ປະຊາຊົນຫຼາຍຄົນ ຢູ່ແຂວງສາລະວັນ ກັງວົນຢ້ານບໍ່ມີທີ່ດິນທຳມາຫາກິນ

ປະຊາຊົນລາວຢູ່ແຂວງສາລະວັນໃນພາກໃຕ້ຂອງລາວ ວິຕົກກັງວົນຢ້ານບໍ່ມີທີ່ດິນທຳມາຫາກິນ ເພາະທາງການ ຈະໃຫ້ສຳປະທານທີ່ດິນແກ່ນັກລົງທຶນຫຼາຍຂຶ້ນ. ຊາວສາລະວັນຫຼາຍຄົນກ່າວວ່າ ພວກເຂົາບໍ່ດີໃຈ ທີ່ທາງການແຂວງ ຈະຊຸກຍູ້ສົ່ງເສີມໃຫ້ນັກລົງທຶນ ໂດຍສະເພາະນັກລົງທຶນຈີນແລະວຽດນາມ ມາລົງທຶນພາຍໃນແຂວງຫຼາຍຂຶ້ນ ເພາະວ່າ ການລົງທຶນໃຫຍ່ໆຂອງຕ່າງປະເທດ ຈະເຮັດໃຫ້ຊັບພະຍາກອນທຳມະຊາດຂອງແຂວງຫຼຸດລົງ ເປັນຕົ້ນທີ່ດິນແລະປ່າໄມ້. ແຕ່ເຈົ້າໜ້າທີ່ແຂວງ ໃຫ້ເຫດຜົນວ່າ ທາງການແຂວງສາລະວັນ ສະໜັບສະໜູນໃຫ້ຊາວຕ່າງປະເທດມາລົງທຶນ ກໍເພາະວ່າ ນັກລົງທຶນຕ່າງປະເທດ ມີເງິນຫຼາຍ ສາມາດເຮັດການຜະລິດອັນໃຫຍ່ໂຕ ແລະສາມາດສ້າງໂຮງຈັກໂຮງງານ ເຊິ່ງຈະເຮັດໃຫ້ຊາວແຂວງສາລະວັນມີວຽກເຮັດງານທຳ ແລະທີ່ສຳຄັນ ກໍຈະຊ່ວຍສ້າງສາພັດທະນາແຂວງສາລະວັນໃຫ້ຈະເລີນກ້າວໜ້າ, ອີງຕາມຄຳເວົ້າຂອງປະຊາຊົນແລະເຈົ້າໜ້າທີ່ແຂວງສາລະວັນຫຼາຍໆຄົນ.

ເມື່ອຕົ້ນເດືອນກັນຍາ ປີ 2024 ສະມາຄົມມິດຕະພາບລາວ-ຈີນແຂວງສາລະວັນ ໄດ້ຈັດກອງປະຊຸມແລະຕົກລົງກັນວ່າ ທາງສະມາຄົມ ຈະຮ່ວມມືກັບທາງການແຂວງສາລະວັນ ເພື່ອຂະຫຍາຍການຮ່ວມມືລະຫວ່າງແຂວງສາລະວັນແລະບັນດາເມືອງແລະແຂວງຕ່າງໆຂອງຈີນ ເພື່ອຊັກຊວນຊາວຈີນ ໃຫ້ມາລົງທຶນໃນແຂວງສາລະວັນຫຼາຍຂຶ້ນ.

ຕໍ່ການລົງທຶນຂອງຈີນດັ່ງກ່າວ ຊາວລາວຫຼາຍຄົນໃນແຂວງສາລະວັນ ມີຄວາມເຫັນວ່າ ພວກເຂົາມີຄວາມວິຕົກກັງວົນ ຢ້ານນັກລົງທຶນຈີນ ຈະມາຈັບຈອງເອົາທີ່ດິນຢູ່ໃນແຂວງຫຼາຍຂຶ້ນ ຊຶ່ງປັດຈຸບັນ ກໍມີໜ້ອຍຢູ່ແລ້ວ ; ຕົວຢ່າງ, ຊາວລາວຄົນໜຶ່ງ ຢູ່ເມືອງສາລະວັນ ແຂວງສາລະວັນ ທີ່ບໍ່ປະສົງບອກຊື່ ກ່າວກັບວິທະຍຸເອເຊັຍເສຣີໃນວັນທີ່ 13 ກັນຍາ 2024 ນີ້ວ່າ ຖ້າລັດຖະບານລາວ ໃຫ້ສຳປະທານທີ່ດິນແກ່ນັກລົງທຶນຈີນຫຼາຍຂຶ້ນ ທີ່ດິນທຳມາຫາກິນຂອງປະຊາຊົນພາຍໃນແຂວງ ກໍຈະຫຼຸດລົງ ແລ້ວປະຊາຊົນ ກໍຈະກາຍເປັນພຽງລູກຈ້າງຂອງຈີນ. ປັດຈຸບັນ ນັກລົງທຶນຈີນ ກໍໄດ້ສຳປະທານທີ່ດິນໄປຫຼາຍແລ້ວ ເພື່ອປູກກ້ວຍແລະມັນຕົ້ນ ດັ່ງທ່ານໄດ້ກ່າວຕື່ມວ່າ:

“ກະນັກລົງທຶນຈີນແລະສ່ວນຫຼາຍ ມີແຕ່ສວນກ້ວຍກັບສວນມັນຕົ້ນຫັ້ນແຫຼະ ຄົນຈີນກໍເອົາເຂົ້າມາຫຼາຍ ໂອ້ ບໍ່ດີ ມັນກໍບໍ່ດີແລ້ວ ສ່ວນຫຼາຍ ປະຊາຊົນບໍ່ມີທີ່ທຳມາຫາກິນ ກໍຫຼຸດໜ້ອຍຖອຍລົງຫັ້ນແລ້ວ ເຂົາສຳປະທານເດ່ ກຳມະກອນສ່ວນຫຼາຍກະຄົນລາວເຂົາເອົາ ໄດ້ຍິງຂ່າວຢູ່ ບາງເທື່ອກໍບໍ່ໄດ້ເງິນ.”

ເຊັ່ນດຽວກັນ ຊາວລາວຜູ້ໜຶ່ງຢູ່ເມືອງຕຸ້ມລານ ແຂວງສາລະວັນ ກໍຄິດວ່າ ປັດຈຸບັນ ຊາວຈີນແລະວຽດນາມ ໄດ້ມາລົງທຶນປູກກ້ວຍຢູ່ເຂດເມືອງຕຸ້ມລານຫຼາຍແລ້ວ ແລະຖ້າຫາກມີການລົງທຶນຂອງຕ່າງປະເທດຫຼາຍຂຶ້ນກວ່ານີ້ ຊັບພະຍາກອນທຳມະຊາດເປັນຕົ້ນດິນແລະປ່າໄມ້ ກໍຈະຫຼຸດໜ້ອຍຖອຍລົງ ປະຊາຊົນທ້ອງຖິ່ນຈະທຳມາກິນແນວໃດ.

ຊາວເມືອງຕຸ້ມລານນາງນີ້ ກ່າວອີກວ່າ:

“ປີນີ້ເຂົາກໍເວົ້າ ຄືຈີນ ຄືວຽດນັ້ນ ເຂົາມາລົງທຶນ ວ່າຊິເຮັດສວນກ້ວຍອີຫຍັງ ແຕ່ເຂົາກະບໍທັນໄດ້ເຮັດດອກ ກະບໍ່ດີ ມັນມີແຕ່ດິນ ດິນຢ່າງດຽວ ຊັບພະຍາກອນທຳມະຊາດເດ່ ຕໍ່ໄປ ປະຊາຊົນເຂົາກະຈະເຮັດຫຍັງລະ ເຂົາຈະຂາຍຫຍັງ ຈະຫາຫຍັງກິນ ເຮັດຫຍັງກິນ.”

ຊາວເມືອງຕຸ່ມລານນາງນີ້ ໃຫ້ຕົວຢ່າງວ່າ ນັກລົງທຶນວຽດນາມ ໄດ້ມາສ້າງໂຮງງານເຜົາຖ່ານໄມ້ຢູ່ເມືອງຕຸ້ມລານ ໂດຍໄດ້ຕັດໄມ້ຕິ້ວ ແລະຊື້ໄມ້ຕິ້ວຈາກຫຼາຍໆບ່ອນ ປັດຈຸບັນ ໄດ້ເຮັດໃຫ້ປ່າໄມ້ໃນເຂດເມືອງຕຸ້ມລາຍຖືກທຳລາຍໄປເກືອບໝົດແລ້ວ ດັ່ງນາງໄດ້ກ່າວຕື່ມວ່າ:

“ໂອ້ມີແຕ່ໂຮງງານຖ່ານ ມັນມີຫຼາຍໂຮງງານເດ່ລະ ສົ່ງອອກວຽດນາມ ເຈົ້າເມືອງ ເຈົ້າແຂວງເຂົາໃຫ້ຊັບພະຍາກອນທຳມະຊາດ ຂົນເອົາໄມ້ຕິ້ວຫັ້ນແລ້ວ ໄມ້ເປັນຂອງເຂົາ ພຸ້ນແຖວພູແຖວຜາ ບໍ່ໄດ້ປູກເປັນທຳະຊາດເດ່່ ລາງຄົນໃຫ້ລາຄາສູງເຂົາກໍຂາຍໝົດເລີຍ ທັງທຶນທັງສວນ ຂາຍທັງໄມ້ເລີຍ.”

ສ່ວນເຈົ້າໜ້າທີ່ແຂວງສາລະວັນທ່ານໜຶ່ງ ອະທິບາຍວ່າ ພວກທີ່ມາລົງທຶນໃນແຂວງສາລະວັນສ່ວນຫຼາຍ ເປັນຄົນຈີນແລະວຽດນາມ. ສຳລັບທີ່ດິນທີ່ໃຫ້ສຳປະທານໄປນັ້ນ ສ່ວນຫຼາຍກໍເປັນດິນ ທີ່ທາງແຂວງໄດ້ຈັດສັນໄວ້ແລ້ວ.

“ສ່ວນຫຼາຍມີແຕ່ຈີນ ວຽດນາມເນາະ ເຂົ້າມາລົງທຶນນຳເຮົາ ມີການໃຫ້ສຳປະທານຫຼືວ່າ ມາສ້າງໂຮງຈັກໂຮງງານ ເບື້ອງລັດເຮົາກະ ຈັດສັນດິນ ຈັດສັນປັນສ່ວນຢູ່ແລ້ວ.”

ເຈົ້າໜ້າທີ່ແຮງງານແຂວງສາລະວັນທ່ານໜຶ່ງ ກໍໃຫ້ເຫດຜົນວ່າ ທີ່ດິນສ່ວນຫຼາຍ ທີ່ທາງແຂວງໃຫ້ສຳປະທານໄປນັ້ນ ກໍແມ່ນ ດິນຂອງລັດ ບໍ່ແມ່ນດິນຂອງປະຊາຊົນ; ອີກຢ່າງໜຶ່ງ ການລົງທຶນຂອງຈີນ ກໍຈະຊ່ວຍສ້າງສາພັດທະນາແຂວງສາລະວັນ ແລະຈະຊ່ວຍເຮັດໃຫ້ປະຊາຊົນມີວຽກເຮັດງານທຳ ດັ່ງທ່ານໄດ້ກ່າວອີກວ່າ:

“ສ່ວນຫຼາຍນີ້ ເພິ່ນສຳປະທານ ແຕ່ວ່າດິນທີ່ມັນເປັນດິນເຂດຂອງລັດຄຸ້ມຄອງ ບໍ່ແມ່ນຂອງປະຊາຊົນ ມັນເປັນເຂດສະຫງວນ ທີ່ບໍ່ໃຫ້ປະຊາຊົນເຮັດຫັ້ນໜາ. ສ່ວນຫຼາຍເຂົາຈະລົງທຶນປູກໄມ້ໃຫ້ໝາກອີຫຍັງຕ່າງໆຫັ້ນໜາ ຄົນລາວກໍມີວຽກງານທຳ.”

ຕໍ່ຄຳຖາມທີ່ວ່າ ເປັນຫຍັງທາງການແຂວງສາລະວັນ ຈຶ່ງອະນຸຍາດໃຫ້ຈີນເຂົ້າມາລົງທຶນຫຼາຍແທ້, ເຈົ້າໜ້າທີ່ທ່ານນີ້ຕອບວ່າ ເປັນເພາະຄົນຈີນ ມີເງິນຫຼາຍ.

“ຈີນນີ້ມັນກໍເປັນເຈົ້າມືໃຫຍ່ ມີທຶນຫຼາຍເນາະ ຄັນມັນເຮັດ ມັນກໍຕ້ອງເຮັດລະດັບໂຮງງານ ຄັນວ່າກຳມະກອນຈີນເຂົ້າມາຫຼາຍ ມັນກໍມີຂໍ້ເສຍຫັ້ນແຫຼະ ເວົ້າເລື່ອງວ່າຍາດແຮງງານກັນ ຄົນລາວກໍຫຼາຍ ສ່ວນຫຼາຍຄົນຈີນມັນຈະຢູ່ໃນລະດັບຕຳແໜ່ງສູງໆຂອງເຂົາຫັ້ນນ່າ.”

ເມື່ອບໍ່ດົນຜ່ານມາ ທ່ານ ຄຳຜ່ານ ສີລາວີ ຫົວໜ້າຜະແນກອຸດສາຫະກຳແລະການຄ້າແຂວງສາລະວັນ ໄດ້ລາຍງານຕໍ່ກອງປະຊຸມສະຫຼຸບຜົນງານການລົງທຶນພາຍໃນແຂວງວ່າ ແຂວງສາລະວັນ ມີການລົງທຶນທັງໝົດ 126 ຫົວໜ່ວຍທຸລະກິດ ທີ່ມີມູນຄ່າປະມານ 484 ຕື້ກີບ ເຊິ່ງສ່ວນຫຼາຍກໍເປັນການລົງທຶນຂອງຈີນແລະວຽດນາມ.