ໂຄງການທາງລົດໄຟ ວຽງຈັນ-ທ່າເຮືອຫວຸ໋ງອ໋າງ ບໍ່ຄືບໜ້າ ຍ້ອນຂາດງົບປະມານ

ຕະຫຼອດຫຼາຍປີມານີ້ ລັດຖະບານລາວ ມີຄວາມພະຍາຍາມ ທີ່ຈະພັດທະນາໂຄງການທາງດ່ວນ ວຽງຈັນ-ຮາໂນ້ຍ ໄລຍະທາງ 700 ປາຍກິໂລແມັດ ແລະໂຄງການ ເສັ້ນທາງລົດໄຟ ວຽງຈັນ-ທ່າເຮືອ ຫວຸ໋ງອ໋າງ ໄລຍະທາງ 550 ປາຍກິໂລແມັດ ແຕ່ມາຮອດດຽວນີ້ ທັງ 2 ໂຄງການ ກະຍັງບໍ່ມີຄວາມຄືບໜ້າ ຍ້ອນບໍ່ມີງົບປະມານລົງທຶນ, ດັ່ງເຈົ້າໜ້າທີ່ ກະຊວງໂຍທາທິການ ແລະຂົນສົ່ງ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 18 ຕຸລາ ນີ້ວ່າ:

“ຄວາມຄືບໜ້າບໍ່ທັນມີ ເອົາເງິນມາແຕ່ໃສນ້ອງເອີຍ ເຂົາວ່າຊິຕໍ່ MOU ຕໍ່ໄປ EIA ເຂົາກະວ່າ ເບື້ອງຕົ້ນ ເຂົາແລ້ວໆ ເຈົ້າບໍ່ເຮັດຫຍັງ ສົມມຸດວ່າ ມັນກະຄາແລ້ວເນາະ ມັນກະເປັນການກົດໜ່ວງຖ່ວງດືງ ການພັດທະນາ ເຮັດບໍ່ໄດ້ແລ້ວເຈົ້າກະຍອມ ກະໃຫ້ບໍລິສັດອື່ນເຂົ້າມາເຮັດ PTL ເຂົາກະມີບັນຫາເລື່ອງເງິນຫັ້ນແລ້ວ ເຂົາຊິກູ້ໃສມາກ່ອນ ໂຕນັ້ນຫັ້ນສໍາຄັນ ໃຜຊິໃຫ້ເຈົ້າ ລະເງິນເປັນ 2-3 ພັນລ້ານໂດລ້າ.”

ທ່ານກ່າວອີກວ່າ ເມື່ອປີ 2023 ທີ່ຜ່ານມາ ທ່ານ ຈັນທອນ ສິດທິໄຊ ປະທານບໍລິສັດ ປິໂຕລ້ຽມ ເທດດີ້ງ ມະຫາຊົນ ຫຼື PTL ຜູ້ໄດ້ຮັບສໍາປະທານ ຈາກລັດຖະບານລາວ ໃຫ້ເປັນຜູ້ພັດທະນາໂຄງການ ເສັ້ນທາງລົດໄຟວຽງຈັນ-ທ່າເຮືອ ຫວຸ໋ງອ໋າງ ກະຢັ້ງຢືນວ່າ ໃນຕົ້ນປີ 2024 ຈະເລີ່ມດໍາເນີນການກໍ່ສ້າງທັນທີ.

ໃນປີດຽວກັນນັ້ນ ບໍລິສັດ ປິໂຕລ້ຽມ ເທດດີ້ງ ໄດ້ເຊັນສັນຍາ ກັບ ບໍລິສັດ Yooshin Engineering Corporation ແລະບໍລິສັດ Korea National Railway ຈາກປະເທດເກົາຫຼີໃຕ້ ເພື່ອສຶກສາ, ສໍາຫຼວດ ແລະອອກແບບໂຄງການລະອຽດ ເຊິ່ງປັດຈຸບັນ ກະສໍາເລັດໝົດແລ້ວ ແຕ່ສຸດທ້າຍ ກະບໍ່ມີຄວາມຄືບໜ້າໃດໆ ເນື່ອງຈາກລັດຖະບານລາວ ແລະບໍລິສັດ ປິໂຕລ້ຽມ ເທດດີ້ງ ບໍ່ສາມາດເຈລະຈາ ກູ້ຢືມເງິນມາລົງທຶນໄດ້.

ທາງດ້ານເຈົ້າໜ້າທີ່ ຫ້ອງການປົກຄອງເມືອງທ່າແຂກ ແຂວງຄໍາມ່ວນ ກ່າວວ່າ ເມື່ອປີ 2023 ທີ່ຜ່ານມາ ບໍລິສັດຜູ້ພັດທະນາໂຄງການ ເສັ້ນທາງລົດໄຟວຽງຈັນ-ທ່າເຮືອ ຫວຸ໋ງອ໋າງ ໄດ້ເຂົ້າມາສໍາຫຼວດ ແລະອອກແບບເສັ້ນທາງໄປແລ້ວ ແຕ່ປັດຈຸບັນ ຍັງບໍ່ມີລາຍງານລະອຽດອອກມາເທື່ອ ເຮັດໃຫ້ທາງການແຂວງ ແລະປະຊາຊົນລາວ ໃນແຂວງຄໍາມ່ວນ ຍັງບໍ່ທັນຮູ້ວ່າ ຈະໄດ້ຮັບຜົນກະທົບ ຫຼາຍ-ໜ້ອຍເທົ່າໃດ, ດັ່ງເຈົ້າໜ້າທີ່ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເພິ່ນກະອີງໃສ່ ບໍລິສັດ ຫຼືວ່າ ໂຄງການ ທີ່ຮັບກໍ່ສ້າງຫັ້ນ ຍັງບໍ່ແຈ້ງຕອບມາ ມັນຖືກຜົນກະທົບຈັກຫຼັງຄາເຮືອນ ຈັກບ້ານ ເພິ່ນຍັງບໍ່ໄດ້ແຈ້ງຫາທາງເມືອງ.”

ຊາວລາວທ່ານໜຶ່ງ ໃນນະຄອນຫຼວງວຽງຈັນ ກ່າວວ່າ ການພັດທະນາ ທັງ 2 ໂຄງການຂະໜາດໃຫຍ່ນີ້ ຫາກບໍ່ແມ່ນງົບປະມານ ຂອງລັດຖະບານລາວ ຫຼື ບໍລິສັດເອກະຊົນພາຍໃນ ເປັນຜູ້ລົງທຶນດ້ວຍໂຕເອງ ກະອາດຈະເຮັດໃຫ້ລັດຖະບານລາວ ພະເຊີນກັບບັນຫາໜີ້ສິນເພີ່ມຂຶ້ນ ບໍ່ຄຸ້ມຄ່າທີ່ຈະລົງທຶນ ເລື່ອງສິດ-ຜົນປະໂຫຍດທີ່ຈະໄດ້ຮັບມານັ້ນ ກະຢູ່ໃນສັດສ່ວນທີ່ໜ້ອຍຫຼາຍ ຈະເຫັນໄດ້ຈາກ ໂຄງການເສັ້ນທາງລົດໄຟລາວ-ຈີນ ໃນປັດຈຸບັນ, ດັ່ງຊາວລາວ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຕາມຄວາມເປັນຈິງນີ້ ເລື່ອງການສ້າງທາງ ພົວພັນເລື່ອງການຄົມມະນາຄົມນີ້ ຄັນເວົ້າມາແລ້ວ ສິດຜົນປະໂຫຍດທີ່ເຮົາຈະໄດ້ຮັບນີ້ ແມ່ນໜ້ອຍຫຼາຍ ແລ້ວບາດນີ້ ຄັນຖ້າວ່າເຮັດ ມັນກະບໍ່ຕ່າງຫຍັງ ກັບເສັ້ນທາງ ລົດໄຟດຽວນີ້ຫັ້ນແຫຼະ (ລົດໄຟລາວ-ຈີນ).”

ເຈົ້າໜ້າທີ່ທະນາຄານ ພັດທະນາອາຊີ ຫຼື ADB ປະຈໍາລາວ ກ່າວວ່າ ທັງ 2 ໂຄງການຂະໜາດໃຫຍ່ ມີໂອກາດທີ່ຈະເກີດໄດ້ ຫາກລັດຖະບານລາວ ແລະບໍລິສັດຜູ້ຮ່ວມທຶນ ມີງົບປະມານພຽງພໍ ເພາະໂຄງການດັ່ງກ່າວ ຈະຊ່ອຍຊຸກຍູ້ ແລະພັດທະນາເສດຖະກິດໃນລາວ ແລະພາກພື້ນ ໃຫ້ເກີດການຂະຫຍາຍໂຕຂຶ້ນ ແຕ່ມາເບິ່ງໂດຍລວມແລ້ວ ທັງ 2 ໂຄງການ ຍັງບໍ່ທັນເປັນຮູບປະທໍາເທື່ອ ໂດຍສະເພາະ ເລື່ອງຂອງບໍລິສັດຜູ້ຮ່ວມລົງທຶນ ແລະງົບປະມານລົງທຶນ, ດັ່ງເຈົ້າໜ້າທີ່ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ລາວກະມີ ທ່າເຮືອຫວຸ໋ງອ໋າງ ແລ້ວກະຈະມີການຂະຫຍາຍທາງດ່ວນໄປຮາໂນ່ຍ ແຕ່ກະວາງຮາກຖານໄປຊັ້ນແຫຼະ ແລ້ວບາດນີ້ ການມາລົງທຶນນີ້ ມັນຍັງບໍ່ໜັກແໜ້າ ກະມີໂອກາດ ຄັນເຂົາມີເງິນ ມັນກະຮ່ວມມືອັນໃດໜຶ່ງ ຊິຍັງບໍ່ເປັນ ເບິ່ງບໍ່ເປັນຮູບປະທໍາຫຼາຍເທົ່າໃດ.”

ສໍາລັບໂຄງການທາງດ່ວນ ວຽງຈັນ-ຮາໂນ້ຍ ລວມໄລຍະທາງ 700 ປາຍກິໂລແມັດ ມູນຄ່າການລົງທຶນປະມານ 6.1 ຕື້ໂດລ້າສະຫະລັດ ປັດຈຸບັນ ພວມຢູ່ລະຫວ່າງ ການສຶກສາ-ອອກແບບລາຍລະອຽດ ແລະຊອກຫາແຫຼ່ງທຶນ ບໍ່ທັນສໍາເລັດເທື່ອ.

ສໍາລັບໂຄງການ ເສັ້ນທາງລົດໄຟລາວ-ຫວຽດນາມ ຈະມີມູນຄ່າການລົງທຶນ ທັງໝົດ ປະມານ 6.3 ຕື້ໂດລ້າສະຫະລັດ ມີໄລຍະທາງຍາວປະມານ 500 ປາຍກິໂລແມັດ ຈາກນະຄອນຫຼວງວຽງຈັນ ໄປຫາທ່າເຮືອ ຫວຸ໋ງອ໋າງ ປະເທດຫວຽດນາມ ແຍກເປັນສອງສ່ວນ ຄື ສະເພາະຝັ່ງປະເທດລາວ ໄລຍະທາງ 460 ປາຍກິໂລແມັດ ແລະຝັ່ງຫວຽດນາມ ໄລຍະທາງ 100 ປາຍກິໂລແມັດ.