ເຂື່ອນເຊລະນອງ 1 ປ່ອຍນໍ້າອອກຈາກເຂື່ອນ ເຕືອນໃຫ້ຊາວບ້ານ ຮັບມືນ້ຳຖ້ວມ

ປະຊາຊົນຢູ່ 9 ເມືອງຂອງແຂວງສະຫວັນນະເຂດ ໄດ້ເຝົ້າລະວັງການທີ່ຈະເກີດນໍ້າຖ້ວມ ຢູ່ໃນຂະນະນີ້ ພາຍຫຼັງທີ່ຫ້ອງວ່າການແຂວງສະຫວັນນນະເຂດ ໄດ້ອອກແຈ້ງການ ກ່ຽວກັບການປ່ອຍນໍ້າຂອງເຂື່ອນໄຟຟ້າເຊລະນອງ 1 ຂອງຈີນ ໃນມື້ວັນທີ 6 ກັນຍາ 2024 ນີ້.

ປະຊາຊົນນາງນຶ່ງ ເວົ້າກ່ຽວກັບເລື່ອງທີ່ວ່ານີ້ ຕໍ່ວິທຍຸເອເຊັຍເສຣີ ໃນມື້ວັນທີ 6 ກັນຍານີ້ວ່າ ປະຊາຊົນຢູ່ 9 ເມືອງຂອງແຂວງສະຫວັນນະເຂດ ໄດ້ກະກຽມມ້ຽນມັດເຄື່ອງຂອງເອົາໄວ້ ແລະເຝົ້າລະວັງການເກີດນໍ້າຖ້ວມ ພາຍຫຼັງທີ່ມີແຈ້ງການອອກມາວ່າ ເພື່ອຄວາມປອດໄພຂອງເຂື່ອນ ຄະນະບໍລິຫານເຂື່ອນໄຟຟ້າເຊລະນອງ 1 ຂອງຈີນ ຈະປ່ອຍນໍ້າອອກຈາກເຂື່ອນລົງມາ ແຕ່ມື້ວັນທີ 7 ກັນຍານີ້ເປັນຕົ້ນໄປ. ແລະເມື່ອກ່ອໜ້ານີ້ ກໍເຄີຍມີການປ່ອຍນໍ້າອອກຈາກເຂື່ອນທີ່ວ່ານີ້ລົງມາ ເຮັດໃຫ້ເກີດນໍ້າຖ້ວມຫຼາຍເຂດ ຂອງຫຼາຍເມືອງ ຢູ່ແຂວງສະຫວັນນະເຂດນີ້, ປະຊາຊົນໄດ້ຮັບຜົນກະທົບ ຈາກນໍ້າຖ້ວມນັ້ນມາແລ້ວ ດັ່ງທີ່ນາງເວົ້າວ່າ:

“ແມ່ນ ກໍຈົມກໍຖ້ວມ ກະຖ້ວມຢູ່ ຖ້າເຂົາເຈົ້າປ່ອຍຫລາຍຫັ້ນນ່າ ແມ່ານຖ້ວມນາຖ້ວມອີ່ຫຍັງຫັ້ນແຫລະ ປີກ່ອນໆຫັ້ນມັນກະຖ້ວມດົນຢູ່ ແຕ່ວ່າປີກາຍນີ້ກະບໍ່ໄດ້ຖ້ວມຫລາຍ ຫັ້ນນ່າຖ້ວມປະມານມື້ນຶ່ງ 2 ມື້ ມັນກະບົກແລ້ວ.”

ແລະຊາວສວນມັນຕົ້ນ ຜູ້ນຶ່ງກໍເວົ້າໃນມື້ດຽວກັນນັ້ນວ່າ ຖ້າມີການປ່ອຍນໍ້າ ອອກຈາກເຂື່ອນເຊລະນອງ 1 ລົງມາ ກໍຢ້ານວ່າ ຊາວສວນມັນຕົ້ນ ທີ່ຢູ່ເຂດເມືອງພິນ ກໍຈະໄດ້ຮັບຜົນກະທົບນໍາດ້ວຍ ຊຶ່ງຢູ່ເມືອງພິນນີ້ ກໍເຄີຍຖືກນໍ້າຖ້ວມໜັກມາແລ້ວ ເມື່ອ 2 ປີກ່ອນ ຍ້ອນເຂື່ອນທີ່ວ່ານີ້ ປ່ອຍນໍ້າລົງມາ, ເຮັດໃຫ້ນໍ້າເຊລະນອງລົ້ນຝັ່ງ ໃຫຼເຂົ້າຖ້ວມຜົນລະປູກຂອງຊາວສວນມັນຕົ້ນ ແລະຊາວກະສິກອນ ອື່ນໆ ດັ່ງທີ່ທ່ານກ່າວວ່າ:

“ຖ້ວມມັນຕົ້ນ ກະຖ້ວມ ເຂດເມືອງພິນເພາະວ່າ ນໍ້າເຊລະນອງ ຕອນທີ່ເຂົາປ່ອຍເຂື່ອນຫັ້ນ ລົງເຂດເມືອງພິນ ຫລັກໆກະແມ່ນເມືອງພິນ ຄັນວ່າຝົນມາແຕ່ຫວຽດແລ້ວ ມັນຈະຍູ້ນໍ້າເຊໃຫ້ຂຶ້ນເນາະ ມັນຈະກະທົບຫລັກໆ ກະແມ່ນເມືອງພິນ.”

ໃນຂະນະດຽວກັນ ປະຊາຊົນຢູ່ເມືອງເຊໂປນ ກໍເຊື່ອວ່າ ຖ້າມີການປ່ອຍນໍ້າອອກຈາກເຂື່ອນນີ້ລົງມາ ນໍ້າກໍຈະຖ້ວມຕື່ມອີກ, ເຂດການຜະລິດຂອງປະຊາຊົນ ຮວມທັງທົ່ງໄຮ່ທົ່ງນາ ແລະຖະໜົນຫົນທາງ ກໍຈະຖືກນໍ້າຖ້ວມ ຍ້ອນນໍ້າໃນເຊລະນອງ ແລະນໍ້າເຊໂປນ ໄຫຼເຂົ້າຖ້ວມ ຄືດັ່ງທີ່ໄດ້ເກີດຂຶ້ນເມື່ອກ່ອນໜ້ານີ້, ແຕ່ກໍຍັງບໍ່ຮູ້ວ່າ ຖ້ານໍ້າຖ້ວມອີກເທື່ອນີ້ ຈະສົ່ງຜົນກະທົບ ຕໍ່ປະຊາຊົນຫຼາຍໜ້ອຍຊໍ່າໃດ ດັ່ງທີ່ທ່ານກ່າວວ່າ:

“ມັນຍັງບໍ່ທັນໄດ້ປ່ອຍ ມື້ອື່ນເດ້ ຖ້ວມເຊໂປນນີ້ແຫລະ  ຖ້ວມທົ່ງນາແຫລະ ເສັ້ນທາງມັນກະບໍ່ໄດ້ຖ້ວມ ມັນປ່ອຍນໍ້າເຊລະນອງເດ້.”

ກ່ຽວກັບເລື່ອງທີ່ວ່ານີ້ ເຈົ້າໜ້າທີ່ຫ້ອງວ່າການປົກຄອງແຂວງສະຫວັນນະເຂດ ທ່ານນຶ່ງກ່າວວ່າ ໃນມື້ວັນທີ 6 ກັນຍາ 2024 ນີ້ ຫ້ອງວ່າການປົກຄອງແຂວງສະຫວັນນະເຂດ ໄດ້ເຜີຍແພ່ແຈ້ງການ ກ່ຽວກັບການປ່ອຍນໍ້າ ຂອງເຂື່ອນໄຟຟ້າເຊລະນອງ 1 ໄປຍັງ 9 ເມືອງ ຄືເມືອງເຊໂປນ, ເມືອງນອງ, ເມືອງພິນ, ເມືອງພະລານໄຊ, ເມືອງອາດສະພັງທອງ, ເມືອງຊົນນະບູລີ, ເມືອງຈໍາພອນ, ເມືອງສອງຄອນ ແລະເມືອງທ່າປາງທອງ ເພື່ອໃຫ້ແຈ້ງເຕືອນປະຊາຊົນ ຢູ່ແຕ່ລະເມືອງຮູ້, ແຕ່ການເລື່ອງປ່ອຍນໍ້ານີ້ ທ່ານເອງກໍຍັງບໍ່ຮູ້ ດັ່ງທີ່ທ່ານກ່າວວ່າ:

“ໂຕປ່ອຍນີ້ ເຮົາກະຍັງບໍ່ຮູ້ເນາະ ວ່າເພິ່ນປ່ອຍນໍ້າ ຫລືບໍ່ເນາະ ມີແຕ່ແຈ້ງການໃຫ້ກະກຽມຊື່ໆ ແຕ່ວ່າມື້ປ່ອຍອີ່ຫລີ ເຮົາກະບໍ່ແນ່ໃຈວ່າ ປ່ອຍຫລືບໍ່ ມັນສິຖ້ວມຢູ່ທາງລຸ່ມພຸ້ນ ກໍສິເປັນເມືອງສອງຄອນ ແລ້ວກໍທ່າປາງທອງ ໄປທາງຫລຸ່ມ ສິເຍີ້ນໄປທາງແຂວງຈໍາປາສັກ.”

ແລະເຈົ້າໜ້າທີ່ເມືອງທ່າປາງທອງ ທ່ານນຶ່ງກໍເວົ້າວ່າ ອໍານາດການປົກຄອງທັງ 9 ເມືອງ ກໍໄດ້ປະຕິບັດຕາມແຈ້ງການັ້ນ ແລະກໍໄດ້ກຽມພ້ອມຮັບມືກັບເຫດການ ທີ່ອາດຈະເກີດຂຶ້ນ ຮວມທັງໄດ້ແຈ້ງຊາວບ້ານ ໃຫ້ກຽມຍ້າຍເຄື່ອງຂອງ ຖ້າເກີດມີນໍ້າຖ້ວມ, ບໍ່ມີບັນຫາດອກ ດັ່ງທີ່ທ່ານກ່າວວ່າ:

“ບໍ່ມີບັນຫາດອກ ເພາະວ່າທາງຄະນະອະນຸກໍາມະການເຮົາ ກໍກະກຽມຢູ່ເນາະ ນໍ້າເຂື່ອນນີ້ ກະຖືວ່າມັນກໍມີການລະບາຍ ບໍ່ມີ ປີກາຍນີ້ ແຕ່ປີກ່ອນນີ້ມີ ມັນກໍຫລາຍໆເຂື່ອນຕ້ອງໄດ້ປ້ອງກັນເນາະ ປີກາຍປີຊືນນີ້ນ່າ.”

ເພື່ອຂໍຮູ້ກ່ຽວກັບເລື່ອງນີ້ຕື່ມ ວິທຍຸເອເຊັຍເສຣີ ໄດ້ຕິດຕໍ່ໄປຫາທາງບໍລິສັດ ເຂື່ອນໄຟຟ້າເຊລະນອງ 1 ຈໍາກັດ, ແຕ່ເຈົ້າໜ້າທີ່ທີ່ກ່ຽວຂ້ອງ ຍັງບໍ່ສະດວກທີ່ຈະໃຫ້ຄໍາເຫັນ. ແຕ່ເຖິງຢ່າງໃດກໍຕາມ ເວົ້າເຖິງເລື່ອງການປ່ອຍນໍ້າອອກຈາກເຂື່ອນໄຟຟ້າເຊລະນອງ 1 ກະຊວງພັບພະຍາກອນທໍາມະຊາດ ແລະສິ່ງແວດລ້ອມ ໄດ້ຄາດຄະເນວ່າ ແຕ່ມື້ວັນທີ 6 ຫາວັນທີ 9 ກັນຍານີ້ ຈະມີພະຍຸຝົນເຂົ້າມາ ຊຶ່ງຈະເຮັດໃຫ້ລະດັບນໍ້າ ໃນອ່າງເກັບນໍ້າຂອງເຂື່ອນດັ່ງກ່າວ ເພີ່ມສູງຂຶ້ນ ແລະຕ້ອງໄດ້ປ່ອຍ ນໍ້າອອກຈາກເຂື່ອນ ເພື່ອປ້ອງກັນບໍ່ໃຫ້ນໍ້າໄຫຼລົ້ນເຂື່ອນ ແລະບໍ່ໃຫ້ເຂື່ອນແຕກ.

ເຂື່ອນໄຟຟ້າເຊລະນອງ 1, ຂະໜາດ 70 MW, ມີມູນຄ່າການການກໍ່ສ້າງ 150 ລ້ານໂດລ້າສະຫະຣັດ. ເຂື່ອນນີ້ ມີ 4 ບໍລິສັດເປັນຜູ້ຖືຫຸ້ນ ຄື ບໍລິສັດພັດທະນາພະລັງງານສາກົນ (YEIG) ຂອງຈີນ ຖືຫຸ້ນ 70%, ບໍລິສັດດາວສະຫວັນລາວ 15%, ບໍລິສັດ ລັດວິສາຫະກິດໄຟຟ້າລາວ 10% ແລະ ບໍລິ ສັດຜະລິດເຈັ້ຍ Sunpaper Holding Lao ຂອງຈີນ ຖືຫຸ້ນ 5%.

ເລື່ອງການປ່ອຍນໍ້າອອກຈາກເຂື່ອນ ເມື່ອກ່ອນໜ້ານີ້ ບໍລິສັດ ໄຊຍະບູລີ ພາວເວີ ຈໍາກັດ ເຈົ້າຂອງເຂື່ອນໄຟຟ້າໄຊຍະບູລີ ກໍໄດ້ອອກແຈ້ງການ ໃນມື້ວັນທີ 19 ສິງຫາທີ່ຜ່ານມາ ເຕືອນປະຊາຊົນ ທີ່ຢູ່ທັງເບື້ອງເທິງເຂື່ອນແລະເບື້ອງລຸ່ມເຂື່ອນ ໃຫ້ລະມັດລະວັງ ລະດັບນ້ໍາ ທີ່ອາດຈະເພີ່ມຂຶ້ນ ແລະຫຼຸດລົງຈາກການປ່ອຍນ້ໍາຂອງເຂື່ອນນີ້ ລະຫວ່າງວັນທີ 20 ຫາວັນທີ 23 ສິງຫາ 2024 ທີ່ໄດ້ເຮັດໃຫ້ລະດັບນ້ໍາ ໃນແມ່ນ້ໍາຂອງເພີ່ມສູງຂຶ້ນ.