ຜູ້ປະສົບພັຍນ້ຳຖ້ວມ ຍັງບໍ່ໄດ້ຮັບການຊ່ອຍເຫຼືອ

ສຸພັດຕາ
2021-09-30
Share
ຜູ້ປະສົບພັຍນ້ຳຖ້ວມ ຍັງບໍ່ໄດ້ຮັບການຊ່ອຍເຫຼືອ ເມື່ອວັນທີ 14 ມິຖຸນາ 2021 ເມືອງແລະແຂວງ ໄຊຍະບູຣີ ໄດ້ຮັບຜົນກະທົບໜັກ ຈາກ ພະຍຸ Koguma ມີຝົນຕົກໜັກ ເຮັດໃຫ້ນໍ້າຮຸ່ງ ສູງຂຶ້ນຢ່າງໄວວາ ກະທັນຫັນ ຫຼຸຫຼັ່ງໄຫຼເຂົ້າສູ່ຕົວເມືອງ ຖ້ວມບ້ານເຮືອນ ປະຊາຊົນ.
ນັກຂ່າວ ພົລເມືອງ

ມາຮອດປັດຈຸບັນ ຊາວບ້ານຜູ້ປະສົບພັຍ ນໍ້າຖ້ວມ ຈໍານວນ 480 ຄອບຄົວ ໃນພື້ນທີ່ 19 ບ້ານ ຢູ່ເມືອງແກ່ນທ້າວ ແຂວງໄຊຍະບູຣີ ທີ່ໄດ້ຮັບ ຜົລກະທົບຈາກ ພັຍນໍ້າຖ້ວມ ໃນໄລຍະວັນທີ 16-17 ກັນຍາ ປີ 2021 ນີ້ ກໍາລັງຖ້າ ການຊ່ອຍເຫຼືອ ຈາກພາກສ່ວນທີ່ກ່ຽວຂ້ອງຢູ່ ຊຶ່ງຊາວບ້ານ ປະມານ 450 ຄອບຄົວ ໄດ້ຮັບຜົລກະທົບ ທາງດ້ານເນື້ອທີ່ທໍາການຜລິດ ຍ້ອນໄຮ່ນາຖືກນໍ້າຖ້ວມ ແລະເຮືອນຂອງ ຊາວບ້ານອີກ 30 ຫຼັງ ກໍໄດ້ຮັບຄວາມເສັຽຫາຍ ຈາກນໍ້າຖ້ວມ, ດັ່ງຊາວບ້ານຜູ້ປະສົບ ພັຍນໍ້າຖ້ວມທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນວັນທີ 29 ກັນຍາ ນີ້ວ່າ:

“ບໍ່ເຮືອນຂ້ອຍ ບໍ່ທັນໄດ້ຖ້ວມ ພໍດີມັນມາຈຸ ປະຕູຮົ້ວຊື່ໆ ນາເຂົ້ານີ້ ເສັຽຫາຍປະມານ 30 ເປີເຊັນນີ້ແຫຼະ ຍັງບໍ່ທັນໄດ້ມີ ໜ່ວຍງານລົງມາ ເທື່ອເກາະ ກະບໍ່ຮູ້ນໍາຂະເຈົ້າ ກະມີມາຊ່ອຍຢູ່ ແຕ່ວ່າມັນຊິຊ້າໄປໜ້ອຍນຶ່ງ.”

ໃນຂນະທີ່ ຊາວບ້ານຢູ່ ເມືອງແກ່ນທ້າວ ອີກນນາງນຶ່ງ ກ່າວວ່າ ເຫດການນໍ້າຖ້ວມ ໃນເດືອນນີ້ ໄດ້ເຮັດໃຫ້ນາເຂົ້າ ຂອງຊາວບ້ານ ທີ່ຢູ່ໃນເຂດພື້ນທີ່ຕໍ່າ ຖືກນໍ້າຖ້ວມຈົນເກືອບໝົດ ສ້າງຄວາມເສັຽຫາຍ ຕໍ່ເຂົ້າທີ່ກໍາລັງປູກຫຼາຍເຕີບ ແຕ່ມາຮອດປັດຈຸບັນ ກໍຍັງບໍ່ເຫັນພາກສ່ວນໃດ ຂອງທາງການ ເມືອງແກ່ນທ້າວ ມາໃຫ້ການຊ່ອຍເຫຼືອ ແຕ່ຢ່າງໃດ:

“ຢູ່ແກ່ນທ້າວ 2 ຮອບ ຮອບທີ່ 3 ມາກະ ຂຶ້ນມາອີກຕື່ມ ແຕ່ມັນບໍ່ຂຶ້ນຫຼາຍ ຮອບທີ່ 3 ນ່າ ໄຮ່ນາ ຖ້ວມຫຼາຍ ໄຮ່ນານ່າ ບໍ່ໝົດເມືອງດອກ ຖ້ວມແຕ່ພວກຢູ່ຕໍ່າ ຢູ່ມໍ່ຫ້ວຍຊື່ໆ ນາເຂົາເຈົ້າພຸ້ນຖ້ວມນ່າ.”

ແລະ ຊາວບ້ານທີ່ໄດ້ຮັບ ຜົລກະທົບ ຍ້ອນນໍ້າຖ້ວມເນື້ອທີ່ ນາເຂົ້າ ກໍກ່າວວ່າ ມາຮອດມື້ນີ້ ລາວກໍຍັງຕ້ອງການ ຄວາມຊ່ອຍເຫຼືອ ຈາກພາກສ່ວນ ທີ່ກ່ຽວຂ້ອງຢ່າງ ຮີບດ່ວນເຊັ່ນກັນ ຊຶ່ງເຫດການນໍ້າຖ້ວມໄດ້ຜ່ານໄປຫຼາຍມື້ແລ້ວ ແຕ່ກໍຍັງບໍ່ໄດ້ ຮັບການຊ່ອຍເຫຼືອແນວໃດ:

“ນໍ້າຖ້ວມ ກະເສັຽຫາຍ ຫຼາຍຢູ່ ກະເປັນທົ່ງນາ ຕ້ອງການການຊ່ວຍເຫຼືອ.”

ສ່ວນຊາວບ້ານ ຢູ່ເມືອງແກ່ນທ້າວ ອີກທ່ານນຶ່ງ ທີ່ໄດ້ຮັບຜົລກະທົບ ຈາກນໍ້າຖ້ວມໃນເທື່ອນີ້ ກໍຮູ້ສຶກບໍ່ພໍໃຈປານໃດ ທີ່ໄດ້ຮັບການຊ່ອຍເຫຼືອ ແບບຫຼ້າຊ້າ ຈາກພາກສ່ວນ ທີ່ກ່ຽວຂ້ອງ ຊຶ່ງໃນໄລຍະກ່ອນໜ້ານີ້ ຄອບຄົວຂອງທ່ານເອງ ກໍແທບບໍ່ໄດ້ຮັບການຊ່ອຍເຫຼືອ ໃດໆ ເລີຍ ກ່ຽວກັບທາງດ້ານການກະເສດ ແລະດ້ານອື່ນໆ, ດັ່ງທ່ານກ່າວວ່າ:

“ຕາມເບິ່ງນິ່ ບໍ່ມີໃຜມາຊ່ອຍເຫຼືອ ເທື່ອເນີ້ ແຈ້ງການໄປຊື່ໆ ແຈ້ງການໄປຊຸດແລ້ວ ນີ້ກະວ່ານາແລ້ງ ໄທບ້ານແຈ້ງການ ໄປໝົດແລ້ວ ວ່ານາແລ້ງນ່າ ເປັນຈໍານວນ ຕັ້ງຫຼາຍຮ້ອຍຄອບຄົວ ເຂົ້ານາກະບໍ່ໄດ້ກ່ຽວ ໂຄງການຊ່ວຍເຫຼືອ ມາກະບໍ່ເຫັນແນ່ ຫຍັງຈັ່ງຊິ້ເລີຍນ່າ ໂອ້ ຍອມແລ້ວ ປະຊາຊົນນີ້ຍໍ່າແຍ່ດຽວນີ້ນ່າ.”

ທ່ານກ່າວຕື່ມວ່າ ສໍາລັບເຫດການ ນໍ້າຖ້ວມໃນເດືອນນີ້ ກໍໄດ້ເຮັດໃຫ້ນາເຂົ້າຂອງຕົນ ຖືກນໍ້າຖ້ວມຫຼາຍ ຍັງບໍ່ສາມາດ ປະເມີນຄວາມເສັຽຫາຍ ໄດ້ເທື່ອ ຊຶ່ງກໍຮູ້ສຶກກັງວົນ ວ່າເມື່ອຮອດລະດູການ ເກັບກ່ຽວເຂົ້າ ອາຈເກັບກ່ຽວ ໄດ້ໜ້ອຍ ຈຶ່ງຢາກໃຫ້ພາກສ່ວນ ທີ່ກ່ຽວ ຂ້ອງ ເລັ່ງຫາແນວທາງຊ່ອຍເຫຼືອ ຜົລກະທົບໃນຄັ້ງນີ້ດ້ວຍ.

ທາງດ້ານເຈົ້າໜ້າທີ່ ທາງການ ເມືອງແກ່ນທ້າວ ທ່ານນຶ່ງກ່າວວ່າ ປັດຈຸບັນ ເຈົ້າໜ້າທີ່ ຫຼາຍພາກສ່ວນ ທີ່ກ່ຽວຂ້ອງ ກໍາລັງລົງພື້ນທີ່ ຮິບໂຮມຂໍ້ມູນ ຄວາມເສັຽຫາຍ ຈາກພັຍນໍ້າຖ້ວມ ທົ່ວເມືອງແກ່ນທ້າວ ແລະເມື່ອສໍາເຣັດແລ້ວ ກໍຈະສເນີໄປຍັງຂັ້ນແຂວງ ເພື່ອໃຫ້ການຊ່ອຍເຫຼືອ ແກ່ຊາວບ້ານ ຜູ້ປະສົບພັຍຕໍ່ໄປ:

“ການຊ່ວຍເຫຼືອນິ່ ເພິ່ນມີແຕ່ເກັບກໍາຂໍ້ມູນເນາະ ຍັງບໍ່ທັນໄດ້ຊ່ວຍເຫຼືອ ມີແຕ່ເກັບກໍາຂໍ້ມູນໄວ້ ວ່າຈັກຫຼັງຄາເຮືອນ ຈັກຄອບຄົວຫັ້ນນ່າ ແລ້ວກະລາຍງານຂັ້ນເທິງ ແລ້ວເພິ່ນຈະຕຽມຊ່ວຍເຫຼືອ.”

ເຫດການນໍ້າຖ້ວມ ຢູ່ 19 ບ້ານ ໃນເມືອງແກ່ນທ້າວ ໃນໄລຍະວັນທີ 16-17 ກັນຍາທີ່ຜ່ານມາ ມີເຮືອນຊາວບ້ານ ແລະ ສິ່ງປຸກສ້າງເສັຽຫາຍ 30 ຫຼັງ ຄິດເປັນມູລຄ່າເກືອບ 130 ລ້ານກີບ ແລະໄດ້ເຮັດໃຫ້ເນື້ອທີ່ທໍາການຜລິດ ຂອງຊາວບ້ານ ເສັຽຫາຍຈໍານວນ 130 ເຮັກຕ້າຣ໌ ຄິດເປັນມູລຄ່າເກືອບ 220 ລ້ານກີບ ອີກທັງຍັງເຮັດໃຫ້ ໜອງປາ ເສັຽຫາຍ 5 ແຫ່ງ ມູລຄ່າເກືອບ 70 ລ້ານກີບ ແລະ ມີເສັ້ນທາງເສັຽຫາຍ 4 ຈຸດ ແລະຂົວເພ ອີກ 7 ແຫ່ງ ມູລຄ່າຄວາມເສັຽຫາຍ 3,4 ຕື້ກີບ, ອີງຕາມຂໍ້ມູນຈາກຫ້ອງການ ຖແລງຂ່າວ, ວັທນະທັມ ແລະ ທ່ອງທ່ຽວ ເມືອງແກ່ນທ້າວ.

ກ່ອນໜ້ານີ້ ໃນເດືອນມິຖຸນາ ທີ່ຜ່ານມາ ຫາກໍເກີດເຫດການໍ້າຖ້ວມ ກະທັນຫັນ ຢູ່ຫຼາຍເມືອງ ຂອງແຂວງໄຊຍະບູຣີ ໂດຍສະເພາະ ເມືອງໄຊຍະບູຣີ ຈາກຜົນກະທົບຂອງພະຍຸ ໂຄກູມະ ເຮັດໃຫ້ມີບ້ານ ຖືກນໍ້າຖ້ວມທັງໝົດ 56 ບ້ານ ໃນນັ້ນມີຄອບຄົວ ໄດ້ຮັບຜົລກະທົບ ປະມານ 5,000 ຄອບຄົວ ມີຈໍານວນພົລເມືອງທັງໝົດ ປະມານ 20,000 ຄົນ ຊຶ່ງມີເຮືອນ ໄດ້ຮັບຄວາມເສັຽຫາຍ ຈໍານວນ ປະມານ 4,200 ຫຼັງ ໃນນັ້ນ 19 ຫຼັງ ຖືກນໍ້າພັດ ຈົນໝົດຫຼັງ ອີກທັງເນື້ອທີ່ ທໍາການຜລິດ ເສັຽຫາຍເກືອບ 170 ເຮັກຕ້າຣ໌ ແລະ ຍັງມີຄວາມເສັຽຫາຍ ອື່ນໆ ອີກຫຼາຍດ້ານ ຮວມມູລຄ່າເສັຽຫາຍ ປະມານ 94 ຕື້ກີບ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ