ຜູ້ປະສົບໄພນ້ຳຖ້ວມ ຢູ່ເມືອງຫຼວງນ້ຳທາ ບໍ່ມີນ້ຳປະປາໃຊ້

ຫລາຍບ້ານ ຢູ່ເມືອງຫລວງນໍ້າທາ ແຂວງຫລວງນໍ້າທາ ຍັງບໍ່ສາມາດໃຊ້ນໍ້າປະປາ ໄດ້ຕາມປົກກະຕິ ພາຍຫລັງໄດ້ຮັບຜົນກະທົບ ໄພພິບັດນ້ໍາຖ້ວມ ຢ່າງໜັກ ນັບແຕ່ມື້ວັນທີ 9 ກັນຍາ 2024 ຈົນມາຮອດປັດຈຸບັນ ຍ້ອນມີຕະກອນ ແລະ ມີໃບໄມ້ ໃນນໍ້າປະປາ, ດັ່ງ ເຈົ້າໜ້າທີ່ ລັດວິສາຫະກິດ ນໍ້າປະປາ ແຂວງຫລວງນໍ້າທາ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 1 ຕຸລາ 2024 ນີ້ວ່າ:

“ນໍ້າປະປາເຮົາ ມັນກໍຍັງມີບັນຫາຢູ່ ເຈົ້າ ເພາະວ່າ ມື້ຄືນນີ້ ມັນໄຫລມາອີກ ຂີ້ເຫຍື້ອມັນເຂົ້າປໍ້າເຮົາອີກ ເມືອງນໍ້າທາ ບາງບ້ານ ມັນກະຍັງບໍ່ໄດ້ເທື່ອ ເພາະວ່າເຮົາປໍ້ານໍ້າຂຶ້ນແລ້ວ ຜ່ານຂະບວນການຜລິດແລ້ວ ປ່ອຍອອກເລີຍ ເພາະວ່ານໍ້າຢູ່ໃນອ່າງ ມັນບໍ່ມີແນ ບາງເຂດທີ່ວ່າມັນສູງ ນໍ້າຈະບໍ່ໄປ ເພາະແຮງດັນມັນບໍ່ໄດ້ ນໍ້າມາອີກແລ້ວ ດຽວນີ້ເຮົາກະເປີດ ເຮົາກໍປໍ້າເຄື່ອງນຶ່ງ ປ່ອຍປົກກະຕິ ເຈົ້າ ແຕ່ວ່າບາງເຂດທີ່ວ່າມັນສູງ ມັນກໍບໍ່ໄປ ແຮງດັນມັນບໍ່ໄດ້.” 

ທ່ານກ່າວຕື່ມວ່າ ນັບແຕ່ການເກີດເຫດນໍ້າຖ້ວມ ເຮັດໃຫ້ລະບົບບການສົ່ງນໍ້າປະປາ ໃນເຂດເມືອງຫລວງນ້ໍນໍ້າທາ ໄດ້ຮັບຜົນກະທົບຫລາຍ ເຊິ່ງລັດວິສາຫະກິດ ນໍ້າປະປາ ແຂວງຫລວງນໍ້າທາ ແລະ ພາກສ່ວນທີ່ກ່ຽວຂ້ອງ ກໍ ພະຍາຍາມຊ່ອຍກັນສ້ອມແປງ ເພື່ອໃຫ້ພໍ່ແມ່ປະຊາຊົນ ສາມາດໃຊ້ນໍ້າປະປາໄດ້ຕາມປົກກະຕິ ແຕ່ເນື່ອງຈາກສະພາບ ລະບົບການສົ່ງນ້ໍາປະປາ ບາງສ່ວນໄດ້ຮັບຄວາມເສັຍຫາຍ ປະກອບກັບ ຍັງມີຝົນຕົກໜັກເປັນໄລຍະ ຈຶ່ງເຮັດໃຫ້ການສ້ອມແປງ ປະສົບຄວາມຫຍຸ້ງຍາກ ໂດຍສະເພາະ ບ້ານທີ່ຕັ້ງຢູ່ໃນພື້ນທີ່ສູງ ບໍ່ແມ່ນແຕ່ສະເພາະ ເຮືອນປະຊາຊົນເທົ່ານັ້ນ ທີ່ບໍ່ສາມາດໃຊ້ບໍລິການນໍ້າປະປາໄດ້ ແຕ່ຍັງກວມເອົາສະຖານທີ່ ລັດຖະການ ເປັນຕົ້ນ ໂຮງຮຽນປະຖົມ ແລະ ມັດທະຍົມ ຫລາຍແຫ່ງ ທີ່ໄດ້ຮັບຜົນກະທົບຈາກນໍ້າຖ້ວມ ກໍຍັງບໍ່ມີນໍ້າປະປາໃຊ້ ມາເປັນໄລຍະເວລາຫລາຍມື້ແລ້ວ ເຮັດໃຫ້ ໃນໄລຍະທີ່ບໍ່ມີນໍ້າປະປາໃຊ້ ພໍ່ແມ່ປະຊາຊົນ ຈໍາເປັນຕ້ອງໄດ້ນໍາໃຊ້ນໍ້າລິນ, ນ້ໍາຝົນ ແລະ ນໍ້າຈາກສາຍຕ່າງໆ, ດັ່ງ ທ່ານຄູ ຢູ່ໂຮງຮຽນມັດທະຍົມ ແຫ່ງນຶ່ງ ທີ່ໄດ້ຮັບຜົນກະທົບຈາກນໍ້າຖ້ວມ ໃນເຂດເທດສະບານ ເມືອງຫລວງນໍ້າທາ ທ່ານນຶ່ງ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ຍັງໃຊ້ບໍ່ໄດ້ເທື່ອ ເພາະວ່າດິນເຈື່ອນ ແລ້ວກໍທໍ່ຂາດ ຍັງບໍ່ທັນໄດ້ແປງເທື່ອ ມີຊ່ວງນຶ່ງ ພາຍຫລັງທີ່ນໍ້າລົງ ປະມານ 4-5ມື້ ຂະເຈົ້າກໍໃຊ້ໄດ້ ແຕ່ຕອນນີ້ ກໍເພ່ຄືເກົ່າ ຕື່ມແລ້ວ ໃຊ້ບໍ່ໄດ້ ອາທິດປາຍແລ້ວ ຂະເຈົ້າກໍລົງຕັກແບບນໍ້າຫ້ວຍ ນໍ້າຮອງ ແລ້ວກໍໃຊ້ແບບປະຍັດ ມັດທະຍັດໄປ ເທົ່ານັ້ນແຫລະ ບາງຈຸກໍໃຊ້ນໍ້າຝົນ ເທົ່ານັ້ນແຫລະ ລ້າງຖ້ວຍ ອັນນັ້ນ ອັນນີ້ໄປ.”

ເຖິງແມ່ນວ່າ ເຮືອນປະຊາຊົນ ແລະ ສະຖານທີ່ ລັດຖະການ ບາງແຫ່ງ ຈະສາມາດໃຊ້ນໍ້າປະປາ ໄດ້ແລ້ວ ແຕ່ເປັນນໍ້າປະປາ ທີ່ສາມາດ ໃຊ້ເປັນໄລຍະໆ ເທົ່ານັ້ນ ຍ້ອນລະບົບສົ່ງນໍ້າປະປາ ເສັຍຫາຍຫລາຍສົມຄວນ ພາຍຫລັງເກີດເຫດນໍ້າຖ້ວມ, ດັ່ງ ຊາວບ້ານ ຢູ່ບ້ານນາເຕີຍ ເມືອງຫລວງນໍ້າທາ ແຂວງຫລວງນໍ້າທາ ທ່ານນຶ່ງກ່າວວ່າ: 

“ເອ ນໍ້າປະປານີ້ຖືວ່າ ຂາດໆ ເຂີນໆ ຄືວ່າຫັ້ນແຫລະ ໄຟນີ້ກໍ ເຂົາເອົາມາໃຫ້ໃຊ້ປົກກະຕິແລ້ວ ໄຟຫັ້ນ ເພາະວ່ານໍ້າໂຕນີ້ນີ່ແບບ ບ່ອນຂະເຈົ້າຂຸດບໍ່ຫັ້ນນ່າ ມັນຢູ່ແຄມນໍ້ານີ້ເນາະ ບໍ່ຫັ້ນມັນຖ້ວມແລ້ວ ກໍບໍ່ມີບ່ອນຊິດູດຫັ້ນແນ ສົ່ງຢູ່ ສົ່ງກໍ 2-3 ມື້ຮອດເທື່ອນຶ່ງ ເພາະວ່າ ມັນປ່ຽນຈຸດສົ່ງແນ.” 

ຂະນະດຽວກັນ ທາງດ້ານ ລັດວິສະຫະກິດ ນໍ້າປະປາ ແຂວງຫລວງນໍ້າທາ ແລະ ພາກສ່ວນທີ່ກ່ຽວຂ້ອງ ກໍໄດ້ພະຍາຍາມສ້ອມແປງ ລະບົບນໍ້າປະປາ ໃຫ້ແກ່ພໍ່ແມ່ປະຊາຊົນບາງສ່ວນນຶ່ງແລ້ວ ເຮັດໃຫ້ບາງບ້ານທີ່ໄດ້ຮັບຜົນກະທົບຈາກນໍ້າຖ້ວມ ສາມາດໃຊ້ນໍ້າປະປາໄດ້ ຕາມປົກກະຕິແລ້ວ ບາງສ່ວນ, ດັ່ງ  ຊາວບ້ານ ຢູ່ບ້ານໂພນໄຊສະຫວ່າງ ເມືອງຫລວງນໍ້າທາ ແຂວງຫລວງນໍ້າທາ ທ່ານນຶ່ງ ກ່າວວ່າ:

“ເອ ມັນມີເປັນຊ່ວງ ມັນກະໃຊ້ໄດ້ຢູ່ ແຕ່ວ່າມັນມີເປັນຊ່ວງ ເອ ມັນມີເປັນຊ່ວງທີ່ໃຊ້ບໍ່ໄດ້ ແລ້ວກໍໃຊ້ໄດ້ ໄດ້ແລ້ວດຽວນີ້ນ່າ ຢູ່ໂພນໄຊສະຫວ່າງ ດຽວນີ້ ມັນໃຊ້ໄດ້ປົກກະຕິແລ້ວ ຊ່ວງຫລັງນໍ້າຖ້ວມ 2-3 ມື້ກ່ອນຫັ້ນ ມັນໃຊ້ບໍ່ໄດ້.” 

ໃນມື້ວັນທີ 16 ກັນຍາ 2024, ພົນ ຈັດຕະວາ ອິນແກ້ວ ມະນີຈັນ ຫົວໜ້າການທະຫານ ກອງບັນຊາການທະຫານ ແຂວງຫລວງນໍ້າທາ ລາຍງານວ່າ ໃນໄລຍະ ມື້ວັນທີ 9-13 ກັນຍາ 2024 ແຂວງຫລວງນໍ້າທາ ປະສົບໄພພິບັດນໍ້າຖ້ວມ ຢ່າງໜັໍກ ແຕ່ມາຮອດປັດຈຸບັນ ນໍ້າໄດ້ບົກແຫ້ງລົງແລ້ວ ເຊິ່ງພາກສ່ວນທີ່ກ່ຽວຂ້ອງ ກໍໄດ້ລົງພື້ນທີ່ຊ່ອຍເຫລືອປະຊາຊົນ ໃນ 3 ເມືອງ ໂດຍສະເພາະ ແມ່ນມີຜູ້ໄດ້ຮັບຜົນກະທົບ 3,414 ຫລັງຄາເຮືອນ, 18,986 ຄົນ ພົບເຮືອນທີ່ເປ່ເພ່ ແລະ ໄຫລໄປກັບນໍ້າ 115 ຫລັງຄາເຮືອນ ເຮັດໃຫ້ມີປະຊາຊົນ ທີ່ບໍ່ມີບ່ອນອາສັຍ ແລະ ບໍ່ມີເຄື່ອງໃຊ້ ຈໍານວນ 2,765 ຄົນ.

ພາຍຸໃຕ້ຝຸ່ນ ຍາກິ ສົ່ງຜົນໃຫ້ເກີດຝົນຕົກໜັກ, ນໍ້າຖ້ວມ ແລະ ດິນເຈື່ອນ ນັບແຕ່ມື້ວັນທີ 9 ກັນຍາ ທີ່ຜ່ານມາ ທັງນີ້ ໃນແຂວງຫລວງນໍ້າທາ ແມ່ນມີ 48 ບ້ານ ໃນ 2 ເມືອງຂອງ ແຂວງຫລວງນໍ້າທາ ໄດ້ຮັບຜົນກະທົບ ຫລາຍທີ່ສຸດ  ມີ 20 ບ້ານ ໄດ້ຮັບຜົນກະທົບ ຢ່າງຮຸນແຮງ ແລະ ມີປະຊາຊົນ ປະມານ 40,000 ຄົນ ຕ້ອງການຄວາມຊ່ວຍເຫລືອ.

ອີງຕາມ ການລາຍງານ ຂອງ ອົງການອາຫານໂລກ (World Food Programmer) ໃນມື້ວັນທີ 23 ກັນຍາ 2024.