ໂຈນເລາະລັກເຄື່ອງ ໃນຍາມລ໊ອກດາວ

ໄຊຍາ
2021-09-29
Share
ໂຈນເລາະລັກເຄື່ອງ ໃນຍາມລ໊ອກດາວ ທາງຣົດໄຟ ລາວ-ຈີນ ເຂດນະຄອນຫຼວງວຽງຈັນ ທີ່ ມີຮົ້ວເຫຼັກລຽບໄປຕາມເສັ້ນທາງ ທັງສອງຟາກຂ້າງ.
ພາບປະກອບ: ນັກຂ່າວພົລເມືອງ

ໃນໄລຍະທີ່ ນະຄອນຫຼວງວຽງຈັນ ມີການຣະບາດໃນຊຸມຊົນ ຢ່າງໜັກໜ່ວງ. ທາງການໄດ້ໃຊ້ມາຕການລ໊ອກດາວທີ່ເຂັ້ມງວດ ເພື່ອ ຄວບຄຸມສະຖານະການ ການຣະບາດ. ແຕ່ປະກົດການນຶ່ງ ທີ່ເກີດຂຶ້ນໃນໄລຍະນີ້ ກໍຄືການຂີ້ລັກງັດແງະ ເຄື່ອງຂອງປະຊາຊົນ ຕາມ ບ້ານຕ່າງໆ ຮວມໄປເຖິງສະຖານທີ່ທີ່ສຳຄັນ ຂອງປະເທດ ເຊັ່ນໂຄງການກໍ່ສ້າງ ທາງຣົດໄຟລາວ-ຈີນ. ດັ່ງເຈົ້າໜ້າທີ່ທ້ອງຖິ່ນ ເມືອງ ຫາດຊາຍຟອງ ທີ່ຮັບຜິດຊອບດຳເນີນຄະດີ ກ່າວຕໍ່ວິທຍຸເອເຊັຽເສຣີ ໃນວັນທີ 28 ກັນຍາ 2021 ນີ້ວ່າ:

"ແມ່ນ ບໍ່ແມ່ນຄົນເຂດເຮົາເນາະ ເປັນຄົນກັມມະກອນ ມາເຮັດວຽກຢູ່ພວກຣົດໄຟລາວ-ຈີນ ບ້ານເຮົາຫັ້ນ ມີໜ່ວຍ ປກສ ປກຊ ເນາະ ຮັກສາຄວາມສງົບພາຍ ໃນບ້ານເຮົານີ້ແຫຼະ ຄັນມີສະພາບອັນໃດເກີດຂຶ້ນ ກໍແມ່ນຣາຍງານເຈົ້າໜ້າທີ່.”

ທ່ານໄດ້ກ່າວຕື່ມວ່າ ເມື່ອວັນທີ 24 ກັນຍາ 2021 ເຈົ້າໜ້າທີ່ຕຳຣວດໄດ້ກັກໂຕຜູ້ລັກຊັບ ທາງຣົດໄຟລາວ-ຈີນ ຊື່ວ່າ ທ້າວ ອາມີ ອາຍຸ 22 ປີ ຢູ່ບ້ານ ທົ່ງເໝືອດ ເມືອງກາສີ ແຂວງວຽງຈັນ ຜູ້ກ່ຽວ ໄດ້ມາເຊົ່າຫ້ອງແຖວ ຢູ່ບ້ານດົງໂພສີ ເມືອງຫາດ ຊາຍຟອງ ນະຄອນຫຼວງວຽງຈັນ. ຕາມການຣາຍງານພົບຂອງກາງ ເຫຼັກຂໍ້ຕໍ່ຫຼັກລານ 147 ອັນ, ນ໋ອດຈັບຕີນຣົດໄຟ 39 ອັນ ແລະ ກໍໄດ້ ນຳເອົາຜູ້ກ່ຽວ ໄປດຳເນີນຄະດີຕາມກົດໝາຍແລ້ວ.

ໃນໄລຍະນີ້ ເຖິງແມ່ນວ່າ ຈະມີການປະກາດລ໊ອກດາວ ຢ່າງເຂັ້ມງວດ ແຕ່ກຸ່ມຄົນຂີ້ລັກ ກໍຍັງອອກເຄື່ອນໄຫວ ລັກເຄື່ອງຂອງຊາວ ບ້ານ ຢູ່ເປັນຈຳ ອັນໃດທີ່ລັກໄດ້ງ່າຍ ເຂົາກໍລັກໄປ ບໍ່ວ່າຈະເປັນ ເປັດ ໄກ່ ແບ້ ແລະ ໄມ້ ຕາມຫົວໄຮ່ ປາຍນາຂອງປະຊາຊົນ ກໍຖືກລັກເອົາໝົດ. ໂດຍເຈົ້າໜ້າທີ່ ເມືອງນາຊາຍທອງ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 28 ກັນຍາ ວ່າ:

"ເຣື່ອງຂີ້ລັກນີ້ ໂອຍຍັງຫຼາຍ ມັນຍາມເຈົ້າໜ້າທີ່ ບໍ່ແມ່ນເຈົ້າໜ້າທີ່ຍາມມັນ ເຈົ້າທີ່ເຜີ ມັນຫຼອຍໂລດ ເຈົ້າໜ້າທີ່ ຖືວ່າຢູ່ກາຢູ່ເປັນຈຸດ ເຂົາຮູ້ທາງໄປພວກທີ່ວ່າບໍ່ມີວຽກເຮັດງານທໍາ ພວກວັຍລຸ້ນນີ້ແຫຼະນ່າ ດຽວນີ້ມັນກໍລັກຂອງປະຊາຊົນແຫຼະ ໂຕແບ້ບໍ ໂຕງົວ ໂຕເປັດ ໂຕໄກ່ ໄມ້ຫົວໄຮ່ ປາຍນາຂອງປະຊາຊົນ ບ່ອນໃດໄມ້ດູ່ ໄມ້ຫຍັງຫັ້ນນ່າເຂົາໄປເລາະລັກແນວນັ້ນ ຕາມມີຂໍ້ມູນຂ່າວ ແຕ່ລະອາທິດນີ້ ມີຄັນຈັບໄດ້ກໍໃສ່ຄຸກແລ້ວຜ່ານມາ ຈັບໄດ້ກໍໃສ່ຄຸກ.”

ສ່ວນປະຊາຊົນ ໃນນະຄອນຫຼວງວຽງຈັນ ໄດ້ໃຫ້ຄຳເຫັນວ່າ ໃນໄລຍະລ໊ອກດາວ ຫຼາຍຄົນ ບໍ່ມີວຽກເຮັດ ກໍຈຳເປັນຕ້ອງໄດ້ລັກເຄື່ອງ ຂອງຄົນອື່ນ. ພ້ອມນີ້ ໄລຍະນີ້ເຈົ້າໜ້າທີ່ກໍຕ້ອງໄດ້ກວດຢູ່ຕາມຈຸດ ເຂົ້າ-ອອກ ຕາມມາຕການລ໊ອກດາວ ຈຶ່ງເຮັດໃຫ້ກຸ່ມຄົນຂີ້ລັກ ສວຍໂອກາດໃນຍາມນີ້:

"ແມ່ນໜ້າຈະມີ ເພາະເຂົາເຈົ້າຕົກວຽກຕົກງານແດ່ ບໍ່ມີວຽກເຮັດແດ່ເຈົ້າໜ້າທີ່ສ່ວນຫຼາຍ ຍ່າງກວດກາຫັ້ນບໍ່ມີ ແຕ່ວ່າອາຈມີເປັນຈຸດ ຈຸດບ້ານ ມີແຕ່ປ້ອງກັນຕົນເອງ.”

ສ່ວນຊາວບ້ານອີກຄົນນຶ່ງ ໄດ້ກ່າວວ່າ ຄົນຂີ້ລັກອາຈເພີ່ມຫຼາຍຂຶ້ນ ຍ້ອນວ່າວັຍໜຸ່ມພວກ ທີ່ຕິດຢາເສບຕິດສ່ວນຫຼາຍ ມັກຈະເລາະ ລັກເອົາເຄື່ອງຂອງຊາວບ້ານ ເພື່ອເອົາໄປຂາຍເອົາ ເງິນ ແລະ ຊື້ຢາເສບຕິດມາເສບ:

"ກາຊິເຣີ້ມຄືວ່າ ເຣີ້ມມີໂຈນຫັ້ນແຫຼະ ມັນຊິຫຼາຍຂຶ້ນ ດຽວນີ້ວັຍຣຸ້ນພວກເສບຢານີ້ ມັນຫາກມັກລັກ ດຽວນີ້ການຕິດຕໍ່ກັນ ການໄປ ການມາ ມັນກາໄປບໍ່ໄດ້ທໍາມາຫາກິນ ກໍບໍ່ມີທາງຈະໄປມັນໄປບໍ່ໄດ້.”

ສຳລັບສະຖານະການ ການຣະບາດ ຂອງເຊື້ອພຍາດໂຄວິດ-19 ປະຈຳວັນທີ 28 ກັນຍາ 2021 ທາງຄະນະສະເພາະກິຈຄວບຄຸມ ເຊື້ອໂຄວິດ-19 ໄດ້ຖແລງວ່າ ກວດພົບຜູ້ຕິດເຊື້ອ ໃໝ່ເພີ່ມ 500 ຄົນ ຈາກຜົລຂອງການກວດ ຫາເຊື້ອໃນວັນທີ 27 ກັນຍາ ທັງໝົດ 5,911 ຄົນ. ດັ່ງ ດຣ ສີສະຫວາດ ສຸດທານີລະໄຊ ຮອງຫົວໜ້າ ກົມຄວບຄຸມ ພຍາດຕິດຕໍ່ ກະຊວງສາທາຣະນະສຸຂ ໄດ້ຖແລງ ໃນວັນທີ 28 ກັນຍາ 2021 ບາງຕອນໄດ້ກ່າວວ່າ:

"ໄດ້ກວດວິເຄາະ ຫາໂຕຢ່າງທັງໝົດ 5,911 ຄົນ ກວດພົບຜູ້ຕິດເຊື້ອ ໃໝ່ 500 ຄົນ ເຊິ່ງແຍກເປັນກໍຣະນີນຳເຂົ້າ ແມ່ນມີ 29 ຄົນ ສຳລັບການຕິດເຊື້ອໃນຊຸມຊົນ ແມ່ນມີສູງເຖິງ 471 ຄົນ.”

ທ່ານໄດ້ຖແລງຕື່ມວ່າ ໃນຈຳນວນຜູ້ຕິດເຊື້ອ ມີກໍຣະນີນຳເຂົ້າ 29 ຄົນ ນະຄອນຫຼວງວຽງຈັນ 6 ຄົນ, ແຂວງສວັນນະເຂດ 20 ຄົນ ແລະ ແຂວງຈຳປາສັກ 3 ຄົນ. ສ່ວນຜູ້ຕິດ ເຊື້ອໃນຊຸມຊົນມີເຖິງ 471 ຄົນ ໃນນີ້ ນະຄອນຫຼວງວຽງຈັນ ສູງກວ່າໝູ່ 363 ຄົນ, ແຂວງ ບໍ່ແກ້ວ 7 ຄົນ, ແຂວງຫຼວງພຣະບາງ 29 ຄົນ, ແຂວງຊຽງຂວາງ 1 ຄົນ, ແຂວງວຽງຈັນ 12 ຄົນ, ແຂວງບໍລິຄຳໄຊ 3 ຄົນ, ແຂວງໄຊສົມບູນ 13 ຄົນ, ແຂວງຄຳມ່ວນ 19 ຄົນ, ແຂວງສວັນນະເຂດ 7 ຄົນ, ແຂວງສາຣະວັນ 1 ຄົນ ແລະ ແຂວງ ຈຳປາສັກ 16 ຄົນ.

ປັດຈຸບັນ ມີຜູ້ໄດ້ຮັບການກວດຫາເຊື້ອທັງໝົດ 566,384 ຄົນ, ມີຜູ້ຕິດເຊື້ອສະສົມທັງໝົດ 22,941 ຄົນ, ປິ່ນປົວເຊົາ 17,837 ຄົນ, ກຳລັງປິ່ນປົວ 5,088 ຄົນ ແລະ ເສັຽຊີວິດສະ ສົມ 16 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ