ພົບເດັກຍິງ ອາຍຸ 15 ປີ ຫາຍຢູ່ເຂດເສຖກິຈ ພິເສດ ສາມຫຼ່ຽມຄຳ ແລ້ວ

ຈຳປາທອງ
2022.10.24
Share on WhatsApp
Share on WhatsApp
ພົບເດັກຍິງ ອາຍຸ 15 ປີ ຫາຍຢູ່ເຂດເສຖກິຈ ພິເສດ ສາມຫຼ່ຽມຄຳ ແລ້ວ ກາສິໂນ ຄິງສ໌ໂຣມັນສ໌ ໃນເຂດເສຖກິຈ ພິເສດ ສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ, ວັນທີ 4 ຕຸລາ ປີ 2022.
RFA

ຜູ້ໃຊ້ເຟສບຸກຄ໌ ໜູນາ ກຸ້ງ ພານິນ (Nouna Kung Phanin) ໄດ້ໂພສຕ໌ ຂໍ້ຄວາມ ປະກາດຫາຄົນຫາຍໄປ ທີ່ເປັນຫລານສາວ ຂອງ ທ່ານເອງ ຊື່ ນາງນ້ອຍ ນາມສົມມຸດ ອາຍຸ 15 ປີ ພາຍຫລັງທີ່ໄດ້ເຮັດວຽກຢູ່ເຂດກາສິໂນ ຄິງສ໌ໂຣມັນສ໌ ເມືອງຕົ້ນເຜິ້ງ ແຂວງບໍ່ແກ້ວ ນໍາບໍຣິສັດໃນຕຶກ ຊິນວານຕາ ໄດ້ 2 ເດືອນ, ແລ້ວຖືກບໍຣິສັດໄລ່ອອກ ໂດຍບໍ່ໄດ້ຮັບຄ່າແຮງງານ, ຂະນະນີ້ພີ່ນ້ອງ ຕິດຕໍ່ຫາໄດ້ແລ້ວ ແລະນາງປອດພັຍດີ. ນາງໄດ້ຮັບການຊ່ອຍເຫລືອ ຈາກຜູ້ພົບເຫັນ ໃນຮ້ານກິນດື່ມ, ແລະໄດ້ສົ່ງນາງກັບບ້ານ ທີ່ເມືອງຊະນະຄາມ ແຂວງວຽງຈັນ, ອີງຕາມຄໍາເວົ້າ ຂອງຍາດພີ່ນ້ອງ ຂອງນາງ ຕໍ່ວິທຍຸ ເອເຊັຽເສຣີ ໃນມື້ວັນທີ 24 ຕຸລານີ້.

ສົ່ງລາວເມືອບ້ານແລ້ວກໍ໋ ມາເຮັດວຽກຢູ່ຫັ້ນ ແລ້ວບາດນີ້ວ່າຖືກເຂົາເຈົ້າໄລ່ອອກ ແລ້ວເຂົາເຈົ້າບໍ່ໃຫ້ເງິນວ່າຊັ້ນ ເຂົາເຈົ້າບໍ່ໃຫ້ເງິນ ອັນນີ້ກໍບໍ່ຈັກຊິວ່າຈັ່ງໃດ ແລ້ວຫລານໂທໄປບອກວ່າ, ຫລານອີກຄົນນຶ່ງຫັ້ນ ຖືກໄລ່ອອກວ່າຊັ້ນ, ລາວບໍ່ມີເງິນແລ້ວລາວຊິມາຫາທາງນີ້.

ນາງເວົ້າຕື່ມວ່າ ຕົນມີໝູ່ ທີ່ເຮັດວຽກ ຢູ່ກາສິໂນ ຄິງສ໌ໂຣມັນສ໌ ແລະທີ່ຜ່ານມາ ກໍໄດ້ຍິນຂ່າວວ່າ ມີຄົນຫາຍໄປ ພາຍຫລັງໄປເຮັດວຽກ ຢູ່ບ່ອນດຽວກັນນີ້ ແຕ່ບໍ່ຮູ້ວ່າ ສາມາດຕິດຕາມມາໄດ້ ຫລືບໍ່. ສໍາລັບນາງນ້ອຍນີ້ ແມ່ນຖືກນາຍໜ້າລາວ ຕົວະໄປບໍຣິການທາງເພດ ຢູ່ຮ້ານກິນດື່ມບ່ອນພົບນາງນັ້ນ, ແຕ່ນາງຍັງບໍ່ໄດ້ຖືກບັງຄັບ ໃຫ້ຂາຍບໍຣິການທາງເພດເທື່ອ ຍ້ອນຮ້ານນັ້ນ ເປັນຮ້ານທີ່ບໍ່ບັງຄັບ ໃຫ້ແມ່ຍິງ ບໍຣິການທາງເພດ ຫາກບໍ່ເຕັມໃຈ.

ບໍຣິສັດ ໃນຕຶກຊິນວານຕາ ຕັ້ງຢູ່ໜ້າດ່ານ ກວດຄົນ ເຂົ້າ-ອອກ ຂອງກາສິໂນ ຄິງສ໌ໂຣມັນສ໌ ຊຶ່ງໃນຕຶກນັ້ນ ມີຫລາຍບໍຣິສັດ ທີ່ຮັບສມັກ ພະນັກງານຕອບແຊັດ ຫລາຍພາສາ ທັງພາສາຈີນ, ວຽດນາມ, ອັງກິດ, ໄທຍ ແລະພາສາລາວ. ພາຍຫລັງ ທີ່ຄະນະຄຸ້ມຄອງ ເຂດເສຖກິຈພິເສດ ແຂວງບໍ່ແກ້ວ ໄປປະສານງານກັບບໍຣິສັດ ບໍ່ໃຫ້ຂາຍຄົນງານ ຕໍ່ໃຫ້ບໍຣິສັດອື່ນ ແລ້ວຫາກພະນັກງານ ທີ່ເຮັດວຽກຕອບແຊັດບໍ່ໄດ້ ກໍຈະບໍ່ຖືກຂາຍຕໍ່ ໃຫ້ບໍຣິສັດອື່ນ, ຖ້າຂາຍຕໍ່ ກໍຈະໄດ້ຍຸບ ບໍຣິສັດນັ້ນເລີຍ.

ດັ່ງນາຍໜ້າ ທີ່ຮັບຈ້າງ ເອົາຄົນເຂົ້າເຮັດວຽກ ໃນເຂດກາສິໂນ ຄິງສ໌ໂຣມັນສ໌ ເວົ້າວ່າ:

ແບບນີ້ມັນກໍມີຢູ່ເດ໋ ແບບເຮັດວຽກບໍ່ໄດ້ ດຽວນີ້ກໍເຂົາໄລ່ອອກທັມມະດາແຫລະ ບໍ່ຄືແຕ່ກ່ອນແລ້ວເດ໋ ຄົນລາວໄປໃສ ກໍໄດ້ໝົດແລ້ວ ສົ່ງກັບບ້ານແລ້ວກໍແລ້ວ ບໍ່ຕ້ອງໄປຂາຍຕໍ່ແນວນັ້ນແນວນີ້. ແຕ່ກ່ອນມີໂອ໋ ໄປຂາຍຕໍ່ ເປັນໜີ້ ເປັນສິນບັກຫລາຍໆ ດຽວນີ້ບໍ່ມີແບບນັ້ນແລ້ວ ຍ້ອນວ່າທີ່ຜ່ານມາ ມັນມີຫລາຍໆ ແລ້ວບາດນີ້ພວກເຈົ້າໜ້າທີ່ ທາງຕໍາຣວດເຂົ້າໄປກວດ ໄປນັ້ນ ແລ້ວກໍອອກແຈ້ງການມາໃໝ່ແລ້ວ ບໍ່ໃຫ້ມີແບບນັ້ນແລ້ວ ແຕ່ລະມື້ຈະມີຕໍາຣວດໄປກວດ ຕລອດຫັ້ນນ່າ. ບໍຣິສັດນີ້ຍຸບເລີຍຫັ້ນນ່າ ບໍ່ໃຫ້ເຮັດ ບໍ່ໃຫ້ເກີດເລີຍຫັ້ນນ່າ.

ກ່ອນໜ້ານີ້ ເຈົ້າໜ້າທີ່ ທີ່ກ່ຽວຂ້ອງກໍສາມາດຊ່ອຍແມ່ຍິງ ແລະເດັກນ້ອຍລາວ ອອກມາຈາກກາຊີໂນຄິງໂຣມັນໄດ້ຢູ່ເລື້ອຍ. ສະເພາະປີ 2022 ນີ້ ທາງເຈົ້າໜ້າທີ່ ຄະນະກັມມະການ ຕ້ານການຄ້າມະນຸສ ແຂວງບໍ່ແກ້ວ ໄດ້ສົ່ງແມ່ຍິງ ຊຶ່ງສ່ວນໃຫຍ່ອາຍຸ ລະຫວ່າງ 17 ປີ ຫາ 20 ປາຍປີ ໃຫ້ສະຫະພັນແມ່ຍິງ ແຂວງບໍ່ແກ້ວ ເພື່ອສົ່ງພວກເຂົາເຈົ້າ ກັບບ້ານ ປະມານ 20 ປາຍຄົນ ພາຍຫລັງທີ່ຖືກຕົວະ ໄປເຮັດວຽກຕອບແຊັດ ແລ້ວບໍ່ໄດ້ເງິນເດືອນ.

ດັ່ງເຈົ້າໜ້າທີ່ ສະຫະພັນແມ່ຍິງ ແຂວງບໍ່ແກ້ວ ກ່າວຕໍ່ວິທຍຸ ເອເຊັຽເສຣີວ່າ:

ໂຕອັນເຮົາຮູ້ນີ້ ກໍປະມານ 20 ປາຍ ໂອ໋ ມັນມີຫລາຍກໍຣະນີ ບາງຄົນກໍມາຕອບແຊັດ ບາງຄົນກໍມາອັນນັ້ນນ່າ ກຸ່ມສ່ຽງບໍຣິການທາງເພດ ແລ້ວກໍຖືກຂູດຮີດແຮງງານ ໂດຍສະເພາະແບບ ບາງທີກໍບໍ່ຈ່າຍເງິນເດືອນ ແລ້ວກໍຢາກກັບມາ.

ໃນໄລຍະປີ 2021-2022 ທ່ານ ຄໍາຜະຫຍາ ພັນປັນຍາ ຮອງເຈົ້າແຂວງ ແຂວງບໍ່ແກ້ວ ຣາຍງານເມື່ອວັນທີ 14 ມິຖຸນາຜ່ານມານີ້ວ່າ ທາງຄະນະກັມມະການ ຕ້ານການຄ້າມະນຸສ ລະດັບຊາຕ ແລະພາກສ່ວນທີ່ກ່ຽວຂ້ອງ ໄດ້ຊ່ອຍເຫລືອ ຜູ້ຖືກເຄາະຮ້າຍທັງໝົດ 477 ຄົນ. ໃນນັ້ນມີທັງຄົນງານລາວ, ຄົນຕ່າງປະເທດ ແລະໃນໄລຍະດຽວກັນນີ້ ທາງຄະນະກັມມະການ ຕ້ານການຄ້າມະນຸສ ແຂວງບໍ່ແກ້ວ ກໍໄດ້ຮັບຄໍາຮ້ອງທຸກ ຂໍຄວາມຊ່ອຍເຫລືອ ຈາກຜູ້ຖືກເຄາະຮ້າຍ 9 ຄັ້ງ, ໄດ້ຮັບແຈ້ງຄວາມ, ຄໍາຮ້ອງຟ້ອງ, ຄໍາຮ້ອງຂໍຄວາມຊ່ອຍເຫລືອຈາກຜູ້ປົກ ຄອງ, ຈາກສະຖານທູດຕ່າງປະເທດ 66 ຄັ້ງ. ສາມາດຊ່ອຍທັງຄົນລາວ ແລະຄົນຕ່າງປະເທດ ຊຶ່ງສ່ວນໃຫຍ່ແມ່ນຈີນ ທີ່ຖືກຕົວະມາເຮັດວຽກຕອບແຊັດ ແລ້ວຖືກບັງຄັບນັ້ນ ອອກມາໄດ້ ຊຶ່ງຈໍານວນນຶ່ງກໍສົ່ງກັບບ້ານ ແລະຈໍານວນນຶ່ງກໍເຮັດວຽກຕໍ່.

ດັ່ງເຈົ້າໜ້າທີ່ ຕໍາຣວດປ້ອງກັນຄວາມສງົບ ແຂວງບໍ່ແກ້ວ ກ່າວວ່າ:

ບາງຄົນກໍສົ່ງ ບາງຄົນກໍໃຫ້ໄປເຮັດວຽກຕໍ່ຫັ້ນນ່າ ເຂົາກໍມາໄກ້ເກັ່ຽ ບາງເທື່ອເຂົາກໍຕົວະ ມາເນາະມາເຮັດວຽກ ມາ ມັນກໍບໍ່ເປັນຕາມເຂົາບອກຫັ້ນນ່າ ມີແຕ່ວ່າເຮັດວຽກແລ້ວ ບາງເທື່ອຜູ້ກ່ຽວຢາກກັບບ້ານເນາະ ທາງບໍຣິສັດບໍ່ໃຫ້ກັບ ທາງເຈົ້າໜ້າທີ່ກໍໄປຊ່ວຍເຫລືອເພິ່ນ.

ກ່ຽວກັບເຣື່ອງທີ່ວ່ານີ້ ວິທຍຸ ເອເຊັຽເສຣີ ກໍໄດ້ພະຍາຍາມຕິດຕໍ່ ໄປຫາ ນາງ ນ້ອຍ ຜູ້ຕົກເປັນຂ່າວນີ້ ເພື່ອຂໍຮູ້ຣາຍລະອຽດ ກ່ຽວກັບການເຮັດວຽກ ນໍາບໍຣິສັດ ຊິນວານຕາ ຢູ່ເຂດກາສິໂນ ຄິງສ໌ໂຣມັນສ໌ ແຕ່ກໍບໍ່ສາມາດຕິດຕໍ່ໄດ້.

ຕໍ່ມາ ຜູ້ໃຊ້ເຟສບຸກ ໜູນາ ກຸ້ງ ພານິນ ກໍໄດ້ລຶບຂໍ້ຄວາມ ທີ່ວ່ານັ້ນອອກແລ້ວ ແລະໄດ້ໂພສຕ໌ ຂໍ້ຄວາມໃໝ່ເມື່ອວັນທີ 22 ກັນຍາທີ່ຜ່ານມາ “ຂອບໃຈທຸກ ຄົນ ທີ່ຊ່ອຍແຊຣ໌ ແລະຂອບໃຈ ທຸກຄົນທີ່ເປັນຫ່ວງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.