ໂຮງງານຫຼາຍແຫ່ງ ໃນເຂດເສດຖະກິດພິເສດ ຂາດເຂີນຄົນງານຫຼາຍພັນຄົນ

ໂຮງຈັກ-ໂຮງງານ ຂອງຫຼາຍບໍລິສັດ ຢູ່ເຂດເສດຖະກິດພິເສດ ທີ່ນະຄອນຫຼວງວຽງຈັນ, ແຂວງສະຫວັນນະເຂດ ແລະຈໍາປາສັກ ໃນປັດຈຸບັນ ຍັງຕ້ອງການຄົນງານລາວຫຼາຍ ເຊັ່ນບໍລິສັດ ເປເຕີ ເຄື່ອງນຸ່ງລາວຈໍາກັດຂອງຈີນ ຢູ່ເຂດເສດ ຖະກິດພິເສດ ໃນນະຄອນຫຼວງວຽງຈັນ ບໍລິສັດດຽວ ຊຶ່ງໃນຂະນະນີ້ ມີຄົນງານຢູ່ປະມານ 1,000 ຄົນ ກໍຍັງຕ້ອງການຕື່ມອີກປະມານ 5,000 ຄົນ ແລະວ່າ ດຽວນີ້ ມີໂຮງງານເປີດຂຶ້ນຫຼາຍ ໂຮງງານໃດກໍຕ້ອງການຄົນງານ, ອີງຕາມຄໍາເວົ້າຂອງພະນັກງານບໍລິສັດດັ່ງກ່າວ ຕໍ່ວິທຍຸເອເຊັຍເສຣີ ໃນວັນທີ 15 ພະຈິກນີ້.

“ເຮົາຕ້ອງການປະມານ 5,000 ຄົນ ເພາະວ່າກໍາລັງຈະເປີດໂຮງງານໃໝ່ ແຕ່ຕອນນີ້ກໍມີປະມານພັນປາຍ ພັນປາຍ ໂຮງງານອື່ນ ເຂົາເຈົ້າກໍຕ້ອງການຄືກັນ ເພາະດຽວນີ້ເປີດໂຮງງານຫຼາຍແລ້ວ ຜູ້ໃດກໍຕ້ອງການແຮງງານຫຼາຍ.”

ແລະເຈົ້າໜ້າທີ່ ໂຮງງານຕັດຫຍິບແຫ່ງນຶ່ງ ຢູ່ເຂດເສດຖະກິດພິເສດ ສະຫວັນ-ເຊໂນ ທີ່ແຂວງສະຫວັນນະເຂດ ກໍເວົ້າວ່າ ຂະນະນີ້ ທາງໂຮງງານ ມີຄົນງານແລ້ວ 200 ຄົນ, ຍັງຕ້ອງການຕື່ມອີກປະມານ 100 ຄົນ, ຜູ້ທີ່ຈະສະໝັກເຂົ້າມາເຮັດວຽກ ບໍ່ຈໍາກັດລະດັບການສຶກສາ ແລະບໍ່ມີປະສົບການກໍຮັບເອົາ.

“ກະ ຄືບໍລິສັດເຮົາ ກໍຍັງເປີດໃໝ່ແດ່ ຫັ້ນນະ ທາງໂຮງງານເຮົາຍັງຕ້ອງການຫຼາຍ ພະນັກງານກໍຍັງຕ້ອງການ 100 ຄົນ ປັດຈຸບັນນີ້ 200 ພະນັກງານ ຖ້າຫາກພະນັກງານມີຄວາມຍຶດໝັ້ນມາວຽກປົກກະຕິ ບໍ່ຂາດ ກໍໄດ້ປະມານ 3 ລ້ານປາຍ ເຮົາຮັບທຸກຄົນ ໂຮງງານເຮົາບໍ່ໄດ້ຈໍາກັດວຸດທິການສຶກສາ ແລະກະບໍ່ມີປະສົບການ ເຮົາກໍຮັບ ເພາະມີການສອນງານກ່ອນ.”

ການຂາດຄົນງານທີ່ວ່ານັ້ນ ກໍຍ້ອນວ່າ ທາງເຈົ້າຂອງໂຮງຈັກ ໂຮງງານ ບໍ່ສາ ມາດປະຕິບັດຕາມນະໂຍບາຍ ດ້ານສະຫວັດດິການ ຂອງຕົນເອງໄດ້ ໂດຍສະ ເພາະບາງໂຮງງານຈີນ ທີ່ຍັງເອົາລັດເອົາປຽບຄົນງານລາວຢູ່ ເຊັ່ນບາງໂຮງ ງານ ມີມື້ພັກວຽກໃຫ້ຄົນງານ 4 ມື້ຕໍ່ເດືອນ, ຈະພັກມື້ໃດກໍໄດ້, ແຕ່ເມື່ອຄົນງານພັກວຽກ ກໍຖືກຫັກເງິນເດືອນ ດັ່ງເຈົ້າໜ້າທີ່ຜະແນກແຮງງານແລະ ສະຫວັດດິການສັງຄົມ ແຂວງສະຫວັນນະເຂດທ່ານນຶ່ງກ່າວວ່າ:

“ເວົ້າເລື່ອງປັດໃຈສະຫວັດດິການ ອາດຈະບໍ່ຕອບສະໜອງໃຫ້ເຂົາເຈົ້າ ຍົກໂຕຢ່າງ ຄືວັນພັກຈັ່ງຊີ້ນະ ມີມີບາງບໍລິສັດຂອງຈີນ ເດືອນນຶ່ງພັກ 4 ວັນ ເຂົາເຈົ້າເລືອກວັນພັກມື້ໃດກໍໄດ້ ແຕ່ວ່າບໍ່ໃຫ້ຕໍ່ເນື່ອງຄົບ 4 ວັນໃນເດືອນນຶ່ງ ບັດນີ້ເຂົາລາພັກຈໍາເປັນ 1 ວັນ ໄປຕັດເງິນ ເດືອນເຂົາ 3-4 ແສນຕໍ່ວັນ ອັນນີ້ກໍເປັນປັດໃຈນຶ່ງນໍ ປະກົດການໂຕນີ້ຂຶ້ນມານ່າ ຢູ່ໃນຊ່ວງແກ້ໄຂຢູ່ພວກເຮົາກະດາຍ.”

ທ່ານກ່າວຕື່ມວ່າ ອີກສາເຫດນຶ່ງ ທີ່ເຮັດໃຫ້ບໍລິສັດໃນເຂດເສດຖະກິດພິເສດທີ່ວ່ານັ້ນ ຂາດຄົນງານລາວຫຼາຍ ກໍຍ້ອນບັນຫາເສດຖະກິດລາວຕົກຕໍ່າ ເງິນກີບອ່ອນຄ່າ, ເງິນກີບເຟີ້ແຮງ, ຄ່າຄອງຊີບສູງ ແຕ່ເງິນເດືອນພັດຕໍ່າ ບໍ່ກຸ້ມກິນ ໂດຍສະເພາະຜູ້ທີ່ມີຄອບຄົວ, ເຮັດໃຫ້ພວກເຂົາເຈົ້າ ພາກັນໄປຊອກຫາເຮັດວຽກຢູ່ຕ່າງປະເທດ ຫຼາຍກວ່າຢູ່ລາວ.

ໃນຂະນະດຽວກັນ ຄົນງານຜູ້ນຶ່ງ ກໍເວົ້າວ່າ ສ່ວນນຶ່ງ ທີ່ເຮັດໃຫ້ຄົນງານລາວ ບໍ່ຢາກເຮັດວຽກຢູ່ໃນເຂດເສດຖະກິດພິເສດທີ່ວ່ານັ້ນ ແມ່ນຍ້ອນໄດ້ເງິນເດືອນໜ້ອຍ ແຕ່ຄ່າຄອງຊີບສູງ ບໍ່ພໍກິນ, ດັ່ງນັ້ນພວກເຂົາເຈົ້າ ຈຶ່ງພາກັນໄປເຮັດວຽກຢູ່ຕ່າງປະເທດ ເປັນຕົ້ນແມ່ນໄທ ທີ່ໄດ້ເງິນເດືອນຫຼາຍ ແລະມີສະຫວັດດິການດີກວ່າຢູ່ລາວ.

“ມັນກໍມີສ່ວນເລື່ອງຄ່າຄອງຊີບ ແລ້ວກະເງິນເດືອນພື້ນຖານ ສ່ວນຫຼາຍຈະໄປທາງດ້ານປະເທດໄທຫັ້ນແຫຼະ ເພາະວ່າຄ່າຄອງຊີບ ເຂົາເຈົ້າກັບປະເທດລາວ ກໍບໍ່ຄ່ອຍຕ່າງກັນຫຼາຍ ຫຼັກໆເລື່ອງພາສາທີ່ເຮົາອາດຈະຮູ້ຢູ່ແລ້ວ ສ່ວນເລື່ອງເງິນເດືອນພື້ນຖານ ເຂົາເຈົ້າສູງກວ່າເຮົາ.”

ຍ້ອນຂາດເຂີນຄົນງານລາວ ຫຼາຍຄືແນວນັ້ນ ປັດຈຸບັນ ຫຼາຍບໍລິສັດ ຈຶ່ງ

ຕ້ອງການນໍາຄົນງານຈາກຕ່າງປະເທດເຂົ້າມາ ແລະລັດຖະບານລາວ ກໍໄດ້ອະນຸມັດໃຫ້ນໍາເຂົ້າມາ 145,049 ຄົນ ຊຶ່ງສ່ວນຫຼາຍເຮັດວຽກໃນຂະແໜງອຸດສາຫະກໍາ ຮອງລົງມາກໍແມ່ນຂະແໜງບໍລິການ ແລະກະສິກໍາ.

ເພື່ອແກ້ໄຂບັນຫາດັ່ງກ່າວ ຕ່າງປະເທດກໍໃຫ້ການຊ່ອຍເຫຼືອ. ໃນຕົ້ນເດືອນພະຈິກນີ້ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນ ຫຼື IOM ໄດ້ຮ່ວມກັບກະຊວງແຮງງານ ແລະສະຫວັດດິການສັງຄົມ, ກະຊວງທີ່ກ່ຽວຂ້ອງ ແລະບໍລິສັດຈັດຫາງານ ຈັດກອງປະຊຸມກັນ ປະເມີນຄວາມຕ້ອງການຄົນງານ ຂອງນາຍຈ້າງ ໃນເຂດເສດຖະກິດພິເສດ ຢູ່ນະຄອນຫຼວງວຽງຈັນ, ຢູ່ແຂວງສະຫວັນນະເຂດ ແລະຈໍາປາສັກ ເພື່ອສ້າງຍຸດທະສາດ ທີ່ອີງໃສ່ຫຼັກຖານ ໃນການທົດສອບທັກສະສີມືແຮງງານ, ເພື່ອຫາວຽກເຮັດ ໃຫ້ຄົນງານເຄື່ອນຍ້າຍ ທີ່ກັບຄືນ ແລະໃຫ້ຜູ້ຈ້າງງານ ຝຶກອົບຮົມ ແລະຫາວຽກໃຫ້ຫຼາຍຂຶ້ນ.