ແຂວງອັດຕະປື ຂາດເຂີນແພດ-ໝໍ ຈຳນວນຫຼາຍ

ການໃຫ້ບໍລິການ ດ້ານສາທາລະນະສຸກ ຢູ່ທົ່ວແຂວງອັດຕະປື ຍັງປະສົບກັບບັນຫາແພດ ແລະໝໍ ບໍ່ພຽງພໍ ທັງທາງດ້ານຈໍານວນ ແລະຄຸນນະພາບ ຊຶ່ງປັດຈຸບັນມີພຽງ 516 ຄົນ. ດັ່ງນັ້ນ ພະແນກສາທາລະນະສຸກ ແຂວງອັດຕະປື ຈຶ່ງຕ້ອງການໂຄຕາລັດຖະກອນຕື່ມອີກ 339 ຄົນ ເພື່ອສົ່ງໄປສະຖານທີ່ບໍລິການດ້ານສາທາລະນະສຸກແຫ່ງຕ່າງໆ ທີ່ຂາດເຂີນ ໂດຍສະເພາະ ໄປເຂດຫ່າງໄກ, ແພດອາສາ ທີ່ເຮັດວຽກ ກໍບໍ່ມີເງິນເດືນ ໃນຂະນະທີ່ຄ່າຄອງຊີບສູງ ຢ້ານບໍ່ໄຫວ, ອີງຕາມຄໍາເວົ້າຂອງເຈົ້າໜ້າທີ່ຫ້ອງການ ພະແນກສາທາລະນະສຸກແຂວງອັດຕະປືນາງນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 23 ຕຸລາ 2024 ນີ້.

“ເຈົ້າ ສ່ວນຫລາຍກໍເລັ່ງໃສ່ແພດເພາະວ່າສ່ວນໃຫຍ່ ໂຄຕ້າລັດຖະກອນກໍປະມານປີນຶ່ງ 10 ກວ່າຄົນ ມາແບ່ງໃຫ້ບເານກັບເມືອງແນ່ ແລ້ວກໍໂຮງໝໍແຂວງແນ່ ແລ້ວກໍໂຮງຮຽນສາທາລະນະສຸກແນ່ ມັນກໍໄດ້ຂ້ອນຂ້າງໜ້ອຍ ຄືອາສາເຮົາເຮັດວຽກ ບໍ່ໄດ້ເງິນເດືອນວ່າຊັ້ນສາ ຄ່າຄອງຊີບມັນກໍສູງ ເຂົາບໍ່ໄຫວ ກໍຍໍ້າມັນລົດອີ່ຫຍັງ.”

ຂ່າວສານອັດຕະປືລາຍງານ ໃນວັນທີ 22 ຕຸລາ 2024 ນີ້ ກ່ຽວກັບການຈັດສັນ ໂຄຕາລັດຖະກອນ ທີ່ເປັນແພດ-ໝໍ ຂອງຫົວໜ້າພະແນກສາທາລະນະສຸກແຂວງວ່າ ໄລຍະຜ່ານມາ ແມ່ນອີງໃສ່ຕາໜ່າງການບໍລິການ ສຸຂະພາບຂອງແຕ່ລະຂັ້ນ ດ້ວຍການຈັດບູລິມະສິດ ໃຫ້ເຂດຫ່າງໄກ ສອກຫຼີກ ໃຫ້ພຽງພໍໃນຂັ້ນພື້ນຖານ ຕາມມາດຕະຖານ ຂອງກະຊວງສາທາລະນະສຸກ. ແຕ່ບັນຫາທີ່ ກະທົບ ຕໍ່ການປະຕິບັດໜ້າທີ່ການເມືອງ ແມ່ນຈໍານວນພະນັກງານ ແພດ-ໝໍ- ພະຍາບານ ທີ່ບໍ່ພຽງພໍ ທັງທາງດ້ານປະລິມານ ແລະຄຸນນະພາບ.

ອີງຕາມຄໍາເວົ້າຂອງທ່ານ ອິນປັນ ອິນທິລາດ ຫົວໜ້າພະແນກສາທາລະນະສຸກແຂວງອັດຕະປື ໃນມື້ວັນທີ 22 ຕຸລາ ນີ້ແລ້ວແມ່ນວ່າ ປັດຈຸບັນ ແຂວງອັດຕະປື ມີແພດ ແລະໝໍ ທັງໝົດ 514 ຄົນ. ເພື່ອໃຫ້ພຽງພໍ ແລະ ຮອງຮັບການບໍລິ ການ ໃຫ້ມີຄຸນນະພາບ ຕ້ອງມີຕື່ມອີກ 339 ຄົນ ຈຶ່ງຈະບັນຈຸຊັບຊ້ອນພຽງພໍ ຕາມຕໍາແໜ່ງງານ ໃນແຕ່ລະຂັ້ນ ຄື ພະແນກສາທາລະນະສຸກແຂວງ ທີ່ມີ 63 ຄົນ, ຕ້ອງການເພີ່ມ 21 ຄົນ, ໂຮງໝໍແຂວງ ທີ່ມີ 119 ຄົນ, ຕ້ອງການເພີ່ມ 171 ຄົນ, ໂຮງຮຽນແພດ ທີ່ມີ 19 ຄົນ, ຕ້ອງການເພີ່ມ 8 ຄົນ. ພ້ອມກັນນັ້ນ ສາທາເມືອງສາມັກຄີໄຊ ກໍຕ້ອງການເພີ່ມ 29 ຄົນ, ສາທາເມືອງສະໜາມໄຊ ຕ້ອງການເພີ່ມ 37 ຄົນ, ສາທາເມືອງຊານໄຊ ຕ້ອງການເພີ່ມ 3 ຄົນ, ສາທາເມືອງພູວົງ ຕ້ອງການເພີ່ມ 6 ຄົນ, ສາທາເມືອງໄຊເສດຖາ ມີ 54 ຄົນ, ພຽງພໍກັບຄວາມຕ້ອງການ ແລະ ສຸກສາລາທົ່ວແຂວງ 33 ແຫ່ງ ມີ 94 ຄົນ, ຕ້ອງການບັນຈຸເພີ່ມ 64 ຄົນ.ພະແນກສາທາລະນະສຸກ ຕ້ອງການເພີ່ມ 21 ຄົນ, ໂຮງໝໍແຂວງ 171 ຄົນ, ໂຮງຮຽນແພດ 8 ຄົນ, ເມືອງສາມັກຄີໄຊ 29 ຄົນ, ເມືອງສະໜາມໄຊ 37 ຄົນ, ສາທາເມືອງຊານໄຊ 3 ຄົນ, ເມືອງພູວົງ 6 ຄົນ. ສໍາລັບສຸກສາລາທົ່ວແຂວງ 33 ແຫ່ງ ມີ 94 ຄົນ ຕ້ອງການເພີ່ມ 64 ຄົນ.

ພ້ອມດຽວກັນນີ້ ແພດອາສາສະໝັກ ທີ່ມີອາຍຸການ 10 ປີຢູ່ເມືອງສາມັກຄີໄຊ ຜູ້ນຶ່ງເວົ້າວ່າ ໃນພື້ນທີ່ເຂດນອກຢູ່ແຂວງອັດຕະປື ຍັງປະສົບບັນຫາຂາດເຂີນບຸກຄະລາກອນທາງການແພດ ຫລາຍກວ່າຢູ່ເຂດເມືອງ ຂະນະທີ່ໃນຮອບຫຼາຍປີທີ່ຜ່ານມາ ໂຄຕາລັດຖະກອນແພດໃນລະດັບປະເທດ ແລະລະດັບແຂວງ ຫລຸດຈໍານວນລົງເລື້ອຍໆ ດັ່ງທີ່ທ່ານກ່າວວ່າ:

“ແຕ່ລໍາພັງໂຕເອງນີ້ ຍັງບໍ່ໄດ້ໂຕເລກນໍາເຂົາ ຢູ່ຈົນ 10 ປີຍັງບໍ່ໄດ້ໂຄຕ້ານໍາເຂົາ ໄປການຢູ່ສຸກສາລາຫ່າງໄກສອກຫລີກ ອາສາສະໝັກຄືຢູ່ຂັ້ນແຂວງ ມັນກໍຫລາຍ ເປັນ 100-200 ແຕ່ວ່າມັນບໍ່ໄດ້ໂຕເລກຫັ້ນນ່າ ຜູ້ຢູ່ 10 ປີກໍອອກ ຄືຢູ່ບໍ່ໄດ້ເງິນເດືອນກໍອອກ 4, 5 ຄົນ 6 ຄົນກໍແມ່ນບໍ່ມີເງິນເດືອນໃຫ້ເຂົາ.”

ແລະເຈົ້າໜ້າທີ່ທີ່ເຮັດວຽກດ້ານການພັດທະນາຄຸນນະພາບ ບຸກຄະລາກອນທາງການແພດຢູ່ແຂວງອັດຕະປື ກໍກ່າວເຖິງອີກສາເຫດນຶ່ງທີ່ເຮັດໃຫ້ທາງການແຂວງອັດຕະປື ຕ້ອງການບຸກຄະລາກອນທາງການແພດຫລາຍເພີ້ມຕື່ມວ່າ ແມ່ນເປັນຍ້ອນຈໍານວນທີ່ມີຢູ່ນັ້ນ ແມ່ນຍັງບໍ່ທັນມີຄຸນນະພາບພໍເທົ່າໃດ.

“ຫລັກສູດການແພດຂັ້ນສູງຫັ້ນ ກໍເລີຍມີຄວາມຕ້ອງການພະນັກງານເພີ້ມ ຍົກລະດັບຫລືວ່າເຊື່ອມຕໍ່, ເຊື່ອມຕໍ່ ເອົາພະນັກງານທີ່ຈົບຊັ້ນກາງມາເຊື່ອມຕໍ່ເປັນຊັ້ງສູງໃນປັດຈຸບັນ.”

ພ້ອມດຽວກັນນີ້ ຊາວບ້ານຢູ່ເມືອງສາມັກຄີໄຊ ກໍເວົ້າຕໍ່ວິທຍຸເອເຊັຽເສຣີໃນມື້ດຽວກັນນີ້ວ່າ ປະຊາຊົນຈໍານວນນຶ່ງ ຈໍາເປັນຕ້ອງໄປປິ່ນປົວຢູ່ສະຖານພະຍາ ບານເອກກະຊົນ ຊຶ່ງເຮັດໃຫ້ພວກເຂົາເຈົ້າ ຕ້ອງຈ່າຍເງິນສໍາລັບຄ່າປິ່ນປົວຮັກສາພະຍາບານຫລາຍກວ່າຂອງລັດປະມານ 3 ເທົ່າ ດັ່ງທີ່ທ່ານກ່າວວ່າ:

“ມີກໍພວກແພດທີ່ເພິ່ນໄປເຮັດປະຈໍ່ຢູ່ຫັ້ນ ຄລີນິກອີ່ສັງເພິ່ນກໍມີຢູ່ ສ່ວນບຸກຄົນຈັ່ງຊີ້ນ່າ ຢູ່ໂຮງໝໍຊຸມຊົນຫັ້ນ ເຂົາບໍ່ຄ່ອຍໄດ້ເຂົ້າດອກ ເຂົາໄປຢູ່ໂຮງໝໍທີ່ເຂົາຮຽນຈົບມາ ເຂົາຢູ່ກັບຫັ້ນແຫລະ ທີ່ເຂົາຮຽນມາຫັ້ນ ມັນວ່ອງໄວກວ່າຢູ່ໂຮງໝໍ ແພດເພິ່ນກໍບໍ່ຄ່ອຍເອົາໃຈໃສ່ ເບິ່ງຄົນເຈັບຈັ່ງຊີ້ນ່າ.”

ທ່ານ ອິນປັນ ອິນທິລາດ ຫົວໜ້າພະແນກສາທາລະນະສຸກ ແຂວງອັດຕະປື ກ່າວຕື່ມວ່າ ຢູ່ເຂດຫ່າງໄກສອກຫຼີກ ເພື່ອໃຫ້ພຽງພໍຕໍ່ການຮັບໃຊ້ບໍລິການປະຊາ ຊົນ ໃນຂະນະທີ່ການສະໜອງມີຈຳກັດໃນແຕ່ລະປີຢູ່ນີ້ ທາງກະຊວງສາທາລະ ນະສຸກ ຮ່ວມກັບພະແນກສາທາລະນະສຸກແຂວງ ໄດ້ຈັດສັນໂຄຕາໃຫ້ສຸກສາລາ ຢູ່ເຂດຫ່າງໄກສອກຫຼີກໃຫ້ພຽງພໍ ບົນພື້ນຖານຢ່າງໜ້ອຍ 3 ຄົນ. ໃນຕົວຈິງບາງແຫ່ງ ມີແພດປິ່ນປົວ 2 ຄົນ, ພະຍາບານ 1 ຫຼື 2 ຄົນ, ຜະດຸງຄັນ 1 ຄົນ, ບາງແຫ່ງກໍບໍ່ມີຜະດຸງຄັນ  ເຊິ່ງກຳລັງຈັດສັນ ຫຼື ສັບປ່ຽນພະນັກງານອາສາສະໝັກ, ພະນັກງານຢູ່ຂັ້ນເມືອງ ລົງໄປຊ່ວຍເປັນໄລຍະ, ສ່ວນການຈັດສັນໂຄຕາລັດຖະກອນ ແຕ່ປີ 2021-2024 ແມ່ນກະຊວງສາທາລະນະສຸກ ເປັນຜູ້ຈັດສັນໃຫ້ ໂດຍອີງຕາມວິຊາສະເພາະທີ່ຍັງຂາດ ແລະ ຈໍານວນທີ່ຍັງບໍ່ພໍຕາມມາດຕະຖານ ຕາມການເກັບກຳຂໍ້ມູນ ແລະ ຖານຂໍ້ມູນຕົວຈິງ ທີ່ມີລະບົບຕິດຕາມທາງອອນລາຍ ແລະ ທາງພະແນກສາທາລະນະສຸກແຂວງ ເປັນຜູ້ຈັດ ການສອບເສັງຄັດເລືອກເອົາບຸກຄະລາກອນເຂົ້າໃສ່ຕາມວິຊາສະເພາະ, ສ່ວນສະຖານທີ່ບັນຈຸ ແມ່ນກະຊວງສາທາລະນະສຸກ ເປັນຜູ້ລະບຸມາເທົ່ານັ້ນ ບໍ່ສາ ມາດປ່ຽນແປງໄດ້.