ເຈົ້າໜ້າທີ່ ຄວນປາບປາມ ບັນຫາຄ້າກາມ ຈິງຈັງ

ສຸພັດຕາ
2021-11-08
Share
ເຈົ້າໜ້າທີ່ ຄວນປາບປາມ ບັນຫາຄ້າກາມ ຈິງຈັງ ກາຊິໂນຄິງໂຣມັນ ເມືອງຕົ້ນເມືອງ ແຂວງບໍ່ແກ້ວ ເດືອນ ພຶສຈິກາ 2021
RFA

ຊາວລາວ ຢາກໃຫ້ພາກສ່ວນທີ່ກ່ຽວຂ້ອງ ດໍາເນີນການກັບຜູ້ທີ່ປະກາດຕາມສື່ອອນລາຍນ໌ ເພື່ອຮັບສມັກເອົາແມ່ຍິງລາວ ຫຼືຊັກຊວນຕົວະຍົວະເອົາເດັກນ້ອຍແມ່ຍິງ ອາຍຸຕໍ່າກວ່າ 18 ປີ ໄປຂາຍປະເວນີ ໂດຍສະເພາະ ຢູ່ກາສິໂນ ຄິງໂຣມັນ Kings Romans Casino) ເມືອງຕົ້ນເຜິ້ງ ແຂວງບໍ່ແກ້ວ ເນື່ອງຈາກການຄ້າປະເວນີ ເປັນເລື່ອງຜິດກົດໝາຍ ແຕ່ກໍຍັງມີການຮັບສມັກແບບນີ້ຢູ່, ດັ່ງຊາວລາວ ຢູ່ນະຄອນຫຼວງວຽງຈັນ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ 8 ພຶສຈິກາ ນີ້ວ່າ:

“ໃນ ຕິກຕ໊ອກ ຫັ້ນແຫຼະ ໃນເຟສກໍເຫັນຢູ່ ເຫັນຢູ່ໃນຕິກຕ໊ອກຫັ້ນແຫຼະຫຼາຍ ເພິ່ນກໍບາງອັນ 18 ປີ 17 ປິ ກໍຜິດຢູ່ ແຕ່ປະກາດແນວນີ້.”

ຊາວລາວ ອີກທ່ານນຶ່ງ ຢູ່ແຂວງສວັນນະເຂດ ເວົ້າວ່າ ພາກສ່ວນທີ່ກ່ຽວຂ້ອງ ຄວນມີມາຕການຄວບຄຸມ ການນໍາໃຊ້ ສື່ສັງຄົມອອນລາຍນ໌ ເພື່ອຫຼີກລ້ຽງ ການເບື່ອເມົາຕໍ່ສັງຄົມ ແລະການໂຄສະນາຊວນເຊື່ອ ຈາກກຸ່ມຄົນບໍ່ດີ, ດັ່ງທ່ານກ່າວວ່າ:

“ໃຊ້ສື່ສັງຄົມຫຼາຍ ຕ້ອງມີມາຕການ ມາຕການກ່ຽວກັບການໂພສ ການແຊຣ໌ຕາມການກ່ຽວກັບ ການນໍາໃຊ້ສື່ອອນລາຍນີ້.”

ສະພາບໂຕຈິງ ຢູ່ແຂວງບໍ່ແກ້ວ ຄົນຢູ່ພື້ນທີ່ຈະຮູ້ດີ ວ່າການ ຄ້າ-ຂາຍ ປະເວນີພາຍໃນ ກາຊິໂນ ຄິງໂຣມັນ ນັ້ນເປັນທີ່ໂດ່ງດັງ ແຕ່ຄາດບໍ່ເຖິງວ່າ ຈະມີນາຍໜ້າ ຊອກຫາແມ່ຍິງລາວ ໄປຄ້າປະເວນີ ກ້າໂພສປະກາດແນວນັ້ນ ຈຶ່ງຢາກໃຫ້ພາກສ່ວນທີ່ກ່ຽວຂ້ອງ ແກ້ໄຂບັນຫານີ້ ເນື່ອງຈາກເປັນຫ່ວງອະນາຄົດຂອງລູກຫຼານ, ດັ່ງຊາວລາວ ທ່ານນຶ່ງ ຢູ່ແຂວງບໍ່ແກ້ວ ກ່າວວ່າ:

“ຂ້ອຍກະວ່າ ໂຕນີ້ນີ່ ມັນນ່າເປັນຫ່ວງຫຼາຍ ແຕ່ຂ້ອຍນີ້ເປັນປະຊາຊົນຢູ່ເມືອງຫ້ວຍຊາຍ ຢູ່ແຂວງບໍ່ແກ້ວນີ້ແຫຼະ ໄດ້ຍິນຂ່າວລືຢູ່ ມັນການຄ້າຂາຍປະເວນີ ມັນຂ້ອນຂ້າງຈະໂດ່ງດັງ ແຕ່ວ່າກະບໍ່ຄິດວ່າ ມັນຊິໂຫດຂນາດນີ້ ຄັນທາງຂັ້ນເທິງເພິ່ນເຫັນວ່າມັນຖືກ ມັນຜິດແນວໃດກໍເຮັດຕາມນັ້ນໂລດເນາະ.”

ປັດຈຸບັນ ສູນສະກັດກັ້ນ ແລະແກ້ໄຂ ເຫດການສຸກເສີນ ທາງຄອມພິວເຕີ້ ກະຊວງໄປສະນີ, ໂທຣະຄົມມະນາຄົມ ແລະການສື່ສານ ໄດ້ຮັບຮູ້ ເຖິງບັນຫາດັ່ງກ່າວແລ້ວ ໂດຍສະເພາະການໂພສ ປະກາດຮັບສມັກ ສາວງາມລົງທາງເຟສບຸກ ຂອງກຸ່ມຄົນບໍ່ດີ ຊຶ່ງທາງສູນ ກໍໄດ້ຕິດຕໍ່ຫາສໍານັກງານໃຫຍ່ ຂອງເຟສບຸກໂດຍກົງ ເພື່ອໃຫ້ຍົກເລີກໂພສ ທີ່ເຂົ້າຂ່າຍຕົວະຍົວະ ຫຼືເຊີນຊວນໄປປະກອບ ອາຊີບທີ່ຜິດກົດໝາຍ ອີກທັງ ທາງສູນກໍມີມາຕການ ໃນການດໍາເນີນການ ກັບກຸ່ມຄົນບໍ່ດີນີ້ຢູ່ ແຕ່ບໍ່ສາມາດເປີດເຜີຍຣາຍລະອຽດ ໃນທີ່ສາທາຣະນະໄດ້, ດັ່ງເຈົ້າໜ້າທີ່ ກະຊວງໄປສະນີ, ໂທຣະຄົມມະນາຄົມ ແລະການສື່ສານ ທ່ານນຶ່ງ ກ່າວວ່າ:

“ຄັນເວົ້າເຣື່ອງຍຸທສາດນີ້ ເຮົາແມ່ນສ່ວນຫຼາຍ ມັນກໍມີເຕັກນິກຂອງພວກເຮົາເນາະ ໂຕນີ້ເຮົາກໍຂອບຂ່າຍບໍ່ໄດ້ ເພາະວ່າມັນເປັນຄວາມລັບເດ້ ໂຕນີ້ເຮົາກໍມີເຕັກນິກຂອງພວກເຮົາ ທີ່ຈະໄປຕອບໂຕ້ກັບກຸ່ມຫັ້ນເນາະ.”

ທ່ານກ່າວຕື່ມວ່າ ສ່ວນໃນກໍຣະນີ ຂອງວິດີໂອ ປະກາດຮັບສມັກສາວງາມ ໄປເຮັດວຽກຂາຍບໍຣິການ ທາງເພດ ຢູ່ແອັບຕິກຕ໊ອກ (TikTok) ນັ້ນ ທາງສູນຍັງບໍ່ສາມາດ ດໍາເນີນເອກສານໄດ້ ເນື່ອງຈາກ ຍັງຢູ່ໃນໄລຍະການແຜ່ຣະບາດ ຂອງໂຄວິດ-19, ເຈົ້າໜ້າທີ່ກ່ຽວຂ້ອງ ໄດ້ຜັດປ່ຽນກັນ ໄປຫ້ອງການ ຈຶ່ງຍັງບໍ່ມີການປະຊຸມກັນ ເພື່ອແກ້ໄຂບັນຫາດັ່ງກ່າວນີ້ເທື່ອ.

ໃນສ່ວນຂອງການຕິດຕໍ່ສື່ສານ ຂອງແມ່ຍິງລາວ ທີ່ເຂົ້າສູ່ຂບວນການ ການຄ້າປະເວນີນັ້ນ ແມ່ນແມ່ຍິງຈໍານວນນຶ່ງ ໄດ້ໃຊ້ແອັບເຟສບຸກ (Facebook) ເປັນຊ່ອງທາງ ໃນຕິດຕໍ່ກັບນາຍໜ້າ ໃນລັກສະນະຊັກຊວນ  ຫຼືຕົວະຍົວະ ໄປຄ້າປະເວນີ ຊຶ່ງປັດຈຸບັນ ພາກສ່ວນທີ່ກ່ຽວຂ້ອງ ປະຈໍາ ປກສ ແຂວງບໍ່ແກ້ວ ໄດ້ຕິດຕາມຫາກຸ່ມ ຄ້າປະເວນີນີ້ ມາດໍາເນີນຄະດີ ຢ່າງຕໍ່ເນື່ອງ, ດັ່ງເຈົ້າໜ້າທີ່ ປກສ ແຂວງບໍ່ແກ້ວ ທ່ານນຶ່ງກ່າວວ່າ:

“ແມ່ນແຫຼະ ຕິດຕາມ ຕິດຕາມຢູ່ ກາຍຊອກຫາກຸ່ມແກ້ງດັ່ງກ່າວ ກໍຄິດນະເຮົາ ເຮົາມີຂໍ້ມູນ ເຮົາກໍດໍາເນີນຄະດີໄດ້.”

ເຖິງຢ່າງໃດກໍຕາມ ວຽກງານການລຶບໂພສ ທີ່ເຂົ້າຂ່າຍການຄ້າປະເວນີ ທັງໃນແອັບຕິກຕ໊ອກ ແລະເຟສບຸກນັ້ນ ຈະເຮັດໄດ້ງ່າຍຂຶ້ນ ຫາກເກີດຄະດີ ຂຶ້ນກັບຜູ້ເສັຽຫາຍ ແລະຜູ້ເສັຽຫາຍນັ້ນ ໄດ້ຮ້ອງທຸກມາຍັງສູນ  ຫຼືປະຊາຊົນຮວບຮວມລາຍຊື່ ຮ້ອງທຸກມາຍັງສູນດ້ວຍຕົນເອງ ແລະໃຫ້ມີກາຈໍ້າສີແດງຄັກແນ່ ເນື່ອງຈາກການລຶບແຕ່ລະຢ່າງ ອອກຈາກແອັບຕິກຕ໊ອກ ແລະ ເຟສບຸກ ບໍ່ໄດ້ຂຶ້ນກັບຣັຖບານລາວໂດຍຕົງ ແຕ່ຂຶ້ນກັບສໍານັກງານໃຫຍ່ ຂອງແອັບນັ້ນໆ ແລະທາງການລາວ ຕ້ອງໄດ້ມີການຮວບຮວມ ເອກສານຢ່າງຄັກແນ່ ເພື່ອສົ່ງໃຫ້ສໍານັກງານໃຫຍ່ ຂອງແອັບນັ້ນໆ ຢ່າງຕໍ່າໃຊ້ເວລາບໍ່ເກີນ 1 ເດືອນ, ອີງຕາມຂໍ້ມູນຈາກຫ້ອງການ ກະຊວງໄປສະນີ, ໂທຣະຄົມມະນາຄົມ ແລະການສື່ສານ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ