ຫົວໜ້າຂະແໜງການຄັງ ແຂວງອັດຕະປືຖືກຈັບ ຕໍ່ມາເສຍຊີວິດຢູ່ໃນຄຸກ

ເຫດການແຂວນຄໍໂຕເອງຕາຍ ຂອງທ່ານ ສຸກໄໝ ສຸດບຸນລົ້ນ ອາດີດຫົວໜ້າຂະແໜງການຄັງແຂວງອັດຕະປື ຢູ່ໃນຄຸກເມືອງຊານໄຊ ແຂວງອັດຕະປື ເກີດຂຶ້ນໃນມື້ວັນທີ 24 ຕຸລາ 2024 ນີ້ ເຈົ້າໜ້າທີ່ທາງການແຂວງອັດຕະປື ກໍໄດ້ຢືນຢັນ ດັ່ງເຈົ້າໜ້າທີ່ທາງການແຂວງອັດຕະປືທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 25 ຕຸລານີ້ວ່າ:

“ແມ່ນໆແທ້ ເຈົ້າ ໂອ໋ ກະບໍ່ທັນແນ່ໃຈເດີ ເພາະວ່າບໍ່ໄດ້ຮັບຂໍ້ມູນຂ່າວສານ ເຈົ້າ ຫລືວ່າປະສານທາງຕໍາຫລວດ ຂະແໜງຖະແຫລງຂ່າວກະໄດ້ເດີ.”

ແລະເຈົ້າໜ້າທີ່ກອງບັນຊາການປ້ອງກັນຄວາມສະຫງົບ ແຂວງອັດຕະປືທ່ານນຶ່ງກໍກ່າວໃນມື້ດຽວກັນນັ້ນວ່າ ກໍລະນີທ່ານ ສຸກໄໝ ສຸດບຸນລົ້ນ ເສຍຊີວິດຢູ່ໃນຄຸກເມືອງຊານໄຊນັ້ນ ຫົວໜ້າກອງບັນຊາການປ້ອງກັນຄວາມສະຫງົບແຂວງອັດຕະປື ກໍຍັງບໍ່ທັນມີຄວາມເຫັນ ແລະບໍ່ມີຂໍ້ສະຫຼຸບອອກມາເທື່ອ ດັ່ງນັ້ນຈຶ່ງບໍ່ສາມາດເວົ້າໄດ້ວ່າ ຈະມີການສືບສວນສອບສວນ, ຈະມີການຖະແຫຼງຂ່າວບໍ່ ຫຼືວ່າແນວ ໃດ.

“ໂຕນີ້ເຮົາກະບໍ່ທັນຮູ້ ແນ່ໃຈນ່າວ່າເພິ່ນ ຊິໃຫ້ຖະແຫລງຂ່າວບໍ່ ຫລືວ່າແນວໃດເພາະວ່າ ເພິ່ນບໍ່ທັນແຈ້ງ ບໍ່ທັນວ່າອີ່ຫຍັງຫັ້ນນ່າ.”

ກ່ຽວກັບເລື່ອງນີ້ ເຈົ້າໜ້າທີ່ລະດັບສູງ ຂອງແຂວງອັດຕະປື ກໍຢືນຢັນວ່າ ທ່ານ ສຸກໄໝ ສຸດບຸນລົ້ນ ອາດີດເຈົ້າໜ້າທີ່ຂະແໜງການຄັງ ແຂວງອັດຕະປື ໄດ້ເສຍຊີວິດຢູ່ໃນຄຸກເມືອງຊານໄຊ ໃນລັກສະນະແຂວນຄໍຕົວເອງ. ແຕ່ສາເຫດຂອງການແຂວນຄໍຈົນເສຍຊີວິດນັ້ນ ພາກສ່ວນທີ່ກ່ຽວຂ້ອງ ບໍ່ທັນໄດ້ເປີດເຜີຍເທື່ອ.

ທ່ານ ສຸກໄໝ ສຸດບຸນລົ້ນ ແລະພະນັກງານລັດ ໃນຂະແໜງການອື່ນໆອີກ 10 ປາຍຄົນ ຖືກກວດສອບວ່າມີຄວາມຜິດ ແລະຖືກຈັບໃສ່ຄຸກນັ້ນ ສ່ວນໃຫຍ່ເປັນພະນັກງານຊັ້ນຜູ້ນ້ອຍ. ສ່ວນວ່າເຈົ້າໜ້າທີ່ຜູ້ໃຫຍ່ ທີ່ມີອໍານາດສັ່ງການ ບໍ່ຖືກກວດສອບ ແລະບໍ່ຖືກຈັບ.

ຢູ່ແຂວງອັດຕະປື ອົງການກວດກາແຫ່ງລັດ ໄດ້ທໍາການກວດກາ ແລະກວດສອບເຂັ້ມງວດບັນດາໂຄງການລົງທຶນຕ່າງໆ ທັງຂອງບໍລິສັດເອກະຊົນພາຍໃນ ແລະຕ່າງປະເທດ ແຕ່ປີ 2022 ເປັນຕົ້ນມາ.

ຢູ່ແຂວງນີ້ ຜ່ານການກວດສອບ ຮວມທັງໂຄງການປູກໄມ້ອຸດສາຫະກໍາຂອງບໍລິສັດຈີນ ທີ່ສໍາປະທານດິນຂອງລັດ 500 ເຮັກຕານັ້ນ ພົບວ່າ ເງິນທີ່ໄດ້ຮັບຈາກຄ່າສໍາປະທານທີ່ດິນ, ຄ່າພາສີ ແລະອາກອນ ແລະຄ່າອື່ນໆ ຕາມທີ່ລະ ບຽບກົດໝາຍກໍານົດ ໄດ້ຮົ່ວໄຫຼເປັນຈໍານວນຫຼວງຫຼາຍ ຍ້ອນພະນັກງານຂັ້ນແຂວງ ທີ່ກ່ຽວຂ້ອງ ຖອກເງິນທີ່ເກັບໄດ້ນັ້ນ ເຂົ້າງົບປະມານຂອງລັດພຽງປະ

ມານ 50% ເທົ່ານັ້ນ.   

ນອກຈາກນັ້ນ ຍັງມີການໃຊ້ໜ້າທີ່ ຕໍາແໜ່ງ ສວຍໂອກາດຮັບສິນບົນ ແລະ, ປ່ຽນແປງໂຕເລກລາຍຮັບ-ລາຍຈ່າຍ ແລະອື່ນໆ

ປັດຈຸບັນ ອົງການກວດກາແຫ່ງລັດ ກໍາລັງເລັ່ງກວດກາ ແລະກວດສອບຫຼາຍໂຄງການ ເປັນຕົ້ນໂຄງການກໍ່ສ້າງເສັ້ນທາງ ຈາກບ້ານຫີນລາດ ເມືອງສະໜາມໄຊ ແຂວງອັດຕະປື ໄປຫາເມືອງປາກຊ່ອງ ແຂວງຈໍາປາສັກ ທີ່ວ່າພົບເງິນສູນຫາຍເຖິງ 81 ຕື້ປາຍກີບ ຈົນເຮັດໃຫ້ບໍ່ສາມາດຈ່າຍຄ່າຊົດເຊີຍ ໃຫ້ຜູ້ປະ ສົບໄພເຂື່ອນແຕກ ຢູ່ເມືອງສະໜາມໄຊນັ້ນໄດ້ຕາມກໍານົດ ດັ່ງເຈົ້າໜ້າທີ່ແຂວງອັດຕະປື ທີ່ບໍ່ປົງອອກຊື່ ແລະສຽງຂອງທ່ານ ເວົ້າວ່າ:

“ແມ່ນຄວາມຈິງແນວຄືນັ້ນແລ້ວ ພາຍຫລັງທີ່ຄະນະລັດຖະບານກວດສອບ ກວດໄປກວດມາກະເຫັນວ່າ ເງິນມັນຮົ່ວໄຫລໄປ ກວດເຫັນໂຕນີ້ກ່ອນ ມັນກະລາມໄປໝົດ ລວມທັງໄມ້ອຸດສາຫະກໍາ ບໍລິສັດເຮັດບໍ່ທັນສໍາເລັດ ກໍຂໍຖອນເງິນ 100% ກະສືບໄປເລື້ອຍໆ ເອົາແຕ່ຜູ້ໜັກໆແດ່ ສ່ວນປີກປາຍ ທີ່ບໍ່ໜັກ ກະປະໄວ້ກ່ອນ.”

ກ່ຽວກັບເຫດການແຂວນຄໍຕາຍ ຂອງທ່ານ ສຸກໄໝ ສຸດບຸນລົ້ນ ນີ້ ປະຊາຊົນຢູ່ແຂວງຈໍາປາສັກຜູ້ນຶ່ງເວົ້າຕໍ່ວິທຍຸເອເຊັຍເສຣີວ່າ ລັດຖະບານລາວ ຄວນຈະອອກມາຊີ້ແຈງ ແລະຖະແຫຼງຂ່າວຢ່າງເປັນທາງການ ໃຫ້ສັງຄົມຮູ້ ເພື່ອຄວາມໂປ່ງໃສ ເພາະຜູ້ເສຍຊີວິດ ເປັນເຖິງເຈົ້າໜ້າທີ່ລະດັບສູງຂອງແຂວງອັດຕະປື.

ພ້ອມກັນນັ້ນ ທ່ານກໍເວົ້າວ່າ ເຈົ້າໜ້າທີ່ລະດັບສູງ ບໍ່ວ່າຈະເປັນຕໍາແໜ່ງໃດ ຫາກກວດສອບພົບວ່າ ສໍ້ລາດບັງຫຼວງ ກໍຄວນຈະສືບສວນ ສອບສວນ ແລະດໍາເນີນຄະດີຕາມລະບຽບກົດໝາຍ ຢ່າງເປີດເຜີຍ.

“ພະນັກງານໂຕສໍ້ກົງນີ້ ມັນຫລາຍຫັ້ນແລ້ວ ຄັນສິເວົ້າ ພະນັກງານຄົນໃດສໍ້ກົງ ສິແມ່ນນາຍພົນນາຍພັນ ທະຫານຕໍາຫລວດ ກະຢ່າ ປິດລັບບໍ່ໄດ້ ເປີດເຜີຍໂລດ ເອົາໄປໆ ຈັກໜ້ອຍເຈົ້າສິຂ້າຄົນຖິ້ມຊື່ໆ ຜູ້ບໍ່ຜິດກະວ່າຜິດ ນັ້ນມັນບໍ່ຖຶກໄດ໋ ເຮັດວຽກ.”

ໃນໄລຍະກາງສະໃໝ 5 ປີ (2021-2025) ອົງການກວດກາແຫ່ງລັດ ໄດ້ກວດພົບການສໍ້ລາດບັງຫຼວງ 7 ຄະດີ. ໃນນັ້ນ ມີພະນັກງານ-ລັດຖະກອນ ທີ່ກະທໍາຜິດ 34 ຄົນ, ພະນັກງານລັດວິສາຫະກິດ 33 ຄົນ, ສ້າງຄວາມເສຽຫາຍທັງໝົດ 508.40 ຕື້ກີບ, 64 ລ້ານປາຍບາດ ແລະ 100,000 ປາຍໂດລາສະຫະລັດ.  

ເມື່ອປີ 2022 ໄດ້ກວດພົບ ເຫັນການຈ່າຍເງິນ ທີ່ບໍ່ເປັນໄປຕາມແຜນການຊົດເຊີຍຄວາມເສຍຫາຍ ແລະແຜນການຟື້ນຟູຄຸນນະພາບຊີວິດ ຂອງປະຊາຊົນ ທີ່ໄດ້ຮັບຜົນກະທົບ ຈາກເຂື່ອນເຊປຽນ-ເຊນໍ້ານ້ອຍ ແຕກຢູ່ເມືອງສະໜາມໄຊ ແຂວງອັດຕະປື  ຫຼາຍກວ່າ 81 ຕື້ກີບ.

ບັນຫາການສໍ້ລາດບັງຫລວງ ຂອງພະນັກງານ-ລັດຖະກອນ ຕາມທີ່ອົງການກວດສອບແຫ່ງລັດ ພົບເຫັນ ແມ່ນເກີດຈາກເຈົ້າໜ້າທີ່ລັດ ເກືອບທຸກຂະແໜງ ການ ທີ່ບໍ່ມີຄວາມໂປ່ງໃສ, ເມື່ອໄດ້ງົບປະມານໄປແລ້ວ ກໍບໍ່ເຮັດບັນຊີເບີກຈ່າຍຕາມແຜນ, ບາງໂຄງການລົງທຶນ ກໍເພີ້ມງົບປະມານໂດຍບໍ່ຈໍາເປັນ, ບາງໂຄງ ການ ທີ່ບໍ່ມີການປະເມີນດ້ານເສດຖະກິດ-ເຕັກນິກ ກໍເບີກຈ່າຍງົບປະມານໃຫ້ດໍາເນີນການ. 

ເວົ້າເຖິງເລື່ອງຄວາມໂປ່ງໃສ ອົງການເພື່ອຄວາມໂປ່ງໃສສາກົນ (Transparency International) ໄດ້ເປີດເຜີຍຜົນການສໍາຫລວດ ດັດສະນີການຮັບຮູ້ເລື້ອງການສໍ້ລາດບັງຫຼວງ (Corruption Perceptions Index) ປະຈໍາປີ 2023 ທັງໝົດ 180  ປະເທດທົ່ວໂລກ. ຈາກຜົນຂອງການສໍາຫຼວດ ພົບວ່າ ສປປລາວ ຖືກຈັດໃຫ້ຢູ່ໃນອັນດັບທີ 136 ຊຶ່ງສະທ້ອນໃຫ້ເຫັນວ່າບັນຫາການສໍ້ລາດບັງຫຼວງຢູ່ລາວ ຍັງແຜ່ຫຼາຍ ແລະບໍ່ໄດ້ຮັບການແກ້ໄຂໃຫ້ດີຂຶ້ນ.