ປະຊາຊົນ ຢູ່ເມືອງໂຂງ ແຂວງຈໍາປາສັກ ຍັງຕັດໄມ້ ຖາງປ່າ ເພື່ອຫາລ້ຽງຊີບຢູ່

ປີ 2023 ທີ່ຜ່ານມາ ທາງການ ແລະອົງການພັດທະນາຊຸມຊົນເມືອງໂຂງ ແຂວງຈໍາປາສັກ ໄດ້ໄປກວດກາ ແກ້ໄຂບັນຫາຊາວບ້ານບ້ານນາສົງເປື່ອຍ ແລະບ້ານນາໜອງເຫ້ຍ ແລະເຂດອ້ອມແອ້ມ ທີ່ໄດ້ລັກຕັດໄມ້ໄປຂາຍ ໃຫ້ໂຮງງານເຜົາຖ່ານ, ໂຮງງານຜະລິດເຟີນີເຈີ ແລະຖາງປ່າ ບຸກເບີກທີ່ດິນທໍາການກະເສດ ພາຍຫຼັງທີ່ພວກເຂົາເຈົ້າ ບໍ່ມີວຽກເຮັດງານທໍາ ແລະບໍ່ມີບ່ອນຫາຢູ່ຫາກິນ ຊຶ່ງໃນປັດຈຸບັນ ບັນຫາທີ່ວ່ານີ້ກໍຍັງມີຢູ່ ແຕ່ການເຮັດສວນມັນຕົ້ນ ແມ່ນມີບໍ່ຫຼາຍ ດັ່ງເຈົ້າໜ້າທີ່ທີ່ກ່ຽວຂ້ອງທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 26 ພະຈິກ 2024 ນີ້ວ່າ: 

“ເຂດຫ່າງໄກສອກຫຼີກ ຖ່ານດໍາ ແມ່ນຂາຍຮັບໃຊ້ພາຍໃນ ຂາຍໃນຕະຫຼາດຊຸມຊົນທົ່ວໄປ ບໍ່ໄດ້ສົ່ງອອກ. ຂາຍແກ້ໄຂຊີວິດການເປັນຢູ່ຂອງຄອບຄົວ ເລື່ອງການຖາງປ່າທາງຂັ້ນເທິງເພິ່ນກະໃຫ້ຢຸດເຊົາ ດ້ວຍວິທີເຕົ້າລວມປະຊາຊົນ ແລະອໍານາດການປົກຄອງ ໂຄສະນາເຜີຍແຜ່ປູກຈິດສໍານຶກ ໃຫ້ພໍ່ແມ່ປະຊາຊົນໃນບ້ານຮັບຮູ້ ເຂົ້າໃຈການປົກປັກຮັກສາປ່າໄມ້ ເຜີຍແຜ່ກຽ່ວກັບກົດໝາຍປ່າໄມ້ ສວນມັນຕົ້ນແມ່ນມີບໍ່ຫຼາຍ ເພາະທາງຂັ້ນເທິງເພິ່ນໃຫ້ຢຸດເຊົາ ການຖາງປ່າແບບຊະຊາຍດົນແລ້ວ.” 

ມາເຖິງປັດຈຸບັນ ຊາວບ້ານໃນເຂດດັ່ງກ່າວ ສ່ວນຫຼາຍເປັນຜູ້ເຖົ້າ ເຮັດນາ ເຮັດໄຮ່ປູກເຂົ້າ, ລ້ຽງສັດ ຍ້ອນວ່າ ຄົນໄວອອກແຮງງານ ພາກັນອອກຈາກບ້ານ ໄປຊອກຫາວຽກເຮັດງານທໍາຢູ່ ນະຄອນຫຼວງວຽງຈັນ ແລະໄປເຮັດວຽກຫາເງິນຢູ່ປະເທດໄທ ແລະເດັກນ້ອຍນັກຮຽນ ຈໍານວນໜຶ່ງກໍໄປຮຽນຢູ່ນະຄອນຫຼວງວຽງຈັນ ແລະເມື່ອ 2-3 ປີຫຼັງ ກໍເຊັ່ນດຽວກັນ ດັ່ງທີ່ທ່ານກ່າວໃນມື້ດຽວກັນນີ້ວ່າ:

”ກໍໜ້າຈະ 2-3 ປີຫຼັງ ກໍຊິເປັນຊາວໄຮ່ ຊາວນາ ສ່ວນໃຫຍ່ເດ ປູກຝັງ ລ້ຽງສັດຈັ່ງຊີ້ນະ  ເດັກນ້ອຍນີ້ ຂະເຈົ້າກໍມາຮຽນຢູ່ວຽງນີ້ ກໍຈະເປັນພວກມ.ປາຍ ພວກມະຫາວິທະຍາໄລ ພວກວິທະຍາໄລ ກໍມາຮຽນຢູ່ວຽງ ແຕ່ວ່າຖ້າເປັນຄົນໜຸ່ມນ້ອຍ ມີເຮື່ອ ມີແຮງ ເຂົາກໍມາເຮັດວຽກຢູ່ວຽງ ສ່ວນຫຼາຍກໍມີແຕ່ຜູ້ຖອກຜູ້ເຖົ້າບໍ່ ຜູ້ອອກບໍານານບໍ່ ຫຼືວ່າຢູ່ນາຫັ້ນ ລ້ຽງສັດ ປູກເຂົ້າ ຂະເຈົ້າກໍປູກຕາມລະດູຢູ່ໃດ໋ ບາງລະດູ ຂະເຈົ້າກໍປູກມັນຕົ້ນ ບາງລະດູ ຂະເຈົ້າກໍປູກສາລີ ບາງລະດູກໍປູກເຂົ້າຫັ້ນນະ.” 

ບ້ານນາສົງເປື່ອຍ ແລະບ້ານນາໜອງເຫ້ຍ ເປັນບ້ານທີ່ຕັ້ງຢູ່ພື້ນທີ່ຮາບພຽງ ຫ່າງໄກຈາກນະຄອນປາກເຊຫຼາຍ ຄື 100 ປາຍຫຼັກ ຊາວບ້ານມັກພາກັນເຮັດໄຮ່ ເຮັດນາ ປູກມັນຕົ້ນ ແລະພືດຕາມລະດູການ ດັ່ງນັ້ນຈຶ່ງມີການຖາງປ່າ ຈູດປ່າຢູ່ເລື້ອຍໆ ດັ່ງຊາວບ້ານຢູ່ເມືອງໂຂງ ແຂວງຈໍາປາສັກ ນາງໜຶ່ງເວົ້າຕໍ່ວິທຍຸ ເອເຊັຽເສຣີໃນມື້ດຽວກັນນີ້ວ່າ:

”ໂດຍ ຢູ່ເຂດນອກ ໄກຈາກໂຕເມືອງເກືອບ 200 ຫຼັກຢູ່ດອກ ເຂດທົ່ງພຽງ ແມ່ນໆ {ເຮັດໄຮ່-ນາ ກະສິກໍາທົ່ວໄປ.)”  

ປັດຈຸບັນ ມີໂຮງງານເຜົ່າຖ່ານ ແລະໂຮງງານຜະລິດເຟີນີເຈີ ຫຼາຍແຫ່ງ ຢູ່ກະແຈກກະຈາຍກັນ ຕາມເມືອງຕ່າງໆ ຂອງແຂວງຈໍາປາສັກ. ພວກເຈົ້າຂອງໂຮງງານ ຈະຮັບຊື້ໄມ້ຈາກຊາວບ້ານ ໄປເຜົາຖ່ານ ແລະຜະລິດເຟີນີເຈີ ແຕ່ບໍ່ຮູ້ວ່າ ພວກເຂົາເຈົ້າສົ່ງຜົນຜະລິດນັ້ນ ໄປຂາຍຢູ່ໃສ, ອີງຕາມຄໍາເວົ້າຂອງ ເຈົ້າໜ້າທີ່ດ້ານສິ່ງແວດລ້ອມ ຢູ່ແຂວງຈໍາປາສັກ ທ່ານໜຶ່ງໃນມື້ວັນທີ 26 ພະຈິກ 2024 ນີ້:

”ໂອ້ ປາກົດວ່າມີຢູ່(ໂຮງງານເຜົນຖ່ານ ແລະໂຮງງານຜະລິດເຟີນີເຈີ)ພຸ້ນນະ ມີໆຢູ່(ສົ່ງອອກໄປໃສ) ໂອ ໂຕນີ້ກໍບໍ່ໝັ້ນໃຈປານໃດ ແຕ່ວ່າມີຢູ່ ຈໍາປາສັກ ມີຢູ່ເດີ.”  

ທີ່ຜ່ານມາ ໂຮງງານເຜົາຖ່ານ ແລະໂຮງງານຜະລິດເຟີນີເຈີ ຢູ່ແຂວງຈໍາປາສັກ ສ່ວນຫຼາຍແມ່ນພວກນັກທຸລະກິດຫວຽດນາມ ແລະຈີນ ເປັນເຈົ້າຂອງ. ເມື່ອຜະລິດສິນຄ້າໄດ້ແລ້ວ ກໍຂາຍຢູ່ພາຍໃນລາວ ແລະຈໍານວນໜຶ່ງ ກໍສົ່ງໄປຂາຍຕ່າງປະເທດ ຮວມທັງຈີນ ແລະຍີ່ປຸ່ນ ດັ່ງເຈົ້າໜ້າທີ່ຢູ່ແຂວງຈໍາປາສັກ ທີ່ຮູ້ເລື່ອງນີ້ ທ່ານໜຶ່ງເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າວ່າ:

”ໂອ ມີຫຼາຍເຕີບຢູ່ ຊິແມ່ນຂອງຫວຽດ ຂອງພາຍໃນແນ່ ຂອງພາຍໃນແນ່ ຂອງຫວຽດ ຂອງຈີນ ສົ່ງເມືອຈີນ ກັບຍີ່ປຸ່ນ.”

ເພື່ອແກ້ໄຂບັນຫາດັ່ງກ່າວ ທາງຫ້ອງການກະສິກໍາ ແລະປ່າໄມ້ ເມືອງໂຂງ ແຂວງຈໍາປາສັກ ແລະສະມາຄົມພັດທະນາຊຸມຊົນເມືອງໂຂງ ກໍໄດ້ເຜີຍແພ່ລະບຽບກົດໝາຍ ກ່ຽວກັບການຄຸ້ມຄອງ ຊັບພະຍາກອນປ່າໄມ້ ໃຫ້ປະຊາຊົນ ທັງ 2 ບ້ານດັ່ງກ່າວຮູ້ ແລະທັງຮັບຟັງຄວາມຄິດເຫັນຂອງພວກເຂົາເຈົ້າ ເພື່ອຫາແນວທາງແກ້ໄຂ ໃນການປົກປ້ອງປ່າໄມ້ຮ່ວມກັນ.

ສໍາລັບຢູ່ແຂວງສະຫວັນນະເຂດ ເມື່ອກ່ອນໜ້ານີ້ ຫ້ອງວ່າການ ແຂວງສະຫວັນນະເຂດ ໄດ້ອອກແຈ້ງການ ໃນມື້ວັນທີ 14 ມີນາ 2024  ຫ້າມບໍ່ໃຫ້ບຸກຄົນ ແລະນິຕິບຸກຄົນ ຕັດໄມ້ມາເຜົາຖ່ານ, ຫ້າມເຜົາຖ່ານ, ເກັບຊື້ຖ່ານ ແລະເຄື່ອນຍ້າຍຖ່ານດໍາ ຢູ່ໃນແຂວງສະຫວັນນະເຂດ ແລະບໍ່ໃຫ້ພະແນກ ອຸດສາຫະກໍາ ແລະການຄ້າແຂວງ ອອກໜັງສືອະນຸຍາດເຄື່ອນຍ້າຍຖ່ານດໍາ ນັ້ນ.