ແພດ-ໝໍພົບອຸປສັກ ໃນການສັກວັກຊີນ ໂຄວິດ-19

ໄຊຍາ
2021-11-23
Share
ແພດ-ໝໍພົບອຸປສັກ ໃນການສັກວັກຊີນ ໂຄວິດ-19 ບັນຍາກາດ ຂອງການຊື້ຂາຍ ທີ່ຕລາດ ລາວ-ອົດຊີ້ ຖ່າມກາງມາຕການ ປ້ອງກັນໂຄວິດ-19 ຢ່າງເຕັມທີ່ (TS), ພຶສຈິກາ 2021.
RFA

ປັດ​ຈຸ​ບັນ​ຜູ້​ສູງ​ອາ​ຍຸ​ ແລະ​ປະ​ຊາ​ຊົນ​ຈຳ​ນວນ​ນຶ່ງ ​ທີ່​ຢູ່​ເຂດ​ຊົນ​ນະ​ບົດ ​ໃນ​ຫຼາຍ​ແຂວງ​ຍັງ​ບໍ່​ສາ​ມາດ​ເຂົ້າ​ເຖິງ​ການ​ສັກ​ວັກ​ຊີນ​ປ້​ອງ​ກັນ ​ໂຄວິດ-19 ໄດ້​ຕາມ​ຈຸດ​ບໍ​ຣິ​ການ ​ປະ​ຈຳ​ໂຮງ​ໝໍ​ຕ່າງໆ ໄດ້​ຢ່າງ​ທົ່ວ​ເຖິງ​ເຮັດ​ໃຫ້​ທາງ​ການ​ລາວ​ ອອກ​ມາ​ຕ​ການ​ໃຫ້​ເຈົ້າ​ໜ້າ​ທີ່​ ແພດ-ໝໍ​ ໃນ​ແຕ່​ລະ​ແຂວງ ລົງ​ພື້ນ​ທີ່ ​ໄປ​ສັກ​ວັກ​ຊີນ​ປ້ອງ​ກັນ​ໂຄວິດ-19 ໃຫ້​ປະ​ຊາ​ຊົນ ​ດັ່ງ​ກ່າວ​ເຂດ​ບ້ານ​ຕ່າງໆ ແຕ່​ການ ລົງ​ພື້ນ​ທີ່ ​ໄປ​ສັກ​ວັກ​ຊີນ​ໃຫ້​ປະ​ຊາ​ຊົນ​ ແຕ່​ລະ​ບ້ານ​ເຈົ້າ​ໜ້າ​ທີ່​ແພດ​ແລະ​ໝໍ​ ກໍ​ພົບ​ບັນ​ຫາ​ຫຼາຍ​ຢ່າງ​ໂດຍ​ສະ​ເພາະ​ຢູ່​ເຂດ​ຊົນ​ນະ​ບົດ ​ຊຶ່ງ​ການ​ເດີນ​ທາງ​ເຂົ້າ​ໄປ​ຍັງ​ຫຍຸ້ງ​ຍາກ​ ແລະ​ພາ​ຫະ​ນະ​ກໍ​ບໍ່​ມີ​ພຽງ​ພໍ. ດັ່ງ​ເຈົ້າ​ໜ້າ​ທີ່​ໝໍ​ທ່ານ​ນຶ່ງ​ ທີ່​ລົງ​ພື້ນ​ທີ່​ໄປ​ສັກ​ວັກ​ຊີນ​ປ້ອງ​ກັນ​ເຊື້ອ ​ໂຄວິດ-19 ໃນ​ແຂວງ​ຊຽງ​ຂວາງ​ ກ່າວ​ຕໍ່​ວິ​ທ​ຍຸ​ເອ​ເຊັຽ​ເສ​ຣີ ​ໃນ​ວັນ​ທີ 23 ​ພຶສ​ຈິ​ກາ ​ນີ້​ວ່າ:

ກໍມີຄວາມຫຍຸ້ງຍາກຢູ່ເນາະປັດຈຸບັນນີ້ເຂົາເຈົ້າແມ່ນຣະດູການເກັບກ່ຽວມີບາງບ້ານທີ່ວ່າເຮົາໄປກໍບໍ່ໄດ້ສັກໝົດ ມັນຕ້ອງໄດ້ໄປຫຼາຍເທື່ອ ກ່ຽວກັບພາຫະນີ້ ໃນການລົງໄປມີາມຫຍຸ້ງຍາກ ແດ່ກໍບໍ່ພຽງພໍໄປບ້ານຍາກ ຈັ່ງຊິຣົດເຮົາກໍເກົ່າແກ່ແລ້ວ ໄປແລ້ວ ກໍເປ່ກໍເພຕາມທາງ.”

ນອກ​ຈາກ​ບັນ​ຫາ​ດັ່ງ​ກ່າວ​ແລ້ວ ​ກໍ​ຍັງ​ພົບ​ບັນ​ຫາ​ໃນ​ເຣືຶ່ອງ​ເຈົ້າ​ນ​ໜ້າ ​ທີ່​ບຸກ​ຄະລາ​ກອນ​ການ​ແພດ ບໍ່​ພຽງ​ພໍ​ຮວມ​ເຖິງ​ເຣື່ອງ​ອຸ​ປະ​ກອນ​ການ​ແພດ​ນຳ​ດ້ວຍ ​ເປັນ​ຕົ້ນ​ຊຸດ​ປ້ອງ​ກັນ​ໃນ​ເວ​ລາ​ທີ່ລົງ​ພື້ນ​ທີ່ ​ໄປ​ສັກ​ວັກ​ຊີນ​ປ້ອງ​ກັນ​ໂຄວິດ-19 ກໍ​ບໍ່​ໄດ້​ມີ​ ຕ້ອງ​ປ້ອງ​ກັນ​ຕົນ​ເອງ ​ດ້ວຍ​ການ​ໃສ່​ຜ້າ ອັດ​ປາກ​ອັດ​ດັງ ​ແລະ​ເວັ້ນ​ໄລ​ຍະ​ຫ່າງ. ດັ່ງ​ເຈົ້າ​ໜ້າ​ທີ່ ​ໝໍ​ໃນ​ແຂວງ​ສວັນ​ນະ​ເຂດ​ ທ່ານ​ນຶ່ງ​ຂໍ​ສງວນ​ຊື່ ​ແລະ​ຕຳ​ແໜ່ງ​ກ່າວ​ວ່າ:

ບັນຫາບຸກຄະລາກອນການແພດເຮົາບໍ່ພຽງພໍອັນສອງມາກ່ຽວກັບຄວາມກຽມພ້ອມອຸປະກອນເຮົາບໍ່ພຽງພໍຍົກໂຕຢ່າງວ່າຊຸດນຸ່ງປ້ອງກັນນີ້ບໍ່ພຽງພໍເຮົາໄດ້ ແຕ່ໃສ່ແມອັນສອງມາລ້າງເຈວອັນສາມາຮັກສາມາການໄລຍະຫ່າງ ຄູ່ມື້ນີ້ນ່າການສນອງຂອງຂັ້ນເທິງເຮົາ ບໍ່ທັນໄດ້ເຫັນ ບໍ່ແພດໝໍເຮົາໃນປັດຈຸບັນຈຶ່ງມີການຕິດເຊື້ອຫຼາຍ.”

ຂ​ນະ​ທີ່​ຢູ່ ​ແຂວງ​ຫຼວງ​ພ​ຣະ​ບາງ​ ການ​ສັກ​ວັກ​ຊີນ​ປ້ອງ​ກັນ​ເຊື້ອ​ ໂຄວິດ-19 ຢູ່​ພາຍ​ໃນ​ເມືອງ​ ສ່ວນ​ໃຫຍ່​ກໍ​ພົບ​ວ່າ ​ໄດ້​ສັກ​ເປັນ​ສ່ວນ​ຫຼາຍ​ແລ້ວ ​ຍັງ​ເຫຼືອ​ແຕ່​ຢູ່​ເຂດ​ຊົນ​ນະ​ບົດ ​ຊຶ່ງ​ເຈົ້າ​ໜ້າ​ທີ່​ແພດ ​ແລະ​ໝໍ​ກໍ​ພົບ​ບັນ​ຫາ​ໃນ​ເຣື່ອງ​ເສັ້ນ​ທາງ ​ຍັງ​ມີ​ສ​ະ​ພາບ​ເປ່​ເພ ​ເຮັດ​ໃຫ້​ການ​ເດີນ​ທາງ ​ເຂົ້າ​ໄປ​ໂດຍ​ການ​ຍ່າງ ​ຫຼື​ໃຊ້​ຣົດ​ຈັກ​ແທນ. ດັ່​ງ​ເຈົ້າ​ໜ້າ​ທີ່​ ທີ່​ກ່ຽວ​ຂ້ອງ​ ທ່ານ​ນຶ່ງ​ໃນ​ແຂວງ​ຫຼວງ​ພ​ຣະ​ບາງ​ກ່າວ​ວ່າ:

18 ປີຂື້ນເມືອນີ້ ຂ້ອນຂ້າງຫຼາຍແລ້ວຈະຍັງຍັງຢູ່ແຖບເຂດນອກພຸ້ນແຫຼະເນາະເສັ້ນທາງນີ້ໄປຫາແຕ່ລະບ້ານຊົນນະບົດພົບຄວາມຫຍຸ້ງຍາກຢູ່ບາງເທື່ອກໍຍ່າງເອົາບາງເທື່ອກໍຣົດຈັກໄປໄດ້ຈັ່ງຊິຫັ້ນນ່າ.”

ກ່ຽວ​ກັບ​ເຣື່ອງ​ດັ່ງ​ກ່າວ​ນີ້ ​ຊາວ​ບ້ານ​ໃນ​ເຂດ​ຊົນ​ນະ​ບົດ​ ໃນ​ແຂວງ​ຫຼວງ​ພ​ຣະ​ບາງ ​ທ່ານ​ນຶ່ງ​ກ່າວວ່າ ​ປະ​ຊາ​ຊົນ​ໃນ​ເຂດ​ຊົນ​ນະ​ບົດ​ ກໍ​ເຂົ້າ​ໃຈ​ກັນ​ຫຼາຍ​ຂື້ນ ​ໃນ​ເຣື່ອງ​ໄປ​ຮັບ​ການ​ສັກ​ວັກ​ຊີນ​ ປ້ອງ​ກັນ​ເຊື້ອ​ ໂຄວິດ-19 ຖ້າ​ຈຸດ​ໃດ ​ມີ​ບໍ​ຣິ​ການ​ສັກ​ວັກ​ຊີນ​ປ້ອງ​ກັນ ​ໂຄວິດ-19 ​ແນ່ນອນ​ວ່າ​ຈະ​ຕ້ອງພາ​ກັນ ​ຫຼັ່ງ​ໄຫຼ​ໄປ​ສັກ ​ຍ້ອນ​ຫຼາຍ​ຄົນ​ຍັງ​ຢ້ານ​ເຊື້ອ ​ໂຄວິດ-19 ​ກັນ​ຢູ່​ດັ່ງ​ທ່ານ​ກ່າວ​ວ່າ:

ເຂົ້າໃຈແລ້ວ ປະຊາຊົນເຂົ້າໃຈແລ້ວ ຄັນຖ້າແພດໝໍເນາະ ເພິ່ນລົມາສັກຢາແລ້ວ ມີສະຖານທີ່ອອກໄປສັກ ໂອ້ຄົນຊິຫຼາຍ ຊິຫຼັ່ງ ຊິໄຫຼເຂົ້າໄປເລີຍລະ ກັງວົນຫັ້ນແລ້ວ ບາງຄົນກໍຢູ່ ບໍ່ເຢັກີນບໍ່ສຸກປານໃດ ເລີຍລະ.”

ຊາວ​ບ້ານ​ໃນ​ແຂວງວຽງ​ຈັນ​ ທ່ານ​ນຶ່ງ​ກ່າວ​ວ່າ ​ຫຼາຍ​ຄົນ​ກໍ​ຍັງ​ຮູ້​ສຶກ​ຢ້ານ​ ເຊື້ອ​ໂຄວິດ-19 ກັນ​ຢູ່ ແຕ່​ກໍ​ຮູ້​ຈັກ​ປັບ​ໂຕ​ ໃນ​ການ​ໃຊ້​ຊີ​ວິດ ​ເພາະ​ຍັງ​ຕ້ອງ​ທຳ​ມາ​ຫາ​ກິນ ​ລ້ຽງ​ຄອບ​ຄົວ ​ແລະ​ປັດ​ຈຸ​ບັນ​ຊາວ​ບ້ານ ​ກໍ​ໄປ​ຮັບ​ການ​ສັກ​ວັກ​ຊີນ ​ປ້ອງ​ກັນ​ເຊື້ອ ​ໂຄວິດ-19 ກັນ​ຫຼາຍ​ຂື້​ນ​ແລ້ວ ​ຍັງ​ເຫຼືອ​ພຽງ​ແຕ່​ເດັກ​ນ້ອຍ​ ຕ່ຳ​ກວ່າ 17 ​ປີ​ເປັນ​ສ່ວນ​ໃຫຍ່​ທີ່​ຍັງ​ບໍ່​ໄດ້​ສັກ.

ເຣື່ອງຢ້ານກໍຢ້ານລະເດີ້ຄັນຢ້ານຫຼາຍກໍບໍ່ມີຢູ່ມີກີນສັກວັກຊີນເຂົາເຈົ້າສັກຫຼາຍແລ້ວລະດຽວນີ້ແພດໝໍເຂົາເຈົ້າລົງແຕ່ລະບ້ານສ່ວນຫຼາຍກໍແມ່ນຍັງເດັກນ້ອຍ 17 ປີ ລົງມານີ້ຍັງຫຼາຍ.”

ສຳ​ລັບ​ຜູ້​ຕິດ​ເຊື້ອ ​ໂຄວິດ-19 ​ໃນ​ຮອບ​ເດືອນ​ພຶ​ສ​ຈິ​ກາ​ນີ້ ​ກໍ​ພົບ​ວ່າ​ຫຼາຍ​ແຂວງ​ມີ​ການ​ຕິດ​ເຊື້ອ​ສູງ 100-500 ຄົນ​ຕໍ່​ວັນ​. ສາ​ເຫດ​ສ່ວນ​ໃຫ​ຍ່​ກໍ​ເກີດ​ຈາກ ​ການ​ຖື​ເບົາ​ຂອງ​ຫຼາຍ​ຄົນ ​ທີ່​ຍັ​ງບໍ່​ຄ່ອຍ​ປະ​ຕິ​ບັດ​ຕາມ ​ມາ​ຕ​ການ​ຢ່າງ​ຈິງ​ຈັງ ​ແລະ​ຈະ​ເຂົ້າ​ຣະ​ດູ​ໜາວ​ນີ້​ ເຈົ້າ​ໜ້າ​ທີ່​ກໍ​ຄາດ​ວ່າ​ມີ​ແນວໂນ້ມ ​ຈະ​ຍັງ​ບໍ່​ຫຼຸດ​ລົງ​ງ່າຍ​ ແຕ່​ທາງ​ການ​ກໍ​ພະ​ຍາ​ຍາມ​ເລັ່ງ​ສັກ​ວັກ​ຊີນ ​ປ້ອງ​ກັນ​ເຊື້ອ ​ໂຄວິດ-19 ​ໃຫ້​ໄດ້​ຕາມ​ເປົ້າ​ໝາຍ 70% ໃນ​ທ້າຍ​ປີ​ນີ້​ ເພື່ອ​ໃຫ້​ມີ​ພູມ​ປ້ອງ​ກັນ ​ເຊື້ອ​ໄດ້​ຫຼາຍ​ຂື້ນ. ເຈົ້າ​ໜ້າ​ທີ່ ທີ່​ກ່ຽວ​ຂ້ອງ​ ໃນ​ນະ​ຄອນ​ຫຼວງວຽງ​ຈັນ ​ທ່ານ​ນຶ່ງ​ທີ່​ຂໍ​ສງວນ​ຊື່ແລະ​ຕຳ​ແໜ່ງ​ກ່າວ​ວ່າ:

ຄາດຄະເນໄວ້ວ່າທ້າຍເດືອນພືສຈິການີ້ພະຍາຍາມໃຫ້ໂຕເລກຫຼຸດລົງເພິ່ນກຳລັງພະຍາຍາມ ຄຸມເຂັ້ມຢູ່ເລັ່ງສັກວັກຊີນ ໃຫ້ມັນໄດ້ຫຼາຍທີ່ສຸດ ຕາມແຜນເພິ່ນຢາກໃຫ້ມັນໄດ້ 70-80.”

ເຈົ້າ​ໜ້າ​ທີ່​ທີ່​ກ່ຽວ​ຂ້ອງ ​ໃນ​ແຂວງ​ຫຼວງ​ພ​ຣະ​ບາງ​ ທ່ານ​ດັ່ງ​ກ່າວ​ໄດ້​ກ່າວ​ເພີ່ມ​ກ່ຽວ​ກັບ​ເຣື່ອງ​ນີ້​ວ່າ​ຄາດ​ວ່າ ​ໂຕ​ເລກ​ການ​ຕິດ​ເຊື້ອ​ ໂຄວິດ-19 ​ຍັງ​ຈະ​ສູງ​ຢູ່​ຍ້ອນ​ປັດ​ຈຸ​ບັນ​ ປະ​ຊາ​ຊົນ​ເຣີ່ມ​ໃຊ້​ຊີວິດ​ປົກ​ກະ​ຕິ​ກັນ​ແລ້ວ​ ດັ່ງ​ທ່ານ​ໄດ້​ກ່າວ​ວ່​າ:

ຄິດວ່າມັນຈະສູງເພາະວ່າຣະບາດຢູ່ຊຸມຊົນກໍຫຼາຍ ບາດນີ້ຄັນຖ້າວ່າ ເຮົາຊິສະກັດກັ້ນ ເຮັດຄືເກົ່າພໍ່ແມ່ປະຊາຊົນ ກໍຊອກຢູ່ຫາກິນຫັ້ນນ່າ ກໍຍັງຍາກຊົ່ວຈະຄວບຄຸມກັນ ເພິ່ນກໍປະກາດກັນຢູ່ ອອກຣະບຽບກັນຢູ່ທຸກມື້ ໜ່ວຍສະເພກິຫັ້ນນ່າກໍຍັງມີການຕິດຣະບາດຢູ່.”

ໃນ​ວັນ​ທີ 23 ພື​ສ​ຈິ​ກາ ​ນີ້​ທາງ​ການ​ລາວກວ​ດ​ພົບ​ຜູ້​ຕິດ ​ເຊື້ອ​ໂຄວິດ-19 ​ເພີ່ມ​ໃໝ່ 1,323 ຄົນ. ຕິດ​ເຊື້ອ​ໃນ​ຊຸມ​ຊົນ 1,318 ຄົນ ຕິດ​ເຊື້ອ​ຈາ​ກ​ກໍ​ຣະ​ນີ ນຳ​ເຂົ້າ 5 ຄົນ, ​ເສັຽ​ຊີ​ວິດ​ສະ​ສົມ 137 ​ຄົນ ແລະ ຕິດ​ເຊື້ອ​ສະ​ສົມ 64,482 ຄົນ.

ສ່ວນ​ການ​ສັກ​ວັກ​ຊີນ​ປ້ອງ​ກັນ ​ໂຄວິດ-19 ໃນ​ປັດ​ຈຸ​ບັນ​ເຂັມ​ທີ 1 ສັກ​ໄດ້ 1,692,533 ຄົນ, ​ກວມເອົາ 50.32% ແລະ ​ເຂັມ​ທີ 2 ​ສັກ​ໄດ້ 3,077,625 ກວມ​ເອົາ 41.94%.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ