ກວດພົບ 800 ປາຍຄົນ ຕິດໂຄວິດ ສາຍພັນ ໂອມິຄຣອນ

ອຸ່ນແກ້ວ
2022.03.16
Share on WhatsApp
Share on WhatsApp
ກວດພົບ 800 ປາຍຄົນ ຕິດໂຄວິດ ສາຍພັນ ໂອມິຄຣອນ ໃນເຂດທີ່ມີການແຜ່ຣະບາດ ຂອງໂຄວິດ-19 ເຈົ້າໜ້າທີ່ ທີ່ກ່ຽວຂ້ອງ ກໍຈະໜ່ວຍງານ ດຳເນີນການສຸ່ມກວດຫາໂຄວິດ-19 ກັບກຸ່ມຊາວບ້ານ ໃນເຂດບ້ານນັ້ນທັນທີ ເພາະຖືເປັນກຸ່ມສ່ຽງ ໃນນະຄອນຫຼວງວຽງຈັນ ເມື່ອເດືອນຕຸລາ 2021.
RFA

ຄະ​ນະ​ສະ​ເພາະ​ກິ​ຈ ຄວບ​ຄຸມໂຄວິດ-19 ໄດ້​ຖ​ແລງ ວັນ​ທີ 16 ມີ​ນາ ວ່າ ໄດ້​ກວດ​ພົບຜູ້​ຕິດ​ເຊື້ອ​ ໂຄວິດ-19 ສາຍ​ພັນໂອ​ມິ​ຄຣອນ 848 ຄົນ ຈາກ​ຜົ​ລກວດ​ທັງ​ໝົດ 3,000 ປາຍ​ ໂຕຢ່າງ. ໃນ​ຈຳ​ນວນຜູ້​ຕິດ​ເຊື້ອ​ທັງ​ໝົດ ນະ​ຄອນ​ຫລວງວຽງ​ຈັນ ກວມ​ເອົາຈຳ​ນວນ​ຜູ້​ຕິດ​ເຊື້ອ​ ຫຼາຍກວ່າ​ແຂວງ​ອື່ນ. ສາ​ເຫດ​ທີ່​ເຮັດ​ໃຫ້​ມີ​ຜູ້​ຕິດ​ເຊື້ອ​ເພີ່ມ​ຂຶ້ນ ຍ້ອນ​ວ່າ ປະ​ຊາ​ຊົນ​ມີ​ການ​ ຊຸມ​ແຊວ​ກັນ​ຫຼາຍ​ຂຶ້ນ, ມີ​ການ​ເປີດ​ຮ້ານ ​ກິນ​ດື່ມ​ເປັນ​ປົກ​ຕິ ແລະ ຫຼາຍ​ຄົນ​ກໍ​ບໍ່​ປ້ອງ​ກັນ​ໂຕ​ເອງ.

ເຈົ້າ​ໜ້າ​ທີ່​ ສາ​ທາ​ຣະ​ນະ​ສຸ​ຂ ທ່ານ​ນຶ່ງ ທີ່​ຂໍ​ສງວນ​ຊື່ ແລະ ຕຳ​ແໜ່ງ ໄດ້​ກ່າວ​ຕໍ່​ເອ​ເຊັຽ​ເສ​ຣີ ວ່າ:

ຕ້ອງເວົ້າເຣື່ອງການປ້ອງກັນ ນຶ່ງລະແມ່ນເຣື່ອງການ ຈັດງານກິກັມຕ່າງໆ ແລະ ການຊຸມແຊວເບາະ ບັນດາຮ້ານກິນດື່ມນີ້ ຫຼາຍໆ ບ່ອນເພິ່ນກະເປີດ ບັນຫານີ້ແຫຼະ ຖືວ່າ ມັນສ້າງໃຫ້ມີໂຄວິດຂຶ້ນມາຕື່ມນີ້ນ່າ ຫຼາຍຄົນລາງເທື່ອ ກໍບໍ່ໄດ້ໃສ່ຜ້າປິດປາກ ປິດຫຍັງກະມີ ແຕ່ວ່າ ພວກເຮົາ ກໍຕ້ອງໄດ້ເອົາໃຈໃສ່ ນຳກັນໝົດນັ້ນ ແຫຼະ ທຸກພາກສ່ວນຮອດພໍ່ແມ່ປະຊາຊົນຫັ້ນແຫຼະ.”

ທ່ານ ກ່າວ​ຕື່ມ​ວ່າ ສ່ວນ​ມາ​ຕ​ການ​ປ້ອງ​ກັນ ເຈົ້າ​ໜ້າ​ທີ່​ກໍ​ຍັງ​ໃຊ້​ມາ​ຕ​ການ​ຄື​ເກົ່າ ຍັງ​ບໍ່​ໄດ້​ມີ​ການ​ແຈ້ງ​ການ​ເພີ່ມ​ຕື່ມ ແລະ ພໍ່​ແມ່​ປະ​ຊາ​ຊົນ ຄວນ​ຈະ​ເອົາ​ໃຈໃສ່ ເປັນ​ເຈົ້າ​ການ​ໃນ​ການ ​ປ້ອງ​ກັນ​ຮ່ວມ​ກັນ​ໃຫ້​ຫຼາຍ​ຂຶ້ນ ແລະ ຄວນ​ຫຼີກ​ລ້ຽງ​ໄປ​ຊຸມ​ແຊວ ທີ່​ເປັນ​ສາ​ເຫດ​ນຶ່ງ ​ທີ່​ເຮັດ​ໃຫ້​ມີ​ການ​ຕິດ​ເຊື້ອ ​ໂຄວິດ-19 ເພີ່ມ​ຂຶ້ນ.

ໂຕ​ເລກ​ການ​ຕິດ​ເຊື້ອ 2 ມື້ ຜ່ານ​ມາ ບໍ່​ມີ​ແນມ​ໂນ້ມ​ຈະ​ຫຼຸດ​ລົງ ແຕ່ ​ອາ​ການບໍ່​ຮຸນ​ແຮງ ເມື່ອ​ທຽບ​ໃສ່​ທີ່​ຜ່ານ​ມາ.

ດ​ຣ. ລັດ​ຕະ​ນະ​ໄຊ ເພັດ​ສຸ​ວັນ ຫົວ​ໜ້າ​ກົມ​ຄວບ​ຄຸມ ​ພະ​ຍາດ​ຕິດ​ຕໍ່ ກະ​ຊວງ​ສາ​ທາ​ຣະ​ນະ​ສຸ​ຂ ໄດ້​ຖ​ແລງ​ຕໍ່​ສື່ມວ​ນ​ຊົນ ​ໃນ​ວັນ​ທີ 16 ມີ​ນາ ຕອນ​ນຶ່ງວ່າ:

ສາເຫດຂອງການຣະບາດຮອບນີ້ ເກີດຈາກການຣະບາດຂອງສາຍພັນໂອມິຄຼອນ ໂດຍສະເພາະແມ່ນ ສາຍພັນທີ່ທາງການເອີ້ນວ່າ BA.2 ແມ່ນສາມາດ ຕິດຕໍ່ເຮັດໃຫ້ອັດຣາການຕິດເຊື້ອເພີ່ມຂຶ້ນສູງ ສຳລັບ    ລາວ ໂຕເລກຕິດເຊື້ອທົ່ວປະເທດ ບໍ່ມີແນວໂນ້ມທີ່ຈະຫຼຸດລົງ ແລະ ມື້ນີ້ ກໍເປັນມື້ນຶ່ງ ທີ່ມີຜູ້ຕິດເຊື້ອ ທົ່ວປະເທດ ສູງເຖິງ 800 ກວ່າຄົນ.”

ເຖິງວ່າ ຈະ​ມີ​ຜູ້​ຕິດ​ເຊື້ອ​ເພີ່ມ​ຂຶ້ນ ແຕ່​ທາງ​ການ​ລາວ ກໍ​ຍັງ​ເປີດ​ໃຫ້​ນັກ​ທ່ອງ​ທ່ຽວ ພາຍ​ໃຕ້​ໂຄງ​ການ​ສີ​ຂຽວ ທີ່​ເດີນ​ທາງ​ຜ່ານ​ກຸ່ມ​ທົວຣ໌ ເຂົ້າ​ມາ​ທ່ຽວ​ພາຍ​ໃນ​ລາວ ໄດ້​ຄື​ເກົ່າ ຕາມ​ແຜນ​ຂອງ​ຣັ​ຖ​ບານ​.

ເຈົ້າ​ໜ້າ​ທີ່​ກ່ຽວ​ຂ້ອງ ​ຜູ້​ຂໍ​ສງວນ​ຊື່ ແລະ ຕຳ​ແໜ່ງ ທ່ານນຶ່ງ ໄດ້​ກ່າວ​ວ່າ:

ເປີດດຽວນີ້ ເພິ່ນກໍຄື ຜ່ອນຜັນຫຼາຍແລ້ວເດ້ ແຕ່ກໍກວດໂຄວິດຄືເກົ່າ ແຕ່ຄັນຈະປົກຕິຄືທີ່ຜ່ານມາຫັ້ນນ່າ ກະເດືອນ 7 ພຸ້ນນ່າ ຕາມແຜນ ບໍ່ຜ່ານກຸ່ມທົວກະໄດ້.”

ກ່ຽວ​ກັບ​ເຣື່ອງ​ດັ່ງ​ກ່າວ ກໍ​ມີ​ຊາວ​ລາວ​ຈຳ​ນວນ​ນຶ່ງ ກໍ​ຮູ້​ສຶກ​ກັງ​ວົນ​ໃຈ ແລະ ເປັນ​ຫ່ວງວ່າ ເຊື້ອ​ໂຄວິດ-19 ຈະ​ກັບ​ຣະ​ບາດ​ຄື​ເກົ່າ ແລະ ຢ້ານ​ສົ່ງ​ຜົ​ລ​ກະ​ທົບ​ໃນ​ຫຼາຍ​ດ້ານ.

ຊາວ ​ນະ​ຄອນ​ຫລວງວຽງ​ຈັນ ທ່ານ​ນຶ່ງ ໄດ້​ກ່າວ​ວ່າ:      

ໂຕນີ້ຫັ້ນນ່າເນາະ ມັນກະຜ່ອນຄາຍຊ່ວງໆ ນຶ່ງຫັ້ນລະນ່າ ບາດນີ້ລະ ເຂົາພັດເປີດຮ້ານກິນດື່ມ ບໍ່ ຮ້ານບັນເທີງນັ້ນ ຫຼາຍຂຶ້ນຫັ້ນນ່າ ແລະ ກໍຄົນໄປຊຸມກັນຫຼາຍຫັ້ນນ່າ ມັນເປັນ ສາເຫດໃຫ້ມັນຣະບາດຂຶ້ນແບບນີ້ຫັ້ນນ່າ ກັງວົນໃນກະໜ້າເປັນຫ່ວງເດ້.”

ພ້ອມ​ດຽວ​ກັນ​ນີ້ ຊາວ​ລາວ​ອີກ​ຈຳ​ນວນ​ນຶ່ງ ກໍ​ບໍ່​ໄດ້​ຮູ້​ສຶກ​ກັງ​ວົນ​ໃຈ​ຫຼາຍ ຍ້ອນ​ວ່າ ເຣີ່ມ​ຄຸ້ນ​ເຄີຍ ກັບ​ເຣື່ອງ​ໂຄວິດ-19 ແລະ ຮູ້​ຈັກການ​ປ້ອງ​ກັນໂຕ​ເອງ​ແລ້ວ.

ຊາວ​ ນະ​ຄອນ​ຫລວງວຽງ​ຈັນ ອີກ​ທ່ານ​ນຶ່ງ ໄດ້​ກ່າວ​ວ່າ:

ກໍກັງວົນໃຈປານໃດລະ ຊິນແລ້ວເດ້ ສຳລັບພວກເຮົາມັນເຊບຕົວເອງຢູ່ແລ້ວ ເຮົາກໍຈະມີການປ້ອງກັນ.”  

ຢ່າງ​ໃດ​ກໍ​ຕາມ ບັນ​ດາ​ປະ​ເທດ​ອາ​ຊຽນ ຫຼາຍ​ປະ​ເທດ ເປັນ​ຕົ້ນ​ວຽດ​ນາມ, ໄທ​ຍ, ສິງ​ກະ​ໂປຣ໌ ແລະ ມາ​ເລ​ເຊັຽ ກໍ​ເປີດ​ປະ​ເທດ​ ຢ່າງ​ເປັນ​ທາງ​ການ​ໃນ​ບໍ່​ດົນ​ນີ້ ເຖິງວ່າ ອັດ​ຕ​ຣາ​ການ​ຕິດ​ເຊື້ອ ​ໂຄວິດ-19 ຍັງ​ບໍ່​ຫຼຸດ​ລົງ​ກໍ​ຕາມ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.