ແຂວງອັດຕະປື ລົງວິໄນຕໍ່ພະນັກງານລັດ ຈໍານວນ 26 ຄົນ

ໃນເດືອນກຸມພາ ທີ່ຜ່ານມາ ແຂວງອັດຕະປື ໄດ້ລົງວິໄນ ຕໍ່ພະນັກງານ-ລັດຖະກອນ, ສະມາຊິກພັກ ແລະຄະນະບ້ານ ລວມ 26 ຄົນ ເຊິ່ງມີສ່ວນກ່ຽວຂ້ອງ ກັບການສໍ້ລາດບັງຫຼັງ ການບຸກລຸກທີ່ດິນ ເຂດປ່າປ້ອງກັນ ຢູ່ພູພຽງບໍລະເວນ ແລະປ່າຜະລິດ ຢູ່ເມືອງສະໜາມໄຊ ແຂວງອັດຕະປື:

“ໂອ້ ເຂົາລົງຢູ່ແຂວງອັດຕະປືນີ້ ມັນແມ່ນການສໍ້ລາດບັງຫຼວງ ເອົາເງິນ ສໍ້ໂກງເອົາເງິນຂອງພັກຂອງລັດຫັ້ນແຫຼະ ຍັງບໍ່ທັນໄດ້ຕັດສິນຊໍ້າແຖ ສິໄດ້ລົງໂທດໝົດຫັ້ນແຫຼະ ຖືກໂຕໃດໆ ມັນອີງຕາມມາດຕາແນວນັ້ນ ລົງວິໄນໝົດແລ້ວ.”

ຢ່າງໃດກໍ່ຕາມ ບຸກຄົນທີ່ຮູ້ເຫດການ ຜູ້ບໍ່ປະສົງອອກຊື່ ແລະ ສຽງ ຢູ່ແຂວງອັດຕະປື ໄດ້ກ່າວຕໍ່ວິທຍຸເອເຊັຽເສຣີ ໃນມື້ວັນທີ 27 ຕຸລາ ວ່າ ໃນການປະຕິບັດໂຕຈິງ ພະນັກງານທີ່ມີີລາຍຊື່ຖືກລົງວິໃນ ນັ້ນ ຍັງຄົງມາເຮັດການປົກກະຕິ ແລະ ບໍ່ໄດ້ຖືກປົດຕໍາແໜ່ງຫຍັງ ຍົກເວັ້ນແຕ່ນາຍບ້ານ ທີ່ຖືກປົດຕໍາແໜ່ງ.

ການລົງວິໄນພະນັກງານທັງ 26 ຄົນນີ້ ກ່ຽວຂ້ອງ ກັບການສໍ້ລາດບັງຫຼວງຫຼາຍໂຄງການ ຕັ້ງແຕ່ ການຍັກຍອກເງິນທຶນ ຊ່ອຍເຫຼືອຜູ້ປະສົບໄພ ຈາກເຫດການເຂື່ອນເຊປຽນ-ເຊນໍ້ານ້ອຍແຕກ ຈົນເຖິງຂໍ້ຂັດແຍ້ງ ໃນການໃຫ້ສໍາປະທານ ແກ່ບໍລິສັດຕ່າງປະເທດ ເຊັ່ນ: ບໍລິສັດ ຂອງນັກລົງທຶນຈີນ ໃນການສໍາປະທານທີ່ດິນ ຢູ່ເຂດບ້ານໜອງຫິນ ແລະບ້ານໄຊດອນໂຂງ ເມືອງສະໜາມໄຊ:

“ມັນຄຸມເຄືອໝົດເລີຍຫັ້ນເນາະ ມັນມີ 3-4 ໜ້າວຽກຫັ້ນນ່າ ທີ່ກິນເງິນສໍ້ລາດບັງຫຼວງຫັ້ນ ສະສົມມາເລີຍຫັ້ນ ຄືວ່າ ເຂື່ອນແຕກກໍ່ແມ່ນເນາະ ກໍ່ຈຸດຽວກັນ ພະນັກງານອັນດຽວກັນ ວ່າຊັ້ນສາ ເປັນຜູ້ຮັບຜິດຊອບວຽກອັນນີ້ ເງິນຊ່ອຍເຫຼືອກະຈໍານວນໜຶ່ງ ກໍ່ບ້ວງອື່ນກໍ່ຈໍານວນໜຶ່ງ ສໍາປະຖອກສໍາປະທານດິນນີ້ນ່າ ກໍ່ຈໍານວນໜຶ່ງ ເຂົາກິນ ພ້ອມກັນກິນຫັ້ນນ່າ.”

ກ່ອນໜ້ານີ້ ແຂວງອັດຕະປື ກວດພົບເຫັນ ການໃຊ້ເງິນ ບໍ່ເປັນໄປຕາມແຜນຊົດເຊີຍ ແລະການຟື້ນຟູ ຈໍານວນຫຼາຍກວ່າ 81 ຕື້ກີບ ໃນແຜນການຊົດເຊີຍ ຜົນກະທົບໂຄງການເຂື່ອນເຊປຽນ-ເຊນໍ້ານ້ອຍແຕກ ຢູ່ເມືອງສະໜາມໄຊ ປັດຈຸບັນ ຍັງມີຄ່າຊົດເຊີຍ ທີ່ຍັງຄົງຄ້າງຈ່າຍ ອີກປະມານ 697.53 ຕື້ກີບ ເມື່ອກວດກາ-ກວດສອບເຂັ້ມງວດຂຶ້ນ ກໍ່ພົບວ່າ ບັນດາໂຄງການ ທີ່ເຂົ້າມາລົງທຶນໃນແຂວງອັດຕະປື ມີຂໍ້ມູນບໍ່ສອດຄ່ອງ ກັບລາຍຮັບໂຕຈິງ ເພາະເຫັນງົບປະມານລາຍຮັບ ເກີດການຮົ່ວໄຫຼ ເປັນຈໍານວນມະຫາສານ.

“ມັນກ່ຽວກັບ ສໍາປະທານດິນສວນມັນຕົ້ນ ຂາຍໂດຍທີ່ວ່າບໍ່ໄດ້ ແຈ້ງເຈົ້າເມືອງ ເຈົ້າແຂວງ ແບບອະນຸມັດ ແບບພາຍໃນບ້ານ ກັບນາຍທຶນ ເຂົາອະນຸມັດໃຫ້ນາຍທຶນ ຈັ່ງຊີ້ຫັ້ນນ່າ ກະເລີຍຖືກວິໄນ ຕາມໄດ້ຍິນວ່າ ຈັບເຂົ້າຄຸກ.”

ໃນລາຍຊື່ພະນັກງານ ແລະປະຊາຊົນ ທີ່ຖືກລົງໂທດນັ້ນ ມີຄະນະບ້ານ ຈາກບ້ານໜອງຫີນ ຈໍານວນ 4 ຄົນ ທີີ່ຖືກລົງວິໄນ ຄືນາຍບ້ານ ແລະຮອງນາຍບ້ານ 3 ຄົນ ທັງໝົດ ຖືກປົດອອກຈາກຕໍາແໜ່ງ ແລະຈັບເຂົ້າຄຸກ ຍ້ອນມີການຮັບສິນບົນ ນໍານາຍໜ້າ ຊື້-ຂາຍທີ່ດິນ ໃນເຂດບ້ານ ລວມທັງໝົດ 2,072,000,000 ກີບ ແລະ ເຊັນໃບແຈ້ງທີ່ດິນ ໂດຍບໍ່ໄດ້ຮັບອະນຸຍາດ ລວມ 271 ສະບັບ ຮວມເນື້ອທີ່ກວ່າ 729 ເຮັກຕ້າ.