທົບທວນຄືນນະໂຍບາຍ​bການຍົກເວັ້ນພາສີອາກອນ ໃນໂຄງການລົງທຶນ.”

ໄລ​ຍະ​ຜ່ານ​ມາ ກະ​ຊວງ​ການ​ເງິນ ໄດ້​ອອກ​ແຈ້ງ​ການ ເຖິງຫົວ​ໜ່ວຍ​ທຸ​ຣະ​ກິຈ ທີ່​ຍັງ​ມີ​ໃບ​ເກັບ​ອາ​ກອນ​ທີ່​ໃຊ້​ບໍ່​ທັນ​ໝົດ ໃຫ້​ສ​ເນີ​ໄປ​ຍັງຂ​ແນງ​ການ​ຊ່ວຍ​ສາ​ອາ​ກອນ ເພື່ອ​ຫຼຸດ​ຜ່ອນ​ອາ​ກອນ​ມູນ​ຄ່າ​ເພີ່ມ ຈາກທີ່​ເຄີຍ​ເສັຽ 10 ເປີເຊັນ ມາ​ເປັນເສັຽ 7 ເອີ​ເຊັນ. 

ເຈົ້າ​ໜ້າ​ທີ່​ຜ​ແນກ​ຊ່ວຍ​ສາ​ອາ​ກອນ ຜູ້ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ທ່ານ​ນຶ່ງ ໄດ້​ກ່າວ​ວ່າ ຕໍ່​ເອ​ເຊັຽ​ເສ​ຣີ ໃນ​ວັນ​ທີ 16 ພຶ​ສ​ພາ ວ່າ:

ນຳໃຊ້ຫຼຸດໝົດຫັ້ນແຫຼະ ຈັດຕັ້ງປະຕິບັດແລ້ວ ແຕ່ວ່າເກົ່າ ອັນທີ່ເວັ້ນສັນຍາຜ່ານມາກໍຕ້ອງໄດ້ເບິ່ງສັນຍາຄືນເນາະ ຄັນວ່າເພິ່ນວ່າ ປ່ຽນໃສ່ອັນປະຕິບັດຕາມສັນຍາ ປັບປຸງແຕ່ໄລຍະ ກະນຳໃຊ້ໄດ້ເລີຍແຫຼະ ເຫຼືອ 7 ເປີເຊັນ ແຕ່ມີການຍົກເວັ້ນ ກໍແນ່ນອນແຫຼະ ສົ່ງຜົກະທົບຕໍ່ລາຍຮັບ ແຕ່ວ່າ ເພິ່ນກໍເບິ່ງ ເພິ່ນກໍຊິຮັກສາ ເບິ່ງຫັ້ນແຫຼະ ໃຫ້ນັກລົງທຶນ ສາມາດລົງທຶນໄປໄດ້ຫັ້ນແຫຼະ ເອີ ກໍເກັບປົກຕິ ພາສີທີ່ດິນໂຕຫັ້ນແຫຼະ ອາກອນເງິນເດືອນ.”

ໃນ​ເດືອນ​ເມ​ສາປີ 2022 ອັດ​ຕ​ຣາ​ເງິນ​ເຟີສູງ​ຂຶ້ນ 9.9 ເປີ​ເຊັນ ຈາກ 2 ເປີ​ເຊັນ ໃນ​ປີ 2021 ທີ່​ຜ່ານ​ມາ ຖ່າມ​ກາງການ​ຣະ​ບາດ​ຂອງ​ໂຄວິດ-19 ອີງ​ຕາມ​ຂໍ້​ມູນ​ຈາກ​ທະ​ນາ​ຄານ​ໂລກ.

ຕາມ​ກົດ​ໝາຍ​ແລ້ວ ກໍ​ຕ້ອງ​ເສັຍ​ພາ​ສີ, ຊາວ​ນະ​ຄອນ​ຫລວງວຽງ​ຈັນ ທ່າ​ນນຶ່ງ ໄດ້​ກ່າວ​ຕໍ່​ວິທຍຸເອ​ເຊັຽ​ເສ​ຣີ ໃນ​ວັນ​ທີ 16 ພຶ​ສ​ພາ ວ່າ:  

ພາສີລະມັນກໍ ກໍອີງຕາມກົດໝາຍມັນຫັ້ນແຫຼະ ຄັນໝົດຫຼາຍກໍເສີຽຄ່າທາງ ເສັຽອາກອນແລ້ວກໍແລ້ວ ເຕັກນອກ ເຕັກນິກ ແມ່ນ ຄັນນຳເຂົ້າຈາກຕ່າງປະເທດ ກໍຂຶ້ນເພາະວ່າ ເງິນກີບມັນອ່ອນຄ່າເດ້.” 

ໜີ້​ສິນ​ສາ​ທາ​ຣະ​ນະ ທີ່​ກູ້​ຢືມ​ມາ​ຈາກ​ຕ່າງ​ປະ​ເທດ ຈະ​ມີ​ຄວາມ​ສ່ຽງຕໍ່​ສະ​ພາບ ອັດ​ຕ​ຣາ​ແລກ​ປ່ຽນອ່ອນ​ຄ່າ ແລະ ແຂງ​ຄ່າ.

ເຈົ້າ​ໜ້າ​ທີ່ ຜູ້​ເຮັດ​ວຽກ​ດ້ານ​ການ​ເງິນ ທ່ານ​ນຶ່ງ ໄດ້​ກ່າວ​ວ່າ:

ກູ້ຢືມມາແລ້ວຣັບານເປັນໜີ້ ກູ້ຢືມທຶນດອກເບັ້ຽຕ່ຳເນາະ ຈາກທະນາຄານໂລກບໍ່ ຈາກທະນາຄານເອເຊັຽ ເພິ່ນກໍມີແຕ່ໃຊ້ 50 ປີ ຂຶ້ນເມືອ ກໍມີສ່ວນແຕ່ວ່າ ບໍ່ໜັກ ກໍຄືວ່າ ຖ້າຄ່າເງິນບໍ່ເໜັງຕີງຮອດ 25 ເປີເຊັນ ກໍບໍ່ໄລ່ຄືນເນາະ ເປັນລາຄາເກົ່າ ເພິ່ນກໍໃຊ້ຕາມອັນເກົ່າຫັ້ນນ່າ.”

ປະ​ເທດ​ລາວ ຍັງ​ມີ​ບັນ​ຫາ​ການ​ບໍ​ຣິ​ການ ​ຈັດ​ການ​ໜີ້​ສິນ​ສາ​ທະ​ຣະ​ນະ ແລະ ລະ​ບົບການ​ເກັບ​ລາຍ​ຮັບ ໃນ​ຂະ​ນະ​ທີ ທາງ​ກາ​ນ​ລາວ ໄດ້​ຮ່ວມ​ມື​ກັບ​ພາກ​ທຸ​ຣະກິ​ຈ ແລະເອ​ກ​ຊົນ ເພື່ອ​ຊອກ​ຫາ​ແນວ​ທາງ​ແກ້​ໄຂ​.

ເຈົ້າ​ໜ້າ​ທີ່ຜູ້​ເຮັດ​ວຽກ ​ດ້ານ​ການ​ເງິນ ທ່ານ​ນຶ່ງ ໄດ້​ກ່າວ​ວ່າ:  

ຣັກໍມີແນວທາງໃນການແກ້ໄຂບັນຫາດັ່ງກ່າວນີ້ຢູ່ຫຼາຍຢ່າງຢູ່ ບັນຫານີ້ ກໍຕ້ອງໄດ້ໃຊ້ເວລາໃນການສຶກສາແດ່.”  

ໃນ​ປີວັນ​ທີ 16 ກັນ​ຍາ 2021 ທ່ານ ບຸ​ນ​ເຫລືອ ສິນ​ໄຊ​ວໍ​ລະ​ວົງ ຮອງ​ຣັ​ຖ​ມົນ​ຕ​ຣີ ກະ​ຊວງ​ການ​ເງິນ ແລະ ທ່ານ​ ອາ​ເລັກ ເຄຣເມີ້ຣ໌ ຜູ້​ຕາງ​ໜ້າ​ທະ​ນາ​ຄານ​ໂລກ ປະ​ຈຳ​ລາວ ໄດ້​ຮ້ວມ​ກັນ​ປຶກ​ສາ​ຫາ​ລື ກ່ຽວ​ກັບ​ວຽກ​ງານໃນ​ການ​ພັ​ທ​ນາ​ຂ​ແນງ​ການ​ເງິນ ໂດຍ​ສະ​ເພາະ​ແຜນ​ຄຸ້ມ​ຄອງ​ການ​ເງິນພາກ​ຣັ​ຖ ຍ້ອນ​ປະ​ເທດ​ລາວປະ​ສົບ​ບັນ​ຫາກ່ຽວ​ກັບ​ການ​ຈັດ​ເກັບ​ລາຍ​ຮັບ ແລະ ການ​ຈັດ​ສັນ​ລາຍ​ຈ່າຍ ໃຫ້​ມີ​ຄວາມ​ສອດ​ຄ່ອງ​ກັນ.

ທີ່​ຜ່ານ​ມາ ກະ​ຊວງ​ການ​ເງິນ ໄດ້​ສ້າງ​ແຜນ​ປະ​ຕິ​ຮູບ ຂ​ແນງ​ການ​ເງິນ​ກ້າວ​ທຳ​ອິດ ເຊິ່ງໄດ້​ຮັບ​ການ​ທຶນ​ຊ່ວຍ​ເຫຼືອລ້າ​ ຈາກ​ຫະ​ພ​າບ​ຢູ່​ໂຣບ ໂດຍຜ່ານ​ທະ​ນາ​ຄານ​ໂລກຈຳ​ນວນ 5 ລ້ານ​ຢູ​ໂຣ ພາຍ​ໃຕ້​ໂຄງ​ການ​ປະ​ຕິ​ຮູບການບໍ​ຣິ​ຫານ​ເງິນ​ສາ​ທາ​ລະ​ນະ ເຊິ່ງ​ໄລ​ຍະ​ໂຄງ​ການ​ຮອດ​ເດືອນ​ມີ​ນາ 2022.

ນອກ​ຈາກນີ້ ລາວ​ຍັງ​ໄດ້​ຮັບ​ການເງິນ​ກູ້​ຢືມ​ຈາກ​ທະ​ນາ​ຄານ​ໂລກຈຳ​ນວນ 20 ລ້ານ​ໂດ​ລ້າຣ໌ ພາຍ​ໃນ​ໂຄງ​ການ​ປັບ​ປຸງ​ລະ​ບົບ​ ການ​ຄຸ້ມ​ຄອງ​ການ​ເງິນ​ແຫ່ງ​ຣັ​ຖ ໃຫ້​ມີ​ຄວາມ​ທັນ​ສ​ມັຍ ເຊິ່ງ​ໂຄງ​ການ​ຈະ​ດຳ​ເນີນ​ການ​ໄປ​ຈົນ​ຮອດ 2025 ເພື່ອ​ປັບ​ປຸງ​ຣະ​ບຽບ​ຄຸ້ມ​ຄອງ​ຂໍ້​ມູນ​ຂ່າວ​ສານ ການ​ເງິນ​ຂອງ​ປະ​ເທດ​ລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ