ຮ້ານບັນເທີງ ແລະຮ້ານກິນດື່ມ ໃນເມືອງວັງວຽງ ຈໍານວນໜຶ່ງ ໄດ້ຮັບຜົນກະທົບ ຫຼັງຈາກ ພົບສິ່ງມຶນເມົາ ປົນເປື້ອນສານເມທານອລ

ພາຍຫຼັງເກີດເຫດ ນັກທ່ອງທ່ຽວຕ່າງປະເທດເສຍຊີວິດ ຈາກການດື່ມສິ່ງມຶນເມົາ ປົນເປື້ອນທາດເບື່ອ ຢູ່ເມືອງວັງວຽງ ແຂວງວຽງຈັນ ກໍເຮັດໃຫ້ບັນດາຮ້ານບັນເທີງ ແລະຮ້ານກິນດື່ມຈໍານວນໜຶ່ງ ໄດ້ຮັບຜົນກະທົບຕາມໆກັນ, ໂດຍສະເພາະ ນັກທ່ອງທ່ຽວຕ່າງປະເທດ ທາງຝັ່ງຢຸໂຣບ ຫຼຸດລົງ, ເພາະຫຼາຍຄົນ ພາກັນລະມັດລະວັງໂຕເອງຫຼາຍຂຶ້ນ, ໂດຍສະເພາະ ກຸ່ມນັກທ່ອງທ່ຽວທີ່ຍັງພັກເຊົ່າ ຫຼື ຍັງພັກອາໄສຢູ່ໃນເມືອງວັງວຽງ, ເຂົາເຈົ້າ ກໍບໍ່ຄ່ອຍໄປຮ້ານກິນດື່ມ ໃນໄລຍະນີ້ ຄືກັບແຕ່ກ່ອນ, ດັ່ງຜູ້ປະກອບການ ໃນເມືອງວັງວຽງ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 25 ພະຈິກ ນີ້ ວ່າ: 

“ມັນກະສົ່ງຜົນກະທົບຫັ້ນແຫຼະ ພໍເກີດເລື່ອງຫຼາຍຄົນກະລະວັງໂຕຂຶ້ນ ກະນັກທ່ອງທ່ຽວກະຫຼຸດລົງຢູ່. ນັກທ່ອງທ່ຽວຕ່າງປະເທດມາຢູ່ ແຕ່ວ່າ ມັນຈະໜ້ອຍຊ່ວງນີ້ ຊ່ວງນີ້ຈະແມ່ນເນັ້ນພວກເກົາຫຼີ. ໃຫ້ແຂກລະມັດລະວັງກັນເອງຫັ້ນແຫຼະ ໄປແຕ່ລະບ່ອນ ບາງເທື່ອກະບໍ່ທັນກິນ ດື່ມແອວກໍຮໍຫັ້ນນ່າ ໂຮງແຮມເຂົາເຈົ້າຫັ້ນນ່າ ຕາມການແຈ້ງການປິດ ບໍ່ຮູ້ກໍານົດ ແຂກກໍ່ອອກຈາກໂຮງແຮມແລ້ວ.”        

ຂະນະທີ່ ຜູ້ປະກອບການຮ້ານບັນເທີງ ທ່ານໜຶ່ງ ໃນເມືອງວັງວຽງ ກໍກ່າວວ່າ ຮ້ານທ່ານເອງ ກໍ່ຍັງເປີດປົກກະຕິ, ແຕ່ວ່າ ຫຼາຍຄົນພາກັນຕື່ນໂຕ ລະມັດລະວັງ ໃນການດື່ມສິ່ງມຶນເມົາຫຼາຍຂຶ້ນ ຍັງບໍ່ກ້າດື່ມກັນຫຼາຍ ພາຍຫຼັງມີນັກທ່ອງທ່ຽວເສຍຊີວິດ ຢູ່ເມືອງວັງວຽງ ແລະທ່ານເອງ ກໍ່ຫວັງວ່າ ທາງການລາວ ຈະຊອກຫາສາເຫດ ແລະຖະແຫຼງຂ່າວ ໃຫ້ສັງຄົມຮັບຮູ້ ເຖິງຂໍ້ແທ້ຈິງທີ່ເກີດຂຶ້ນ:

“ກະມີຜົນກະທົບແນ່ນອນເນາະ ມັນກະບໍ່ເປັນຜົນດີ ເສຍຫາຍເລື່ອງຊື່ສຽງ ເຮັດໃຫ້ນັກທ່ອງທ່ຽວ ຫຼາຍໆຄົນນີ້ກະ ເກີດການຕື່ນໂຕເນາະ ຄິດວ່າຫຼາຍຄົນກະ ບໍ່ກ້າກິນເຫຼົ້າຫັ້ນແຫຼະເນາະ ຈະມີຄວາມລະມັດລະວັງຫຼາຍຂຶ້ນຫັ້ນແຫຼະ ໃນການມາດື່ມກິນເຫຼົ້າອີ່ຫຍັງຕ່າງໆຫັ້ນແຫຼະ. ຫວັງວ່າ ທາງຄະນະກໍາມະການ ເພີ່ນຈະສອບສວນ-ສືບສວນ ໄດ້ຂໍ້ມູນເທັດຈິງ ມາຖະແຫຼງຂ່າວ ໃນໄວໆນີ້.”

 ພ້ອມດຽວກັນນີ້ ຜູ້ປະກອບການຮ້ານອາຫານແຫ່ງໜຶ່ງ ໃນເມືອງວັງວຽງ ກໍ່ກ່າວວ່າ ສ່ວນໃຫຍ່, ຮ້ານທີ່ຈະໄດ້ຮັບຜົນກະທົບ ຄື ຮ້ານຂາຍເຫຼົ້າ, ຂາຍເບຍ, ຮ້ານບາຣ໌ ເພາະພາບພົດ ກໍ່ເສື່ອມເສຍໄປແລ້ວ ເຊິ່ງຈາກນີ້ ກໍ່ຂຶ້ນຢູ່ກັບນັກທ່ອງທ່ຽວ ເວລາເຂົາເຈົ້າມາທ່ຽວ ກໍ່ຕ້ອງລະມັດລະວັງກັນເອງ:              

“ຜົນກະທົບ ໂຕນີ້, ສ່ວນຫຼາຍ, ມັນຈະເປັນຂອງບາຣ໌ເນາະ ເລື່ອງພາບພົດທັງປະເທດເນາະ ກໍຈະມີສ່ວນເສຍຢູ່. ມັນກະຂຶ້ນຢູ່ກັບພວກທ່ອງທ່ຽວເອງ ຕໍ່ໄປເຂົາເຈົ້າກະກໍຈະຊິມີສະຕິເນາະ ລະມັດລະວັງໂຕຂຶ້ນຕື່ມ.”

 ກ່ຽວກັບເລື່ອງດັ່ງກ່າວນີ້, ເຈົ້າໜ້າທີ່ຂັ້ນເມືອງ ໃນເມືອງວັງວຽງ ທ່ານໜຶ່ງ ກໍກ່າວວ່າ ປັດຈຸບັນ, ທາງເມືອງວັງວຽງ ໄດ້ມີມາດຕະການອອກມາແລ້ວ ໂດຍການສັ່ງປິດໂຮງແຮມ ທີ່ເກີດເຫດດັ່ງກ່າວແລ້ວ, ໂດຍບໍ່ມີກໍານົດ ລວມເຖິງ ການກວດກາຮ້ານບັນເທີງ ແລະຮ້ານກິນດື່ມນໍາດ້ວຍ. ນອກຈາກນີ້, ໃນຕໍ່ໜ້າ ພາກສ່ວນທີ່ກ່ຽວ ກໍຈະມີມາດຕະການ ໃນການກວດກາ ຫ້າມຮ້ານກິນດື່ມ, ຮ້ານບັນເທີງທີ່ຂາຍເຫຼົ້າ, ຂາຍເບຍ ໃຫ້ເຂັ້ມງວດຫຼາຍຂຶ້ນ ເຊິ່ງບໍ່ສະເພາະ ໃນເມືອງວັງວຽງເທົ່ານັ້ນ, ໃນທົ່ວປະເທດນໍາ ເພື່ອປ້ອງກັນ ບໍ່ໃຫ້ເກີດເຫດການແບບດັ່ງກ່າວ ເກີດຂຶ້ນອີກ:                                                  

“ກະມີມາດຕະການແຫຼະ ປິດໂຮງແຮມ, ປິດການບໍລິການ ກວດສອບເອົາຂໍ້ມູນລະອຽດຄືນກ່ອນ ວ່າສາເຫດມັນເປັນແນວໃດໆຫັ້ນນ່າ ໃນຕໍ່ໜ້ານີ້ ກໍ່ຈະໄດ້ເພີ່ມມາດຕະການ ນອກຈາກໂຕນີ້ກະບ່ອນອື່ນໆນ່າ ຕ້ອງໄດ້ເຂັ້ມງວດ ໃນການເດີນການຕິດຕາມ ກວດກາເຂັ້ມງວດກວ່າເກົ່າຫັ້ນແຫຼະ ທົ່ວປະເທດຫັ້ນແຫຼະ ຄັນບັນຫາມັນເປັນຄືແນວນີ້ຂຶ້ນ ທຸກພາກສ່ວນ ກະຕ້ອງໄດ້ເຂັ້ມງວດນໍາກັນແຫຼະ ບໍ່ໃຫ້ມັນເກີດບັນຫາແນວນີ້ອີກຫັ້ນນ່າ ພາຍຫຼັງທີ່ໄດ້ຂໍ້ມູນລະອຽດ ກໍຊິມີການຖະແຫຼງຂ່າວ.” 

ເຖິງຢ່າງໃດກໍຕາມ, ເຈົ້າໜ້າທີ່ຂັ້ນເມືອງ ໃນເມືອງວັງວຽງ ທ່ານດັ່ງກ່າວ ຍັງກ່າວຕື່ມວ່າ ສາເຫດການເສຍຊີວິດ ແລະການເຈັບປ່ວຍໜັກ ຂອງນັກທ່ອງທ່ຽວ ທີ່ດື່ມສິ່ງມຶນເມົາ ປົນເປື້ອນທາດເບື່ອນີ້ ກໍຍັງບໍ່ສາມາດສະຫຼຸບໄດ້ວ່າ ແມ່ນມີສານໃດປົນເປື້ອນ ເພາະທາງການລາວ ກໍາລັງຢູ່ລະຫວ່າງ ສືບສວນຫາສາເຫດຢູ່. ເມື່ອຈະແຈ້ງຄົບຖ້ວນແລ້ວ, ກໍຈະມີການຖະແຫຼງຂ່າວ ໃຫ້ຮັບຮູ້.

ອີງຕາມການລາຍງານ ຂອງທ່ານ ບຸນຈັນ ມາລາວົງ, ເຈົ້າເມືອງ ເມືອງວັງວຽງ, ລາຍງານ ໃນວັນທີ 23 ພະຈິກ 2024 ຕໍ່ເຫດການດັ່ງກ່າວ ນີ້ວ່າ ທາງການລາວ ໄດ້ສືບສວນ-ສອບສວນ ເຈົ້າຂອງໂຮງແຮມ ທີ່ເກີດເຫດດັ່ງກ່າວແລ້ວ ເພື່ອຈະໄດ້ເກັບກໍາຂໍ້ມູນ ທີ່ພົວພັນເຖິງການເຈັບປ່ວຍ ແລະການເສຍຊີວິດໃຫ້ຊັດເຈນ ແລະຈະໄດ້ສະໜອງຂໍ້ມູນ ໃຫ້ຂັ້ນເທິງ ເພື່ອໄປແຈ້ງຕໍ່ຄອບຄົວ ຂອງຜູ້ເສຍຊີວິດ.

ທ່ານ ບຸນຈັນ ກໍໄດ້ຍອມຮັບວ່າ ເຫດທີ່ເກີດຂຶ້ນນີ້ ແມ່ນມີກະທົບ ແລະສ້າງພາບພົດບໍ່ດີ ໃຫ້ຕໍ່ປະເທດລາວ, ໂດຍສະເພາະ ແມ່ນການທ່ອງທ່ຽວ ໃນເມືອງວັງວຽງ. ແນວໃດກໍຕາມ, ຈະດໍາເນີນການ ຕາມລະບຽບກົດໝາຍ ຕໍ່ຫົວໜ່ວຍທຸລະກິດ, ຜູ້ປະກອບການ ການບໍລິການ ອາຫານ ແລະເຄື່ອງດື່ມ, ໃຫ້ທັນສະພາບການ ແລະເຂັ້ມງວດ.

ແລະພາຍຫຼັງ ຈາກເຫດການນີ້ ທີ່ເກີດຂຶ້ນ ກໍ່ໄດ້ຕິດຕາມກວດກາ ຊຸກຍູ້ຫົວໜ່ວຍທຸລະກິດ, ຜູ້ປະກອບການຮ້ານບັນເທີງ, ຮ້ານອາຫານ ແລະອື່ນໆຢ່າງເຂັ້ມງວດ ເພື່ອຮັບປະກັບຄວາມປອດໄພ ຂອງນັກທ່ອງທ່ຽວທີ່ເຂົ້າມາໃຊ້ບໍລິການ ແລະມາຮອດປັດຈຸບັນ ກໍ່ຍັງມີນັກທ່ອງ ເຂົ້າມາທ່ຽວ ໃນເມືອງວັງວຽງ ກັນຕໍ່ເນື່ອງຢູ່.

ຫຼ້າສຸດນີ້, ຜູ້ເປັນພໍ່ ຂອງນາງ Bianca Jones, (ບິອ່ານກ້າ ໂຈນສ໌) ທີ່ເປັນ 1 ໃນຜູ້ເສັຍຊີວິດ ໄດ້ກ່າວຕໍ່ສື່ມວນຊົນຕ່າງປະເທດ ພ້ອມດ້ວຍຄວາມສະອື້ນໃຈ ຢູ່ນະຄອນຫຼວງບາງກອກ ເມື່ອວັນທີ 24 ພະຈິກ ທີ່ຜ່ານມາວ່າ ທ່ານ ຮຽກຮ້ອງໃຫ້ລັດຖະບານລາວ ທຳການສືບສວນ-ສອບສວນ ຢ່າງຈະແຈ້ງ ແລະ ໂປ່ງໃສ ເພື່ອໃຫ້ເກີດຄວາມຍຸຕິທຳ ແກ່ຜູ້ເສຍຊີວິດ ແລະ ເພື່ອປ້ອງກັນ ບໍ່ໃຫ້ເຫດການລັກສະນະນີ້ ເກີດຂຶ້ນອີກ.