ໂຮງງານຜະລິດແປ້ງມັນຕົ້ນຂອງຈີນ ຢູ່ໄຊຍະບູລີ ຍັງສົ່ງຜົນກະທົບຕໍ່ຊາວບ້ານ

ໂຮງງານຜະລິດແປ້ງມັນຕົ້ນ ຂອງບໍຣິສັດ ກ້າວໜ້າລາວ ຈຳກັດ ຂອງນັກລົງທຶນຈີນ ຕັ້ງຢູ່ບ້ານນໍ້າຊົ້ງ ເມືອງປາກລາຍ ແຂວງໄຊຍະບູລີ ຍັງສົ່ງຜົນກະທົບ ຕໍ່ສິ່ງແວດລ້ອມ-ສັງຄົມ ຢ່າງຮຸນແຮງ ຂະນະທີ່ທາງການລາວ ສັ່ງໃຫ້ໂຮງງານດັ່ງກ່າວ ປັບປຸງແກ້ໄຂແລ້ວ ແຕ່ຍັງບໍ່ສໍາເລັດເທື່ອ.

ຊາວບ້ານນາງນຶ່ງ ຢູ່ເມືອງປາກລາຍ ແຂວງໄຊຍະບູລີ ກ່າວວ່າ ໂຮງງານຜະລິດແປ້ງມັນຕົ້ນ ຍັງສົ່ງກິ່ນເໝັນຂິວ ໄປທົ່ວພື້ນທີ່ ແລະຍັງບໍ່ທັນບຳບັດນໍ້າເປື້ອນ-ນໍ້າເສັຽ ໄດ້ຕາມມາດຕະຖານ ເຮັດໃຫ້ເກີດການຮົ່ວຊືມ ກ່ອນຈະໄຫລລົງຊູ່ແຫລ່ງນໍ້າາມະຊາດ ເຊັ່ນ ຮ່ອງລະບາຍນໍ້າ ແລະ ແມ່ນໍ້າຂອງ.

ດັ່ງ ຊາວບ້ານນາງນີ້ ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 17 ກັນຍາ ນີ້ວ່າ:

“ກະຍັງມີຜົນກະທົບຫັນແຫລະ ສ່ວນຫລາຍກະເໝັນ ນໍ້າເສັຽກະລົງມາ ເພາະວ່າ ບາງເທື່ອ ກະເຫັນເປັນເປັນຟອງນໍ້າ ເພາະວ່າ ເຮົາກະສະເນິໄປຫລາຍເທຶ່ອ ກະບໍ່ຮູ້ວ່າເພີ່ນ ປັບປຸງແກ້ໄຂ ຫລືບໍ່ເນາະ ແຕ່ວ່າກະເໝັນມາເລື້ອຍໆ.”

ຊາວບ້ານນາງນີ້ ກ່າວອີກວ່າ ຜົນກະທົບດັ່ງກ່າວ ແມ່ນເກີດຂຶ້ນຕັ້ງແຕ່ເດືອນ ມີນາ ປີ 2024 ທີ່ຜ່ານມາ ຫລັງຈາກນັ້ນ ຊາວບ້ານໃນພື້ນທີ່ ກະໄດ້ສະເນິໃຫ້ທາງການລາວ ຂັ້ນເມືອງ ໄດ້ລົງພື້ນທີ່ຕິດຕາມ, ກວດກາ ປັບປຸງ ແກ້ໄຂຜົນກະທົບທີ່ເກີດຂຶ້ນ ຈົນມາຮອດປັດຈຸບັນ ກະຍັງບໍ່ທັນແກ້ໄຂ ສຳເລັດເທຶ່ອ.

ຊາວບ້ານນາງນຶ່ງ ຢູ່ເມືອງປາກລາຍ ແຂວງໄຊຍະບູລີ ກ່າວວ່າ ຢາກໃຫ້ທາງການລາວ ເຄັ່ງຮ້ອນທີ່ຈະແກ້ໄຂບັນຫາເລືອງນໍ້າເປື້ອນ-ນໍ້າເສັຽ ກ່ອນຈະລົງໄປສູ່ນໍ້າທັມມະຊາດ ເນື່ອງຈາກ ມີກິ່ນເໝັ່ນຮຸນແຮງ ກະທົບຕໍ່ການເປັນຢູ່ຂອງຊາວບ້ານໃນພື້ນທີ່ ຢ່າງໜັກ ໃນໄລຍະຫລາຍເດືອນ ທີ່ຜ່ານມານີ້.

ຊາວບ້ານນາງນີ້ ຍັງຕັ້ງຂໍ້ສັງເກດອີກວ່າ ໂຮງງານຜະລິດແປ້ງມັນຕົ້ນ ຂອງຈີນແຫ່ງນີ້ ມີຂະໜາດໃຫຍ່ຫລາຍສົມຄວນ ແຕ່ທາງການລາວ ໄດ້ອະນຸຍາດໃຫ້ຕັ້ງໂຮງງານ ຢູ່ໃກ້ກັບເຂດຊຸມຊົນ ທີ່ມີປະຊາຊົນອາສັຍຢູ່ເປັນຈໍານວນຫລາຍແບບນີ້ ແມ່ນຖືກຕ້ອງຕາມລະບຽບການ ຫລື ບໍ່. 

ດັ່ງ ຊາວບ້ານນາງນີ້ ກ່າວຕໍ່ ວິທຍຸເອຊັຽ ເສຣີ ໃນມື້ດຽວກັນນີ້ວ່າ:

“ປັດຈຸບັນນີ້ແມ່ນເວົ້າເລື້ອງອັນນາ ໂຮງງານນ່າເນາະ ເລື້ອງການບຳບັດນໍ້າເສັຍຫຍັງຕ່າງໆ ບໍ່ຮູ້ວ່າຈີນຫັ້ນຂະເຈົ້າ ຄິດແນວໃດແຫລະ ເພາະວ່າ ຕົວບ່ອນສາງ ທີ່ຂະເຈົ້າເຮັດໂຮງງານຫັ້ນນ່າ.”

ທາງດ້ານເຈົ້າໜ້າທີ່ ຜະແນກສັບພະຍາກອນທັມມະຊາດ ແລະ ສິ່ງແວດລ້ອມ ແຂວງໄຊຍະບູລີ ກ່າວຍອມຮັບວ່າ ໂຮງງານຜະລິດແປ້ງມັນຕົ້ນ ຂອງນັກລົງທຶນຈີນ ແມ່ນສ້າງບໍ່ໄດ້ມາດຕະຖານແທ້ ເຮັດໃຫ້ເກີດຜົນກະທົບ ຕໍ່ ສິ່ງແວດລ້ອມ-ສັງຄົມ ຂຶ້ນຕາມມາ ທັງເລື້ອງການບໍາບັດ ນໍ້າເປື້ຶອນ-ນໍ້າເສັຽ, ເລື້ອງກິ່ນເໝັນ ແລະ ຄວາມສະອາດພາຍໃນໂຮງງານ ທຸກບັນຫາທີ່ເກີດຂຶ້ນ ບໍ່ໄດ້ເປັນໄປຕາມ ບົດວິພາກ ທາງດ້ານເຕັກນິກ.

ນອກຈາກນີ້ ທາງການລາວ ແລະ ພາກສ່ວນທີ່ກ່ຽວຂ້ອງທັງໝົດ ກະຍັງບໍ່ໄດ້ເອົາໃຈໃສ່ ທີ່ຈະຕິດຕາມ, ກວດກາ ໂຮງງານດ່ັງກ່າວ ໂດຍສະເພາະບັນຫາ ສິ່ງແວດລ້ອມ-ສັງຄົມ ຈົນເຮັດໃຫ້ຜົນກະທົບຈາກໂຮງງານດັ່ງກ່າວ ເລີ້ມຮຸນແຮງຂຶ້ນ ແລະ ຫຍຸ້ງຍາກທີ່ຈະແກ້ໄຂໄດ້ໃນໄລຍະສັ້ນ.

ດັ່ງ ເຈົ້າໜ້າທີ່ ທ່ານນີ້ ກ່າວຕໍ່ວິທຍຸເອຊັຽ ເສຣີ ໃນມື້ດຽວກັນນີ້ວ່າ:

“ໂຮງຈັກໂຮງງານ ສໍ່າພັດບໍ່ໄປຕາມລະບຽບຫັລກການ ຕາມບົດວິພາກ ມັນກະໄດ້ແກ້ກັນໄປວ້າ ບໍ່ຢາກໃຫ້ມັນເດືອດຮ້ອນປະຊາຊົນເນາະ ໜ້າທີ່ມັນກະຕ້ອງພາກລັດເຮົານີ້ແລ້ວ ຜັກດັນໃຫ້ມັນໄດ້ຕາມມາດຕະຖານ.”

ຕໍ່ກັບບັນຫານີ້ ໃນມື້ວັນທີ 5 ສິງຫາ 2024 ທີ່ຜ່ານມາ ຄະນະກວດກາ ວິຊາການດ້ານສິ່ງແວດລ້ອມ ຂອງກະຊວງຊັບພະຍາກອນ ທຳມະຊາດ ແລະ ສິ່ງແວດລ້ອມ ກໍໄດ້ເດີນທາງໄປກວດກາພາກສະນາມ ກ່ຽວກັບ ການຈັດຕັ້ງປະຕິບັດວຽກງານຄຸ້ມຄອງ ສິ່ງແວດລ້ອມ ແລະເງືອນໄຂຕ່າງໆ ກ່ຽວກັບ ສິ່ງແວດລ້ອມ ຂອງໂຮງງານ ຜະລິດແປ້ງມັນຕົ້ນດັ່ງກ່າວນີ້ ກໍໄດ້ສັ່ງໃຫ້ໂຮງງານດັ່ງກ່າວ ປະຕິບັດ ບັນດາມາດຕະຖານປ້ອງກັນ ແລະ ຫລຸດຜ່ອນຜົນກະທົບຕໍ່ສິ່ງແວດລ້ອມ-ສັງຄົມ ແລະ ທໍາມະຊາດຢ່າງເຂັມງວດ ໂດຍສະພາະເລື້ອງການບຳບັດ ນໍ້າເປື້ອນ-ນໍ້າເສັຍ ກ່ອນຈະປ່ອຍລົງຊູ່ ແຫລ່ງນໍ້າທຳມະຊາດ. 

ເຈົ້າໜ້າທີ່ກົມສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກ່າວວ່າ ໂຮງງານຜະລິດແປ້ງມັນຕົ້ນ ຂອງຈີນແຫ່ງນີ້ ແມ່ນໄດ້ຮັບອະນຸຍາດຈາກລັດຖະບານລາວ ແຕ່ເມື່ອກິດຈະການໄປແລ້ວ ບໍ່ປະຕິບັດຕາມມາດຕະຖານ ເຮັດໃຫ້ຊາວບ້ານໃນພື້ນທີ່ ເກີດການຮ້ອງຟ້ອງຂຶ້ນເລື້ອຍໆ ໂດຍສະເພາະ ບັນຫານໍ້າເປື້ອນ-ນໍ້າເສັຍ ແລະ ກິ່ນເໝັນ ກະທົບຕໍ່ຊີວິດການເປັນຢູ່ ຂອງຄົນໃນພື້ນທີ່ອ້ອມຂ້າງ.

ດັ່ງ ເຈົ້າໜ້າທີ່ທ່ານນີ້ ກ່າວຕໍ່ວິທຍຸເອຊັຽ ເສຣີ ໃນມື້ດຽວກັນນີ້ວ່າ:

“ໂຮງງານສົ່ງຜົນສະທ້ອນ ຕໍ່ສັງຄົມ ແລ້ວກະເລື້ອງອັນສິ່ງແວດລ້ອມເນາະ ຖືວ່າບໍ່ໄດ້ມາດຕະຖານ ຖືກຮ້ອງຟ້ອງມາອີກເນາະ ເລື້ອງນໍ້າເສັຽ ເຮົາກະມີມາດຕະການໃນການຄຸ້ມຄອງ ເອີ້ນມາເຕືອນເນາະ ແລ້ວໃຫ້ເຂົາປັບປຸງ ຖ້າວ່າເຂົາຍັງເຮັດຄືເກົ່າ ມັນຈະໄດ້ໃຫ້ເຂົາຫຍຸດເຊົາຖາວອນ.”

ເມື່ອເດືອນ ມີນາ 2024 ທີ່ຜ່ານມາ ໂຮງງານຜະລິດແປ້ງມັນຕົ້ນ ຢູ່ບ້ານນໍ້າຊົ້ງ ໄດ້ເຮັດນໍ້າເປື້ອນ-ນໍ້າເສັຍ ໄຫລລົງສູ່ແມ່ນໍ້າຂອງ ຈົນເຮັດໃຫ້ຊາວບ້ານໃນພື້ນທີ່ ກັງວົນວ່າ ຈະເປັນອັນຕະລາຍຕໍ່ສັດນໍ້າ ແລະ ສິ່ງແວດລ້ອມ ແຕ່ຫລັງຈາກນັນ ອົງການປົກຄອງ ເມືອງປາກລາຍ ກໍໄດ້ລົງພື້ນທີ່ຕິດຕາມ ກວດກາ ເຫັນວ່າ ໂຮງງານດັ່ງກ່າວ ບໍ່ໄດ້ປ່ອຍນໍ້າເສັຍລົງແມ່ນໍ້າຂອງໂດຍກົງ ແຕ່ອາດມີທໍ່ນໍ້າເປື້ອນ ຫລື ນໍ້າມາຈາກອ່າງນໍ້າເປື້ອນ ໄດ້ມີການຮົ່ວໄຫລ ແລະ ໄຫລລົງໃສ່ແມ່ນໍ້າຂອງ.

ເມື່ອເດືອນ ພຶກສະພາ 2024 ທີ່ຜ່ານມານີ້ ໂຮງງານຜະລິດແປ້ງມັນຕົ້ນ ຂອງບໍລິສັດ ກ້າວໜ້າລາວ ຈຳກັດ ສາຂາເມືອງໄຊຍະບູລີ ກໍເຄີຍເກີດການຮ້ອງຮຽນ ຈາກຊາວບ້ານ ເລື້ອງກິ່ນເໝັນຮຸນແຮງ ກະທົບຕໍ່ຊີວິດ ການເປັນຢູ່ຂອງຊາວບ້ານ ບ້ານນາຊໍາ ແລະ ຜາຊ້າງ ໃນເມືອງໄຊຍະບູລີ ປັດຈຸບັນ ກະຍັງບໍ່ທັນໄດ້ແກ້ໄຂສຳເລັດເທື່ອ.

ສໍາລັບ ໂຮງງານຜະລິດແປ້ງມັນຕົ້ນ ຂອງບໍລິສັດກ້າວໜ້າລາວ ຈຳກັດ ປັດຈຸບັນ ເປີດດຳເນີນກິດຈະການຢູ່ 2 ສາຂາ ໃນແຂວງໄຊຍະບູລີ ໂຮງງານຜະລິດແປ້ງມັນຕົ້ນ ບ້ານນາຊໍາ ເມືອງໄຊຍະບູລີ ແລະ ໂຮງງານຜະລິດແປ້ງມັນຕົ້ນ ບ້ານນໍ້າຊົ້ງ ເມືອງປາກລາຍ ເຊິ່ງທັງສອງແຫ່ງ ສາມາດຜະລິດ ແປ້ງມັນຕົ້ນໄດ້ປະມານ 300,000 ຕັນຕໍ່ປີ.