ຊາວບ້ານເດືອດຮ້ອນ ກິ່ນເໝັນ ຈາກໂຮງງານຜລິດແປ້ງມັນຕົ້ນ

ປັດຈຸບັນ ຊາວບ້ານ ຢູ່ເມືອງໄຊບູລີ ແຂວງສວັນນະເຂດ ແລະ ເມືອງເຊບັ້ງໄຟ ແຂວງຄໍາມ່ວນ ຫຼາຍຮ້ອຍຄອບຄົວ ຍິ່ງໄດ້ຮັບຜົລກະທົບຢ່າງໜັກໜ່ວງ ຈາກກິ່ນເໝັນເນົ່າ, ຄວັນແປ້ງ-ຄວັນໄຟ ແລະ ສຽງດັງ ຈາກໂຮງງານຜລິດແປ້ງມັນຕົ້ນ ຂອງບໍຣິສັດ ລາວ ທີທີແອວ (Lao TTL) ພັທນາຄົບວົງຈອນ ຈໍາກັດ ຂອງນັກລົງທຶນວຽດນາມ ຕັ້ງຢູ່ບ້ານມະນີລາດ ເມືອງໄຊບູລີ ແຂວງສວັນເຂດ ຊຶ່ງໄດ້ເຣີ່ມການຜລິດ ມາແຕ່ວັນທີ 20 ເດືອນພຶສຈິກາ ປີ 2023.

ເມື່ອວັນທີ 10 ເດືອນ ມົກກະຣາ ປີ 2024 ທາງເຈົ້າໜ້າທີ່ ພາກສ່ວນກ່ຽວຂ້ອງ ເມືອງໄຊບູລີ ແຂວງສວັນນະເຂດ ໄດ້ສັ່ງໃຫ້ບໍຣິສັດດັ່ງກ່າວ ແກ້ໄຂບັນຫາກິ່ນເໝັນເນົ່ານັ້ນແລ້ວ ແຕ່ກິ່ນເໝັນໜັກຂຶ້ນກວ່າເກົ່າ. ອີງຕາມຄວາມເວົ້າ ຂອງຊາວບ້ານ ໃນບ້ານມະນີລາດ ຜູ້ນຶ່ງ ທີ່ຮູ້ກ່ຽວກັບເຣື່ອງນີ້ ເລົ່າໃຫ້ວິທຍຸເອເຊັຽເສຣີຟັງ ໃນວັນທີ 11 ກຸມພາ 2024 ນີ້ວ່າ:

“ແຫ່ງໜັກກວ່າເກົ່າ 2-3 ມື້ມານີ້ແຫ່ງພິລຶກ ບໍ່ໄດ້ເຊົາເລີຍ ຕັ້ງແຕ່ຜລິດມາ ກະບໍ່ໄດ້ເຊົາເໝັນມາເລີຍ ເໝັນນັ້ນໜັກໜ້າເຕັກໆ ບໍ່ມີຄໍາວ່າ ຜ່ອນຄາຍເລີຍ ທັມມະດາຄັນວ່າ ປັບປຸງ ມັນຕ້ອງດີຂຶ້ນ ອັນນີ້ ມັນພັດເໝັນໄປໜ້າເຕັກໆ ຄືເຮົາ ຄືປະຊາຊົນທົ່ວໄປບໍ ມັນກະຈໍາເປັນຢູ່ເນາະ ເຮືອນຢູ່ ທີ່ທໍາມາຫາກິນຢູ່ນີ້ ຈັກຊິໃຫ້ໄປໃສ.”

ຊາວບ້ານຜູ້ນີ້ ເວົ້າອີກວ່າ ຢູ່ແຂວງສວັນເຂດ ແລະ ແຂວງຄໍາມ່ວນ ຮວມແລ້ວ ກໍຫຼາຍຮ້ອຍຄອບຄົວ ທີ່ໄດ້ຮັບຜົລກທົບຍ້ອນກິ່ນເໝັນ ແລະ ຄວັນ ຈາກໂຮງງານດັ່ງກ່າວ ເປັນຕົ້ນ ບ້ານດ້າງທ່າ, ບ້ານໜອງບອນ, ບ້ານຂົວເຊບັ້ງໄຟ (ຂຶ້ນກັບເມືອງເຊບັ້ງໄຟ ແຂວງຄໍາມ່ວນ), ບ້ານມະນີລາດ, ບ້ານນາທອງ, ບ້ານຄໍາສະຫວາງ, ບ້ານປ່າໄລ່ ແລະຄ້າຍທະຫານ ຈໍ 401 (ຂຶ້ນກັບເມືອງໄຊບູລີ ແຂວງສວັນນະເຂດ):

“ສະເພາະໃນບ້ານນີ້ ມັນກະຕົກຢູ່ 200-300 ຫຼັງຄາແລ້ວ ທີ່ຮັບຜົລກະທົບ ທີ່ວ່າ ຄວາມເໝັນມັນກະຈາຍໃສ່ແຮງຫັ້ນນ່າ ລະກະ ບ້ານອ້ອມຂ້າງ ກະຄືບ້ານໄກ້ ມັນຈະເປັນເມືອງເຊບັ້ງໄຟ ແຂວງຄໍາມ່ວນເນາະ ກະຄົນລະຟາກເຊ ກະສໍ່າໆຢູ່ບ້ານດຽວກັນຫັ້ນລະ. ໄລຍະທາງມັນກະ ແຕ່ວ່າຕ່າງເມືອງ ຕ່າງແຂວງຊື່ໆ ມັນກະຕັ້ງຢູ່ໂຮງງານເນາະ ກະຄົນລະຟາກເຊ ນໍ້າເຊບັ້ງໄຟ ກະກວ້າງກະປະມານ 200-300 (ແມັດ) ນີ້ແຫຼະ ກະຖືວ່າ ກິ່ນແຮງຄືກັນຫັ້ນນ່າ ແຕ່ວ່າບ້ານນັ້ນ ຂະເຈົ້າກະເປັນໂຕເມືອງເນາະ ຕົກຢູ່ 300-400 ຫຼັງຄາແລ້ວ ບ້ານຂະເຈົ້າກະດາຍ. ບ້ານຂະເຈົ້າກະ ລະກະບ້ານອື່ນໆ ແຕ່ວ່າ ມັນຫາກບໍ່ເໝັນແຮງປານໃດ ບ້ານອ້ອມຂ້າງນີ້ແຫຼະ ບ້ານອື່ນໆ ບ້ານດ້າງສວັນບໍ່, ບ້ານດ້າງທ່າ, ບ້ານໜອງບອນ, ບ້ານຄໍາສະຫວາງ ຈັ່ງຊີ້ ຄຸ້ມນາທອງ ເໝັນແຮງຢູ່ບ້ານໃກ້ ລະດັບ 3 ຫຼັກກິໂລ ຖືວ່າເໝັນແຫຼະ 3-4 ຫຼັກກິໂລ ຖືວ່າ ຍັງເໝັນຢູ່.”

ບັນຫາ ທີ່ຊາວບ້ານ ປະສົບຢູ່່ໃນເວລານີ້ ກໍແມ່ນກິ່ນເໝັນ ຈົນແສບດັງ ແສບຄໍ ຫາຍໃຈຝືດ ແລະ ຄວັນ ເຮັດໃຫ້ແສບຕາ.

ດັ່ງຊາວບ້ານຜູ້ດຽວກັນນີ້ ເວົ້າອີກວ່າ:

“ນຶ່ງກະແມ່ນ ບັນຫາເຣື່ອງກິ່ນ ກິ່ນນີ້ຖືວ່າຮຸນແຮງຫັ້ນແຫຼະ ລະກະໂຕທີ 2 ກະແມ່ນເວົ້າເຣື່ອງຄວັນເນາະ ຄວັນມັນຈະມີສອງຄວັນ ກະຄືຄວັນແປ້ງ ສາມກະແມ່ນ ຄວັນໄຟທີ່ຂະເຈົ້າອົບອັນນັ້ນແຫຼະ ເພາະເຂົາເຈົ້າໃຊ້ຟືນຫຼາຍ. ກາງຄືນມາ ເຂົາເຈົ້າອົບແປ້ງອົບຫຍັງ ມັນຄວັນແສບຫູແສບຕາ ຄືເຮົາເຜົາຖ່ານນີ້ແຫຼະ ລະກະສຽງ ກາງຄືນເຂົາໃຊ້ສຽງໜັກ. ອາດໃຊ້ກົລຈັກຫຼາຍຂຶ້ນບໍ່ ອາຈມີການອົບນໍາເບາະ ໃຊ້ເຄື່ອງອົບນໍາບໍ່ຈັກ ກາງເວັນນີ້ ມັນຊິບໍ່ດັງແຮງປານໃດ ກາງຄືນ ນຶ່ງມັນອາກາດມັນກະສະງັກແດ່ເນາະ ແລະກະສຽງດັງ ຄືຢູ່ສນາມບິນນີ້ແຫຼະ ດັງອື້ໆ ເບິດຄືນ ຜູ້ຢູ່ໃກ້ກະຊີບໍ່ຢາກໄຫວພຸ້ນແຫຼະ ດຽວນີ້ ກະຊໍ່າກັບເກີດໂຣກຣະບາດແຫຼະ ເພາະວ່າຫຼາຍໆຄົນກະກວດ ກະຖືວ່າເປັນໂຣກ ທາງເດີນຫາຍໃຈຫຼາຍລະ.”

ຂະນະທີ່ ຄຣູບາ ບາງອົງ ຢູ່ວັດໃກ້ຄຽງ ໂຮງງານຜລິດແປ້ງມັນຕົ້ນ ດັ່ງກ່າວ ກໍມີການຫູອື້ ຈົນຕ້ອງໄດ້ໄປໂຮງໝໍ ແລະກໍໄດ້ຮັບການຢັ້ງຢືນ ຈາກທ່ານໝໍ ວ່າເປັນ ຫູອັກເສບ ລະຫວ່າງ ແຍກກ້ອງຫູກັບດັງ.

ດັ່ງຄຣູບາ ອົງນີ້ ເວົ້າໃຫ້ວິທຍຸເອເຊັຽເສຣີ ເມື່ອວັນທີ 9 ກຸມພາ 2024 ວ່າ:

“ຖາມວ່າ ກິ່ນເໝັນກະທົບ ມັນກະທົບທັງ 2 ແຂວງ ທັງແຂວງຄໍາມ່ວນ ທັງແຂວງສວັນນະເຂດ ລະຜົລກະທົບ ຂອງຄຣູບາ ລະມີແຕ່ມື້ວານນີ້ ຄຣູບາ ລົງໄປກວດ ເພາະວ່າ ຄຣູບາຫູອື້ ກັບເຈັບດັງ ກະເລີຍໄປກວດ ລະເຂົາເລີຍວ່າ ມັນຖືກກິ່ນມໍລພິດ ໝໍຢູ່ແຂວງ ຖາມຄຣູບາວ່າ ຢູ່ໄກ້ບ່ອນເຂົາເຜົາຖ່ານບໍ່ ຄຣູບາ ກະເລີຍອະທິບາຍວ່າ ພວກເຜົາຖ່ານລະບໍ່ມີ ແຕ່ວ່າ ຄັນວ່າສູດຄວັນມົລພິດລະຢ້ານແມ່ນກິ່ນເໝັນ ກິ່ນເໝັນຈາກໂຮງງານແປ້ງ ຄຣູບາກະເວົ້າ ຕາມຄວາມຈິງ ທີ່ຄຣູບາໄປຫາໝໍມາ ລະທ່ານ ດຣ ເພິ່ນວ່າ ຫູຍາຄຣູ ລະບໍ່ເປັນຫຍັງ ລະເພິ່ນສ່ອງດັງ ເອົາກ້ອງສ່ອງຮູດັງ ໃຊ້ກ່ອງສ່ອງດັງ ເພິ່ນເລີຍວ່າ ມັນອັກເສບເດີ້ຍາ ລະວັງແຍກແກ້ວຫູ ກັບແຍກດັງ ມັນອັກເສບອັດຢູ່ຫັ້ນ ລະຫູຍາຄຣູ ລະບໍ່ໄດ້ຍິນ.”

ຄຣູບາ ອົງນີ້ ຍັງເວົ້າໃຫ້ຟັງຕື່ມ ພາຍຫຼັງທີ່ ໄປກວດນໍາທ່ານໝໍມາ ທ່ານໝໍ ກໍແນະນໍາດັ່ງນີ້:

“ທ່ານໝໍ ທີ່ໄປຫາໝໍມາ ກະມີແຕ່ວ່າ ໃຊ້ຄຣູບາ ງົດໃຊ້ສຽງ ນຶ່ງອາທິດ ແລ້ວກະໃຫ້ໃສ່ຜ້າປິດປາກ ລະກະເພິ່ນໃຫ້ຢາ ມາກິນຊົ່ວຄາວເບື້ອງຕົ້ນ ເບິ່ງກ່ອນ ຄັນອາການບໍ່ດີ ເພິ່ນໃຫ້ກວດຊໍ້າ.”

ໃນຂະນະດຽວກັນ ຊາວບ້ານ ຢູ່ບ້ານມະນີລາດ ອີກຄົນນຶ່ງ ທີ່ບໍ່ປະສົງອອກຊື່ ແລະສຽງ ກໍກ່າວ ຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ໂຮງງານຜລິດແປ້ງມັນຕົ້ນດັ່ງກ່າວນີ້ ແມ່ນໄດ້ເຣີ່ມເຮັດຜລິດ ທ້າຍເດືອນ 11 ປີ 2023 ມາຮອດດຽວນີ້ ກະຊິໄດ້ຮອດ ປະມານ 3-4 ເດືອນນີ້ແຫຼະ ກະຍັງເໝັນຂນາດນີ້ແລ້ວ ຄັນສົມມຸດຕໍ່ໄປທາງໜ້າ ແຮງຊິໜັກກວ່ານີ້ ອັນນີ້ ມັນເຣີ່ມຕົ້ນໃດ໋ ແຕ່ບໍ່ແມ່ນເຮົາຢາກຕໍ່ຕ້ານ ໄດ້ບໍຣິສັດ ໄດ້ໂຮງງານມາຕັ້ງຢູ່ ມັນກະດີ ເພາະວ່າ ໄດ້ຊ່ອຍຊາວກະເສດຕະກອນ ຂອງພີ່ນ້ອງຊາວລາວເຮົາ ປູກມັນຕົ້ນ ກະໄດ້ຂາຍ ໄດ້ລາຄາດີ, ລູກຫຼານ ກະມີວຽກເຮັດງານທໍາ ຖ້າມັນບໍ່ມີຜົລກະທົບ ແຕ່ພໍມັນມີຜົລກະທົບມາແບບນີ້ ເຮົາກະຕັນຕຶກເລີຍ ບໍ່ຊ່າງຊິວ່າ.”

ສໍາລັບຊາວບ້ານ ຢູ່ບ້ານຂົວເຊບັ້ງໄຟ ເມືອງເຊບັ້ງໄຊ ແຂວງຄໍາມ່ວນ ທີ່ໄດ້ຮັບກະທົບ ກິ່ນເໝັນເນົ່າ, ຄວັນ ແລະສຽງດັງ ຈາກໂຮງງານຜລິດແປ້ງມັນຕົ້ນ ລາວ ທີທີແອວ (Lao TTL) ເຊັ່ນດຽວກັນ ກໍເວົ້າໃຫ້ວິທຍຸເອເຊັຽເສຣີຟັງ ໃນມື້ດຽວກັນນີ້ວ່າ:

“ເໝັນແຮງເລີຍ ປະມານ 10 ໂມງນີ້ ແຮງໄດ້ກິ່ນຄັກ ຣົຖບໍ່ມີຫຼາຍ 10 ໂມງກາງຄືນເອື້ອຍ ຄົນແຖວໃກ້ນີ້ ແບບຮ້ານອາຫານ ຮ້ານເບັຍແຖວນັ້ນ ເຂົາຈົນຢູ່ບໍ່ໄດ້ແຫຼະ.”

ຊາວບ້ານຂົວເຊບັ້ງໄຟ ເມືອງເຊບັງໄຟ ແຂວງຄໍາມ່ວນ ຜູ້ທີ່ສອງ ກໍເວົ້າກ່ຽວກັບຜົລກະທົບ ຈາກສຽງດັງ ແລະກິ່ນເໝັນ ນັ້ນວ່າ:

“ຫຼັກໆສ່ວນຫຼາຍ ກະ ສຽງດັງ ກັບກິ່ນເໝັນ ຖ້າກິ່ນເໝັນນີ້ ເຮືອນນ້ອງນີ້ ກະຢູ່ໄກຢູ່ ຢູ່ປະມານ ກິໂລນຶ່ງ ຫ່າງຈາກໂຮງງານຫັ້ນນ່າ ກະປະມານ ເຣີ່ມ 6 ໂມງ (ແລງ) ນີ້ ມັນກະຊິເຣີ່ມເໝັນມາລະ.”

ກ່ຽວກັບເຣື່ອງກິ່ນເໝັນເນົ່າ ແລະບັນຫາຕ່າງໆ ທີ່ເກີດຂຶ້ນນີ້ ທາງອໍານາດການປົກຄອງບ້ານ ແລະພາກສ່ວນທີ່ກ່ຽວຂ້ອງ ກໍຮັບຮູ້ແລ້ວ ແຕ່ກໍຍັງມິດງຽບ ບໍ່ມີຫຍັງຄືບໜ້າເທື່ອ, ດັ່ງຊາວບ້ານຜູ້ດຽວກັນນີ້ ເວົ້າອີກວ່າ:

“ຕາມທີ່ຮູ້ກະແຈ້ງຢູ່ ແຕ່ອັນນີ້ ກະບໍ່ຮູ້ວ່າ ເພິ່ນກວດສອບໄປຮອດໃສແລ້ວ ເພາະວ່າ ມັນກະຍັງບໍ່ມີການເຄື່ອນໄຫວແນວໃດ ລະມັນກະຍັງເໝັນ ຢູ່ຄືເກົ່າຫັ້ນນ່າ ເພາະວ່າຕາມທີ່ສເນີໄປ ກະບ້ານເມືອງ ຮູ້ຢູ່ແລ້ວ ທີ່ສເນີໄປ.”

ຊາວບ້ານ ໃນເມືອງເຊບັ້ງໄຟ ຄົນທີ່ 3 ທີ່ໄດ້ຮັບກະຜົລຄືກັນນັ້ນ ກໍເວົ້າວ່າ:

“ມັນກະສຽງດັງ ສຽງດັງນີ້ກະບໍ່ເປັນຫຍັງ ກິ່ນເໝັນນີ້ ມັນເໝັນແຮງ ຕອນຫົວຄໍ່າ ປະມານ 7-8 ໂມງຂຶ້ນໄປ ລະແມ່ນເໝັນເລີຍ.”

ຊາວບ້ານຜູ້ນີ້ ຍັງຮຽກຮ້ອງ ຂໍໃຫ້ພາກສ່ວນທີ່ກ່ຽວຂ້ອງ ແກ້ໄຂບັນຫາດັ່ງກ່າວ ນີ້ວ່າ:

“ມັນບໍ່ຮູ້ແນວຊິເວົ້ານ່າ ຖ້າຊິໃຫ້ປິດໂຮງງານ ມັນກະຄືເປັນໄປໄດ້ ເພາະວ່າ ຂະເຈົ້າກະລົງທຶນອີ່ຫຍັງໃສ່ຫຼາຍຫັ້ນນ່າ ມີແຕ່ໃຫ້ປັບປຸງຫັ້ນແຫຼະ ແກ້ໄຂຫັ້ນແຫຼະ ຊິໃຫ້ສ້າງບໍ່ລະບາຍນໍ້າ ເກັບກິ່ນ ແບບບໍ່ໃຫ້ມີກິ່ນອອກມາ ອອກສັງຄົມບໍ ຫຼືວ່າ ເຮັດຈັ່ງໃດກະໄດ້ບໍ່ໃຫ້ມັນກິ່ນ ກັບສຽງດັງຫຼາຍຫັ້ນນ່າ ເພາະວ່າ ເພາະກາງຄືນມາແລ້ວ ມັນມີສຽງດັງ ລະກະມົລພິດຄວັນ.”

ນອກຈາກຊາວບ້ານທົ່ວໄປ ພາກັນໄດ້ຮັບຜົລກະທົບ ຈາກກິ່ນເໝັນເນົ່າ ສຽງດັງ ແລະຄວັນດັ່ງກ່າວ ນັ້ນແລ້ວ ຮ້ານອາຫານ ທີ່ຢູ່ແຄມນໍ້າເຊບັ້ງໄຟ ກໍໄດ້ຮັບຜົລກະທົບເຊັ່ນກັນ, ດັ່ງເຈົ້າຂອງຮ້ານ ອາຫານແຫ່ງນີ້ ກ່າວຕໍ່ວິທຍຸເອເຊັຽເສຣີ ໃນວັນມື້ດຽວກັນນີ້ວ່າ:

“ຂ້ອຍລະເປັນເຈົ້າຂອງຮ້ານອາຫານເນາະ ຂ້ອຍກະຢາກໃຫ້ປັບປຸງ ເພາະວ່າ ມັນເໝັນແຮງອີ່ຫລີ ແບບລູກຄ້າມານັ່ງກິນ ອິຫຍັງກະບາງເທື່ອຫັ້ນ. ເຂົາກະຈົນເຂົາຈົນນັ່ງບໍ່ໄດ້ ຢູ່ຄົນລະຟາກເລີຍ ແຕ່ເໝັນແຮງ ຄົນລະບ້ານ ຄົນລະຟາກຂົວເລີຍ ແຕ່ມັນເໝັນແຮງ ແມ່ນແຕ່ກີ້ຫັ້ນ ມີລູກຄ້າຍຫຼາຍ ຈາກທີ່ວ່າ ສົມມຸດວ່າ ລູກຄ້າເຕັມຮ້ານເນາະ. ດຽວນີ້ຫັ້ນ ລູກຄ້າບາງເທື່ອ 2-3 ໂຕະ ແບບຫຼຸດລົງຫຼາຍຫັ້ນນ່າ ບາງເທື່ອຂະເຈົ້ານັ່ງກິນຢູ່ກະ ມັນເໝັນ ຂະເຈົ້າກະກິນບໍ່ໄດ້້ເນາະ ເຂົາກະຕ້ອງໄດ້ເຊັກບິນ ຕ້ອງໄດ້ກັບ.”

ຕໍ່ກັບຜົລກະທົບ ຈາກກິ່ນເໝັນ ຂອງໂຮງງານມັນຕົ້ນ ທີ່ວ່ານັ້ນ ຜູ້ໄດ້ຮັບຜົລກະທົບໜັກ ແມ່ນຊາວບ້ານ ທາງເມືອງເຊບັ້ງໄຟ ແຂວງຄໍາມ່ວນ, ດັ່ງເຈົ້າໜ້າທີ່ຂັ້ນທ້ອງຖິ່ນ ໃນເມືອງໄຊບູລີ ແຂວງສວັນນະເຂດ ທ່ານນຶ່ງ ກ່າວຕໍ່ວິຍຸເອເຊັຽເສຣີ ໃນວັນທີ 10 ກຸມພາ ນີ້ວ່າ:

“ມັນກະເໝັນ ຄືເວົ້າຫັ້ນແຫຼະເນາະ ກະເໝັນຢູ່ ໂຮງງານຍັງບໍ່ແລ້ວເນາະ ກະຜລິດເລີຍວ່າຊັ້ນສ່າ ກະເຮັດໄປນໍາ ເອີ່ກະແມ່ນແຫຼະ. ມັນເໝັນໃດ໋ ດຽວນີ້ຍາມນອນ ລົມພັດນີ້ ມັນເໝັນແຫຼະ ທາງເມືອງໄຊບັ້ງໄຟພຸ້ນແຫຼະ ມັນໜັກ ເພາະມັນໄປທາງພຸ້ນເດ້ ສ່ວນໜັກກະ ເມືອງເຊບັ້ງໄຟພຸ້ນແຫຼະ. ມັນຕໍາພຸ້ນເບິດ ລົມອຸ້ມເຂົ້າໄປພຸ້ນ ຄົນຢາກນອນກະບໍ່ຢາກໄດ້ ວ່າຊັ້ນ 2-3 ມື້ມານີ້ນ່າ ກັບວັດບໍ ມັນອັນນັ້ນນ່າ ວັດມີບັນຫາ ວັດມັນໄກ້ເດ້ ວັດມະນີລາດ ວັດເມືອງໄຊບູລີ ແຂວງສວັນ.”

ໃນຂະນະດຽວກັນ ເຈົ້າໜ້າທີ່ຂັ້ນທ້ອງຖິ່ນ ໃນເມືອງໄຊບູລີ ແຂວງສວັນນະເຂດ ອີກທ່ານນຶ່ງ ກ່າວເຖິງສະພາບ ຂອງອ່າງບໍາບັດນໍ້າເສັຍ ໃນໂຮງງານດັ່ງກ່າວ ນັ້ນວ່າ:

“ເພິ່ນກໍາລັງປັບປຸງຢູ່ດຽວນີ້ນ່າ ເຈົ້າຂອງເພິ່ນ ຍັງຊິປົກຢູ່ ໜອງທີ 3 ຫັ້ນນ່າ. ລະກິ່ນ ມັນຊິລົດລົງເພິ່ນເວົ້າ ທາງບໍຣິສັດເພິ່ນ ໂຕເຊ ເພິ່ນຊິບໍ່ໄດ້ປ່ອຍຫັ້ນແຫຼະດຽວນີ້ ເພາະວ່າທາງເມືອງ ເພິ່ນກະໄດ້ລົງໄປຕິດຕາມຢູ່ ລົງໄປ ແຕ່ປະກົດວ່າ ມີແຕ່ເພິ່ນຂຸດຄອງ ຂຸດຄອງລົງໄປຫັ້ນ. ເພິ່ນກະໃຫ້ຖົມ ເພິ່ນກະຖົມແລ້ວດຽວນີ້ ເພິ່ນກະຖົມແລ້ວດອກດຽວນີ້ຫາກ ມື້ນັ້ນ ກ່ອນຊິ (ນໍ້າເສຍ) ໄຫຼລົງເຊຫັ້ນ ໃດເພິ່ນຕາຍເນາະ ດູດສົ່ງລົງໄປໃສ່ທໍ່ ໜອງທີ 2 ໜອງບໍາບັດຫັ້ນນ່າ. ມັນໂຫຼດຕາຍໃດ ໂຕນີ້ມັນຍູ້ໜູນພັດລົ້ມຄອງ ເລີຍໄຫຼລົງກາຍລົງໄປເຊເລີຍ ເພິ່ນກະປັບປຸງໃໝ່ດຽວນີ້.”

ທ່ານຍັງກ່າວຕືີ່ມອີກ ເຖິງມາຕຖານ ຂອງການສ້າງອ່າງບໍາບັດນໍ້າເສັຍ ຂອງໂຮງງານຜລິດແປ້ງມັນຕົ້ນດັ່ງກ່າວ ວ່າ:

“ເອີ່! ໄດ້ກະ ບໍ່ໄດ້ (ມາຕຖານ) ປານໃດແຫຼະ ມັນຢາກຊຶມຢາກຫຍັງ ເພາະວ່າ ຄັນຄູມັນ ມີຫິນເນາະ ມັນມີຫິນ ລະມັນກະໂຄ່ງ ທາງພື້ນຫັ້ນນ່າເນາະ ເວລານໍ້າເຂົ້າ ມັນກະຊຶມອອກນອກ ຕາມຂ້າງຫັ້ນນ່າ ມັນກະມີຊຶມ ໂຕນັ້ນ ກະມີສ່ວນກິ່ນຢູ່ ຄັນເຂົາປົກຄຸມ ເບິດແລ້ວຫັ້ນນ່າ.”

ກ່ຽວກັບເຣື່ອງນີ້ ວິທຍຸ ເອເຊັຽເສຣີ ໄດ້ຕິດຕໍ່ໄປຍັງ ບໍຣິສັດຜລິດແປ້ງມັນຕົ້ນ LAO TTL ໃນວັນທີ 12 ກຸມພາ 2024 ແລະກໍໄດ້ຮັບຄໍາອະທິບາຍ ວ່າ:

“ອັນຕອນນີ້ໂຮງງານຫັ້ນນ່າ ອັນ ທາງສິ່ງແວດລ້ອມ ເພິ່ນກະໄດ້ລົງມາກວດກາເນາະ. ເພິ່ນກະ ແນະນໍາຕື່ມ ໃນການໃຫ້ປົກອ່າງຫັ້ນນ່າ. ທາງໂຮງງານຫັ້ນນ່າ ທາງໂຮງງານແມ່ນກໍາລັງດໍາເນີນການແລ້ວອ່າງທີ່ 3 ແລ້ວຫັ້ນນ່າ ກິ່ນຕອນນີ້ ກະແມ່ນລົດລົງແລ້ວ. ໂຮງງານນີ້ ຫາກະເປີດປີທໍາອິດຫັ້ນນ່າ ມັນກະຍັງບໍ່ໄດ້ເຂົ້າທີ່ເຂົ້າທາງປານໃດ. ແຕ່ທາງຊຸມເຮົາກະ ບໍ່ໄດ້ນີ້ງນອນໃຈດອກ ກໍາລັງແກ້ໄຂຫັ້ນນ່າ ເລັ່ງແກ້ໄຂຢູ່ ໜ້າຈະສໍາເຣັດພາຍໃນເດືອນກຸມພານີ້ແຫຼະ.”

ທ່ານຍັງອະທິບາຍ ເຖິງກໍຣະນີ ທີ່ຊາວບ້ານເຫັນ ມີການປ່ອຍນໍ້າເສັຍລົງແມ່ນໍ້າທັມມະຊາຕ ແລະເຫັນຄວັນສີຂາວ ທີ່ປົກຄຸມຢູ່ໂຮງງານ ນັ້ນວ່າ:

“ໂຮງງານຫັ້ນນ່າ ອັນທາງສິ່ງຂອງເຮົາ ມັນບໍ່ມີທໍ່ລະບາຍຄວັນເສັຍ ທໍ່ທີ່ປະຊາຊົນເຫັນມັນເປັນສູງໆຫັ້ນນ່າ ມັນເປັນທໍ່ສົ່ງແປ້ງຂອງເຮົາ ຈາກລະບົບແປ້ງປຽກ ໄປອ່າງແຫ້ງຫັ້ນນ່າ ແຫຼະທໍ່ຫັ້ນມັນຮົ່ວ ລະມັນເຮັດໃຫ້ແປ້ງຜິ່ວອອກມາ ແລະຂະເຈົ້າຊິເຂົ້າໃຈວ່າ ມັນເປັນຄວັນເສັຍຫັ້ນນ່າ ມັນບໍ່ແມ່ນ ອັນນັ້ນມັນເປັນແປ້ງ ຝຸ່ນແປ້ງ ລະບົບການບໍາບັດ ແມ່ນເຮົາມີອ່າງຮອງຮັບ ເຮົາມີອ່າງນໍ້າຮອງຮັບ ລະເຮົາຊິບໍາບັດຢູ່ອ່າງເຮົາ ລະກະມັນບໍາບັດແລ້ວ ເຮົາກະສາມາດປ່ອຍອອກ ຕາມຄໍາແນະນໍາຂອງສິ່ງແວດລ້ອມເລີຍ ມັນຄວາມເຂົ້າໃຈຜິດຂອງປະຊາຊົນເນາະ ເພິ່ນບໍ່ເຂົ້າໃຈຫັ້ນນ່າ.”

ສ່ວນທາງຝ່າຍເຈົ້າໜ້າທີ່ ຫ້ອງການຊັພຍາກອນທັມມະຊາຕ ແລະສິ່ງແວດລ້ອມ ເມືອງໄຊບູລີ ແຂວງສວັນນະເຂດ ກ່າວຕໍ່ວິຍຸເອເຊັຽເສຣີ ໃນມື້ດຽວກັນນີ້ວ່າ:

“ໂອ້ ໂຕນີ້ກະ ມັນຍັງບໍ່ທັນໄດ້ ອັນນັ້ນຄືນເບິ່ງ ມັນບໍ່ທັນສາມາດໃຫ້ຂໍ້ມູນໄດ້ທ່ານ ເພາະວ່າເຮົາຍັງບໍ່ໄດ້ກວດຄືນ ຍັງບໍ່ໄດ້ໄປເຊັກຄືນ.”

ໂຮງງານຜລິດແປ້ງມັນຕົ້ນ ລາວ ທີທີແອວ ພັທນາ ຄົບວົງຈອນ ຈໍາກັດ ສ້າງຕັ້ງຂຶ້ນ ໃນປີ 2021 ທີ່ບ້ານມະນີລາດ ເມືອງໄຊບູລີ ແຂວງສວັນນະເຂດ ໄດ້ເຣີ່ມທົດລອງການຜລິດ ເມື່ອວັນທີ 20 ພຶສຈິກາ ປີ 2023 ທີ່ຜ່ານມານີ້ ແລະ ຍັງບໍ່ທັນສົມບູນແບບ ໃນການປົກປ້ອງສິ່ງແວດລ້ອມ ເຊິ່ງທາງການ ໄດ້ສັ່ງໃຫ້ແກ້ໄຂບັນຫາ ໃຫ້ສຳເຣັດ ພາຍໃນ 1 ເດືອນ.