ແຂວງຊຽງຂວາງ ຈະເປັນເຈົ້າພາບ ຕຣຽມຈັດແຂ່ງຂັນ ກິລາແຫ່ງຊາດ

ສຸພັດຕາ
2022.05.19
Share on WhatsApp
Share on WhatsApp
ແຂວງຊຽງຂວາງ ຈະເປັນເຈົ້າພາບ ຕຣຽມຈັດແຂ່ງຂັນ ກິລາແຫ່ງຊາດ ສນາມກິລາ ແຂວງຊຽງຂວາງ ທີ່ສ້າງສຳເຣັດແລ້ວ ແຕ່ຍັງບໍ່ທັນໄດ້ໃຊ້ແຂ່ງຂັນ ເນື່ອງຈາກ ໂຄວິດ-19 ແລະທາງແຂວງຊຽງຂວາງ ກໍຍັງຮັກສາດູແລ ສນາມກິລາແຫ່ງນີ້ ເປັນຢ່າງດີ.
ນັກຂ່າວ ພົລເມືອງ

ຣັຖບານລາວ ໄດ້ກໍານົດມື້ຈັດການແຂ່ງຂັນກິລາແຫ່ງຊາດ ຄັ້ງທີ່ 11 ຢູ່ແຂວງຊຽງຂວາງແບບເປັນທາງການ ໃນລະຫວ່າງ ວັນທີ່ 13 ຫາ 22 ເດືອນທັນວາ ປີ 2022 ນີ້ ແລະຕຣຽມສົ່ງໜັງສື ແຈ້ງໄປຍັງແຂວງຕ່າງໆໃນມໍ່ໆນີ້ ເພື່ອໃຫ້ກະຕຣຽມຄວາມພ້ອມ ການເຂົ້າຮ່ວມແຂ່ງຂັນ, ເຊິ່ງປັດຈຸບັນ ທາງຄະນະຮັບຜິດຊອບຈັດກິລາແຫ່ງຊາດ ກໍາລັງກະຕຣຽມໜ້າວຽກຫຼາຍດ້ານ ໂດຍມີຄວາມຄືບໜ້າແລ້ວ 70%.

ດັ່ງເຈົ້າໜ້າທີ່ ໃນຄະນະຮັບຜິດຊອບຈັດກິລາແຫ່ງຊາດ ແຂວງຊຽງຂວາງ ກ່າວຕໍ່ວິທຍຸເອເຊັຽເສຣີ ໃນວັນທີ່ 19 ພຶສພາ ນີ້ວ່າ:

“ເດືອນ 12 ນີ້ແຫຼະ ແຕ່ລະຄະນະກັມມະການຝ່າຍຕ່າງໆ ກະຕຣຽມຄວາມພ້ອມ ກະຊິມີຄະນະກັມມະການຝ່າຍຕ່າງໆ ເພິ່ນກະຕຣຽມຫັ້ນແຫຼະ ກະຊິມີເປັນບາງປະເພດກິລາ ກ່ອນມື້ເປີດ-ມື້ປິດຫັ້ນແຫຼະ ຊິມີປະມານ 8 ຫາ 9 ປະເພດກິລາ ແຂ່ງກ່ອນເດ້.”

ໃນຂະນະທີ່ ຫຼາຍແຂວງ ຮວມທັງບາງກະຊວງ ທີ່ຈະສົ່ງນັກກິລາປະຈໍາແຂວງ ຫຼືປະຈໍາກະຊວງ ເຂົ້າຮ່ວມການແຂ່ງຂັນກິລາແຫ່ງຊາດໃນຄັ້ງນີ້ ກໍຕ້ອງໄດ້ກະຕຣຽມຄວາມພ້ອມຄືນໃໝ່ໝົດ ເນື່ອງຈາກລະບົບການຈັດຕັ້ງມີການປ່ຽນແປງ ເຊິ່ງຫຼາຍແຂວງ ກໍມີແຜນທີ່ຈະຈັດກອງປະຊຸມ ກະຕຣຽມການເຂົ້າຮ່ວມກິລາແຫ່ງຊາດໃນມໍ່ໆນີ້ ແລະຈະໄດ້ສເນີຂໍງົບປະມານຈາກທາງຂັ້ນເທິງ ມາໃຊ້ສໍາລັບການກະຕຣຽມ ແລະຄັດເລືອກໂຕນັກກິລາບາງປະເພດ.

ດັ່ງເຈົ້າໜ້າທີ່ຂແນງກິລາ ຢູູ່ແຂວງໄຊຍະບູຣີ ກ່າວວ່າ:

“ເປັນເອກກະສານທາງການ ຂອງກະຊວງສຶກສາ ຍັງບໍ່ທັນໄດ້ແຈ້ງ ໃຫ້ບັນດາແຂວງເທື່ອເນາະ ກະຍັງບໍ່ທັນໄດ້ຄົ້ນຄວ້າຫຍັງຄືກັນເທື່ອ ວ່າຈະເຂົ້າຮ່ວມຈັກປະເພດກິລາ ກະມີແຜນຢູ່ ກະຕຣຽມຄັດເລືອກໂຕນັກກິລາ ໂດຍສະເພາະ ແມ່ນ ບານສົ່ງ, ບານເຕະ, ກະຕໍ້ ແມ່ນຫຍັງນີ້ແຫຼະ.”

ນອກຈາກຈະກະຕຣຽມຄວາມພ້ອມຄືນໃໝ່ແລ້ວ ຫຼາຍແຂວງຍັງຕ້ອງໄດ້ຊອກຫາ ແລະຄັດເລືອກໂຕນັກກິລາ ໃນຫຼາຍປະເພດຄືນໃໝ່ໝົດ ເນື່ອງຈາກນັກກິລາທີ່ໄດ້ຜ່ານການຄັດເລືອກ ໃນກ່ອນໜ້ານີ້ ຫຼາຍຄົນໄດ້ຍ້າຍໄປເຂົ້າຮ່ວມທີມກິລາຂອງແຂວງອື່ນໆ ຫຼືບາງຄົນ ກໍໄດ້ເຊົາຫຼິ້ນກິລາໄປແລ້ວແບບຖາວອນ.

ດັ່ງເຈົ້າໜ້າທີ່ ຂແນງກິລາ ແຂວງຄໍາມ່ວນ ກ່າວວ່າ:

“ໂອ ໂຕກ່ອນມັນແລ້ວລະ ແຕ່ວ່າເພິ່ນຊິແຈ້ງການມາໃໝ່ນີ່ ກໍາລັງຊິກະຕຣຽມໃໝ່ ເປີດກອງປະຊຸມທິດຊິມານີ້ໃດ໋ ໄດ້ຄັດເລືອກໃໝ່ຄືນແຫຼະ ເພາະວ່າມັນມີໂຕເກົ່າ ນັກກິລາມັນກະຍ້າຍໄປຫຼາຍບ່ອນແລ້ວ.”

ທາງດ້ານປະຊາຊົນຫຼາຍຄົນ ຢູ່ແຂວງຊຽງຂວາງ ກໍຮູ້ສຶກຕື່ນໂຕ ຕໍ່ການເປັນເຈົ້າພາບຈັດການແຂ່ງຂັນກິລາແຫ່ງຊາດຂອງແຂວງໃນປີນີ້ ແລະກໍມີຄວາມພ້ອມຮ່ວມກັນເປັນເຈົ້າພາບທີ່ດີ ເຊິ່ງຫຼາຍຄົນກໍເຊື່ອວ່າ ການຈັດການແຂ່ງຂັນກິລາແຫ່ງຊາດຢູ່ແຂວງຄັ້ງນີ້ ຈະເປັນໂອກາດອັນດີ ທີ່ຈະເຮັດໃຫ້ນັກທ່ອງທ່ຽວກັບມາທ່ຽວ ພາຍໃນແຂວງຫຼາຍຄືແຕ່ກ່ອນ ເພື່ອຟື້ນຟູເສຖກິຈພາຍໃນແຂວງ ທີ່ໄດ້ຮັບຜົລກະທົບຈາກເຊື້ອ ໂຄວິດ-19 ແລະຍັງບໍ່ທັນຟື້ນໂຕ.

ດັ່ງຊາວບ້ານ ນາງນຶ່ງ ກ່າວວ່າ:

“ກະໜ້າຈະມີຢູ່ ເພາະວ່າ ມັນປິດຢູ່ 2 ປີເນາະ 2 ປີ ເຂົາເຈົ້າບໍ່ໄດ້ມານ່າ ປະເທດເປີດເປັນທາງການແລ້ວ ຫັ້ນນ່າ ເຂົາກະໜ້າຈະມາຢູ່.”

ໃນຂະນະດຽວກັນ ບັນດາຜູ້ປະກອບການດ້ານໂຮງແຮມ-ເຮືອນພັກ ແລະຮ້ານອາຫານຫຼາຍແຫ່ງ ຢູ່ເມືອງແປກ ແຂວງຊຽງຂວາງ ກໍໄດ້ຖືກຍື່ນຂໍ້ສເນີ ໃຫ້ມີສ່ວນຮ່ວມ ໃນການກະຕຣຽມຕ້ອນຮັບ ບັນດານັກກິລາຈາກແຂວງຕ່າງໆ ແລະບາງກະຊວງ ທີ່ຈະເຂົ້າມາຮ່ວມການແຂ່ງຂັນກິລາແຫ່ງຊາດໃນຄັ້ງນີ້ ເຊິ່ງຜູ້ປະກອບການຫຼາຍຄົນ ກໍມີຄວາມຫວັງວ່າ ເສຖກິຈຂອງພວກເຂົາເຈົ້າ ຈະກັບມາດີຂຶ້ນ.

ດັ່ງຜູ້ປະກອບການຮ້ານອາຫານ ແລະເຮືອນພັກແຫ່ງນຶ່ງ ກ່າວວ່າ:

“ເພິ່ນແຈ້ງມາໄວ້ຫຼາຍເທື່ອລະ ແຕ່ວ່າຍັງບໍ່ທັນໄດ້ຈັດ ສ່ວນຫຼາຍເຂົາເຈົ້າຊິມາຈອງໄວ້ກ່ອນ ກິນເປັນມື້ນີ້ໆ ກິລາຊິມີເທົ່ານີ້ເທົ່ານີ້ ເຂົາຊິຈອງຫັ້ນແຫຼະ ແຂກຊິມາພັກເທົ່ານີ້ໆຫັ້ນນ່າ ຈອງໂຕະໄວ້ກ່ອນ ຄັນວ່າເດືອນ 11-12 ລະແມ່ນທາງກິນຈຽງ ທາງກິລາ ແມ່ນຫຼາຍແຂກນ່າ.”

ສໍາລັບຣາຍລະອຽດ ຂອງການແຂ່ງຂັນກິລາແຫ່ງຊາດ ຄັ້ງທີ່ 11 ຫຼື ຊຽງຂວາງເກມສ໌ ຢູ່ແຂວງຊຽງຂວາງ ຍັງບໍ່ທັນລະບຸເທື່ອວ່າ ຈະມີການແຂ່ງຂັນກິລາຈັກປະເພດ, ມີຈໍານວນຫຼຽນລາງວັນທັງໝົດ ແກ່ນັກກິລາຈັກຫຼຽນ ແລະຈະມີນັກກິລາຈັກຄົນເຂົ້າຮ່ວມ ເຊິ່ງທາງກະຊວງສຶກສາທິການ ແລະ ກິລາ ຈະອອກແຈ້ງການອີກເທື່ອນຶ່ງ, ແຕ່ໃນເບື້ອງຕົ້ນ ຈະບໍ່ມີການສ້າງທີ່ພັກສໍາລັບນັກກິລາ ແຕ່ຈະໃຫ້ນັກກິລາພັກເຊົາຢູ່ຕາມໂຮງແຮມ ແລະເຮືອນພັກ ທີ່ຝ່າຍການຈັດການແຂ່ງຂັນ ຈະເປັນຜູ້ກະຕຣຽມໄວ້ໃຫ້.

ມະຫາກັມກິລາແຫ່ງຊາດຄັ້ງທີ່ 11 ຢູ່ແຂວງຊຽງຂວາງ ເຄີຍມີກໍານົດຈັດຂຶ້ນ ໃນລະຫວ່າງວັນທີ່ 21 ຫາ 30 ທັນວາ ປີ 2019 ແຕ່ຍ້ອນສະພາບອາກາດໃນໄລຍະດັ່ງກ່າວນັ້ນ ມີຄວາມໜາວເຢັນ ແລະບໍ່ເອື້ອອໍານວຍແກ່ນັກກິລາ ຈຶ່ງໄດ້ເລື່ອນໄປຈັດໃນວັນທີ່ 22 ມິນາ ຫາ ວັນທີ່ 1 ເມສາ ປີ 2020 ແຕ່ມາຮອດເດືອນມິນາ ປີ 2020 ທາງຫ້ອງວ່າການສໍານັກງານນາຍົກຣັຖມົນຕຣີ ກໍໄດ້ມີຄໍາສັ່ງ ໃຫ້ເລື່ອນການຈັດການແຂ່ງຂັນກິລາແຫ່ງຊາດ ອອກໄປແບບບໍ່ມີກໍານົດ ຍ້ອນສະຖານະການແຜ່ຣະບາດຂອງເຊື້ອໂຄວິດ-19 ຈົນມີມະຕິ ໃຫ້ກັບມາຈັດການແຂ່ງຂັນພາຍໃນທ້າຍປີນີ້.

ແລະກ່ອນໜ້ານີ້ ໃນປີ 2013 ທາງການລາວ ໄດ້ໃຊ້ງົບປະມານຈໍານວນຫຼາຍກວ່າ 200 ຕື້ກີບ ສໍາລັບກໍ່ສ້າງສນາມກິລາແຫ່ງໃໝ່ ຢູ່ແຂວງຊຽງຂວາງ ເພື່ອໃຊ້ສໍາລັບການຈັດມະຫະກັມກິລາແຫ່ງຊາດ ຢູ່ແຂວງຊຽງຂວາງໂດຍສະເພາະ ແລະໄດ້ສ້າງສໍາເຣັດ ໃນປີ 2017 ແຕ່ຍັງບໍ່ທັນເປີດໃຊ້ແຂ່ງຂັນກິລາ ແບບເປັນທາງການແຕ່ຢ່າງໃດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ