ອອສເຕຣເລັຽ ເຕືອນພົລເມືອງ ລະວັງການເດີນທາງໄປ ສາມຫຼ່ຽມຄຳ

ສຸພັດຕາ
2022.11.17
Share on WhatsApp
Share on WhatsApp
ອອສເຕຣເລັຽ ເຕືອນພົລເມືອງ ລະວັງການເດີນທາງໄປ ສາມຫຼ່ຽມຄຳ ກາສິໂນ ຄິງສ໌ໂຣມັນສ໌ ໃນເຂດເສຖກິຈ ພິເສດ ສາມຫຼ່ຽມຄຳ.
RFA

ເມື່ອວັນທີ 16 ພຶສຈິກາ ທີ່ຜ່ານມານີ້ ເວັບໄຊຕ໌ Smartraveller.gov.au ທີ່ຂຶ້ນກັບກະຊວງການຕ່າງປະເທດ ຂອງປະເທດອອສເຕຣເລັຽ ໄດ້ແຈ້ງເຕືອນພົລເມືອງ ຊາວອອສເຕຣເລັຽ ໃຫ້ມີຄວາມລະມັດລະວັງ ຢ່າງສູງ ໃນການເດີນທາງໄປທ່ອງທ່ຽວ ຢູ່ແຂວງບໍ່ແກ້ວ ແລະພື້ນທີ່ເຂດເສຖກິຈ ພິເສດສາມຫຼ່ຽມຄໍາ ໂດຍໄດ້ຊີ້ແຈງຕື່ມວ່າ ເຂດດັ່ງກ່າວ ເປັນເຂດ ທີ່ມີທັງອາຊຍາກັມ, ຢາເສບຕິດ, ການຄ້າມະນຸສ ແລະ ການຕົວະໄປເຮັດວຽກ ແບບຜິດກົດໝາຍ.

ກ່ຽວກັບເຣື່ອງນີ້ ວິທຍຸ ເອເຊັຽເສຣີ ໄດ້ຕິດຕໍ່ໄປຍັງສະຖານທູຕ ອອສເຕຣເລັຽ ປະຈໍາປະເທດລາວ ເພື່ອສອບຖາມ ຣາຍລະອຽດເພີ່ມຕື່ມ ເຊິ່ງເຈົ້າໜ້າທີ່ລາວ ຜູ້ນຶ່ງທີ່ເຮັດວຽກ ພາຍໃນສະຖານທູຕ ດັ່ງກ່າວ ທີ່ຂໍສງວນຊື່ ແລະ ສຽງ ກ່າວວ່າ:

“ໃນເບື້ອງຕົ້ນ ທາງສະຖານທູຕ ອອສເຕຣເລັຽ ປະຈໍາປະເທດລາວ ກໍໄດ້ຮັບຊາບຂໍ້ມູນ ດັ່ງກ່າວ ຈາກເວັບໄຊຕ໌ ຂອງຣັຖບານອອສເຕຣເລັຽແລ້ວ ແລະໄດ້ມີການຕິດຕາມເຣື່ອງນີ້ ຢ່າງໃກ້ຊິດ ແຕ່ຍັງບໍ່ທັນໄດ້ອອກແຈ້ງການ ເຕືອນນັກທ່ອງທ່ຽວ ຊາວອອສເຕຣເລັຽ ຜ່ານທາງເວັບໄຊຕ໌ ຂອງສະຖານທູຕ ອອສເຕຣເລັຽ ປະຈໍາປະເທດລາວ ແຕ່ຢ່າງໃດເທື່ອ.”

ໃນຂະນະທີ່ ທາງການແຂວງບໍ່ແກ້ວເອງ ກໍຍັງບໍ່ສະແດງຄວາມກັງວົນ ຕໍ່ແຈ້ງການດັ່ງກ່າວເທື່ອ ແລະກໍບໍ່ມີແຈ້ງການເຕືອນ ນັກທ່ອງທ່ຽວຕ່າງປະເທດ ທີ່ເຂົ້າມາທ່ຽວພາຍໃນແຂວງແຕ່ຢ່າງໃດ ແລະກໍຢືນຢັນວ່າ ນັກທ່ອງທ່ຽວຕ່າງປະເທດ ຍັງສາມາດມາທ່ອງທ່ຽວ ພາຍໃນແຂວງບໍ່ແກ້ວ ໄດ້ຕາມປົກກະຕິຢູ່ ໂດຍມີເຈົ້າໜ້າທີ່ທີ່ກ່ຽວຂ້ອງ ຮັກສາຄວາມປອດພັຍ ຢູ່ຫຼາຍບ່ອນ.

ດັ່ງເຈົ້າໜ້າທີ່ ຜແນກຖແລງຂ່າວ ວັທນະທັມ ແລະທ່ອງທ່ຽວ ແຂວງບໍ່ແກ້ວ ກ່າວຕໍ່ວິທຍຸ ເອເຊັຽ ເສຣີ ໃນວັນທີ 17 ພຶສຈິກາ ນີ້ວ່າ:

“ໂອ ໂຕນີ້ ພວກເຮົາກໍມີ ເຈົ້າໜ້າທີ່ຮັບຜິດຊອບ ໝົດແລ້ວ ຖືວ່າເດີນທາງແມ່ນຫຍັງ ຂອງນັກທ່ອງທ່ຽວໄປຫັ້ນ ເພິ່ນກໍໃຫ້ຖືກຕ້ອງໝົດແລ້ວ ບໍ່ມີຫຍັງທີ່ວ່າ ໜ້າເປັນຫ່ວງແລ້ວເນາະ ເຂົ້າໄປເພິ່ນກະ ໄດ້ຮັບການປົກປ້ອງດູແລ ຖືກຕ້ອງຢູ່ແລ້ວ ບໍ່ເປັນຕາຢ້ານຫຍັງ.”

ທາງດ້ານຜູ້ປະກອບການ ດ້ານທຸຣະກິຈ ທ່ອງທ່ຽວ ຢູ່ແຂວງບໍ່ແກ້ວຫຼາຍຄົນ ກໍບໍ່ໄດ້ຮູ້ສຶກກັງວົນ ກ່ຽວກັບການແຈ້ງເຕືອນດັ່ງກ່າວ ແລະບໍ່ຄິດວ່າ ຈະເຮັດໃຫ້ນັກທ່ອງທ່ຽວ ຈາກປະເທດອອສເຕຣເລັຽ ຮູ້ສຶກຢ້ານ ຈົນບໍ່ກ້າທີ່ຈະເດີນທາງ ມາທ່ຽວແຂວງບໍ່ແກ້ວ ເຊິ່ງໃນໄລຍະນີ້ ນັກທ່ຽວຊາວອອສເຕຣເລັຽ ທີ່ເຂົ້າມາທ່ຽວແຂວງບໍ່ແກ້ວ ກໍມີຈໍານວນໜ້ອຍ ແລະນັກທ່ອງທ່ຽວຕ່າງປະເທດ ທີ່ເຂົ້າມານັ້ນ ກໍຍັງບໍ່ຄ່ອຍເດີນທາງເຂົ້າໄປ ໃນເຂດເສຖກິຈ ພິເສດສາມຫຼ່ຽມຄໍາ ເນື່ອງຈາກ ຈໍາເປັນຕ້ອງໄດ້ຜ່ານ ຂັ້ນຕອນຫຼາຍຢ່າງ ເຮັດໃຫ້ເກີດຄວາມບໍ່ສະດວກ.

ດັ່ງຜູ້ປະກອບການ ຣີສອດ ຢູ່ແຂວງບໍ່ແກ້ວ ນາງນຶ່ງກ່າວວ່າ:

“ບໍ່ມີຕ່າງປະເທດ ບໍ່ມີເລີຍ ເພາະວ່າພວກຕ່າງປະເທດນີ້ ຈະເຂົ້າໄປໃນເຂດສາມຫຼ່ຽມຄໍາ ຂນາດມື້ນັ້ນເຮົາພາທົວໄທຍ ຈະເຂົ້າໄປຍັງບໍ່ໄດ້ເລີຍ ມັນຈະຕ້ອງໄປມີຫຼາຍຂັ້ນຕອນ ແລ້ວຕ້ອງມີຜູ້ປະສານງານ ແລ້ວກະເຄັຽເສັ້ນທາງໃຫ້ເຂົ້າໄປ ແລ້ວຂອບເຂດບ່ອນໄປ ໄປບ່ອນໃດແດ່ ເປັນແບບນີ້ນ່າ.”

ສ່ວນຜູ້ປະກອບການ ດ້ານການທ່່ອງທ່ຽວ ຢູ່ແຂວງບໍ່ແກ້ວ ອີກນາງນຶ່ງ ກໍເຫັນວ່າ ການທ່ອງທ່ຽວ ຢູ່ແຫຼ່ງທ່ອງທ່ຽວຫຼາຍແຫ່ງຂອງແຂວງບໍ່ແກ້ວ ໃນປັດຈຸບັນນີ້ ກໍບໍ່ມີຫຍັງ ທີ່ຮູ້ສຶກໜ້າເປັນຫ່ວງເທື່ອ ແຕ່ສໍາລັບຜູ້ທີ່ເຂົ້າໄປທ່ອງທ່ຽວ ຢູ່ພາຍໃນເຂດເສຖກິຈພິເສດ ສາມຫຼ່ຽມຄໍາ ແລະ ພື້ນທີ່ບໍຣິເວນກາຊິໂນ ຄິງສ໌ໂຣມັນນັ້ນ ກໍຈໍາເປັນຕ້ອງໄດ້ລະວັງໂຕເອງຢູ່ ເຊິ່ງຍານາງ ກໍເຫັນນັກທ່ອງທ່ຽວຕ່າງປະເທດ ຈໍານວນນຶ່ງ ທີ່ບໍ່ຮູ້ວ່າມາຈາກປະເທດໃດ ຍັງເດີນທາງໄປເຂດດັ່ງກ່າວຢູ່ ແຕ່ບໍ່ຮູ້ຄັກແນ່ວ່າ ສາມາດເຂົ້າໄປທ່ອງທ່ຽວໄດ້ ຫຼືບໍ່ໄດ້.

ດັ່ງຍານາງກ່າວວ່າ:

“ບໍ່ມີອັນຕລາຍແລ້ວຕິ ແຕ່ຕ້ອງປ້ອງກັນໂຕເອງ ແຕ່ເຫັນແລ້ວກໍ ມີແຕ່ຄົນນຶ່ງ ຫຼືວ່າປະມານຄົນນຶ່ງ ຫາ 2 ຄົນນີ້ແຫຼະ ບາງຄົນເຂົາກໍລຸໄປແຕ່ກາສິໂນ ຫັ້ນແຫຼະ ເຫັນເຂົາຍ່າງໄປຍ່າງມາຢູ່.”

ທາງດ້ານຜູ້ປະກອບການ ບໍຣິສັດນໍາທ່ຽວ ຢູ່ແຂວງບໍ່ແກ້ວທ່ານນຶ່ງ ກ່າວວ່າ ສໍາລັບນັກທ່ອງທ່ຽວຕ່າງປະເທດ ທີ່ມີຄວາມປະສົງ ເຂົ້າໄປທ່ອງທ່ຽວ ຢູ່ເຂດເສຖກິຈພິເສດ ສາມຫຼ່ຽມຄໍາ ໃນໄລຍະນີ້ ຈະຕ້ອງໄດ້ຜ່ານຂັ້ນຫຼາຍຢ່າງ ແລະທີ່ສໍາຄັນຈະຕ້ອງມີບໍຣິສັດທ່ອງທ່ຽວ ເປັນຜູ້ພາໄປເທົ່ານັ້ນ ເພື່ອຮັບປະກັນຄວາມປອດພັຍ.

ດັ່ງທ່ານກ່າວວ່າ:

“ໄປສ່ວນໂຕບໍ່ໄດ້ ເພາະວ່າອັນນີ້ ແມ່ນເປັນເຂດບໍຣິສັດຈໍາກັດ ມານີ້ແລ້ວ ຈະມີຣົຖບໍຣິສັດນີ້ ໄປສົ່ງໂດຍຕຣົງ ຫຼືວ່າ ຖ້າເຮົາມີຣົຖທີ່ວ່າ ເຮົາສາມາດໄປໄດ້ ແຕ່ວ່າ ໄປຮອດຈຸດນັ້ນ ແມ່ນທາງບໍຣິສັດ ເປັນຜູ້ນໍາທາງເຈົ້າ.”

ແຕ່ເຖິງຢ່າງໃດກໍຕາມ ຊາວບ້ານທ່ານນຶ່ງ ທີ່ຢູ່ໃກ້ກັບເຂດເສຖກິຈພິເສດ ສາມຫຼ່ຽມຄໍາ ກໍຢືນຢັນວ່າ ເຂດດັ່ງກ່າວ ຍັງເປັນອັນຕລາຍ ຕໍ່ນັກທ່ອງທ່ຽວຕ່າງປະເທດຢູ່ ຄັນວ່າໄປທ່ຽວດ້ວຍໂຕເອງແບບລໍາພັງ ເຊິ່ງທ່ານເອງກໍເຫັນວ່າ ຢູ່ເຂດດັ່ງກ່າວ ຍັງມີເຫດການບາງຢ່າງ ທີ່ຍັງບໍ່ເປັນປົກກະຕິ ແລະ ເປັນອັນຕລາຍຕໍ່ຊາວຕ່າງປະເທດ.

ດັ່ງທ່ານກ່າວວ່າ:

“ເຈົ້າແມ່ນແຫຼະ ຕ້ອງໄດ້ຜ່ານ ບໍຣິສັດທ່ອງທ່ຽວ ເພາະວ່າຄົນລາວເຮົານີ້ ເຂົາເຂົ້າໄປແລ້ວ ກະອອກມາໄດ້ ແຕ່ຄົນຕ່າງປະເທດ ຄົນທີິ່ວ່າເປັນພະນັກງານຢູ່ຫັ້ນນີ້ ດຽວນີ້ຄືມື້ວານ ເຂົາມີເຫດການຫຍັງກະບໍ່ຮູ້ ແບບວ່າເຂົາເຈົ້າກະບໍ່ໄດ້ອອກມາ.”

ຢ່າງໃດກໍຕາມ ກ່ອນໜ້ານີ້ ສະຖານທູຕຂອງຫຼາຍປະເທດ ປະຈໍາປະເທດລາວ ເປັນຕົ້ນ ສະຫະຣັຖອາເມຣິກາ, ໄທຍ, ມາເລເຊັຽ, ອິນເດັຽ ແລະ ອື່ນໆ ກໍໄດ້ອອກແຈ້ງເຕືອນ ພົລເມືອງປະເທດ ຂອງພວກເຂົາເຈົ້າ ໃຫ້ລະມັດລະວັງ ການຖືກຕົວະໄປເຮັດວຽກ ແບບຜິດກົດໝາຍ ຢູ່ພາຍໃນເຂດເສຖກິຈ ພິເສດສາມຫຼ່ຽມຄໍາ ພາຍຫຼັງຮູ້ຂໍ້ມູນວ່າ ພົລເມືອງຈາກຫຼາຍປະເທດຈໍານວນຫຼາຍຄົນ ຖືກຕົວະໃຫ້ໄປເຮັດວຽກເປັນສະແກມເມີ້ (Scammer) ຫຼືຂບວນການຕົວະເອົາເງິນຜູ້ອື່ນ ຜ່ານທາງລະບົບອອນລາຍນ໌ ເຊິ່ງຈໍານວນນຶ່ງ ກໍສາມາດໂຕນໜີອອກມາໄດ້ ແລະ ອີກຫຼາຍຄົນ ກໍຍັງລໍຖ້າການຊ່ອຍເຫຼືອຢູ່.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.