ຫຼາຍໂຄງການກໍ່ສ້າງເຊື່ອມຕໍ່ ຊາຍແດນຫວຽດນາມຖືກໂຈະ

ມາຮອດປັດຈຸບັນ ບາງໂຄງການດ້ານຄົມມະນາຄົມ ທີ່ເຊື່ອມຕໍ່ລະຫວ່າງ ລາວ-ຫວຽດນາມ ຍັງສືບຕໍ່ໂຈະການກໍ່ສ້າງ ແບບບໍ່ມີກໍານົດ ນຶ່ງໃນນັ້ນແມ່ນ ໂຄງການກໍ່ສ້າງ ທາງດ່ວນ ຈາກເມືອງຫົວເມືອງ ແຂວງຫົວພັນ ຫາຊາຍແດນຫວຽດນາມ ໄລຍະທີ 4 ຄວາມຍາວ 80 ກິໂລແມັດ ລະຫວ່າງ ລັດຖະບານລາວ ກັບ ບໍລິສັດ ດາວຈະເລີນ ກໍ່ສ້າງສ້ອມແປງຂົວ-ທາງ ແລະ ການຄ້າ ຈຳກັດຜູ້ດຽວ ແລະ ບໍລິສັດ ທີ ເຮັດບີ ກຣຸບ ຈຳກັດຜູ້ດຽວ ທີ່ໄດ້ເຊັນບົດບັນທຶກ ຄວາມເຂົ້າໃຈນໍາກັນເມື່ອປີ 2022 ແຕ່ປັດຈຸບັນ ກໍຍັງຖືກໂຈະຢູ່, ດັ່ງ ເຈົ້າໜ້າທີ່ຢູ່ແຂວງຫົວພັນ ທ່ານນຶ່ງ ກ່າວຕໍ່ວິທຍຸ ເອເຊັຍເສຣີ ໃນວັນທີ 8 ຕຸລາ ນີ້ວ່າ:

“ຄືວ່າເຂົາມີແຈ້ງການໂຈະ ຊິເປັນ ເອັ້ມໂອຍູເນາະ ສືກສາຄວາມເປັນໄປໄດ້ ເຂົາເຈົ້າ ມາສໍາຫລວດເບິ່ງແລ້ວເນາະ ເລື້ອງລົດພາຫະນະ ມັນໜ້ອຍເກີນໄປ ແລ້ວເພິ່ນລະໂຈະໄວ້ເຊື່ອຄາວ ການໂຈະນີ້ ຍັງບໍ່ທັນມີໜັງສືມາເທື່ອ ວ່າໂຈະຖາວອນນ່າ ກະມີແຕ່ວ່າເພິ່ນໂຈະ ສືກສາຄວາມເປັນໄປໄດ້.”

ໃນຂະນະດຽວກັນ ສໍາລັບໂຄງການກໍ່ສ້າງທາງດ່ວນ ຈາກນະຄອນຫລວງວຽງຈັນ-ແຂວງໄຊຍະບູນ-ແຂວງຊຽງຂວາງ-ແຂວງຫົວພັນ ເພື່ອເຊື່ອມຕໍ່ອອກໄປຍັງ ຊາຍແດນຫວຽດນາມນັ້ນ ກໍຍັງຖືກໂຈະຢູ່ ເຖິງແມ່ນວ່າແຜນການກໍ່ສ້າງ ໄດ້ກາຍເປັນເວລາ 3 ປີໄປແລ້ວກໍຕາມ ແຕ່ກໍຍັງຢູ່ໃນຂັ້ນຕອນ ການສໍາຫລວດ-ອອກແບບ ຢູ່ຄືເກົ່າ, ດັ່ງ ເຈົ້າໜ້າທີ່ພະແນກ ໂຍທາທິການ ແລະ ຂົນສົ່ງ ແຂວງຫົວພັນ ນາງນຶ່ງ ກ່າວວ່າ:

“ຍັງ ຍັງສໍາຫລວດ ເຂົາເຈົ້າຍັງສໍາຫລວດຢູ່ ເຈົ້າ ເຫັນເຂົາເຮັດໃບສະເໜີ ມາ ກໍາລັງສໍາຫລວດ ອອກແບບ.” 

ທາງດ້ານຊາວບ້ານ ຢູ່ແຂວງຫົວພັນ ທ່ານນຶ່ງ ກໍຢືນຍັນວ່າທັງ 2 ໂຄງການດັ່ງກ່າວ ຍັງບໍ່ທັນລົງມືກໍ່ສ້າງເທື່ອ ແລະ ກໍຍັງຫລ້າຊ້າຢູ່ຄືເກົ່າ ຍັງບໍ່ມີຂ່າວແຈ້ງໃຫ້ຊາວບ້ານຮັບຮູ້ ວ່າ ຈະສ້າງແທ້ ຫລື ບໍ່ສ້າງ ມີແຕ່ເຄີຍວັດແທກດິນຊາວບ້ານໄປແລ້ວ ແຕ່ກໍບໍ່ມີຄວາມຄືບໜ້າແນວໃດ

“ຍັງບໍ່ໄດ້ຍິນເພິ່ນຂ່າວວ່າຊິເຮັດ ແລະ ເຮັດມື້ໃດເນາະ ຄືໄດ້ຍິນແຕ່ປີກາຍ ແຕ່ວ່າປີນີ້ຍັງ ບໍ່ມີຄວາມຄືບໜ້າ ບໍ່ແນ່ໃຈວ່າຊິລົງ ມືເຮັດມື້ໃດເນາະ ເຂົາກໍວາງແຜນມາແຕ່ດົນແລ້ວ ແຕ່ວ່າບໍ່ແນ່ໃຈ ເພິ່ນຊິເຮັດແນວໃດ ເພິ່ນກໍໄດ້ແທກ ແລ້ວກໍໄດ້ອັນນັ້ນຄັກແນ່ແລ້ວເນາະ.” 

ກ່ອນໜ້ານີ້ ໃນລະຫວ່າງກອງປະຊຸມ ສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ 9 ທີ່ຜ່ານມາ ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ຊີ້ແຈງໃຫ້ ໂຄງການກໍ່ສ້າງທາງດ່ວນ ນະຄອນຫລວງວຽງຈັນ-ແຂວງຫົວພັນ ທີ່ມີຄວາມຫລ້າຊ້ານັ້ນວ່າ ເປັນຍ້ອນຂາດງົບປະມານ ສໍາລັບເຮັດ ການສືກສາ ແລະ ສໍາຫລວດຄວາມເປັນໄປໄດ້ ຈື່ງເຮັດໃຫ້ບໍ່ມີຄວາມຄືບໜ້າ.

ໃນຂະນະດຽວກັນ ສໍາລັບໂຄງການກໍ່ສ້າງເສັ້ນທາງລົດໄຟລາວ-ຫວຽດ ໄລຍະທາງ 150 ກິໂລແມັດ ຈາກເມືອງທ່າແຂກ ແຂວງຄໍາມ່ວນ ຫາຊາຍແດນວຽດນາມ ກໍ່ກໍາລັງຢູ່ໃນຂັ້ນຕອນ ສໍາຫລວດເນື້ອທີ່ ແລະ ຊົດເຊີຍ ຊາວບ້ານທີ່ຖືກຜົນກະທົບ ເຊິ່ງຍັງບໍ່ມີແຜນ ທີ່ຈະເລີ້ມກໍ່ສ້າງໃນໄວໆນີ້ ເຊັ່ນດຽວກັນ, ດັ່ງ ເຈົ້າໜ້າທີ່ແຂວງຄໍາມ່ວນ ທ່ານນຶ່ງກ່າວວ່າ:

“ໂອ ອັນນີ້ບໍ່ຮູ້ແນ່ນອນ ຂໍ້ມູນນີ້ ລົງມືກໍ່ສ້າງຍັງໍ່ຮູ້ ໂອ ປັດຈຸບັນ ເພິ່ນກໍາລັງເກັບກໍາຂໍ້ມູນຢູ່ ການຊົດເຊີຍຄອບຄົວ ຂອງປະຊາຊົນຖືກຜົນກະທົບ.” 

ສ່ວນຊາວບ້ານ ຢູ່ເມືອງທ່າແຂກ ທ່ານນຶ່ງ ກໍເຫັນວ່າ ໂຄງການກໍ່ສ້າງທາງລົດໄຟລາວ-ຫວຽດນາມ ກໍໄດ້ກວມເອົາ ດິນຊາວບ້ານ ຢູ່ເມືອງທ່າແຂກ ຈໍານວນຫລາຍຄອບຄົວ ແລະຍັງສືບຕໍ່ ສໍາຫລວດຢູ່ຕາມແລວທາງທີ່ຈະສ້າງລົດໄຟນັ້ນ ແຕ່ຍັງບໍ່ຮູ້ລາຍລະອຽດ ກ່ຽວກັບການຊົດເຊີຍນັ້ນເທື່ອ, ດັ່ງ ທ່ານກ່າວວ່າ:

“ອັນນີ້ມັນແຖວໃກ້ໆ ເຂດບ້ານຂ້ອຍນີ້ ແຖວກາຍຂົວ ຂ້າມແມ່ນ້ໍາຂອງອອກມາໜ້ອຍນຶ່ງເນາະ ແລ້ວກະມີແຖວຄ້າຍທະຫານ ໂພນສີທ່ານີ້ຍິ່ງຍາວໂພນສີທ່າ ພວກນີ້ຂຶ້ນໄປເລີຍ ໂພນສີທ່າ-ແກ້ງຍ່າງນີ້ ແຜນຂອງຂັ້ນເທິງເພິ່ນກໍານົດໄວ້.”

ກ່ອນໜ້ານີ້ ເມື່ອເດືອນ ສິງຫາ ປີ 2023 ບໍລິສັດ ປີໂຕຣລ້ຽມ ເທຣດດິ້ງລາວ ໄດ້ເຊັນສັນຍາ ກັບບໍລິສັດ ຢູຊິນ ເອັນຈິເນັຍລິ້ງ  ແລະ ບໍລິສັດ ວິສາຫະກິດ ລົດໄຟ ເກົາຫຼີ ໃຕ້ ເພື່ອສຶກສາ, ສໍາຣວດ, ອອກແບບລະອຽດ ແລະກໍ່ການສ້າງ ໂຄງການກໍ່ສ້າງທາງລົດໄຟ ລາວ-ຫວຽດນາມໄລຍະທີ 1 ເຊິ່ງຄາດວ່າ ຈະເລີ້ມລົງມືກໍ່ສ້າງ ໃນຕົ້ນປີ 2024 ນີ້ ແຕ່ມາຮອດປັດຈຸບັນ  ກໍ່ເກືອບຊິຮອດທ້າຍປີ ແລ້ວ ກໍຍັງບໍ່ທັນລົງມືກໍ່ສ້າງເທື່ອ.

ສໍາລັບໂຄງການ ດ້ານຄົມມະນາຄົມ ຂະນາດໃຫຍ່ໃນລາວ ທີ່ກ່ຽວຂ້ອງກັບວຽດນາມ ກໍໄດ້ເປີດໃຊ້ແລ້ວ ບາງໂຄງການ ໃນນັ້ນແມ່ນສະຫນາມບິນ ໜອງຄ້າງ ຢູ່ເມືອງຊໍາເໜືອ ທີ່ໄດ້ເປີດໃຊ້ ຕັ້ງແຕ່ເດືອນ ພືກສະພາ ປີ 2023 ເປັນຕົ້ນມາ ໂດຍກຸ່ມບໍລິສັດ ຮອງແອງ ຍາລາຍ ຂອງຫວຽດນາມ ໄດ້ລົງທຶນກໍ່ສ້າງທັງໝົດ 74 ລ້ານໂດລ່າສະຫະລັດ ຫລື ປະມານ 616 ຕື້ກີບ.