ລາວ ອອກລາຍງານ ການເສຍຊີວິດ ຂອງຊາວຕ່າງປະເທດ ຢູ່ວັງວຽງ

ກົມຕໍາຫຼວດກວດຄົນເຂົ້າ-ອອກເມືອງ  ທີ່ຢູ່ພາຍໃຕ້ກົມໃຫຍ່ສັນຕິບານ ກະຊວງປ້ອງກັນຄວາມສະຫ[ງົບ ໄດ້ອອກບົດລາຍງານ ໃນມື້ວັນທີ 22 ພະຈິກ 2024 ເລື່ອງການເສຍຊີວິດຂອງຄົນຕ່າງປະເທດ ເຊື້ອຊາດອາເມຣິກາ ສັນຊາດອາເມຣິກາ ແລະເຊື້ອຊາດເດັນມາກ ສັນຊາດເດັນມາກ. ໃນນັ້ນລະບຸວ່າ ໃນຄັ້ງວັນທີ 13 ພະຈິກ 2024 ທີ່ແຂວງວຽງຈັນ ໄດ້ມີການເສຍຊີວິດຂອງຄົນຕ່າງປະເທດ: ເຊື້ອຊາດເດນມາກ ເພດຍິງ 2 ຄົນ ແລະເຊື້ອຊາດອາເມຣິກາ ເພດຊາຍ 1 ຄົນ.

ຄົນເດັນມາກ 2 ຄົນທີ່ເສຍຊີວິດນັ້ນ ຄືນາງ Anne-Sofie Orkild Coyman, ອາຍຸ 20 ປີ ແລະນາງ Freja Vennervald Sorensen, ອາຍຸ 21 ປີ. ທັງ 2 ຄົນ ໄດ້ເດີນທາງເຂົ້າມາລາວ ໃນມື້ວັນທີ 7 ພະຈິກ 2024 ແລ້ວໄປພັກຢູ່ເຮືອນພັກ ນານາ ແບັກແພັກເກີ ຢູ່ເມືອງວັງວຽງ ແຂວງວຽງຈັນ. ໃນວັນທີ 12 ພະຈິກ ພວກກ່ຽວໄດ້ອອກໄປທ່ຽວຫຼິ້ນຕາມບາ ໃນໂຕເມືອງ ແລະພາກັນກັບທີ່ພັກ ເວລາ 12 ໂມງກາງຄືນ. ມາເຖິງວັນທີ 13 ພະຈິກ ໄດ້ມີພະນັກງານເຮືອນພັກ ໄປກວດເບິ່ງ ແລ້ວພົບວ່າ ທັງ 2 ຄົນນັ້ນ ໝົດສະຕິຢູ່ໃນຫ້ອງ ຈຶ່ງໄດ້ນໍາພວກກ່ຽວສົ່ງໄປໂຮງໝໍວັງວຽງ, ມີອາການສາຫັດ, ແພດບໍ່ສາມາດປິ່ນປົວໄດ້ ແລ້ວໄດ້ນໍາສົ່ງໄປໂຮງໝໍ 103 ທີ່ນະຄອນຫຼວງວຽງຈັນ ເວລາ 20 ໂມງ ແລະໄດ້ເສຍຊີວິດເວລາ 3 ໂມງ 30 ນາທີ ໂດຍທີ່ແພດບົ່ງມະຕິພະຍາດວ່າ ຫົວໃຈລົ້ມເຫຼວ ກະທັນຫັນ.

ສ່ວນນັກທ່ອງທ່ຽວອາເມຣິກາ ຊື່ ທ້າວ ເຈມ ຫລຸຍ ຮັດສັນ (Mr. Jame Louis Hutson) ອາຍຸ           57 ປີ, ໄດ້ເດີນທາງເຂົ້າມາລາວ ໃນມື້ວັນທີ 23 ກໍລະກົດ 2024, ໄດ້ໄປພັກຢູ່ເຮືອນພັກ ນານາ ແບັກແພັກເກີ ມາແຕ່ວັນທີ 20 ຕຸລາ. ມາເຖິງວັນທີ 13 ພະຈິກ ເວລາ 21 ໂມງ 10 ນາທີ ພະນັກງານປະຈໍາເຮືອນພັກ ສັງເກດເຫັນວ່າ ຜູ້ກ່ຽວ ບໍ່ໄດ້ອອກຈາກຫ້ອງພັກ ຈຶ່ງໄດ້ໄປເຄາະປະຕູຫ້ອງ ແຕ່ບໍ່ມີການຕອບຮັບ. ດັ່ງນັ້ນຈຶ່ງເອົາກະແຈສໍາຮອງມາເປີດປະຕູເບິ່ງ ແລ້ວພົບວ່າ ທ້າວ ເຈມ ນອນຢູ່ເທິງຕຽງ ບໍ່ຮູ້ວ່າ ເສຍຊີວິດ ຫຼືຍັງ. ດັ່ງນັ້ນຈຶ່ງໄດ້ໂທຫາເຈົ້າຂອງເຮືອນພັກ ໃຫ້ມາກວດການໍາກັນ ແລະພົບວ່າ ຜູ້ກ່ຽວໄດ້ເສັຍຊີວິດແລ້ວ, ໄດ້ຍ້າຍສົບໄປໄວ້ຢູ່ໂຮງໝໍເມືອງວັງວຽງ.

ຈາກການກວດສອບ ສະຖານທີ່ເກີດເຫດ ພົບວ່າ ພາຍໃນຫ້ອງ ມີເບຍ 4 ແກ້ວ ທີ່ດື່ມໝົດແລ້ວ ແລະເຫຼົ້າ ວັອດກາ 2 ແກ້ວ ທີ່ດື່ມໝົດແລ້ວ, ສົບຜູ້ກ່ຽວ ບໍ່ມີບາດແຜ ບໍ່ມີຮອຍບວມຊໍ້າ. ສົບທ້າວ ເຈມ ຖືກນໍາໄປເກັບໄວ້ຢູ່ມູນນິທິຈີນ ທີ່ນະຄອນຫຼວງວຽງຈັນ.

ກ່ຽວກັບເລື່ອງທີ່ວ່ານີ້ ເຈົ້າໜ້າທີ່ ກະຊວງປ້ອງກັນຄວາມສະຫງົບ ທ່ານນຶ່ງກ່າວວ່າ ເຈົ້າໜ້າທີ່ຕໍາຫຼວດທີ່ກ່ຽວຂ້ອງ ຍັງຢູ່ໃນລະຫວ່າງ ການສືບສວນ ສອບສວນ ຫາລາຍລະອຽດ ຂອງສາເຫດນັກທ່ອງທ່ຽວຕ່າງປະເທດ ທີ່ເສຍຊີວິດນັ້ນຢູ່ ວ່າເປັນຍ້ອນຫຍັງກັນແທ້. ນອກຈາກນີ້ ກໍຍັງມີຂໍ້ມູນຕື່ມວ່າ ຍັງມີນັກທ່ອງທ່ຽວຕ່າງປະເທດ ອີກຈໍານວນນຶ່ງ ທີ່ປິ່ນປົວຢູ່ໂຮງໝໍ ກະເສມລາດ ອິນເຕີເນຊັ່ນເນນ ທີ່ນະຄອນຫຼວງວຽງຈັນ ດັ່ງທີ່ທ່ານກ່າວຕໍ່ວິທຍຸເອເຊັຽເສຣີ ໃນວັນທີ 22 ພະຈິກນີ້ວ່າ:

“ໂອ ເພີ່ນຍັງສອບສວນຢູ່  ຫາສາ ເຫດການຕາຍ ຍ້ອນກິນເຫຼົ້າບໍ່ ຍ້ອນຫຍັງ ຖ້າເບິ່ງ ເພິ້ງຍັງສືບລາຍລະອຽດຢູ່ ໂຕນີ້ກໍຍັງບໍ່ຮູ້ ກໍຄືສິບໍ່ດົນດອກ ຍັງໄປປິ່ນປົວຢູ່ໂຮງໝໍກະເສມລາດ ຫຼາຍຄົນຢູ່ 7-8 ຄົນພຸ້ນລະ.”

ໃນຂະນະດຽວກັນ ເຈົ້າໜ້າທີ່ກະຊວງການຕ່າງແປະເທດທ່ານນຶ່ງກໍເວົ້າວ່າ ກ່ຽວກັບກໍລະນີທີ່ເກີດຂື້ນນີ້ ອາດຈະມີການຖະແຫຼງລາຍລະອຽດ ອີກເທື່ອນຶ່ງ ແຕ່ຍັງບໍ່ຮູ້ວ່າ ເມື່ອໃດ.

ແລະເຈົ້າໜ້າທີ່ ສະຖານທູດ ສະຫະຣັດອາເມຣິກາ ປະຈໍາລາວທ່ານນຶ່ງ ທີ່ຂໍສະຫງວນຊື່ ແລະສຽງ ໄດ້ກ່າວຕໍ່ວິທຍຸເອເຊັຍເສຣີ ໃນມື້ດຽວກັນນີ້ວ່າ ທາງສະຖານທູດ ສະຫະຣັດອາເມຣິກາ ຍັງບໍ່ທັນມີການແຈ້ງເຕືອນໃດໆເທື່ອ. ພ້ອມດຽວກັນນີ້ ວິທຍຸເອເຊັຍເສຣີ ກໍໄດ້ຕິດຕໍ່ໄປຍັງສະຖານທູດອັງກິດ ປະຈໍາລາວ ແລະສະຖານທູດອອສເຕຣເລຍ ປະຈໍາລາວ ແຕ່ເຈົ້າໜ້າທີ່ທີ່ກ່ຽວຂ້ອງ ຍັງບໍ່ສະດວກທີ່ຈະໃຫ້ຂໍ້ມູນ.

ແຕ່ເຖິງຢ່າງໃດກໍຕາມ ເຈົ້າໜ້າທີ່ດ້ານການທ່ອງທ່ຽວ ຢູ່ເມືອງວັງວຽງ ແຂວງວຽງຈັນ ນາງນຶ່ງ ທີ່ຂໍສະຫງວນຊື່ ແລະຕໍາແໜ່ງ ໄດ້ກ່າວວ່າ ເລື່ອງດັ່ງກ່າວ ພາກສ່ວນທີ່ກ່ຽວຂ້ອງ ຈະຫາລືກັນ ແລະຈະລາຍງານຄວາມຄືບໜ້າຢູ່ ແລະທັງຈະຫາລືເລື່ອງມາດຕະການປ້ອງກັນ ເພີ່ມຕື່ມ ຍ້ອນວ່າມັນມີຜົນກະທົບ ຕໍ່ພາບພົດການທ່ອງທ່ຽວຢູ່ເມືອງວັງວຽງ ແຕ່ບໍ່ຮູ້ວ່າ ເພີ່ນຈະເຜີຍແພ່ເມື່ອໃດ.

“ກະບໍ່ຮູ້ວ່າຈະເຜີຍແພ່ອອກສັງຄົມຫັ້ນມື້ໃດ ແຕ່ວ່າມື້ແລງນີ້ ເພີ່ນລວມກັນໝົດທຸກຂະແໜງ ທັງກະຊວງ ທັງແຂວງ ທັງເມືອງ ເພີ່ນຈະເຮັດວຽກຮ່ວມກັນ ລາຍງານກັນຫັ້ນນະ ກໍຄືີຮູ້ນໍາກັນຫັ້ນນະ ສື່ສັງຄົມທຸກມື້ນີ້ ມັນກະກວ້າງຂວາງໄວ ກໍສົ່ງຜົນກະທົບແນ່ນອນ ມັນລະບຽບມິຫຍັງກະມີຢູ່ແລ້ວ ແຕ່ວ່າລໍຖ້າ ເຮົາກໍຕອບຫຼາຍບໍ່ໄດ້.”

ແລະພະນັກງານນໍາທ່ຽວ ຢູ່ເມືອງວັງວຽງ ຜູ້ນຶ່ງກໍເວົ້າວ່າ ເມືອງວັງວຽງ ເປັນເມືອງ ທີ່ນັກທ່ອງທ່ຽວຕ່າງປະເທດ ມາທ່ຽວຫຼາຍ ແລະກໍສ້າງລາຍຮັບໄດ້ຫຼາຍ. ການທີ່ມີຂ່າວວ່າ ນັກທ່ອງທ່ຽວຕ່າງປະເທດເສຍຊີວິດ ຍ້ອນການດື່ມເຫຼ້າ ປະ ສົມສານປົນເປື້ອນຄືແນວນີ້ ແນ່ນອນວ່າ ຈະມີຜົນກະທົບອັນບໍ່ດີ ຕໍ່ພາບພົດການທ່ອງທ່ຽວຢູ່ເມືອງນີ້.

“ການເສຍຊີວິດໃນການທ່ອງທ່ຽວບໍ ການພະຈົນໄພບໍ ການມືນເມົາຢູ່ກິນ ອັນນີ້ຜົນກະທົບກະສິມີຢູ່ ພາບພົດການທ່ອງທ່ຽວ ອັນນັ້ນຢູ່ການຄຸ້ມຄອງຂອງເມືອງດອກ.”

ພ້ອມດຽວກັນນັ້ນ ປະຊາຊົນຢູ່ເມືອງວັງວຽງຜູ້ນຶ່ງ ກໍເວົ້າວ່າ ທາງເມືອງຈະຕ້ອງຫາວິທີປ້ອງກັນ ບໍ່ໃຫ້ເຫດການທີ່ວ່ານີ້ ເກີດຂື້ນໄດ້ອີກ, ຕ້ອງມີມາດຕະການ ກວດກາ ແລະວິທີການປ້ອງຄັກແນ່.

“ໃຊ້ມາດຕະການຫັ້ນແຫຼະ ໄດ້ຫາວິທີປ້ອງກັນແຫຼະ ບໍ່ໃຫ້ມັນເກີດເຫດຂື້ນອີກ ກະໄດ້ມີການກວດສອບຂອງເຫຼົ້າຫັ້ນແຫຼະ ແຕ່ລະຮ້ານແຫຼະວ່າ ໄດ້ມາດຕະຖານ ມີສານປົນເປື້ອນບໍ ເຫຼົ້າມັນເອົາມາແຕ່ໃສ ຮ້ານໃດທີ່ມີສານປົນເປື້ອນ ມັນບໍ່ດີ ຫຼືມັນບໍ່ໄດ້ມາດຕະຖານ ກະສັ່ງປິດ.”

ຂ່າວຫຼ້າສຸດ, ມາເຖິງປັດຈຸບັນ ມີນັກທ່ອງທ່ຽວຕ່າງປະເທດ ໄດ້ເສຍຊີວິດ 6 ຄົນແລ້ວ ຄືຄົນອັງກິດ ເພດຍິງ ອາຍຸ 28 ປີ -1 ຄົນ, ຊາວເດັນມາກ ເພດຍິງ 2 ຄົນ, ຄົນອາເມຣິກາ ເພດຊາຍ 1 ຄົນ ແລະຊາວອອສເຕຣເລຍ ເພດຍິງ 2 ຄົນ

ເພື່ອຂໍຮູ້ລາຍລະອຽດກ່ຽວກັບເລື່ອງດັ່ງກ່າວ ຮວມທັງເລື່ອງການອອກຖະແຫຼງຂ່າວ ກ່ຽວກັບເຫດການ ທີ່ເກີດຂື້ນນັ້ນ ວິທຍຸເອເຊັຽເສຣີ ໄດ້ຕິດຕໍ່ໄປຍັງ ກະ ຊວງຖະແຫຼງຂ່າວ ວັດທະນາທໍາ ແລະທ່ອງທ່ຽວ ແຕ່ບໍ່ມີເຈົ້າໜ້າທີ່ທ່ານໃດຮັບສາຍ.