ໄປເຮັດວຽກຢູ່ ສາມຫຼ່ຽມຄຳ, ຖືກກັກຂັງຮຽກຄ່າໄຖ່

ຈຳປາທອງ
2021-12-30
Share
ໄປເຮັດວຽກຢູ່ ສາມຫຼ່ຽມຄຳ, ຖືກກັກຂັງຮຽກຄ່າໄຖ່ ຄາສິໂນ ຄິງສ໌ໂຣມັນສ໌, ແຂວງບໍ່ແກ້ວ, ວັນທີ 11 ພຶສຈິກາ 2021.
RFA

ຊາວໜຸ່ມລາວ ອາຍຸ 27 ປີ ຢູ່ເມືອງສີໂຄດຕະບອງ ນະຄອນຫລວງວຽງຈັນ ຖືກຄົນຮູ້ຈັກຮັກແພງກັນມາແຕ່ນ້ອຍ ຕົວະຍົວະໄປເຮັດວຽກ ຢູ່ໃນເຂດເສຖກິດພິເສດ ສາມຫລ່ຽມຄໍາ ແຂວງບໍ່ແກ້ວ ໂດຍເຂົ້າໄປແບບບໍ່ຖືກຕ້ອງ ຕາມຣະບຽບກົດໝາຍ. ແຕ່ພໍໄປເຖິງເຂດນັ້ນ ແລ້ວ ກໍຖືກກັກຂັງໄວ້ກ່ອນ ຈົນຈ່ອຍໂຊເຈັບປ່ວຍ ຍ້ອນບາງມື້ບໍ່ໄດ້ກິນເຂົ້າ, ຂາດສານອາຫານ, ເປັນໄຂ້, ຖອກທ້ອງ ແລະບໍ່ຮູ້ວ່າ ຕົນຖືກກັກຂັງໄວ້ຢູ່ບ່ອນໃດ.

ຜູ້ເຄາະຮ້າຍຄົນນີ້ ໄດ້ຂໍກັບຄືນບ້ານ, ແຕ່ທາງນາຍໜ້າບອກໃຫ້ຈ່າຍເງິນ ຈໍານວນ 10,000,000 ກີບໃຫ້ ຈຶ່ງຈະອອກໄປໄດ້. ດັ່ງນັ້ນ ຜູ້ກ່ຽວຈຶ່ງໄດ້ຕິດຕໍ່ໄປຫາແມ່ ທີ່ທຸກຍາກ ແລະຜູ້ເປັນແມ່ກໍປ່ວຍຢູ່, ແຕ່ກໍຈໍາເປັນຕ້ອງໄດ້ຊອກຫາເງິນໄປໄຖ່ເອົາລູກຊາຍອອກມາ ໂດຍໄດ້ຂາຍຣົດຈັກ ແລະຢືມເງິນນໍາຜູ້ທີ່ຮູ້ຈັກກັນ, ແຕ່ກໍບໍ່ໄດ້ເງິນພໍທີ່ຈະໄຖ່ເອົາລູກຊາຍອອກມາໄດ້. ດັ່ງນັ້ນຜູ້ເປັນແມ່ ຈຶ່ງໄດ້ຂໍໃຫ້ນາຍໜ້າ ຫລຸດຄ່າໄຖ່ນັ້ນລົງເປັນ 7,000,000 ປາຍກີບ ແລະລູກຊາຍໄດ້ອອກມາປະມານວັນທີ 29 ທັນວານີ້, ອີງຕາມຄໍາເວົ້າຂອງຜູ້ໃກ້ຊິດຜູ້ເຄາະຮ້າຍ ທີ່ຂໍສງວນຊື່ແລະຕໍາແໜ້ງ ຕໍ່ວິທຍຸເອເຊັຍເສຣີ ໃນມື້ວັນທີ 30 ທັນວາ ນີີ້.

ໝູ່ເຂົາຕົ້ວະໄປ ເຂົາວ່າໄປເຮັດວຽກກະໄປຊີ້ນະ ພໍເຂົ້າໄປແລ້ວເຂົາກໍອັດປະຕູ ອາຫານເຂົາເອົາໃຫ້ຫັ້ນນ່າ ບາງມື້ກະບໍ່ໄດ້ກິນ ຍັງບໍ່ດີຂຶ້ນຍັງນອນຢູ່ຄືເກົ່າ ກະຮັກສາກັນໄປຊີ້ຫັ້ນນ່າ, ຂ້ອຍວ່າຄັນບໍ່ແມ່ນຄ້າມະນຸດ... ເຂົາປ່ວຍ ເຂົາຢາກກັບບ້ານ ເຂົາຂໍມາປົວຢູ່ບ້ານ ເຈົ້າຕ້ອງປ່ວຍ... ກໍສະແດງວ່າເຈົ້າຫາກິນນໍາຄົນ.

ທ່ານເວົ້າຕື່ມວ່າ ນາຍໜ້າ ມີທັງຄົນຈີນ ແລະຄົນລາວ. ແຕ່ແມ່ຜູ້ເຄາະຮ້າຍ ໄດ້ເວົ້ານໍາຫົວໜ້າທີ່ເປັນຄົນລາວ ຊຶ່ງເປັນຄົນແຂວງສວັນນະເຂດ. ຜູ້ເຄາະຮ້າຍໄດ້ຂີ່ຣົຖເມກັບບ້ານ ໃນສະພາບເຈັບປ່ວຍຢູ່. ແມ່ຜູ້ເຄາະຮ້າຍເວົ້າວ່າ ກ່ອນລູກຊາຍຂອງຕົນຈະອອກມາຈາກເຂດເສຖກິດພິເສດສາມ ຫລ່ຽມຄໍາ ໝູ່ຂອງລູກຊາຍທີ່ເຄີຍໄປເຮັດວຽກຢູ່ເຂດນັ້ນຄືກັນໄດ້ກັບຄືນມາບ້ານກ່ອນແລ້ວ ແລະນາງໄດ້ໂທຣະສັບໄປຖາມວ່າ ມາໄດ້ແນວໃດ ເຂົາເວົ້າວ່າ ໄດ້ຈ່າຍເງິນຄ່າໄຖ່ໂຕໃຫ້ນາຍໜ້າຄືກັນ 7-8 ລ້ານກີບ.

ເລີຍໂທຖາມພີ່ນ້ອງເຂົາເຈົ້າຫັ້ນລະ ຜູ້ມາຫັ້ນລະ ໂອ໋ຍໄດ້ເສັຽເງິນຫລາຍເດ໋ ພວກເຮົາເສັຽເງິນ 7-8 ລ້ານເສັຽໃຫ້ນາຍໜ້າ ກະໝູ່ດຽວກັນກັບລາວ ນ້ອງອ້າຍເຂົາເຈົ້າຫັ້ນແຫລະ ໂອ໋ຍເສັຽກໍຈະເຮັດຈັ່ງໃດ ແມ່ຢ້ານລູກເປັນຕາຍຢູ່ພຸ້ນຫັ້ນນະ ຈຶ່ງໄດ້ເອົາລູກລົງມານີ້ແຫລະ.

ນາງເວົ້າຕື່ມອີກວ່າ ລູກຊາຍຂອງນາງ ໄດ້ກັບມານອນປິ່ນປົວຢູ່ບ້ານແລ້ວ, ອາການຍັງບໍ່ດີຂຶ້ນ ໄດ້ດູແລຢູ່. ມາຮອດມື້ນີ້ ກໍຍັງບໍ່ທັນໄດ້ໄປແຈ້ງຄວາມ ຕໍ່ພາກສ່ວນໃດຂອງທາງການເທື່ອ ແລະກໍບໍ່ຢາກໃຫ້ເປັນເຣື່ອງໃຫຍ່ໂຕ ຍ້ອນເປັນຄົນທີ່ຮູ້ຈັກກັນ ແລະບໍ່ມີເງິນໄປແລ່ນຄະດີຄວາມ ເພາະທຸກຍາກ ແລະບໍ່ມີພີ່ນ້ອງ, ຖ້າເກີດບັນຫາຂຶ້ນມາ ກໍບໍ່ມີຜູ້ໃດຊ່ອຍໄດ້ ດັ່ງນັ້ນຈຶ່ງຢາກໃຫ້ມັນເປັນພຽງອຸທາຫອນ ບໍ່ຢາກໃຫ້ຜູ້ໃດຖືກຕົວະຍົວະໄປຄືລູກຊາຍຂອງຕົນນີ້.

ແມ່ກໍບໍ່ຈັກສິວ່າ ຊ່າງສິວ່າ ຄັນເວົ້າແລ້ວມັນກະແມ່ນຄົນກິນສຸກກິນດິບ ນໍາກັນນ່າ ແມ່ກໍບໍ່ມີໃຜເດ໋ ບໍ່ຢາກມີເຣື່ອງກັບເຂົາ ແມ່ກໍບໍ່ຢາກໃຫ້ວ່າ ເຖິງເຈົ້າໜ້າທີ່ດອກ ແມ່ກໍຢາກໃຫ້ມີແຕ່ວ່າໃຫ້ລະວັງຕົວ ແບບບໍ່ຢາກໃຫ້ຄົນໄປເປັນຄືຈັ່ງຊີ້ອີກນ່າ ບໍ່ຢາກໃຫ້ຄົນໄປຕົວະວ່າໄດ້ເງິນເດືອນຫລາຍ ຈັ່ງ ຊັ້ນຈັ່ງຊີ້ ບໍ່ຢາກໃຫ້ໄປຖືກຕົວະຖືກຕົ້ມອີກຫັ້ນນ່າ.

ເຈົ້າໜ້າທີ່ແຂວງບໍ່ແກ້ວທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 30 ທັນວານີ້ວ່າ ບັນ ຫານາຍໜ້າຕົວະຍົວະຄົນລາວ ໄປເຮັດວຽກໃນເຂດເສຖກິດພິເສດສາມຫລ່ຽມຄໍາ ຢູ່ເມືອງຕົ້ນເຜິ້ງນີ້ ແລ້ວຮຽກຄ່າໄຖ່ ເປັນບັນຫາມາດົນແລ້ວ, ທາງການກໍຮັບຮູ້, ເຫັນວ່າເປັນລັກສະ ນະຄ້າມະນຸດ, ແຕ່ທາງຂັ້ນເທິງຍັງບໍ່ສາມາດແກ້ໄຂໄດ້ເທື່ອ.

ໂຕນີ້ມັນກໍມີບັນຫາຢູ່ຫັ້ນແຫລະ ຄືທຸກມື້ຢູ່ແບບວ່າມີນາຍໜ້າຕົວະວ່າ ເອີມາໂລດ ເອົາເຂົ້າມາກໍມີວຽກອັນນີ້ໃຫ້ເຮັດ ລັກສະນະຄ້າມະນຸດຄ້າຄົນຫັ້ນແຫລະ ຕົວະເຂົາເຂົ້າໄປເດ໋. ຂັ້ນເທິງເພິ່ນກໍຄົ້ນຄວ້າແກ້ໄຂຢູ່ວ່າ ແນວນັ້ນມັນເຂົ້າໄປບໍ່ຖືກ ຈັກຈຈິເຮັດແນວໃດ ເພາະວ່າຍາມເຂົ້າເປັນຫຍັງບໍ່ຜ່ານ ບາດນີ້ປະສານທາງໃນເຂດເຂົາເຈົ້າມີແຕ່ຮັບຜິດຊອບ ພວກທີ່ເຂົ້າຖືກຕ້ອງຫັ້ນ ເວລາເຂົ້າມາບໍ່ຜ່ານເຂົາ ເຂົາກໍບໍ່ໄດ້ຮັບຮູ້ນໍາ.

ທ່ານກ່າວຕື່ມວ່າ ເມື່ອຕົ້ນເດືອນທັນວານີ້ ກໍມີປະມານ 30 ປາຍຄົນ ທີ່ຖືກຕົວະມາໃນລັກ ສະນະດັ່ງກ່າວ, ແຕ່ເຈົ້າໜ້າທີ່ກໍບໍ່ໄດ້ດໍາເນີນຄະດີ ກັບຜູ້ທີ່ເຂົ້າໄປໃນເຂດນັ້ນແບບຜິດກົດ ໝາຍ, ມີແຕ່ຕັກເຕືອນ. ທ່ານເວົ້າວ່າ ຖ້າຜູ້ໃດຈະເຂົ້າໄປ ກໍຕ້ອງໃຫ້ຖືກຕ້ອງຕາມຣະບຽບກົດໝາຍ.

ຊ່ວງທີ່ແລ້ວກໍມີຈໍານວນນຶ່ງ 30 ປາຍພຸ້ນແຫລະທີ່ເຂົ້າໄປ ບໍ່ມີວຽກເຮັດຫັ້ນແຫລະ ບາງຄົນທີ່ເຮັດບໍ່ໄດ້ ເຂົາກໍເອົາໄປຂັງກໍມີ ບາງຄົນກໍວ່າເຈັບ ກະບໍ່ມີການເບິ່ງການແຍງ ຍັງບໍ່ປິ່ນບໍ່ປົວຫຍັງ ມີແຕ່ເອົາເຂົ້າເອົານໍ້າຖື້ມໃຫ້ ບໍ່ໄດ້ດໍາເນີນຄະດີແບບໃດແລ໋ວ ອອກມາແລ້ວກໍແລ້ວ ມີແຕ່ວ່າເຕືອນບໍຣິສັດຫັ້ນ ເທື່ອໜ້າເຈົ້າຈະເອົາຄົນເຂົ້າມາ ຕ້ອງໄດ້ສເນີອອກໄປທາງນີ້.

ກ່ຽວກັບບັນຫາທີ່ວ່ານີ້ ວິທຍຸເອເຊັຍເສຣີ ໄດ້ພະຍາຍາມຕິດຕໍ່ໄປຫາເຈົ້າໜ້າທີ່ ທີ່ກ່ຽວຂ້ອງ ຢູ່ໃນເຂດເສຖກິດພິເສດສາມຫລ່ຽມຄໍາ ເພື່ອຂໍຮູ້ລາຍລະອຽດ, ແຕ່ບໍ່ສາມາດຕິດຕໍ່ໄດ້.

ຊາວນະຄອນຫລວງວຽງຈັນ ທີ່ຮູ້ຂ່າວນີ້ເວົ້າວ່າ ຮູ້ສຶກສະເທືອນໃຈຫລາຍ, ເຣື່ອງນີ້ບໍ່ຄວນເກີດຂຶ້ນໃນປະເທດລາວ ແລະກໍຢາກໃຫ້ຄົນມີສະຕິ ກ່ອນຈະຕັດສິນໃຈ ໄປເຮັດວຽກຢູ່ບ່ອນໃດກໍຕາມ, ບໍ່ຄວນເຊື່ອຄົນງ່າຍ.

ສະເທືອນໃຈແທ້ຄັນເຈິະຈັ່ງຊີ້ເນາະ ຢູ່ລາວເຮົາບໍ່ໜ້າຈະມີແບບນີ້ຫັ້ນນະ ມັນກໍຍັງມີແລ້ວຫັ້ນນ່າ ກໍຢາກໃຫ້ລະມັດລະວັງຫັ້ນແຫລະ ບໍ່ຕ້ອງເຊື່ອຄົນງ່າຍ. ຖ້າຢາກໄປແທ້ກໍໃຫ້ຄົນທີ່ວາງໃຈໄດ້ ທີ່ເຂົາເຈົ້າເຮົດຢູ່ຫັ້ນແທ້ໆ ບໍ່ແມ່ນວ່າໄປແລ້ວໄປເຈີແບບນີ້ຫັ້ນ.

ແລະປະຊາຊົນລາວຢູ່ແຂວງບໍ່ແກ້ວຜູ້ນຶ່ງກໍເວົ້າຄືກັນວ່າ ຮູ້ສຶກສະເທືອນໃຈ, ຢາກໃຫ້ຄົນ ອື່ນໆ ມີສະຕິລະວັງຕົວໄວ້, ເຣື່ອງນີ້ໃຫ້ເປັນອຸທາຫອນເຕືອນສະຕິ, ຢ່າຫລັງເຊື່ອຄົນງ່າຍ ແລະຢາກໃຫ້ທາງການແກ້ໄຂບັນຫານີ້ ຢ່າງຈິງຈັງ.

ສົມຄວນທີ່ແກ້ໄຂຫັ້ນແຫລະ ເພາະວ່າກະອີ່ຕົນພວກທີ່ເຂົາເຈົ້າ ທີ່ບໍ່ຮູ້ກະຢາກມາຫາເງິນຫັ້ນແຫລະ ໄດ້ມາກໍໄດ້ມາເຈີສະຖານະການແບບນີ້ ແລະມັນກໍບໍ່ຄ່ອຍໂອເຄປານໃດຫັ້ນແຫລະ.

ນອກຈາກບັນຫາທີ່ວ່ານີ້ແລ້ວ ກໍຍັງມີອີກຫລາຍກໍຣະນີ ທີ່ແມ່ຍິງລາວຈໍານວນຫລວງຫລາຍ ຖືກຕົວະໄປເຮັດວຽກ ແລ້ວຖືກບັງຄັບໃຊ້ແຮງງານ, ໃຫ້ເປັນໂສເພນີ ແລະກໍມີບັນຫາອື່ນໆອີກຕາມມາ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ