ການສລອງວັນ ຂອບຄຸນພຣະເຈົ້າ ຢູ່ ສປປ ລາວ

ສິດນີ້
2021-11-24
Share
ການສລອງວັນ ຂອບຄຸນພຣະເຈົ້າ ຢູ່ ສປປ ລາວ ຊາວຄາໂຕລິກລາວ, ວັນທີ່ 15 ເດືອນ ກັນຍາ 2018
RFA

ການສເລີມ ສລອງວັນຂອບຄຸນພຣະເຈົ້າ ຂອງຊາວຄຣິສຕຽນລາວ ໃນທົ່ວປະເທດຊຶ່ງກົງກັບວັນທີ 25 ພຶສຈິກາ ປີນີ້ ຈະຈັດຂຶ້ນຢ່າງຣຽບງ່າຍ ຍ້ອນບໍ່ສາມາດໂຮມກັນໄດ້ຫລາຍຄົນ  ເພື່ອປະຕິບັດຕາມມາຕການປ້ອງກັນໂຄວິດ-19  ບາງທ້ອງຖິ່ນຈະຈັດພິທີ ສເລີມສລອງວັນຂອບຄຸນ ພຣະເຈົ້າໃນໂບດ ແຕ່ຕ້ອງມີການຈຳກັດຜູ້ຮ່ວມງານ ແຕ່ສ່ວນໃຫຍ່ຈະຈັດພາຍໃນຄອບຄົວ ຫລືຜ່ານສື່ສັງຄົມອອນລາຍນ໌ ດັ່ງຊາວ ຄຣິສຕຽນ ແຂວງຫລວງພຣະບາງ ທ່ານນຶ່ງກ່າວຕໍ່ເອເຊັຽເສຣີໃນວັນທີ 24 ພຶສຈິການີ້ວ່າ:

ຈັດຢູ່ເຮືອນໂຕເອງກໍມີ ແລ້ວແຕ່ບາງຄຣິສຕະຈັກ ກະອາດຈະຈັດຢູ່ໂບດ ມີແຕ່ລະຫວ່າງຜູ້ນຳ ແຕ່ວ່າຈຳກັດຈຳນວນຄົນ ບໍ່ໃຫ້ເກີນ 20 ຄົນ ຈຳກັດຈຳນວນຄົນຮ່ວມເນາະ ແລ້ວກະຮັກສາໄລຍະຫ່າງ ມີບາງກຸ່ມທີ່ຂະເຈົ້າຈະເຮັດທາງອອນລາຍ

ທ່ານກ່າວຕື່ມວ່າ ປີນີ້ຖືວ່າພຣະເຈົ້າໄດ້ໃຫ້ພອນ ແກ່ຊາວຄຣິສຕຽນລາວຫລາຍຄົນ ໃຫ້ມີສຸຂພາບຄວາມເປັນຢູ່ຢ່າງຮົ່ມເຢັນ ທັງອາຫານຫານກິນ ການກະເສດແລະການລ້ຽງສັດໃນ ຂນະທີ່ບັນຫາຊາວຄຣິສຕຽນລາວຖືກຂົ່ມເຫັງໃນເຂດທ້ອງຖິ່ນນັ້ນ ກໍເຫັນວ່າຫລຸດລົງຫລາຍແລ້ວ ແຕ່ກໍຍັງມີບາງບ້ານ ທີ່ເຈົ້າຫນ້າທີ່ຂັ້ນບ້ານ ຍັງຂົ່ມເຫັງຊາວຄຣິສຕຽນຢູ່ ຍ້ອນບໍ່ພໍໃຈທີ່ເຂົາເຈົ້າປະລະ ການເຊື່ອຖືບັນພະບຸຣຸດ ແລ້ວຫັນໄປເຊື່ອຖືສາສນາຄຣິສຕຽນແທນ.

ໃນຂນະທີ່ຊາວຄຣິສຕຽນລາວ ຢູ່ແຂວງວຽງຈັນ ນາງນື່ງກ່າວວ່າ ສຳລັບການຈັດພິທີ ວັນຂອບຄຸນພຣະເຈົ້າໃນເຂດທອ້ງຖິ່ນທີ່ນາງອາສັຍຢູ່ນັ້ນ ກໍຈະຈັດຂຶ້ນແບບ ຣຽບງ່າຍເຫມືອນກັນໃນປີນີ້ ສວ່ນໃຫຍ່ຈະຈັດຂຶ້ນໃນຄອບຄົວ ຍ້ອນປະຕິບັດມາຕການ ປ້ອງກັນໂຄວິດ-19 ດັ່ງນາງເວົ້າວ່າ:

ວັນຂອບຄຸນພຣະເຈົ້າ ກະຄັນຊີ່ເວົ້າຂອບຄຸນ ມັນແລ້ວແຕ່ຂອງຄົວໃຜຄອບຄົວລາວ ມັນແລ້ວແຕ່ຄົນ ແມ່ນເຮັດຕາມເຮືອນ ບໍ່ໄດ້ເຮັດໃນໂບດ ໃນໂບດກໍມີແຕ່ຄຣິສມາສ ແບບນີ້ປະມານນີ້ຫັ້ນນ່າ

ຊາວຄຣິສຕຽນອີກທ່ານນຶ່ງ ຢູ່ແຂວງວຽງຈັນ ກໍກ່າວແບບດຽວກັນວ່າ ຊາວຄຣິສຕຽນຢູ່ແຂວງວຽງຈັນ ກໍຈະຈັດພິທີວັນຂອບຄຸນພຣະເຈົ້າ ພາຍໃນຄອບຄົວຫລາຍກວ່າ ໃນປີນີ້ແລະຫລີກລຽງການໄປໂບດ ແລະຈະບໍ່ໄດ້ເຊີນເຈົ້າໜ້າທີ່ ເຂົ້າຮ່ວມງານ ເຫມືອນດັ່ງທີ່ຜ່ານມາ.

ງານຂອບຄຸນພຣະເຈົ້າຫັ້ນຫວ່າ ໂອ ຢູ່ໃນໂບດພວກເຮົານີ້້ ທີ່ຜ່ານມາຫັ້ນເຄີຍຈັດຢູ່ ແຕ່ວ່າຄືຊີ່ບໍ່ໄດ້ຈັດ ປີນີ້ ຍຸ້ງຍາກຫລາຍ ຍ້ອນພະຍາດໂຄວິດ-19 ຫັ້ນນ່າ

ຊາວຄຣີສຕຽນລາວຢູ່ແຂວງສາຣະວັນກ່າວວ່າ ການສເລີມສລອງວັນຂອບຄຸນ ພຣະເຈົ້າໃນປີນີ້ ສ່ວນຫລາຍຈະຈັດໃນຄອບຄົວຫລາຍກວ່າ  ພາຍຫລັງທີ່ເຈົ້່າໜ້າທີ່ ຂັ້ນເມືອງ ຂັ້ນບ້ານອະນຸບາດໃຫ້ຈັດພິທີໄດ້ ແຕ່ບໍ່ໃຫ້ມີການເຕົ້າໂຮມກັນ ຫລາຍຄົນ ດ່ັງ ທ່ານເວົ້າວ່າ:

ກະມີຫລາຍຢູ່ເຂົາຜ່ອນຜັນເບາະ ງານອີ່ຫຍັງ ງານຂອບຄຸນພຣະເຈົ້າ ງານດອງ ງານປົງສົບ ງານອື່ນໆ ໄປຢ້ຽມຢາມກະໄດ້ຢູ່ ບໍ່ມີໃຜຂັດແຍ່ງດອກ

ສ່ວນຄຣູສອນ ສາສນາຄຣີສຕຽນໃນລາວ ທ່ານນຶ່ງກ່າວວ່າ ການັຈດພີທີວັນຂອບຄຸນພຣະເຈົ້າ ຂອງຊາວຄຣິສຕຽນລາວ ໃນປີນີ້ ຍັງຢູ່ໃນພາຍໃຕ້ການຄວບຄຸມ ມາຕການປ້ອງກັນໂຄວິດ-19 ຢູ່ ຈຶ່ງເຮັດໃຫ້ການສເລີມສລອງ ໃນຫລາຍພື້ນທີ່ຈະບໍ່ຄຶກຄັກປານໃດ ຍ້ອນຍັງມີຫານປິດບ້ານ ປິດເມືອງໃນຫລາຍເຂດຢູ່ ເຮັດໃຫ້ບໍ່ສາມາດເດີນທາງ ໄປມາຫາກັນໄດ້.

ຈັດຢູ່ເຮືອນເຂົາ ເຂົາຊີເຮັດຢູ່ບ້ານເຂົາເອງ ທາງບ້ານຫັ້ນມັນມີການກີດຂວາງ ສອງມາກະພຍາດ ພີ່ນ້ອງຕິດເຊື້ອໃໝ່ໆ ຜູ້ເປັນໄຂ້ກະຢູ່ດີມີແຮງ ດຽວນີ້ເພີ່ນກະຊີ່ຈັດງານ

ກ່ຽວກັບເຣື່ອງນີ້ ເຈົ້າໜ້າທີ່ແນວລາວສ້າງຊາດ ທ່ານນຶ່ງເວົາວ່າ ທາງສູນກາງແນວລາວສ້າງຊາດ ກໍອະນຸຍາດໃຫ້ຊາວຄຣິສຕຽນລາວ ສາມາດຈັດງານວັນຂອບຄຸນພຣະເຈົ້າ ໄປຕາມປັກກະຕິ ຕາມຄວາມເຊື່ອຂອງຊາວຄຣິສຕຽນ ໂດຍຂໍຄວາມຮ່ວມມືໃຫ້ຈັດພິທີພາຍໃຕ້ ມາຕການຄວບຄຸມໂຄວິດ-19 ຢູ່ງເຄັ່ງຄັດ.

ວັນຂອບຄຸນພຣະເຈົ້າ ເປັນວັນຊາວຄຣິສຕຽນອາເມຣິກັນ ຣຳລຶກເຖິງບຸນຄຸນຂອງພຣະຜູ້ທີ່ຊ່ອຍໃຫ້ບັນພຣະບຸຣຸດພວກເຂົາເຈົ້າ ອົພຍົບມາຕັ້ງຖິ່ນຖານຢູ່ປະເທດສະຫະຣັັຖອະເມຣິກາ ເປັນຊຸດທຳອິດ ເມືອປະມານ 400 ຜີຜ່ານມາ ໂດຍຈະສເລີມສລອງກັນໃນວັນພະຫັດຂອງສັປດາທີ 4 ເດືອນພຶສຈິກາ ແຕ່ລະປີ ແຕ່ໃນປີນີ້ ຈະຕົງກັບວັນທີ 25 ພຶສຈິກາ.

ນອກຈາກນີ້ແລ້ວ ຍັງມີວັນຄຣິສມາສ ທີ່ເປັນວັນສຳຄັນ ຂອງສາສນາຄຣິສຕຽນໃນທົ່ວໂລກ ຮວມທັງຊາວຄຣິສຕຽນລາວ ຊື່ງມັກຈັດພິທີສເລີມ ສລອງບຸນຄຣິສມາສກັນໃນແຕ່ລະປີ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ