ການຈໍາກັດເອົາເຄື່ອງດື່ມ ມຶນເມົາ ຈາກເດັກນ້ອຍ

ຈໍາປາທອງ
2021-06-11
Share
ການຈໍາກັດເອົາເຄື່ອງດື່ມ ມຶນເມົາ ຈາກເດັກນ້ອຍ ທາງການວ່າຫ້າມ ຂາຍເຄື່ອງດື່ມ ທີ່ມີທາດເຫລົ້າ ໃຫ້ເດັກນ້ອຍ ອາຍຸ ຕໍ່າກວ່າ 18 ປີ
ນັກຂ່າວພົລເມືອງ

ເຣື່ອງທາງການລາວ ຈະຈໍາກັດບໍ່ໃຫ້ຂາຍເຄື່ອງດື່ມ ທີ່ມີທາດເຫລົ້າໃຫ້ເດັກນ້ອຍອາຍຸຕໍ່າກວ່າ 18 ປີ ປະຊາຊົນລາວເຫັນວ່າບໍ່ເປັນ ເຣື່ອງງ່າຍ ທີ່ຈະຈໍາກັດໄດ້ ຍ້ອນກົນໄກບັງຄັບ ໃຊ້ຣະບຽບ ແລະ ກົດໝາຍຍັງອ່ອນແອ ໂດຍສະເພາະຢູ່ຕາມເຂດຊົນນະບົດ ຊຶ່ງ ສ່ວນຫລາຍ ແມ່ຄ້າພໍ່ຄ້າບໍ່ເລືອກລູກຄ້າ ຂາຍໃຫ້ໝົດ ແລະ ທັງຜູ້ເປັນພໍ່ແມ່ ກໍມັກໃຊ້ລູກໄປຊື້ເຫລົ້າ ຊື້ເບັຍໃຫ້ ເຮັດໃຫ້ເດັກນ້ອຍ ຊຶມຊັບເຣື່ອງນີ້ ມາຕັ້ງແຕ່ຍັງນ້ອຍ ດັ່ງນັກສຶກສາປີທີ 4 ຈາກ ຄະນະນິຕິສາດ ແລະຣັຖສາດ ມະຫາວິທຍາລັຍຈໍາປາສັກ ກ່າວຕໍ່ ວິທຍຸເອເຊັຍເສຣີ ໃນມື້ວັນທີ 10 ມິຖຸນານີ້ວ່າ:

“ຍັງອ່ອນແອຢູ່ເວລາການປະຕິບັດ ເພາະວ່າສ່ວນຫລາຍແມ່ນແມ່ຄ້າ ເຂົາເຈົຶ້າຈະບໍ່ເລືອກກຸ່ມຄົນຫັ້ນນ່າ. ອັນຫຼັກໆ ກໍຄືຢູ່ເຂດນອກ ເຂົາເຈົ້າບໍ່ຮູ້ຫັ້ນນ່າ. ບາງຄົນເຂົາເຈົ້າໃຊ້ລູກ ໃຊ້ເຂົາໄປຊື້ເຫລົ້າຊື້ເບັຽ ໃຫ້ພໍ່ແມ່ຈັ່ງຊີ້ນ່າ ມັນກໍເລີຍເປັນຮີດຄອງ ມັນເລີຍແບບ ເຊື່ອມຊຶມແຕ່ນ້ອຍ ເອີ ເປັນຫຍັງຜູ້ໃຫຍ່ກິນເຫລົ້າ ກິນເບັຽມ່ວນຊື່ນເຮຮາ ບາດມາເດັກນ້ອຍເດ໋ ກໍຢາກລອງຄືກັນ ຈັ່ງຊີ້ນ່ານ້ອງວ່າ. ສິແກ້ກໍຕ້ອງ ໃຊ້ເວລາແຫລະ ແຕ່ທຸກຄົນຕ້ອງເປັນເຈົ້າການ ຄືກັນນັ້ນແຫລະ ທັງຜູ້ໃຫຍ່ທັງ ເດັກນ້ອຍທັງແມ່ຄ້າ.”

ກ່ຽວກັບເຣື່ອງນີ້ ປະຊາຊົນ ຢູ່ນະຄອນຫລວງວຽງຈັນ ທ່ານນຶ່ງເວົ້າວ່າ ການທີ່ທາງການຈະຈໍາກັດການຂາຍເຄື່ອງດື່ມ ທີ່ມີທາດ ເຫລົ້າໃຫ້ເດັກນ້ອຍ ອາຍຸຕໍ່າກວ່າ 18 ປີນັ້ນອາຈເປັນ ໄປບໍ່ໄດ້ ຍ້ອນທຸກມື້ນີ້ ພໍ່ແມ່ເອົາເງິນໃຫ້ລູກໄປໂຮງຮຽນ ແລ້ວລູກເອົາເງິນ ນັ້ນໄປຊື້ເຄື່ອງດື່ມ ທີ່ມີທາດເຫລົ້າ ຊຸມແຊວສັງສັນກັນ ແລະເມື່ອຈໍາກັດຜູ້ມີອາຍຸ ຕໍ່າກວ່າ 18 ປີບໍ່ໃຫ້ຊື້ຄື ແນວນັ້ນ ເດັກນ້ອຍກໍ ຈະໃຫ້ຜູ້ທີ່ມີອາຍຸສູງກວ່າ 18 ປີໄປຊື້ໃຫ້ ດັ່ງທີ່ທ່ານກ່າວວ່າ:

“ສໍາລັບເອື້ອຍຄິດວ່າ ນ່າຈະບໍ່ໄດ້ດອກ ທຸກມື້ເນາະ ນັກຮຽນອິສັງ ຈັ່ງຊີ້ນ່າ ສ່ວນຫຼາຍກໍພໍ່ແມ່ເອົາເງິະນໃຫ້ເນາະ. ບາດນີ້ບາງຄົນ ເຂົາເຈົ້າ ກໍຄືມີຊຸມມີແຊວກັນແນ່ ສ່ວນຫລາຍກໍຕ້ອງ ແມ່ນ ເອີຊື້ທາດເຫລົ້າ ອິຫຍັງຊື້ໄປກິນກັ້ນນ່າ. ບໍ່ຄິດວ່າສິກິນອິຫຍັງດີ. ສ່ວນຫລາຍເຂົາເຈົ້າກະຕ້ອງຄິດວ່າ ເອີຊື້ເບັຽບໍ໋ຊື້ເຫລົ້າບໍ໋ ຊື້ອິຫຍັງຈັ່ງຊີ້ມາກິນ ມັນຕ້ອງເປັນແນວນີ້.”

ແລະຊາວບ້ານຢູ່ແຂວງວຽງຈັນຜູ້ນຶ່ງ ກໍເວົ້າວ່າ ບໍ່ເປັນເຣື່ອງງ່າຍທີ່ຈະບັງຄັບໃຊ້ກົດຣະບຽບ ວ່າດ້ວຍການຈໍາກັດການຂາຍເຄື່ອງດື່ມ ທີ່ມີທາດເຫລົ້າໃຫ້ເດັກນ້ອຍ ອາຍຸຕໍ່າກວ່າ 18 ປີ ໂດຍສະເພາະໃນເຂດຊົນນະບົດ, ທຸກແຂວງຈະເຮັດບໍ່ໄດ້ເລີຍ ເພາະເຈົ້າໜ້າທີ່ບໍ່ ໄດ້ກວດກາຄັກແນ່. ແລະວ່າ ຫາກຢາກເຮັດໃຫ້ກົດຣະບຽບນັ້ນ ໄດ້ຮັບການຈັດຕັ້ງປະຕິບັດ ຢ່າງໄດ້ຮັບຜົລ ກໍຈະຕ້ອງເຮັດໃຫ້ການ ບັງຄັບໃຊ້ກົດຣະບຽບນັ້ນ ເຂົ້າເຖິງທຸກບ້ານ ແລະໃຫ້ນາຍ ບ້ານແຕ່ລະບ້ານ ປະກາດໂທຣະໂຄ່ງ ໃຫ້ທຸກຄົນຮູ້ ດັ່ງທີ່ທ່ານ ກ່າວວ່າ:

“ມັນກໍຄືສິບໍ່ງ່າຍຫັ້ນແຫລະ ອັນຢູ່ເຂດນອກແດ່ຫັ້ນນ່າ ແບບເຂົາເຈົ້າບໍ່ໄປກວດເບິ່ງດີຫັ້ນນ່າ ບໍ່ມີກົດຫັ້ນນ່າ. ກໍຄືໄປຊື້ໄດ້ຢູ່ເຂດນອກ ຫັ້ນນ່າອອກກົດຣະບຽບມາແຕ່ລະບ້ານ ກໍຄືສິງ່າຍແຫຼະ ໃຫ້ນາຍບ້ານແຈ້ງປະກາດວ່າ ບໍ່ໃຫ້ເດັກນ້ອຍ ຕໍ່າກວ່າ 18 ປີໄປຊື້ເຄື່ອງ ດື່ມທີ່ມີເຫລົ້າແອວກໍຮໍລຫັ້ນນ່າ.”

ຢູ່ແຂວງບໍ່ແກ້ວ ໃນມື້ວັນທີ 9 ມິຖຸນານີ້ ຜແນກຖແລງຂ່າວ, ວັທນະທໍາ ແລະທ່ອງທ່ຽວແຂວງ ໄດ້ສົມທົບກັບໂຄງການ CB-DAC ເປີດກອງປະຊຸມ ຈັດຕັ້ງທິມຕິດຕາມ ແລະກວດກາ ການປະຕິບັດມາຕການ ບໍ່ຊື້-ບໍ່ຂາຍເຄື່ອງດື່ມ ທີ່ມີທາດເຫລົ້າ ໃຫ້ເດັກນ້ອຍ ອາຍຸຕໍ່າກວ່າ 18 ປີພາຍໃນແຂວງບໍ່ແກ້ວ. ໃການປະຕິບັດ ເຈົ້າໜ້າທີ່ພາກສ່ວນທີ່ ກ່ຽວຂ້ອງແຂວງນີ້ ກ່າວວ່າ ແຜນຕໍ່ໄປຄື ເຈົ້າໜ້າທີ່ທີ່ກ່ຽວຂ້ອງ ຈະລົງໄປແນະນໍາ ເຈົ້າຂອງຮ້ານຄ້າ ທີ່ຂາຍ ເຄື່ອງດື່ມທີ່ມີທາດເຫລົ້າ ໃນທົ່ວແຂວງໃຫ້ປະຕິບັດຣະບຽບ ກົດໝາຍ ນັ້ນຄັກແນ່ ເນື່ອງຈາກ ທີ່ຜ່ານມາ ເຈົ້າໜ້າທີ່ຍັງເຫັນ ຊາວໜຸ່ມ ເຍົາວະຊົນ ດື່ມເຫລົ້າ ດື່ມເບັຍ ອັນຈະເຮັດໃຫ້ກະທົບ ເຖິງການຮຽນ ແລະເກີດພັຍສັງຄົມຕ່າງໆ ດັ່ງທີ່ທ່ານກ່າວໃນມື້ວັນທີ 10 ມິຖຸນານີ້ວ່າ:

“ຂັ້ນຕອນຕໍ່ໄປນີ້ ຄະນະຮັບຜິດຊອບເຂົາເຈົ້າ ມີແຜນລົງແນະນໍາ ໃຫ້ແຕ່ລະຜູ້ປະກອບການຕ່າງໆ ຍັນດາເມືອງໃຫ້ເຂົາເຈົ້າ ເຂົ້າໃຈ ເປັນເອກພາບກັນ ໃນກົດໝາຍ ແລະໃຫ້ຈັດຕັ້ງ ປະຕິບັດ ປະກາດແຈ້ງການແຈ້ງຂ່າວ ໃຫ້ທົ່ວເຖິງເດ໋. ໃຫ້ສືບຕໍ່ໃນການປະຕິບັດ ກົດໝາຍ ວ່າດ້ວຍເຄື່ອງດື່ມທາດເຫລົ້າ. ອັນນີ້ສະເພາະແຂວງນີ້ຊື່ໆ ແຂວງອື່ນຈະມີ ຫລື ບໍ່ມີ ພວກເຮົາກໍບໍ່ໄດ້ຮູ້ນໍາເນາະ.”

ພະນັກງານຕົວແທນຈໍາໜ່າຍ ຜລິຕພັນຂອງບໍຣິສັດເບັຍລາວຈໍາກັດ ຢູ່ນະຄອນຫລວງວຽງຈັນ ເວົ້າວ່າ ການທີ່ທາງການລາວຈະ ຄວບຄຸມການຈໍາໜ່າຍ ເຄື່ອງດື່ມທີ່ມີທາດເຫລົ້ານັ້ນ ຕົນເຫັນວ່າ ທຸຣະກິດຂອງຕົວແທນຈໍາໜ່າຍ ຈະໄດ້ຮັບຜົລກະທົບ ຢ່າງແນ່ນອນ ຄືຍອດຈໍາໜ່າຍຈະຫລຸດລົງ ເນື່ອງຈາກກຸ່ມເປົ້າໝາຍ ສ່ວນຫລາຍແມ່ນກຸ່ມນັກຮຽນ, ວັຍລຸ້ນ ທີ່ນິຍົມດື່ມເບັຍລາວ ຊຶ່ງມີການກະຈາຍ ໄປທົ່ວປະເທດ ຕາມຮ້ານຄ້າຊຸມຊົນ ຂນາດນ້ອຍເກືອບທຸກແຫ່ງ ທີ່ທຸກຄົນສາມາດເຂົ້າເຖິງໄດ້ ດັ່ງທີ່ທ່ານກ່າວວ່າ:

“ສ່ວນຫລັກໆສ່ວນຫລາຍໆ ແລະກຸ່ມວັບລຸ້ນເນາະ ນິຍົມດື່ມເບັຽລາວນີ້ ແນ່ນອນ ມັນກໍຕ້ອງມີຜົລກະທົບຢູ່ແລ້ວ. ກ່ຽວກັບຍອດຂາຍ ນີ້ແຫລະ ສ່ວນຫລາຍມັນຈະຂຶ້ນກັບ ຮ້ານຂາຍເຄື່ອງດື່ມ ສ່ວນຫລາຍພວກເຮົາ ສົ່ງເຄື່ອງໄປຮ້ານຂາຍ ເຄື່ອງດື່ມ.”

ເມື່ອປີ 2013 ສໍານັກຂ່າວວຽງຈັນທາຍ ຣາຍງານວ່າປະເທດລາວ ມີອັດຕຣາການດື່ມ ເຄື່ອງດື່ມທີ່ມີທາດເຫຼົ້າ ສູງທີ່ສຸດໃນຈໍານວນ 10 ປະເທດອາຊຽນ, ສະເລັ່ຍປະມານ 7 ລິດ ຕໍ່ຄົນຕໍ່ປີ ແລະ ຈາກການສໍາຣວດຂອງ ອົງການອະນາມັຍໂລກພົບວ່າ ແມ່ຍິງລາວ ດື່ມເຄື່ອງດື່ມ ທີ່ມີທາດເຫລົ້າຫລາຍທີ່ສຸດ ໃນແຖບອິນດູຈີນ.

ເມື່ອກ່ອນໜ້ານີ້ ລາວໄດ້ອອກກົດໝາຍ ວ່າດ້ວຍການຄວບຄຸມ ເຄື່ອງດື່ມທີ່ມີທາດເຫລົ້າ ແຕ່ໃນພາກ ປະຕິບັດຕົວຈິງ ບໍ່ໄດ້ຮັບຜົລ ເທົ່າທີ່ຄວນ.

ຄໍາເຫັນ (1)

ເບິ່ງຄວາມເຫັນທັງໝົດ.

Anonymous says:
Jun 30, 2021 11:11 PM

ການຫ້າມບໍ່ໃຫ້ໄວຫນຸ່ມອາຍຸ ຕ່ຳກວ່າ 18 ປີ ດື່ມເຄື່ອງມືນເມົານັ້ນ ເປັນສິ່ງທີ່ປະເສີດແທ້ ເພາະວ່າ ຊາວຫນຸ່ມ ຈະໄດ້ບໍ່ມົ້ວສຸມກັບເຫລົ້າເບຍຕ່າງໆ ເພາະເຂົາເຈົ້າ ຍັງມີການພັດທະນາແລະຈະເລີນເຕີບໂຕ ເປັນຜູ້ນຳໃຫ້ອານາຄົດ. ແຕ່ເທົ່າທີ່ເຫັນຜ່ານມາ ບໍລິສັດເຫລົ້າເບຍຕ່າງໆ ເບື່ອເມົາຊາວຫນຸ່ມໄວລຸ້ນ ຢ່າງຫລວງຫລາຍ ໂດຍການຈັດງານ ໂປໂຫມດຕ່າງໆ ໃຫ້ນັກຮຽນນັກສຶກສາມາໃຊ້ບໍລິການ ເຊິ່ງເປັນການສ້າງລາຍໄດ້ອັນມະຫາສານ. ດັ່ງນັ້ນ ຈຶ່ງເຮັດໃຫ້ ຊາວຫນຸ່ມເຮົາ ມີສະຖິຕິສູງທີ່ສຸດ ໃນປະເທດອາຊຽນ ທັ້ງໆທີ່ ມີລາຍໄດ້ຫນ້ອຍຫລາຍ ໃນອາຊຽນ ແຕ່ພັດມີເງິນ ຊື້ເຫລົ້າຊື້ເບຍດື່ມ. ສະນັ້ນ ພັກລັດຄວນເອົາໃຈໃສ່ ຢ່າງເຄັ່ງຄັດ ແລະຄວນເຮັດໄວທີ່ສຸດ. ອີກສິ່ງນຶ່ງ ທີ່ຫນ້າເປັນຫ່ວງ ກ່ວານີ້ ຄື ຊາວຫນຸ່ມ ມົ້ວສຸມນຳຢາເສບຕິດ ເປັນຕົ້ນ ແມ່ນຢາມ້າ ເຊິ່ງເປັນອັນຕະລາຍທີ່ສຸດ ໃນທຸກມື້ນີ້. ນອກຈາກນີ້ ຍັງມີເຈົ້າຫນ້າທີ່ ຈຳນວນນຶ່ງ ພົວພັນກັບ ການຄ້າທີ່ຜິດກົດຫມາຍດັ່ງກ່າວ. ຂໍຮ້ອງ ໃຫ້ລັດຖະບານ ປາບປາມໃຫ້ເດັດຂາດດ້ວຍ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ