ສານໄທຍ ຈະພິພາກສາຄະດີ ເຂື່ອນໄຊຍະບູຣີ

ອຸ່ນແກ້ວ
2022.08.04
Share on WhatsApp
Share on WhatsApp
ສານໄທຍ ຈະພິພາກສາຄະດີ ເຂື່ອນໄຊຍະບູຣີ ເຄື່ອຂ່າຍປະຊາຊົນໄທຍ 8 ແຂວງລຸ່ມນໍ້າຂອງ ຟ້ອງຮ້ອງການໄຟຟ້າ ຝ່າຍຜລິດ ແຫ່ງປະເທດໄທຍ ແລະໜ່ວຍງານທີ່ກ່ຽວຂ້ອງ ໃຫ້ຖອນສັນຍາຊື້-ຂາຍໄຟຟ້າ ຈາກເຂື່ອນໄຊຍະບູຣີ.
RFA

ສານ​ປົກ​ຄອງ​ສູງ​ສຸດ ຂອງ​ໄທ​ຍ ນັດຟັງ​ຄຳ​ພິ​ພາກ​ສາ ກໍ​ຣະ​ນີ ອົງ​ການ​ພາກ​ປະ​ຊາ​ສັງ​ຄົມໄທ​ຍ ທີ່​ເປັນເຄື່ອ​ຂ່າຍປະ​ຊາ​ຊົນໄທ​ຍ 8 ແຂວງ ລຸ່ມແມ່​ນ້ຳ​ຂອງ ໄດ້​ຟ້ອງ​ຮ້ອ​ງ​ການ​ໄຟ​ຟ້າ​ຝ່າຍ​ຜ​ລິຕ ​ແຫ່ງ​ປະ​ເທດ​ໄທ​ຍ ແລະ ໜ່ວຍ​ງານ​ທີ່​ກ່ຽວຂ້ອງ ໃຫ້​ເພີກ​ຖອນສັນ​ຍາ ​ຊື້​-ຂາຍ ໄຟ​ຟ້າຈາກ​ເຂື່ອນ​ໄຊ​ຍະ​ບູ​ຣີ ໂດຍໄດ້​ກຳ​ນົດ​ຟັງ​ ຄຳ​ພິ​ພາກ​ສາ ໃນ​ວັນ​ທີ 17 ສິງ​ຫາ 2022.

ຍາ​ນາງ ອ້ອມ​ບຸນ ທິບ​ສຸ​ນາ ທີ່​ເປັນ​ນຶ່ງໃນ​ແທນໂຕ​ແທນ ອົງ​ການພາກປະຊາສັງຄົມໄທຍ ໃນ​ຖາ​ນະ​ເປັນ​ຜູ້​ຟ້ອງ​ລຳ​ດັບ​ທີ 4 ຂອງ​ຄະ​ດີນີ້ ກ່າວ​ຕໍ່ວິທຍຸ​ເອ​ເຊັຽ​ເສ​ຣີ ໃນ​ວັນ​ທີ 4 ສິງ​ຫາ ວ່າ:

ເດົາໃຈບໍ່ຖືກວ່າ ສານຈະຕັດສິນອອກມແນວໃດ ຍັງຕ້ອລໍຖ້າລຸ້ນ ຢ່າງດຽວ ເຊິ່ງທາງເຄືອຂ່າຍ ຈະປຶກສາຫາລື ກັນໃນມື້ວັນທີ 4 ສິງຫານີ້ ບໍ່ວ່າ ຈະເສັຽ ຫຼື ຊະນະ ຈະຍົຟ້ອງ ຫຼື ບໍ່ຍົກຟ້ອງ ພວກເຮົາກໍຄົງ ຕ້ອງໄປຮັບຟັງຄຳພິພາກສາ ເພື່ອໃຫ້ເຫັນວ່າ ປະເດັນນີ້ ມັນເປັນບັນຫາ ແມ່ນໄດ້ເກີດຜົກະທົບຂຶ້ນແລ້ວ ແລະ ເຣື່ອງອະທິປະໄຕ ແຕ່ລະປະເທດ ທີ່ໃຊ້ແມ່ນ້ຳຂອງຮ່ວມກັນ.”

ເຂື່ອນໄຊ​ຍະ​ບູ​ຣີ ທີ່​ສ້າງ​ໃສ່ແມ່​ນ້ຳ​ຂອງ ມັນ​ເປັນ​ຜົ​ລ​ກະ​ທົບ​ ຂ້າມ​ຊາຍ​ແດນ. ທ່ານ ຈິ​ຣະ​ສັກ ອິນ​ທະ​ຍົດ ຜູ້​ປະ​ສານ​ງານ ​ເຄື່ອ​ຂ່າຍ​ກຸ່ມ​ຮັກ​ຊຽງ​ຂອງ ແຂວງຊຽງ​ຮາຍ ທີ່​ເປັນ​ອົງ​ການ ​ພາກ​ປະ​ຊາ​ສັງ​ຄົມ​ໄທ​ຍ ໄດ້​ກ່າວ​ວ່າ:  

ກະລໍຖ້າຟັງ ຢູ່ຄືກັນ ຊາວບ້ານ ກໍໄດ້ແຕ່ຫວັງວ່າ ສານຈະໃຫ້ຄວາມເມດຕາ ພວກເຮົາ ກໍຄິດວ່າ ສານຈະຕ້ອງເຮັດໜ້າທີ່ ແຕ່ກໍຫວັງວ່າ ຊາວບ້ານ ຈະໄດ້ຮັບການປົກປ້ອງ ເພາະວ່າ ມັນເປັນຜົກະທົບຂ້າມຊາຍແດນ ເຊິ່ງຖ້າເບິ່ງຈຸດນີ້ ກໍຈະເຫັນເຣື່ອສິ່ງທີ່ຈະຕາມມາ ວ່າສະຖານການແມ່ນ້ຳຂອງ ຈະເປັນແນວໃດ.”

ປາ​ນ້ຳ​ຂອງ ​ກໍ​ເຣີ່ມ​ຫາ​ຍາກ​ຂຶ້ນກວ່າ​ເກົ່າ ຍ້ອນ​ມີ​ຈຳ​ນວນລົດ​ລົງ. ທ່ານ ຊານ​ນະ​ຣົງ ວົງ​ລາ ຜູ້​ຕາງ​ໜ້າ​ກຸ່​ມຮັກ​ຊຽງ​ຄານ ແຂວງ​ເລີຍ ປະ​ເທດ​ໄທ​ຍ ໄດ້​ກ່າວ​ວ່າ:

ຄັນເວົ້າເຖິງຄາມຮູ້ສຶກ ໃນເວລານີ້ ກໍບໍ່ແຕກຕ່າງຫຍັງຈາກທີ່ຜ່ານໆມາ ຄື ມີຄວາມຮູ້ສຶກເສີຍໆ ຄືກັນ ກັບທີ່ຜ່ານມາ ເຊິ່ງຕອນນີ້ ຍົກໂຕຢ່າງ ເປັນຕົ້ນ ເວລານັກທ່ອງທ່ຽວ ມາທ່ຽວ ເມືອງຊຽງຄານ ພວກເຮົາ ບໍ່​​ສາມາດຈັດຫາປາໃນແມ່ນ້ຳຂອງ ເພື່ອມາຣຽມເປັນອາຫານ ໃຫ້ແກ່ນັກທ່ອງທ່ຽວໄດ້ ເພາະວ່າ ປານ້ຳຂອງຫາຍາກຂຶ້ນຫຼາຍເຕີບ.”

ຊາວ​ບ້ານ​ເອງ ກໍ​ຫວັງ​ວ່າ ຈະ​ໄດ້​ຮັບ​ຄວາມ​ເປັນ​ທັມ ໃນ​ກໍ​ຣະ​ນີ​ດັ່ງ​ກ່າວ. ຍາ​ນາງ ສອນ ຈຳ​ປາ​ດອກ ຊາວ​ປະ​ມົງພື້ນບ້ານ ແຂວງ​ອຸ​ບົນ​ຣາທານີ ໃນ​ຖາ​ນະ​ຜູ້​ຟ້ອ​ງ​ລຳ​ດັບ​ທີ 37 ຂອງ​ຄະ​ດີນີ້ ໄດ້​ກ່າວ​ວ່າ:

ກະຢາກໃຫ້ຄວາມເປັນທັມກັບປາ ຫຼືວ່າ ກັບຊຸມຊົນບ້ານ. ໂອ! ດຽວນີ້ຫາປາ ໜ້ອຍລົງ ຊຸມຊົນນີ້ກະຫາແຕ່ບໍ່ໄດ້ກິນ. ກະເຄີຍໄດ້ຫຼາຍກະບໍ່ໄດ້ຫັ້ນນ່າ ດຽວນີ້ ກະລົງຫາຄືເກົ່າ ແຕ່ມັນກະບໍ່ໄດ້ ບາດຣາຍໄດ້ຫຼາຍຢູ່ຊູ່ມື້ນີ້.”

ສຳ​ລັບ​ຄະ​ດີ​ຟ້ອງ​ຮ້ອງ ກ່ຽວ​ກັບ​ເຂື່ອນ​ໄຊ​ຍະ​ບູ​ຣີ ໄດ້​ມີ​ຂຶ້ນ​ນັບ​ແຕ່​ວັນ​ທີ 7 ສິງ​ຫາ ປີ 2012 ໂດຍແມ່ນ ໂຕ​ແທນ ອົງ​ການພາກປະຊາສັງຄົມ ທີ່ເປັນ​ເຄືອ​ຂ່າຍ​ປະ​ຊາ​ຊົນ 8 ແຂວງ ລຸ່ມ​ແມ່​ນ້ຳ​ຂອງ​ຈຳ​ນວນ 37 ຄົນ ໄດ້​ຍື່ນ​ຟ້ອງຄະ​ດີ ຕໍ່​ສານປົກ​ຄງ​ກາງ​ຂອງ​ໄທ​ຍ ກ່ອນ​ທີ່​ຈະ​ມີ​ການກໍ່​ສ້າງ​ເຂື່ອນ​ ໄຊ​ຍະ​ບູ​ຣີ.

ມາ​ຮອດ​ວັນ​ທີ 25 ທັນ​ວາ 2015 ສານ​ປົກ​ຄອງ​ກາງ​ຂອງໄທ ກໍ​ໄດ້​ມີ​ຄຳ​ສັ່ງ​ຍົກ​ຟ້ອງ​ຄະ​ດີ​ ດັ່ງ​ກ່າວ, ແຕ່ ຜູ້​ຟ້ອງ​ຮ້ອງ​ຄະ​ດີ​ດັ່ງ​ກ່າວ ກໍ​ຄື ອົງ​ການ​ພາກ​ປະ​ຊາ​ສັງ​ຄົ​ມ​ໄທ​ຍ ໄດ້​ຍື່ນ​ອຸ​ທອນ ຕໍ່​ສານ​ປົກ​ຄອງ​ສູງ​ສຸດ​ຂອງ​ໄທ​ຍ ແລະ ຄະ​ດີ​ດັ່ງ​ກ່າວ​ກໍ​ແກ່​ຍາວ ​ມາ​ເຖິງ​ປັດ​ຈຸ​ບັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.