ຊາວບ້ານໃນ 5 ບ້ານ ເຂດເມືອງກາສີ ແຂວງວຽງຈັນ ຍັງສືບຕໍ່ໄດ້ຮັບຜົນກະທົບ ຈາກການຂຸດຄົ້ນແຮ່ເຫຼັກ ຂອງບໍລິສັດຈີນ ທີ່ເຮັດໃຫ້ນ້ຳ ໃນສາຍນ້ຳປັງ ກາຍເປັນສີແດງຂຸ່ນ ຈົນຊາວບ້ານບໍ່ກ້າໃຊ້ນ້ຳ

ສາຍນ້ຳປັງ ທີ່ໄຫຼຜ່ານຢ່າງໜ້ອຍ 5 ບ້ານ ປະກອບມີ ບ້ານບວມຜຸກ ບ້ານຫນອງຄຳ ບ້ານຜາຊ້າງ ບ້ານຫ້ວຍຫົກ ແລະບ້ານຈຽງ ຢູ່ເມືອງກາສີ ແຂວງວຽງຈັນ ເປັນສາຍນ້ຳ ທີ່ຊາວບ້ານສາມາດນຳໃຊ້ອຸປະໂພກ-ບໍລິໂພກໄດ້ ຍ້ອນເປັນສາຍນ້ຳໃສ ມີປູປາອຸດົມສົມບູນ ແຕ່ນັບແຕ່ມີ ໂຄງການຂຸດຄົ້ແຮ່ເຫຼັກ ຂອງ ບໍລິສັດ ໄທຢຸ້ຍ ກາສີ ພັດທະນາບໍ່ແຮ່ ຈຳກັດ ຂອງນັກລົງທຶນຈີນ ໄດ້ເຂົ້າມາຂຸດຄົ້ນແຮ່ທາດຢູ່ເທິງນ້ຳ ໄດ້ປະມານ 2 ປີ ສາຍນ້ຳປັງກໍກາຍເປັນສີແດງຂຸ່ນ ມີກິ່ນຂີວ ແລະເປັນຄາບນ້ຳມັນ, ອີງຕາມຄຳເວົ້າຂອງຊາວບ້ານ ຢູ່ບ້ານບວມຜຸກ ເມືອງກາສີ ແຂວງວຽງຈັນ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 26 ພະຈິກ ປີ 2024.

"ເປັນຄາບນ້ຳມັນ ເປັນຂຸ່ນໆ ເລີຍນ່າ ຄັນວ່າເອົາເຂົ້ານາ ເຂົ້າບ່ອນໃດມັນກໍແຫ້ງບ່ອນນັ້ນເລີຍຫັ້ນນ່າ ແຫ້ງໄປກັບນ້ຳຫັ້ນເລີຍຫັ້ນນ່າ ມັນຂຸ່ນແຮງ ໃຊ້ບໍ່ໄດ້ແຫຼະ ເຮັດຫຍັງກໍບໍ່ໄດ້ ເຂົ້ານາເຂົ້າຫຍັງກໍບໍ່ງາມຫັ້ນນ່າ ເຮັດສວນກໍຕາຍໝົດຫັ້ນແຫຼະນ້ຳຫັ້ນນ່າ."

ຊາວບ້ານຢູ່ບ້ານບວມຜຸກ ເມືອງກາສີ ອີກນາງໜຶ່ງ ກ່າວວ່າ ພາຍໃນໜຶ່ງອາທິດ ນ້ຳປັງກາຍເປັນສີແດງຂຸ່ນ 4 ຫາ 5 ມື້ ເຮັດໃຫ້ຊາວບ້ານຢ້ານບໍ່ກ້າໃຊ້ນ້ຳ ເມື່ອສາຍນ້ຳປັງ ກາຍເປັນສີແດງ ກໍ່ເຮັດໃຫ້ຫຼາຍຄອບຄົວ ຂາດລາຍຮັບໄປນຳດ້ວຍ ຍ້ອນບໍ່ສາມາດຫາປູປາ ແລະຜັກກາດນ້ຳ ໄດ້ຄືເກົ່າ.

"ປາກໍກິນກໍຂີວນ້ຳມັນ ຫອຍຍັງບໍ່ມີ ຕະກີ້ຫອຍກົ້ນຍາວຫຼາຍໆ ຕອນນີ້ກໍຫອຍກໍບໍ່ມີ ແມ່ນ ຂາດລາຍຮັບ ສວນຜັກກາດນ້ຳຫຍັງ ຕອນເພິ່ນບໍ່ເອົາມາເຮັດຈານນີ້ເດີ້ ຂາຍທຸກມື້ໆ ມື້ລະແສນ ມື້ລະແສນປາຍເນາະ ດຽວນີ້ຮອດບໍ່ມີຜັກຂາຍ ເຂົາປ່ອຍນ້ຳອັນນີ້ລົງ ຖ້ວມຜັກກາດນ້ຳ ຕາຍໝົດສິດເລີຍຫັ້ນນ່າ."

ກ່ອນໜ້ານີ້ ໃນເດືອນມັງກອນ ທີ່ຜ່ານມາ ນ້ຳລ້າງແຮ່ທາດ ທີ່ເກັບໄວ້ໃນອ່າງເກັບນ້ຳ ໄດ້ລົ້ນອອກມາໄຫຼລົງໃສ່ນ້ຳປັງ ເຮັດໃຫ້ນ້ຳປັງກາຍເປັນສີແດງ, ຕໍ່ມາ ກົມຄຸ້ມຄອງບໍ່ແຮ່ ແລະ ກົມກວດກາ, ກະຊວງພະລັງງານ ແລະບໍ່ແຮ່ ສົມທົບກັບພາກສ່ວນກ່ຽວຂ້ອງ ຂັ້ນສູນກາງ ແລະ ຂັ້ນແຂວງ ກໍໄດ້ລົງກວດກາໂຄງການດັ່ງກ່າວ ໂດຍໄດ້ສະເໜີໃຫ້ບໍລິສັດ ໂຈະໂຄງການຊົ່ວຄາວ ຈົນກວ່າຈະມີການປັບປຸງ ປົວແປງອ່າງລ້າງແຮ່ດັ່ງກ່າວ, ແຕ່ຢ່າງໃດກໍຕາມ ຫຼັງຈາກນັ້ນ 1 ເດືອນ ສາຍນ້ຳປັງ ກໍກາຍເປັນສີແດງຂຸ່ນ ຄືເກົ່າ.

ມາຮອດປັດຈຸບັນ ເຈົ້າໜ້າທີ່ຫ້ອງການຊັບພະຍາກອນ ແລະສິ່ງແວດລ້ອມ ເມືອງກາສີ ກ່າວວ່າ ເຫດການເທື່ອຫຼ້າສຸດນີ້ ເກີດຈາກບໍລິສັດດັ່ງກ່າວ ໄດ້ສ້ອມແປງທໍ່ສົ່ງນ້ຳລ້າງແຮ່ ເຮັດໃຫ້ຂໍ້ຕໍ່ຂອງທໍ່ຫຼຸດ ຈຶ່ງເຮັດໃຫ້ຂີ້ແຮ່ຈຳນວນໜຶ່ງໄຫຼລົງສູ່ຫ້ວຍນ້ຳປັງ ປັດຈຸບັນພາກສ່ວນທີ່ກ່ຽວຂ້ອງ ກໍໄດ້ລົງກວດກາ ແລະໄດ້ສົ່ງລາຍງານໄປຂັ້ນເທິງແລ້ວ ແລະໄດ້ກຳຊັບໃຫ້ບໍລິສັດປະຕິບັດຕາມຂັ້ນຕອນຕາມສັນຍາ ຫາກຍັງປ່ອຍນ້ຳເປື້ອນອີກ ກໍຕ້ອງຮັບຜິດຊອບຕໍ່ຜົນກະທົບຕ່າງໆ ຕາມລະບຽບກົດໝາຍ.

"ທາງບໍລິສັດແມ່ນວ່າສ້ອມແປງທໍ່ສົ່ງແຮ່ ທໍ່ຫັ້ນນ່າຫຼຸດເນາະ ຂໍ້ຕໍ່ ເຮັດໃຫ້ຂີ້ແຮ່ຈຳນວນໜຶ່ງທີ່ວ່າໄຫຼລົງຫັ້ນນ່າ ປັດຈຸບັນໄດ້ສ້ອມແປງສຳເລັດແລ້ວ ທໍ່ທີ່ວ່າສົ່ງນ້ຳເຂົາລ້າງແຮ່ຫັ້ນນ່າ."

ບໍລິສັດ ໄທຢຸ້ຍ ກາສີ ພັດທະນາບໍ່ແຮ່ ຈໍາກັດ ຂອງຈີນ ໄດ້ຮັບສັມປະທານດິນ ເພື່ອຂຸດຄົ້ນແຮ່ເຫຼັກແບບທົດລອງ ເປັນເວລາ 25 ປີ ໂດຍໄດ້ລົງສໍາລວດຂຸດຄົ້ນ ມາຕັ້ງແຕ່ເດືອນ ພະຈິກ ປີ 2021 ພາຍຫລັງໝົດອາຍຸສັມປະທານແລ້ວ ທາງບໍລິສັດກໍຈະປັບໜ້າດິນໃຫ້ເປັນຄືເກົ່າ ແລ້ວສົ່ງດິນນັ້ນ ຄືນໃຫ້ປະຊາຊົນ.