ຕລາດ ຢູ່ນະຄອນໄກສອນ ພົມວິການ ສວັນນະເຂດ ໄຟໄໝ້ ເສັຍຫາຍໜັກ

ຈຳປາທອງ
2022.08.12
Share on WhatsApp
Share on WhatsApp
ຕລາດ ຢູ່ນະຄອນໄກສອນ ພົມວິການ ສວັນນະເຂດ ໄຟໄໝ້ ເສັຍຫາຍໜັກ ເຫດການໄຟໄໝ້ ຕລາດຕລາດຫລັກ 8 ບ້ານອຸດົມວິໄລ ນະຄອນໄກສອນ ພົມວິການ ແຂວງສວັນນະເຂດ.
ຮູບພາບ: ປກສ

ຕລາດຫລັກ 8 ບ້ານອຸດົມວິໄລ ນະຄອນໄກສອນ ພົມວິການ ແຂວງສວັນນະເຂດ ໄຟໄໝ້ ໃນມື້ອວັນທີ 11 ສິງຫານີ້ ເສັຍຫາຍໜັກ, ພວກພໍ່ຄ້າແມ່ຄ້າ ທີ່ໄດ້ຮັບຄວາມເສັຍຫາຍ ໜັກໜ່ວງ ຮຽກຮ້ອງໃຫ້ພາກສ່ວນທີ່ກ່ຽວຂ້ອງ ຊ່ອຍເຫລືອຢ່າງຮີບດ່ວນ ຍ້ອນໄຟໄໝ້ສິນຄ້າ ແລະເຄື່ອງຂອງເສັຍຫາຍໝົດ ແລະຫລາຍຄົນກໍບໍ່ມີທຶນທີ່ຈະຄ້າຂາຍຕໍ່ໄປໄດ້.

ເຈົ້າຂອງຮ້ານສ້ອມແປງໂທຣະສັບ ຢູ່ໃນຕລາດ ທີ່ໄດ້ຮັບຄວາມເສັຍຫາຍຫລາຍເຖິງ 200 ລ້ານກີບນັ້ນ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 12 ສິງຫານີ້ວ່າ:

ເສັຽຫາຍແມ່ນໝົດແບບ 100% ເລີຍ. ບໍ່ໄດ້ຈັກຢ່າງເລີຍ ອາໄລ່ສາງເຮົາເສັຽຫາຍໝົດເລີຍ ເຄື່ອງລູກຄ້າກະໄໝ້ຫລາຍເຄື່ອງ. ໂຕນີ້ໄດ້ຍິນເພິ່ນລົມກັນກະຄືວ່າ ໄຟຟ້າລັດວົງຈອນ ເພິ່ນຍັງບໍ່ວ່າແນວໃດຫັ້ນແຫລະ ເພິ່ນກະບໍ່ທັນມີຄໍາຕອບຫຍັງເລີຍ.

ຄົນງານຮ້ານຄ້າຜູ້ນຶ່ງເວົ້າວ່າ ຕອນນີ້ ເຈົ້າໜ້າທີ່ພາກສ່ວນທີ່ກ່ຽວຂ້ອງ ໄດ້ເອີ້ນບັນດາຜູ້ປະກອບການ ແລະພໍ່ຄ້າແມ່ຄ້າ ແຕ່ລະຮ້ານ ທີ່ໄດ້ຮັບຄວາມເສັຍຫາຍ ຈາກເຫດໄຟໄໝ້ນັ້ນ ໄປໃຫ້ຂໍ້ມູນຄວາມເສັຍຫາຍ  ແລະເວົ້າເຖິງເຣື່ອງ ແນວທາງແກ້ໄຂຄວາມເດືອດຮ້ອນ ໃນເບື້ອງຕົ້ນ ແລະຄວາມຮຽກຮ້ອງ ຕ້ອງການຂອງຜູ້ປະສົບເຫດ ໄຟໄໝ້ຄັ້ງນີ້ນໍາດ້ວຍ.

ຕອນນີ້ ກະເພິ່ນຍັງບໍ່ທັນສລຸບອອກມາ. ເພິ່ນເອີ້ນໄປປະຊຸມຢູ່ ບໍ່ມີຜູ້ໄດ້ຮັບບາດເຈັບ ແຕ່ວ່າມັນບໍ່ໃຫ້ເປີດແລ້ວນ່າ ເຈົ້າ. ເພາະວ່າມັນໄໝ້ໝົດເລີຍຂ້າງໃນ ເຄື່ອງໃນຕລາດທັງໝົດເລີຍ.

ແມ່ຄ້າຮ້ານຂາຍອາຫານສົດ ເວົ້າວ່າ ເຈົ້າໜ້າທີ່ຕໍາຣວດ ແລະພະນັກງານທີ່ກ່ຽວຂ້ອງ ໄດ້ໄປຕລາດເພື່ອສືບສວນ-ສອບສວນຫາຕົ້ນຕໍ ຂອງສາເຫດໄຟໄໝ້ ແລະສອບຖາມພວກພໍ່ຄ້າແມ່ຄ້າ ຊຶ່ງໃນນັ້ນ ມີຮ້ານຄ້າບາງຮ້ານ ບໍ່ໄດ້ຮັບຄວາມເສັຍຫາຍ ແລະກໍຍັງຈະຂາຍເຄື່ອງຕາມປົກກະຕິຢູ່.

ທາງການເພິ່ນກໍາລັງລົງມາສືບສວນມື້ນີ້ ເຈົ້າ. ເພາະວ່າຕອນນີ້ເຮົາກະຢູ່ໃນຕລາດ ອັນນີ້ຮ້ານເຮົາກະບໍ່ຄ່ອຍໜັກປານໃດ ເພາະວ່າເຮົາບໍ່ໄດ້ມ້ຽນເຄື່ອງໃນຮ້ານ. ເຮົາແມ່ນແມ່ຄ້າຕລາດສົດ ເປັນບ່ອນທາງໃນຕລາດ ຈະເສັຍຫາຍຫລາຍ.

ເຈົ້າຂອງຮ້ານຂາຍເຄື່ອງຮ້ານນຶ່ງ ທີ່ຢູ່ອ້ອມແອ້ມຕລາດຫລັກ 8 ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 12 ສິງຫານີ້ວ່າ ໄຟໄໝ້ຕລາດຫລັກ 8 ນີ້ ແມ່ນໄໝ້ພຽງແຕ່ຮ້ານຄ້າ ທີ່ຢູ່ໃນຕລາດເທົ່ານັ້ນ, ບໍ່ໄດ້ໄໝ້ແຜ່ລາມອອກມາທາງນອກ.

ຫລັກ 8 ຫັ້ນບໍ໋ ບໍ່ ບໍ່ຮອດ ເຈົ້າ ເຮົາບໍ່ໄດ້ຂາຍ ເຮົາມີແຕ່ໂຮມສມຸນພັຍ ເພິ່ນກະບໍ່ມີເຄື່ອງຂາຍແຫລະໄໝ້ໝົດແລ້ວ ຈັ່ງວ່າເດີ້ ເຮົາກະຍັງບໍ່ໄດ້ໄປເບິ່ງຫັ້ນນ່າ.

ມາຮອດມື້ນີ້ ກໍຍັງບໍ່ສາມາດສລຸບ ຄວາມເສັຍຫາຍໄດ້ຢ່າງຄັກແນ່ວ່າ ໄຟໄໝ້ ຕລາດນັ້ນ ເຮັດໃຫ້ຮ້ານຄ້າເສັຍຫາຍຈັກຮ້ານ ແລະມູນຄ່າເສັຍຫາຍເທົ່າໃດກັນແທ້ ແລະຍັງບໍ່ຮູ້ວ່າສາເຫດຂອງໄຟໄໝ້ ນັ້ນເປັນຍ້ອນຫຍັງກັນແທ້. ເຈົ້າໜ້າທີ່ຄະນະຮັບຜິດຊອບເຣື່ອງນີ້ ກໍາລັງເກັບກໍາ ແລະຮິບໂຮມຂໍ້ມູນນັ້ນຢູ່ ແລະກໍຄາດວ່າ ນ່າຈະຮູ້ຣາຍລະອຽດ ໄດ້ໃນອາທິດໜ້ານີ້.

ດັ່ງເຈົ້າໜ້າທີ່ ຜແນກແຮງງານ ແລະສວັດດິການສັງຄົມ ແຂວງສວັນນະເຂດ ເວົ້າໃນມື້ດຽວກັນນີ້ວ່າ:

ເພິ່ນກະຍັງຊິເກັບຂໍ້ມູນ ແລ້ວຈັ່ຍງານມາທາງເຮົາ ຍັງບໍ່ເຫັນທາງຜູ້ຮັບຜິດຊອບ ເພິ່ນຣາຍງານມາ ກະເຫັນຕາມຮູບຫັ້ນແຫລະ ຕາມທີ່ວ່າເພິ່ນເອົາລົງໃນເຟສ ພາກສ່ວນເພິ່ນຍັງບໍ່ຣາຍງານມາ.

ພ້ອມດຽວກັນນັ້ນ ວິທຍຸເອເຊັຽເສຣີ ກໍໄດ້ຕິດຕໍ່ໄປຫາຜແນກອຸດສາຫະກັມ ແລະການຄ້າ ແຂວງສວັນນະເຂດ ແລະຫ້ອງການອຸດສາຫະກັມ ແລະການຄ້າ ນະຄອນໄກສອນ ພົມວິຫານ ແຕ່ເຈົ້າໜ້າທີ່ທີ່ຮັບຜິດຊອບເຣື່ອງນີ້ ກໍາລັງປະຊຸມກັນຢູ່, ບໍ່ສະດວກທີ່ຈະໃຫ້ຣາຍລະອຽດໄດ້.

ໄຟໄໝ້ຢູ່ຕລາດຫລັກ 8 ເກີດຂຶ້ນເວລາປະມານ 3 ໂມງເຊົ້າ ຂອງມື້ວັນທີ 11 ສິງຫານີ້ ຊຶ່ງເປັນເວລາທີ່ພວກພໍ່ຄ້າແມ່ຄ້າ ສ່ວນໃຫຍ່ ຍັງບໍ່ທັນມາຕຣຽມເປີດຮ້ານ ດັ່ງນັ້ນ ຈຶ່ງບໍ່ໄດ້ເກັບເຄື່ອງຂອງທັນ. ຫລັງຈາກນັ້ນ ເວລາ 6 ໂມງເຊົ້າ ເຈົ້າໜ້າທີ່ຈຶ່ງສາມາດຄວບຄຸມໄຟໄໝ້ໄດ້.

ອີງຕາມຄໍາເວົ້າ ຂອງແມ່ຄ້າຂາຍອາຫານສົດ ຢູ່ຕລາດຫລັກ 8, ຂະນະນີ້ ເຈົ້າໜ້າທີ່ໄດ້ສັ່ງຫ້າມບໍ່ໃຫ້ຊາວບ້ານເຂົ້າໄປໃນຕລາດເດັດຂາດ, ແຕ່ກໍອະນຸຍາດໃຫ້ຮ້ານຂາຍອາຫານສົດ ຕັ້ງບ່ອນຂາຍຊົ່ວຄາວຢູ່ໜ້າຕລາດ ໂດຍບໍ່ໄດ້ເສັຍຄ່າເຊົ່າບ່ອນຂາຍ. ສ່ວນຮ້ານຄ້າປະເພດອື່ນໆ ແມ່ນໃຫ້ຢຸດຂາຍ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.