ມ.ຄົງເຊໂດນຕ້ອງການອາຫານ


2013-09-25
Share
F-flood-sekong ນໍ້າຖ້ວມໜັກ ປະຊາຊົນ ຕ້ອງອອກມາ ຢູ່ຕາມຖນົນ ຫຼືຂຶ້ນຢູ່ບ່ອນສູງ
wvi.org

 

ປະຊາຊົນ ຈາກບ້ານນາປົ່ງນື່ງ ໃນຈຳນວນ 68 ບ້ານທີ່ຖືກນໍ້າຖ້ວມ ໃນເຂດ ເມືອງຄົງເຊໂດນ ແຂວງສາຣະວັນ ໄດ້ກ່າວຕໍ່ເອເຊັຽເສຣີ ໃນມື້ ວັນທີ 25 ກັນຍາ ວ່າ ປັດຈຸບັນນໍ້າຍັງຖ້ວມຢູ່ ເຖິງແມ່ນວ່ານໍ້າຈະຫລຸດລົງແດ່ແລ້ວກໍຕາມ ແຕ່ປະຊາ ຊົນສ່ວນໃຫຍ່ ຍັງອາສັຍ ຢູ່ແຄມທາງ ເລກທີ່ 13 ຢູ່ ສຳລັບການຊ່ອຍເຫລືອນັ້ນ ຊາວບ້ານຕ້ອງການອາຫານ ແລະເຂົ້າສານ. ດ່ັງທ່ານກ່າວວ່າ:

"ຕັ້ງແຕ່ຄົງເຊໂດນ ຈົນຮອດນາໂຄລາ ຫນອງຫີນພຸ້ນ ນໍ້າແຄມທາງຖນົນຫມົດ ບໍ່ທັນເຫັນຕະຝັ່ງ ເຂົ້າກິນຕ້ອງການຫນັກ ກວ່າຫມູ່ ກໍແມ່ນ ເຂົ້າກິນ ເຂົ້າສານ ຈ້າວຫລືວ່າເຂົ້າສານຫນຽວ ແລ້ວແຕ່ ແຕ່ລະຫລັງຄາເຮືອນ ຖືກນໍ້າຖ້ວມຫມົດເລົ້າເຂົ້າຫນຽວ".

ທ່າວກ່າວຕໍ່ໄປວ່າ ມີການຊ່ອຍເຫລືອຈາກແຂວງບາງສ່ວນແລ້ວ ສ່ວນໃຫຍ່ເປັນຫມີ່ແຫ້ງ ກັບນໍ້າດຶ່ມ ແຕ່ສີ່ງທີ່ຊາວບ້ານຕ້ອງການທີ່ສຸດແມ່ນ ເຂົ້າສານ ແລະຫລັງຈາກນັ້ນກໍຢາກໃຫ້ຊ່ອຍສ້ອມແປງເຮືອນຊານທີ່ເປ່ເພ ແລະພັນເຂົ້າ ເພື່ອປູກທົດແທນ ສີ່ງທີ່ເສັຽຫາຍ ຈາກນ້ຳຖ້ວມ.

ເມືອງຄົງເຊໂດນຖືກນໍ້າຖ້ວມ ມາແຕ່ວັນທີ 17 ກັນຍາ ຈົນຮອດປັດຈຸບັນ ທາງການແຂວງປະເມີນວ່າ ມີປະຊາຊົນໄດ້ຮັບຜົລກະທົບປະມານ 50 ພັນຄົນ ປະມານ 8 ພັນຫລັງຄາເຮືອນ ພື້ນທີ່ກະສີກັມເສັຽຫາຍປະມານ 12 ພັນເຮັກຕາ ໂຮງຮຽນຖືກນໍ້າຖ້ວມ 36 ແຫ່ງ ເສັຽຊິວິດ 1 ຄົນ ເປັນເດັກ ນ້ອຍຜູ້ຍີງອາຍຸຣະຫວ່າງ 11-12 ປີ. ໃນຊ່ວງສອງ-ສາມ ມື້ທີ່ຜ່ານມາ ໃນເຂດພາກກາງ ແລະພາກໃຕ້ຂອງລາວ ມີນໍ້າຖ້ວມ ໃນຫລາຍພື້ນທີ່ຍ້ອນ ລົມພະຍຸພັດຜ່ານ ເຮັດໃຫ້ຝົນຕົກຫນັກມາຫລາຍວັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ