ທະນາຄານ ພັດທະນາອາຊີ ຊ່ອຍທຶນເພື່ອປັບປຸງຖະໜົນ ຢູ່ເມືອງວັງວຽງ

ເມືອງວັງວຽງ ແຂວງວຽງຈັນ ເປັນນຶ່ງໃນຈໍານວນເມືອງ ທີ່ມີນັກທ່ອງທ່ຽວ ທັງພາຍໃນແລະຕ່າງປະເທດໄປທ່ຽວຫລາຍ. ແຕ່ເສັ້ນທາງສັນຈອນໃນເທດສະບານເມືອງວັງວຽງ ແລະເສັ້ນທາງໄປແຫລ່ງທ່ອງທ່ຽວອື່ນໆ ຊຸດໂຊມ ເປ່ເພຕາມການເວລາ, ອີງຕາມຄໍາເວົ້າຂອງພະນັກງານນໍາທ່ຽວ ຢູ່ເມືອງວັງວຽງ ແຂວງວຽງຈັນ ຕໍ່ວິທຍຸເອເຊັຽເສຣີໃນມື້ວັນທີ 22 ຕຸລາ 2024 ນີ້.

ທ່ານເວົ້າວ່າ ປັດຈຸບັນ ເສັ້ນທາງໄປແຫລ່ງທ່ອງທ່ຽວທີ່ມີຊື່ສຽງນັ້ນ ເປ່ເພ ເປັນບວກ ເປັນຂຸມ ເຖິງແມ່ນວ່າຈະມີການສ້ອມແປງ ແຕ່ກໍຍັງລ່າຊ້າ ບໍ່ສະດວກມນການເດີນທາງ ໃນຂະນະທີ່ນັກທ່ອງທ່ຽວ ກໍເລີ້ມເຂົ້າມາຫລາຍ ໃນລະດູການ ທ່ອງທ່ຽວນີ້ ດັ່ງທີ່ທ່ານກ່າວວ່າ:

“ມີແຕ່ພັດທະນາທາງໃຫ້ມັນດີມັນກໍໂອ ເຄແລ້ວ ເຈົ້າທາງມັນບໍ່ດີ ກໍຄືການທ່ອງທ່ຽວມັນກໍບໍ່ຄົງທີ່ຫັ້ນແຫລະ ມັນເປັນເສັ້ນທາງອອກຈາກຕົວເມືອງຕໍ່ໃສ່ທາງຂົວແດງ ໄປທາງວົງແຫວນ ກໍາລັງ ສິລ້ຽວໄປທາງບລູລາກູນ 1 ບລູລາກູນ 2 ບລູລາກູນ 3.”

ປັດຈຸບັນ ຖະໜົນພາຍໃນເຂດເທດສະບານເມືອງວັງວຽງ ເປັນຖະໜົນ ພຽງເລນດຽວ ທີ່ນັກທ່ອງທ່ຽວ ໃຊ້ລົດ 2 ແຖວ ລົດຕຸ໋ກໆ ແລະລົດສ່ວນຕົວແລ່ນ. ແຕ່ເມື່ອມີລົດມາຫລາຍ ກໍເຮັດໃຫ້ການສັນຈອນພາຍໃນຕົວເມືອງ ແອອັດແລະຕິດຂັດ, ດັ່ງພະນັກງານນໍາທ່ຽວຢູ່ເມືອງວັງວຽງ ອີກນາງນຶ່ງ ເວົ້າວ່າ:

“ອັນນີ້ເຂົ້າທາງເສັ້ນທາງໃນເມືອງ ໃຫ້ລົດທົວເຂົ້າເປັນປະເພດລົດ 2 ແຖວຕຸກໆ ຫລືວ່າລົດປະເພດນ້ອຍ ແຕ່ຈໍາພວກນີ້ມັນຈະຫລາຍ ເສັ້ນທາງມັນນ້ອຍແອອັດ ບາງຄັ້ງລົດມັນຫລາຍ ລູກຄ້າຫລາຍຖ້າລົດມັນຈະຕິດມັນຈະແອອັດ ມັນຈະແອອັດ ມັນ ການສັນຈອນມັນໄປຍາກ.”

ນອກຈາກເລື່ອງເສັ້ນທາງທີ່ເປເພ ເປັນບວກ ເປັນຂຸມນັ້ນແລ້ວ ປະຊາຊົນໃນຕົວເມືອງວັງວຽງ ຫລາຍຄົນກໍຍັງສັງເກດເຫັນໄຟຂ້າງທາງ ທີ່ມັກຈະເປີດຕະຫລອດທັງຄືນນັ້ນ ກໍເລີ້ມເປີດ ເລີ້ມປິດສະຫລັບກັນແລ້ວ ແລະຈະເປີດເປັຊ່ວງ ເປັນໄລຍະເວລານຶ່ງເທົ່ານັ້ນ ບໍ່ຄືແຕ່ກ່ອນ ຊຶ່ງຊາວບ້ານຄາດກັນວ່າ ທາງເມືອງອາດຈະຂາດເຂີນງົບປະມານໃນການຈ່າຍຄ່າໄຟ, ດັ່ງເຈົ້າຂອງທຸລະກິດທ່ອງທ່ຽວຢູ່ເມືອງ ວັງວຽງ ຜູ້ນຶ່ງເວົ້າຕໍ່ວິທຍຸເອເຊັຽເສຣີໃນມື້ວັນທີ 22 ຕຸລານີ້ວ່າ:

“ຖະໜົນກໍມີແລ້ວ ແຕ່ຍັງແຄບຍັງນ້ອຍຢູ່ ເລື້ອງໄຟນີ້ແມ່ນຖືວ່າພຽງພໍ ແຕ່ວ່າເລື້ອງງົບປະມານບໍ່ມີ ບໍ່ມີເງິນງົບປະມານຈ່າຍໃຫ້ພາກສ່ວນໄຟຟ້າຄືກັນ ດັ່ງນັ້ນເຂົາຈັ່ງຕັດໄຟອອກ ຕອນຄັ້ງແລກໆຫັ້ນເປີດເຖິງ 6 ໂມງເຖິງ 6 ໂມງເຊົ້າເລີຍ ຕໍ່ມາເຊົາ ບໍ່ມີທຶນ ໄດ້ແຕ່ 6 ໂມງແລງຫາປະມານ 10 ໂມງເຄິ່ງ.”

ເພື່ອປັບປຸງແລະພັດທະນາເມືອງ ວັງວຽງ ໃຫ້ເປັນເມືອງທ່ອງທ່ຽວທີ່ສາ ມາດຮອງຮັບນັກທ່ອງທ່ຽວໄດ້ຢ່າງມີປະສິດທິພາບ ທະນາຄານພັດທະນາອາຊີ ຫຼື ADB ຈຶ່ງໄດ້ໃຫ້ທຶນຊ່ວຍເຫລືອຫລາຍກວ່າ 1.8 ລ້ານໂດລ້າສະຫະລັດ ເພື່ອ ດໍາເນີນການປັບປຸງຕົວເມືອງວັງວຽງໃໝ່ ຊຶ່ງຈະປັບປຸງເສັ້ນທາງ 11 ເສັ້ນ ທີ່ມີຄວາມຍາວ 5,294 ແມັດ, ປູບລ໊ອກຊີເມັນຕາມທາງຍ່າງ, ອະນາໄມຮ່ອງລະ ບາຍນໍ້າ ແລະຂຶ້ນແຜນສ້າງເສົາໄຟຟ້າ ທີ່ໃຊ້ພະລັງງານໂຊລາ ແທນການໃຊ້ໄຟຟ້າ ເພື່ອປະຢັດງົບປະມານ. ໃນຂັ້ນຕໍ່ໄປ ຈະປູກຕົ້ນໄມ້ຕາມແຄມທາງເພື່ອໃຫ້ຈົບງາມ ຊຶ່ງຈະເລີ້ມປັບປຸງຕັ້ງແຕ່ວັນທີ 1 ພະຈິກ 2024 ຫາວັນທີ 31 ມັງກອນ 2026 ຮວມໄລຍະເວລາ 15 ເດືອນ.

ກ່ຽວກັບໂຄງການປັບປຸງຕົວເມືອງ ວັງວຽງນີ້ ເຈົ້າໜ້າທີ່ຖະແຫລງຂ່າວ ວັດທະນະທໍາແລະທ່ອງທ່ຽວ ເມືອງວັງວຽງ ທ່ານນຶ່ງ ເວົ້າຕໍ່ວິທຍຸເອເຊັຽເສຣີໃນມື້ດຍວກັນນີ້ວ່າ ເປັນສ່ວນນຶ່ງຂອງການປັບປຸງໂຄງລ່າງພື້ນຖານທ່ອງທ່ຽວ ຂອງອະນຸພາກພື້ນແມ່ນໍ້າຂອງ ແຫ່ງທີ 2.

“ຂອບເຂດທາງເອົາສໍ່າເກົ່າ ມີແຕ່ວ່າອັດສະພານ ແລ້ວກໍປັບປຸງຮ່ອງລະບາຍນໍ້າ ອະນາໄມຮ່ອງລະບາຍນໍ້າ ເພິ່ນກໍເອົາວິຊາການມາສໍາຫລວດມາອອກແບບໃໝ່ເນາະ ເພື່ອປັບປຸງໃຫ້ທາງມັນຮັບປະກັນ ແລ້ວກໍປັບປຸງທາງ 2 ຂ້າງທາງຍ່າງ ທາງຟຸດບາດໃຫ້ມັນກວ້າງຕື່ມເພື່ອສະດວກໃຫ້ນັກທ່ອງທ່ຽວ ໄດ້ຍ່າງຢູ່ຄັນຕົວເມືອງຫັ້ນ.”

ທ່ານ ບຸນຈັນ ມາລາວົງ, ເຈົ້າເມືອງເມືອງວັງວຽງ ໄດ້ໃຫ້ສໍາພາດໃນມື້ວັນທີ 21 ຕຸລາ 2024 ວ່າ ນັບແຕ່ຕົ້ນປີມາຮອດເດືອນຕຸລາ 2024 ນີ້ ມີນັກທ່ອງທ່ຽວມາທ່ຽວຢູ່ພາຍໃນເມືອງວັງວຽງ ແຂວງວຽງຈັນ ຈໍານວນ 9 ແສນປາຍຄົນ, ໃນນີ້ ເປັນນັກທ່ອງທ່ຽວຕ່າງປະເທດ 4 ແສນປາຍຄົນ ຄືມີຈໍານວນລື່ນແຜນການປີທີ່ວາງໄວ້ 8 ແສນຄົນ ແລະຄາດວ່າ ແຕ່ນີ້ໄປຈົນໝົດປີ ນັກທ່ອງທ່ຽວຈະໄປທ່ຽວເມືອງວັງວຽງເພີ່ມຂຶ້ນອີກລາຍ.