ການປາບປາມຢາເສບຕິດ ແຂວງສະຫວັນນະເຂດ ຍັງທ້າທາຍ

ນັບແຕ່ປີ 2021-2023 ທີ່ຜ່ານມາ ບັນຫາຢາເສບຕິດ ຢູ່ແຂວງສະຫວັນນະເຂດຖືວ່າ ຍັງມີຄວາມທ້າທາຍໃນການປາບປາມ ໃຫ້ຫຼຸດໜ້ອຍລົງ ໂດຍມີການກຳນົດຈຸດພື້ນທີ່ ຫຼໍ້ແຫຼມຫຼາຍເຖິງ 303 ຈຸດ. ຂະນະທີ່ກອງບັນຊາການ ປກສ ແຂວງສະຫວັນນະເຂດສາມາດມ້າງຄະດີຢາເສບຕິດປະເພດຕ່າງໆ ໄດ້ທັງໝົດ 1,014 ເລື່ອງແລະກັກຜູ້ຖືກກ່າວຫາໄດ້ 1,545 ຄົນ.

ເຈົ້າໜ້າທີ່ກອງບັນຊາການ ປກສ ແຂວງສະຫວັນນະເຂດກ່າວວ່າ ປັດຈຸບັນສິ່ງເສບຕິດປະເພດຕ່າງໆ ແມ່ນເຂົ້າເຖິງງ່າຍ ແລະມີລາຄາຖືກໂດຍກຸ່ມເປົ້າໝາຍ ທີ່ເຂົ້າມາພົວພັນຫຼາຍທີ່ສຸດ ຄືກຸ່ມເຍົາວະຊົນ ແລະຊາວໜຸ່ມເຊິ່ງເປັນໄວທີ່ກຳລັງຢາກຮູ້ ຢາກລອງ ຖ້າບໍ່ໄດ້ຮັບການກ່າວເຕືອນ ກໍອາດເຖິງຂັ້ນຕິດຢາເສບຕິດໄປເລີຍ.

ດັ່ງເຈົ້າໜ້າທີ່ ປກສ ແຂວງສະຫັວນນະເຂດ ທ່ານກ່າວຕໍ່ວິທະຍຸເອເຊັຽເສຣີ ໃນວັນທີ 03 ມີນາ 2024 ວ່າ:

“ຕົວຢ່າງສະຫວັນນະເຂດ ອັນຕະລາຍທີ່ສຸດຊ່ວງ ມ.4, ມ.5 ນີ້ເຂົາກໍາລັງຊອກຮູ້ຊອກເຫັນມັກຫຼີ້ນ ມັກກິນເດ້. ອອກໂຮງຮຽນ ມັກປະລະການຮຽນ ມັກຕິດການພະນັນ ມັນສິ່ງເສບຕິດຫັ້ນນ່າ. ພວກນັກຮຽນບາງຄົນກາອອກໂຮງຮຽນ ຍ້ອນສິ່ງເສບຕິດ ກາເປັນອັນຕະລາຍທີ່ສຸດທຸກມື້ນີ້ນ່າ.”

ປັດຈຸບັນກອງບັນຊາການ ປກສ ແຂວງສະຫວັນນະເຂດໄດ້ຂຶ້ນບັນຊີເປົ້າໝາຍ ທັງໝົດ 17,215 ຄົນ ສົມທົບກັບອໍານາດການປົກຄອງບ້ານ ສຶກສາອົບຮົມຂັ້ນຮາກຖານ 15,751 ຄົນ. ແນະນໍາຜູ້ປົກຄອງສົ່ງເຂົ້າສູນບໍາບັດ ປິ່ນປົວຜູ້ຕິດຢາເສບຕິດ ຈຳນວນ 1,052 ຄົນ.

ວັນທີ 29 ມີນາ 2024 ທີ່່ຜ່ານມາ ກອງບັນຊາການ ປກສ ແຂວງສະຫວັນນະເຂດ ກໍໄດ້ມີພິທີທຳລາຍຢາເສບຕິດປະເພດຕ່າງໆ ທີ່ສານຕັດສິນເດັດຂາດແລ້ວປະກອບມີຢາບ້າ 48,80 ກິໂລ, ຢາໄອສ໌ 327,20 ກະຣາມ, ຢາອີ 26,05 ກະຣາມ, ຢາເຄຕາມິນ 472,56 ກະຣາມ ແລະ ກັນຊາແຫ້ງ 461 ກິໂລ.

ເຈົ້າໜ້າທີ່ຫ້ອງການ ປກສ ເມືອງໄຊພູທອງ ແຂວງສະຫວັນນະເຂດກ່າວວ່າ ສິ່ງເສບຕິດປະເພດຕ່າງໆ ເຂົ້າເຖິງໄດ້ງ່າຍ ແລະມີລາຄາຖືກຫຼາຍ ສ່ວນປະເພດສິ່ງເສບຕິ ດທີ່ພົບເຫັນສ່ວນຫຼາຍນັ້ນແມ່ນຖືກນໍາເຂົ້າແລະລອກຮຽນແບບ ຈາກປະເທດໄທ ເຊັ່ນກັນຊາແຫ້ງ, ໃບກະທ້ອມ-ນໍ້າກະທ້ອມ, ກາເຟປະສົມສານເສບຕິດແລະອື່ນໆ ເຖິງວ່າເຈົ້າໜ້າທີ່ພະຍາຍາມຕິດຕາມ ກວດກາແຕ່ກາຍັງມີການຊື້-ຂາຍ ກັນເປັນປະຈຳ. ດັ່ງເຈົ້າໜ້າທີ່ ປກສ ເມືອງໄຊພູທອງ ທ່ານໄດ້ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ຄັນວ່າໄທມີຫຍັງຢູ່ລາວ ກາຕ້ອງມີປຸບໂລດແຫຼະ ຄັນວ່າຜູ້ເຂົາເສບເຂົາຫຍັງແທ້ກາໄດ້ເອົາໄປບໍາບັດ ປິ່ນປົວ ມັນກາຍັງຄວບຄຸມບໍ່ໄດ້ຍັງລັກຊື້-ຂາຍກັນໄດ້.”

ຊາວບ້ານເມືອງຊົນບູລີ ແຂວງສະຫວັນນະເຂດກ່າວວ່າ ຕາມການສັງເກດເຫັນວ່າ ໄລຍະນີ້ມີກຸ່ມຊາວໜຸ່ມລາວພາກັນມົ້ວສຸມກິນໃບກະທ້ອມ, ນໍ້າກະທ້ອມ ແລະ ຢາສູບໄຟຟ້າ ເປັນຈຳນວນຫຼາຍ ແຕ່ບໍ່ຮູ້ວ່າກຸ່ມຊາວໜຸ່ມເຫຼົ່ານັ້ນ ຊື້-ຂາຍສິ່ງເສບຕິດມາແຕ່ຊ່ອງທາງໃດ.

ດັ່ງຊາວບ້ານເມືອງຊົນບູລີ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ນິຍົມຢູ່ຕົ້ນກະທ້ອມເຫັນຢູ່ ມີແຕ່ໄວລຸ້ນຂະເຈົ້າສ່ວນຫຼາຍຄື ຊິບໍ່ມີປູກເອັງສ່ວນຫຼາຍຄືຊິຊື້ເອງຢູ່ແຖວບ້ານນີ້ບໍ່ເຫັນເຂົາປູກເຂດນີ້.”

ເຈົ້າໜ້າທີ່ຫ້ອງການປົກຄອງ ນະຄອນໄກສອນພົມວິຫານ ແຂວງສະຫວັນນະເຂດ ກ່າວວ່າດຽວນີ້ໃບກະທ້ອມ ແລະນໍ້າກະທ້ອມມີການລະບາດຢ່າງໜັກ ມີທັງນໍາເຂົ້າຈາກປະເທດໄທ ແລະ ລັກລອບປູກເອງປັດຈຸບັນຫຼາຍພາກສ່ວນພະຍາຍາມ ທີ່ຈະປາບປາມແລະແກ້ໄຂບັນຫານີ້ຢູ່.

ດັ່ງເຈົ້າໜ້າທີ່ ຫ້ອງການປົກຄອງ ເມືອງໄກສອນພົມວິຫານ ກ່າວຕໍ່ວິທະຍຸເອເຊັຽເສຣີ ໃນມື້ດຽວກັນວ່າ:

“ມີຢູ່ເຈົ້າກ່ຽວກັບໃບກະທ້ອມ ສ່ວນໜຶ່ງການໍາເຂົ້າສ່ວນໜຶ່ງ ກາປູກເອັງເຂົາລັກລີ້ປູກຫັ້ນແຫຼະ ແຕ່ທາງເຮົາກາປາບປາມຢູ່ເຈົ້າ.”

ສໍາລັບວຽກງານປາບປາມ ແລະແກ້ໄຂບັນຫາຢາເສບຕິດ ຖືເປັນວາລະແຫ່ງຊາດ ຂອງລັດຖະບານລາວເຊິ່ງທາງການ ແຂວງສະຫວັນນະເຂດ ພະຍາຍາມເອົາໃຈໃສ່ ຕໍ່ກັບບັນຫານີ້ຢ່າງເຂັ້ມງວດ.

ນັບແຕ່ປີ 2021-2023 ທີ່ຜ່ານມາກອງບັນຊາການ ປກສ ແຂວງສະຫວັນນະເຂດ ສາມາດແກ້ໄຂຄະດີຢາເສບຕິດປະເພດຕ່າງໆ ໄດ້ທັງໝົດ 1,014 ເລື່ອງ ແລະ ກັກຜູ້ຖືກຫາໄດ້ 1,545 ຄົນພ້ອມກັບຍຶດຂອງກາງເປັນຢາບ້າໄດ້ 8 ລ້ານກ່ວາເມັດ, ຢາອີ 960 ເມັດ, ຢາເຄ 17 ຖົງ, ຢາໄອສ໌ 365 ຖົງ, ເຮໂຣອິນ 164 ແທ່ງ, ກັນຊາແຫ້ງ 890 ກິໂລ, ໃບກະທ້ອມ 46 ກິໂລ, ກາເຟປະສົມສານຢາເສບຕິດ 2,000 ຊອງ, ຢາດີໄອ 929 ຂວດ ແລະ ອື່ນໆ ອີກຈຳນວນຫຼາຍ.

ນອກຈາກນີ້ ຍັງໄດ້ຂຶ້ນບັນຊີເປົ້າໝາຍຄ້າຂາຍຢາເສບຕິດ ໄດ້ທັງໝົດ 2,788 ຄົນໃນນັ້ນ ເປັນລາຍໃຫຍ່ 320 ຄົນ, ລາຍກາງ 402 ຄົນ ແລະ ລາຍຍ່ອຍອີກ 2,066 ຄົນ ເຊິ່ງກຸ່ມເປົ້າໝາຍ ທີ່ຖືກຂຶ້ນບັນຊີໃນຄັ້ງນີ້ ຈະບໍ່ມີການເປີດເຜີຍຂໍ້ມູນ ໃຫ້ສັງຄົມຮັບຮູ້ເພາະເຈົ້າໜ້າທີ່ ຈະຕ້ອງໄດ້ຕິດຕາມກວດກາ ພຶດຕິກຳແລະການເຄື່ອນໄຫວ ຕະຫຼອດ.

ດັ່ງເຈົ້າໜ້າທີ່ປາບປາມຢາເສບຕິດ, ກອງບັນຊາການ ປກສ ແຂວງສະຫວັນນະເຂດ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ເມື່ອເຮົາເກັບກໍາຂໍ້ມູນແລ້ວຂຶ້ນບັນຊີເປົ້າໝາຍ ແລ້ວເນາະທັງເປົ້າໝາຍໃໝ່ເປົ້າໝາຍເກົ່າ ແລະຕິດຕາມດ້ວຍການເຄື່ອນໄຫວ ຂອງເຂົາຕາມທິດຊີ້ນຳ ຂອງກົມໃຫຍ່ຕຳຫຼວດຫັ້ນແຫຼະ. ບາງຄົນຫຼັງຈາກພົ້ນໂທດມາກາແມ່ນສືບຕໍ່ ກາມີ ມັນຖືກບັນຫານີ້ເປັນເສດຖະກິດ ຂອງເຂົາເດ້.”

ກະຊວງປ້ອງກັນຄວາມສະຫງົບ ໄດ້ຂຶ້ນບັນຊີລາຍຊື່ນັກຄ້າຢາເສບຕິດ ສະເພາະສູນກາງ 2,272 ຄົນທີ່ຈະຕ້ອງເຝົ້າລະວັງ ແລະຕິດຕາມຕົວມາດໍາເນີນຄະດີ ເຊິ່ງສ່ວນຫຼາຍແລ້ວຈະເປັນເຄືອຂ່າຍ ຂອງຂະບວນການຄ້າຢາເສບຕິດ ຂ້າມຊາດ, ຜູ້ຕ້ອງຫາຄະດີຢາເສບຕິດ ທີ່ເຄີຍຕິດຄຸກມາກ່ອນໜ້ານີ້ ແລະກຸ່ມຄົນທີ່ມີໝາຍຈັບ ແລ້ວແຕ່ຍັງຫາຕົວບໍ່ພົບ. ປັດຈຸບັນບັນຫາຢາເສບຕິດ ໃນປະເທດລາວຖືກວ່າເປັນວາລະແຫ່ງຊາດທີ່ລັດຖະບານລາວ ແຕ່ລະສະໄໝຈະຕ້ອງດຳເນີນການສະກັດກັ້ນ, ປ້ອງກັນແລະປາບປາມ ໃຫ້ລຸດໜ້ອຍຖອຍລົງ ແລະເໜັ້ນຢໍ້າໃຫ້ທຸກພາກສ່ວນໃນສັງຄົມ ເອົາໃຈໃສ່ຊ່ອຍກັນ.