ໃຫ້ເປີດ ໂຮງງານ ພາຍໃຕ້ ມາຕການ ເຂັ້ມງວດ

ສຸພັດຕາ
2021-11-19
Share
ໃຫ້ເປີດ ໂຮງງານ ພາຍໃຕ້ ມາຕການ ເຂັ້ມງວດ ປ້າຍບອກເຕືອນ ໃຫ້ຜູ້ມາຮ່ວມງານບຸນ ມີສະຕິລະວັງໂຕ ປ້ອງກັນໂຄວິດ-19 ບໍຣິເວນທາງເຂົ້າ ກ່ອນໄຫວ້ຮູບປັ້ນ ເຈົ້າຊັຍເສດຖາທິຣາຊ, ພຣະມະຫາກະສັດ ອານາຈັກລາວລ້ານຊ້າງ ເມື່ອຊຸມສັຕວັຕທີ 16 (TS), ວັນທີ 19 ພຶສຈິກາ 2021
RFA

ຣັຖບານລາວ ປະກາດວ່າ ຈະຜລິດຢາປິ່ນປົວເຊື້ອໂຄວິດ-19 ເອງ ທີ່ມີຊື່ວ່າ ໂມລນູພິຣາເວັຍຣ໌ (Molnupiravir) ທີ່ໄດ້ຮັບອະນຸຍາດຈາກອົງການສາກົລ ໂດຍຈະໃຫ້ຣັຖວິສາຫະກິຈ ໂຮງງານຜລິດຢາເລຂ 3 ເປັນຜູ້ຜລິດຢາ ຍີ່ຫໍ້ດັ່ງກ່າວ ແຕ່ໃນເບື້ອງຕົ້ນນີ້ ຍັງຕ້ອງສຶກສາຄົ້ນຄວ້າ ກັນກ່ອນ ແລະຕ້ອງເຮັດຕາມຂັ້ນຕອນ ທຸກຢ່າງຕ້ອງໄດ້ຜ່ານການຮັບຮອງ ຈາກອົງການ ອາຫານ ແລະຢາ ຂອງກະຊວງສາທາຣະນະສຸຂລາວກ່ອນ, ດັ່ງເຈົ້າໜ້າທີ່ ໂຮງງານຜລິດເລຂ 3 ທ່ານນຶ່ງ ທີ່ຂໍສງວນຊື່ ແລະຕໍາແໜ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ່ 19 ພຶສຈິກາ ນີ້ວ່າ:

“ສ່ວນຫຼາຍຫັ້ນ ຄັນມີວຽກຂອງຣັຖບານ ລະແມ່ນເພິ່ນຈະໃຫ້ໂຮງງານເລຂ 3 ອັນນີ້ນີ້ແຫຼະ ເພິ່ນຍັງບໍ່ໄດ້ຜລິດ ເພິ່ນຫາກວ່າຂ່າວຊື່ໆ ກໍາລັງສຶກສາຂໍ້ມູນ ກໍາລັງແບບດໍາເນີນການວ່າຊັນນສາ ທຸກຂັ້ນຕອນການຜລິດ ເຮົາຕ້ອງໄດ້ຍື່ນຫາເພິ່ນກ່ອນເນາະ ເພາະວ່າກ່ອນຜລິດໄດ້ ມັນກະຕ້ອງໄດ້ຮັບອະນຸຍາດ ຈາກ ອຢ ກ່ອນເດ້ເນາະ.”

ອີງຕາມການ ຣາຍກງານ ຂອງ ດຣ. ພູໂຂງ ໂຈມມາລາ ຮອງຜູ້ອໍານວຍການບໍຣິຫານ ໂຮງງານຜລິດຢາເລຂ 3 ທີ່ກ່າວຕໍ່ໜັງສືພິມວຽງຈັນທາມສ໌ ໃນມື້ວັນທີ 19 ພຶສຈິກາ ນີ້ວ່າ ໂຮງງານຜລິດຢາເລຂ 3 ຈະເຣີ່ມຜລິດຢາດັ່ງກ່າວ ໃນທ້າຍເດືອນທັນວາ ປີ 2021 ນີ້ ແລະຈະສາມາດຜລິດໃຫ້ປິ່ນປົວຜູ້ຕິດເຊື້ອ ໂຄວິດ-19 ປະມານ 1,000 ຄົນ ໂດຍຈະຜລິດເປັນຮູບແບບເມັດ ແລະຕ້ອງໄດ້ຜ່ານການຮັບຮອງຈາກອົງການ ອະນາມັຍໂລກນໍາດ້ວຍ.

ສໍາລັບຢາດັ່ງກ່າວນີ້ ແມ່ນຈະນໍາໃຊ້ກັບຜູ້ທີ່ມີອາຍຸ ແຕ່ 18 ປີ ຫາ 65 ປີ ໂດຍໃຊ້ກັບຜູ້ຕິດເຊື້ອ ໂຄວິດ-19 ທີ່ມີອາການບໍ່ຮຸນແຮງ ຫຼືປານກາງ ແລະຈະຕ້ອງເປັນຜູ້ທີ່ ບໍ່ມີໂຣຄປວດບວມ ແລະຂາດອ໊ອກຊິເຈນ (Oxygen) ຊຶ່ງຜູ້ທີ່ຕິດເຊື້ອ ໂຄວິດ-19 ຈະຕ້ອງກິນຢາດັ່ງກ່າວເປັນເວລາ 5 ມື້.

ນອກຈາກນີ້ ກົມອາຫານ ແລະຢາຂອງລາວ ຍັງມີແຜນຈະສຶກສາ ຂໍ້ມູນເພີ່ມຕື່ມ ກ່ຽວກັບປະສິດທິຜົນຂອງຢາ ໂມລນູພິຣາເວັຍຣ໌ ແລະໃນອະນາຄົດ ອາຈຜລິດຢານີ້ ໃຫ້ເປັນແບບສັກໄດ້ ແລະອາຈສາມາດປິ່ນປົວໂຣຄ ຫຼືພຍາດອື່ນໆໄດ້ນໍາ.

258995963_6652089854831228_8595432691852410302_n.jpgໃນຂະນະດຽວກັນ ກະຊວງອຸດສາຫະກັມ ແລະການຄ້າ ກໍໄດ້ແຈ້ງການ ໃນວັນທີ່ 15 ພຶສຈິກາ ທີ່ຜ່ານມານີ້ວ່າ ໃຫ້ບັນດາໂຮງຈັກໂຮງງານ ອຸດສາຫະກັມປຸງແຕ່ງ ແລະຫັດຖະກັມ ສາມາດເປີດດໍາເນີນກິຈການໄດ້ປົກກະຕິ ແຕ່ຕ້ອງປະຕິບັດຕາມ ມາຕການ ຂອງຄະນະສະເພາະກິຈ ເພື່ອປ້ອງກັນ ແລະຄວບຄຸມເຊື້ອໂຄວິດ-19 ຢ່າງເຂັ້ມງວດ.

ສາເຫດ ທີ່ໃຫ້ມີການເປີດກິຈການໄດ້ ຍ້ອນວ່າ ຢາກໃຫ້ເສຖກິຈເດີນໜ້າຕໍ່ໄປ ເພາະຫຼາຍປະເທດ ກໍເຣີ່ມເຮັດວຽກກັນແລ້ວ ຊຶ່ງສ່ວນໃຫຍ່ພະນັກງານ ແລະຄົນງານໃນໂຮງງານຕ່າງໆ ກໍໄດ້ຮັບການສັກວັກຊີນປ້ອງກັນໂຄວິດ-19 ກັນໝົດທຸກຄົນແລ້ວ, ດັ່ງເຈົ້າໜ້າທີ່ ກະຊວງອຸດສາຫະກັມ ແລະການຄ້າ ທ່ານນຶ່ງ ທີ່ຂໍສງວນຊື່ ແລະຕໍາແໜ່ງ ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເປີດໄດ້ເພາະວ່າ ປະເທດອື່ນເຂົາກະທໍາງານເດ້ ສ່ວນໃຫຍ່ສັກຄົບໝົດແລ້ວ ປະມານ 80-90% ຖ້າວ່າມີການຢັ້ງຢືນວ່າ ມາຕຖານຂອງການຜລິດໄດ້ ບໍ່ມີການຕິດເຊື້ອ ບໍ່ໄດ້ນໍາໃຊ້ແຮງງານ ຈາກກຸ່ມແດງ ຖ້າວ່າມີການຕິດເຊື້ອກໍໃຫ້ປິດຊົ່ວຄາວ.”

ທ່ານກ່າວຕື່ມວ່າ ປັດຈຸບັນ ໂຮງຈັກໂຮງງານ ທີ່ເປີດດໍາເນີນກິຈການ ໄປແລ້ວນັ້ນ ຖືວ່າ ປະຕິບັດຕາມມາຕການ ປ້ອງກັນໂຄວິດ-19 ໄດ້ດີ ເຖິງແມ່ນວ່າ ຈະມີຜູ້ຕິດເຊື້ອໂຄວິດ-19 ຢູ່ພາຍໃນໂຮງງານ ຕ່າງໆກໍຕາມ, ແຕ່ກໍສາມາດຄວບຄຸມໄດ້ ເນື່ອງຈາກມີສະຖານທີ່ກັກໂຕ ແລະສະຖານທີ່ປິ່ນປົວພຽງພໍ.

ສໍາລັບມາຕການ ຕາມແຈ້ງການຂອງທາງການ ທີ່ທາງເຈົ້າຂອງໂຮງງານ ຕ້ອງປະຕິບັດຕາມນັ້ນ ຄື ຕ້ອງຈັດສະຖານທີ່ກັກໂຕ ແລະສະຖານທີ່ປິ່ນປົວ ໃຫ້ພຽງພໍ ແລະຕ້ອງຮັບຜິດຊອບຄ່າໃຊ້ຈ່າຍເອງ ທັງໝົດ ຫາກມີການຣະບາດ ຂອງເຊື້ອໂຄວິດ-19 ແບບຄວບຄຸມບໍ່ໄດ້ ແລະຕ້ອງໄດ້ປິດໂຮງງານທັນທີ ຮວມທັງຕ້ອງໄດ້ມີການພົ່ນຢາຂ້າເຊື້ອ ໂຄວິດ-19 ໃນໂຮງງານດັ່ງກ່າວນັ້ນນໍາດ້ວຍ.

ສ່ວນການເຮັດວຽກຢູ່ພາຍໃນໂຮງງານ ກໍຕ້ອງມີການເວັ້ນໄລຍະຫ່າງ 1 ແມັດ ມີເຄື່ອງວັດແທກອຸນຫະພູມ ເວລາທີ່ພະນັກງານທຸກຄົນ ເຂົ້າ-ອອກ ແລະຕ້ອງໃສ່ຜ້າອັດປາກ ອັດດັງ, ຜູ້ໃດບໍ່ໄດ້ສັກວັກຊີນປ້ອງກັນໂຄວິດ-19 ກໍໃຫ້ໄປສັກ ແລະຜູ້ໃດ ມີຄວາມສ່ຽງຕໍ່ການຕິດເຊື້ຶອ ໂຄວິດ-19 ທາງໂຮງງານ ຕ້ອງໃຫ້ແຍກປ່ຽວ ແລະນໍາຜູ້ສໍາຜັດໃກ້ຊິດນັ້ນ ໄປກັກໂຕທັນທີ, ຖ້າຫາກໂຮງງານໃດ ລະເມີດຄໍາສັ່ງ ບໍ່ເຮັດຕາມມາຕການປ້ອງກັນ ໂຄວິດ-19 ທາງການກໍຈະເຮັດຕາມ ລະບຽບກົດໝາຍທັນທີ.

ປັດຈຸບັນ ປະເທດລາວ ຍັງມີຜູ້ຕິດເຊື້ອໂຄວິດ-19 ໃນແຕ່ລະມື້ເປັນຈໍານວນຫຼາຍ ຊຶ່ງແຂວງ ທີ່ມີການຣະບາດໜັກ ພົບບັນຫາຫຍຸ້ງຍາກ ເຣື່ອງສະຖານທີ່ປິ່ນປົວ ຮວມທັງບຸກຄະລາກອນທາງການ ແພດ ບໍ່ພຽງພໍ ເປັນຕົ້ນ ຢູ່ນະຄອນຫຼວງວຽງຈັນ ແຕ່ທາງການໄດ້ແກ້ໄຂ ດ້ວຍວິທີໃຫ້ຜູ້ທີ່ຕິດເຊື້ອ ໂຄວິດ-19 ແຕ່ແຂງແຮງດີ, ບໍ່ມີອາການ ອະນຸຍາດໃຫ້ປິ່ນປົວຢູ່ເຮືອນໄດ້ ຊຶ່ງໃນຈຸດນີ້ຈະຊ່ອຍຫຼຸດຜ່ອນ ບັນຫາເຣື່ອງສະຖານທີ່ປິ່ນປົວບໍ່ພຽງພໍ ແລະມີເຈົ້າໜ້າທີ່ແພດ ແລະໝໍປະຈໍາການ ຕິດຕາມອາການ ດ້ວຍການໂທຣະສັບຫາ ແນະນໍາຂໍ້ມູນຕ່າງໆ ແກ່ຜູ້ທີ່ປິ່ນປົວ ໂຄວິດ-19 ຢູ່ເຮືອນ, ດັ່ງເຈົ້າໜ້າທີ່ ທີ່ກ່ຽວຂ້ອງ ໃນນະຄອນຫຼວງວຽງຈັນ ທ່ານນຶ່ງ ກ່າວວ່າ:

“ຊ່າງນີ້ອາຈບໍ່ພຽງພໍ ບໍ່ເທົ່າໃດ ແຕ່ວ່າມີຄົນອອກ ແລະກໍມີຄົນເຂົ້າ ພາກສ່ວນນຶ່ງເຂົາກໍຂໍໃຫ້ກັກໂຕເອົາເອງ ເງື່ອນໄຂພວກເຂົາມີເງິນແດ່ ກັກບໍຣິເວນເຊົ່າໂຮງແຮມເບາະອິຫຍັງນີ້ ແຕ່ວ່າເງື່ອນໄຂທີ່ເຈົ້າບໍ່ເຂົ້າໃຈ ເຈົ້າມີອາການຫຼືວ່າອິຫຍັງຫັ້ນ ເອົາເບີໂທແພດໃຫ້ປຶກສາ ເອົາຣະບົບດຽວ ຄືປົວຢູ່ໂຮງໝໍຫັ້ນແຫຼະ.”

ພ້ອມດຽວກັນນີ້ ຢູ່ແຂວງຜົ້ງສາລີ ເປັນແຂວງນຶ່ງ ທີ່ມີຜູ້ຕິດເຊື້ອ ໂຄວິດ-19 ຫຼາຍຄືກັນ ຊຶ່ງຢູ່ອັນດັບທີ່ 3 ຂອງປະເທດ ແລະພົບບັນຫາ ເຣື່ອງສະຖານທີ່ປິ່ນປົວ ແລະບຸກຄະລາກອນ ທາງການແພດບໍ່ພຽງພໍ ເຊັ່ນກັນ ໂດຍສະເພາະຢູ່ເມືອງໃໝ່ ແລະເມືອງຂວາ, ດັ່ງເຈົ້າໜ້າທີ່ ສາທາຣະນະສຸຂ ແຂວງຜົ້ງສາລີ ທ່ານນຶ່ງ ກ່າວວ່າ:

ສະຖານທີ່ກະຢູ່ເມືອງໃໝ່ ກັບເມືອງຂວາຫັ້ນເນາະ ແຕ່ວ່າດຽວນີ້ ນັກຮຽນເຂົາຈະເປີດຮຽນແລ້ວ ສະຖານທີ່ກໍອາຈມີຄວາມຫຍຸ້ງຍາກໜ້ອຍນຶ່ງ ບຸກຄະລາກອນແດ່ ມັນບໍ່ພຽງພໍ ແລ້ວກໍໄດ້ນໍາສເນີໃຫ້ທາງສູນກາງ ຫັ້ນນມາຊ່ວຍຫັ້ນນ່າ.”

ສ່ວນຢູ່ແຂວງບໍ່ແກ້ວ ຍັງມີຜູ້ຕິດເຊືິ້ອໂຄວິດ-19 ໃນແຕ່ລະມື້ຫຼາຍເຊັ່ນກັນ ແລະສະຖານທີ່ປິ່ນປົວກໍບໍ່ພຽງພໍ ຊຶ່ງທາງການ ໄດ້ເອົາໂຮງຮຽນເປັນໂຮງໝໍ ພາກສນາມ ເພື່ອປິ່ນປົວຜູ້ຕິດເຊື້ອ ໂຄວິດ-19, ດັ່ງເຈົ້າໜ້າທີ່ ສະເພາະກິຈ ແຂວງບໍ່ແກ້ວ ທ່ານນຶ່ງ ກ່າວວ່າ:

“ພຽງພໍກະບໍ່ພຽງພໍ ໄດ້ເອົາເປັນໂຮງຮຽນ ເຮົາເປັນສູນຕ່າງໆ ເຮັດເປັນໂຮງໝໍສນາມຈໍານວນນຶ່ງ ໂຮງໝໍແຂວງເຮົາ ມັນຄົນເຈັບ ພາຍນອກເຈັບຫຼາຍເນາະ ເພາະເຮົາບໍ່ສາມາດ ຈະເອົາຮັກສາໄວ້ຫັ້ນ.”

ໃນວັນທີ່ 19 ພຶສຈິກາ 2021 ນີ້ ທາງການລາວ ກວດພົບຜູ້ຕິດເຊື້ອໂຄວິດ-19 ທັງໝົດ 1,097 ຄົນ ໃນນີ້ຕິດເຊື້ອໃນຊຸມຊົນ 1,084 ຄົນ ແລະຕິດເຊື້ອຈາກກໍຣະນີນໍາເຂົ້າ 13 ຄົນ. ມາຮອດປັດຈຸບັນ ສປປ ລາວ ມີຜູ້ຕິດເຊື້ອໂຄວິດ-19 ສະສົມທັງໝົດ 59,895 ຄົນ ແລະເສັຽຊີວິດສະສົມ 119 ຄົນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ