ລາຍຮັບ ຣັຖວິສາຫະກິຈ ນ້ຳປະປາ 30% ບໍ່ເຂົ້າຣັຖ

ອຸ່ນແກ້ວ
2022.06.30
Share on WhatsApp
Share on WhatsApp
ລາຍຮັບ ຣັຖວິສາຫະກິຈ ນ້ຳປະປາ 30% ບໍ່ເຂົ້າຣັຖ ຣັຖວິສາຫະກິຈ ນ້ຳປະປາ ນະຄອນຫຼວງ, ບ້ານໂພນເຄັງ ວັນທີ່ 30 ມິຖຸນາ 2022.
ຮູບພາບ: ນັກຂ່າວພົລເມືອງ

ນ້ຳ​ປະ​ປາ ກໍ​ເປັນ​ຂ​ແນງ​ຣັ​ຖວິ​ສາ​ຫະ​ກິ​ຈ​ນຶ່ງ ທີ່​ຖືກ​ນຳ​ມາ​ອະ​ພິ​ປາຍ ຢູ່​ໃນ​ກອງ​ປະ​ຊຸມ​ສ​ມັຍ​ສາ​ມັນ​ເທື່ອ​ທີ 3 ຂອງ​ສະ​ພາ​ແຫ່ງ​ຊາຕ​ຊຸດ​ທີ 9 ຫຼື ກອງ​ປະ​ຊຸມ​ສະ​ພາ ແຫ່ງ​ຊາຕ ກ່ຽວ​ກັບ​ຄວາມ​ໂປ່ງ​ໄສ ແລະ ບັນ​ຫາ​ລາຍ​ຮັບ​ບໍ່​ເຂົ້າ​ຣັ​ຖ 30 ເປີ​ເຊັນ.

ທ່ານ ພັນ​ຄຳ​ ວິ​ພາ​ວັນ ນາ​ຍົກ​ຣັ​ຖ​ມົນ​ຕ​ຣີ ຕອບ​ຂໍ້​ຊັກ​ຖາມຂອງສະ​ມາ​ຊິກ​ ສະ​ພາ​ແຫ່ງ​ຊາຕ ໃນ​ວັນ​ທີ 23 ມິ​ຖຸ​ນາ​ ຢູ່ໃນ​ກອງ​ປະ​ຊຸມ​ສະພາ​ແຫ່ງ​ຊາຕ ຕອນ​ນຶ່ງວ່າ:

ເວົ້າເຖິງນ້ຳປະປາສາ ນ້ຳປະປານີ້ ກໍບໍ່ງ່າຍ ຕາມຂ້າພະເຈົ້າຮູ້ໄວ້ ເຂົາກໍມີວິທີຂອງເຂົາກິນໃດ ກໍຫຼຸບທຶນອີກ ອັດຣາສູນເສັຽບໍ່ ບາງບ່ອນນ້ຳປະປານີ້ສູນເສັຍ 30 ເປີເຊັນ ຣາຍງານໃດ ລະເຮັດໃດ ຊິມີກຳໄລ ທີ່ຈິງມັນບໍ່ແມ່ນເສັຽຮອດປານນັ້ນ ຄັນເສັຽອາກອນນັ້ນ ຂະເຈົ້າກໍສ້າງບໍ່ໄດ້ມາຖານ ຕົກເຮັ່ຽຫັ້ນແຫຼະ 30 ເປີເຊັນ ເພິ່ນກໍກິນນຳຕົກເຮັ່ຽນີ້ແຫຼະ ຄື ຣັບານກໍບໍ່ໄດ້ເງິນ.”

ຜ່ານ​ມາ ມີ​ພະ​ນັກ​ງານ​ຂອງ​ຣັ​ຖ ວິ​ສາ​ຫະ​ກິ​ຈ ນ້ຳ​ປະ​ປາລາວ​ຈຳ​ນວນ​ນຶ່ງ ໄດ້​ສວຍ​ໃຊ້​ຕຳ​ແໜ່ງໜ້າ​ທີ່ ​ຂອງ​ໂຕ​ເອງ ໃນ​ການ​ເກັບ​ຄ່າ​ນ້ຳ​ປະ​ປາ​ ຈາກ​ປະ​ຊາ​ຊົນ​ແບບ​ເຕັມ​ຈຳ​ນວນ ແຕ່ບໍ່​ສົ່ງ​ເງິນ​ຈຳ​ນວນ​ດັ່ງ​ກ່າວນີ້ ເຂົ້າ​ລະ​ບົບ​ໃຫ້​ແກ່​ທາງ​ການຄົບ​ຖ້ວນ.

ເຈົ້າ​ໜ້າ​ທີ່​ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ຜູ້​ທີ່ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ໄດ້​ກ່າວ​ຕໍ່ວິທຍຸ​ເອ​ເຊັຽ​ເສ​ຣີ ໃນ​ວັນ​ນ​ທີ 30 ມິ​ຖຸ​ນາ ວ່າ:

ຕົກເຮັ່ຽ 30 ເປີເຊັນ. ອ່າ 30 ເປີເຊັນ ສູນເສັຍລ້າໆ ຫັ້ນນ່າເຈົ້າ. ລາຍໄດ້ບໍ່ເຂົ້າກັບທາງບໍຣິສັດ ຫຍັງຫັ້ນນ່າ ກໍຫຼາຍຢູ່ເຈົ້າ.”

ບັນ​ຫາ​ການ​ຮົ່ວ​ໄຫຼ ຂອງ​ຣາຍ​ຮັບ​ຈາກ​ການ​ຂາຍ​ນ້ຳ​ປະ​ປາ ໃຫ້​ແກ່​ປະ​ຊາ​ຊົນ ຂອງ​ຣັ​ຖວິ​ສາ​ຫະ​ກິຈ ນຳ​ປະ​ປາ​ລາວ​ນັ້ນ ເກີດ​ຂຶ້ນ​ມາ​ແລ້ວ ເປັນ​​ເວ​ລາ​ດົນ ໂດຍ​ທີ່​ຜ່ານ​ມາ​ ລາຍ​ຮັບ​ດັ່ງ​ກ່າວນີ້ ບໍ່​ເຂົ້າ​ລະ​ບົບ​ຂອງ​ທາງ​ການ​ ປະ​ມານ 10-20 ເປີ​ເຊັນ ເພີ່ມ​ເປັນ 30 ເປີ​ເຊັນ.

ຈົນ​ມາ​ຮອດ​ປັດ​ຈຸ​ບັນ ບັນ​ຫາ​ດັ່ງ​ກ່າວ ຍິ່ງ​ເພີ່ມ​ຂຶ້ນ ແລະ ບາງ​ບ່ອນ​ມີ​ກາ​ນ​ຮົ່ວ​ໄຫຼເຖິງ 50 ເປີ​ເຊັນ ເຊິ່ງ​ພະ​ນັກ​ງານ​ຫຼາຍ​ຄົນ ​ມີ​ສ່ວນ​ກ່ຽວ​ຂ້ອງ ແລະ ຖືກ​ໄລ່​ອອກ.  

ເຈົ້າ​ໜ້າ​ທີ່ ຜ​ແນກ​ໂຍ​ທາ​ທິ​ການ ແລະ ຂົນ​ສົ່ງ ທີ່​ຢູ່​ແຂວງ​ພາກ​ເໜືອ ໄດ້​ກ່າວ​ຕໍ່​ວິທຍຸເອ​ເຊັຽ​ເສ​ຣີ ໃນ​ວັນ​ທີ 30 ມິ​ຖຸ​ນາ ວ່າ:

ໂອ້​! ເປັນມານານແລ້ວ ແຕ່ກ່ອນຍັງແທໜ້ອຍ 10 ປາຍ, 20 ປາຍ ເປີເຊັນ. ດຽວນີ້ ມັນຂຶ້ນ 30 ເປີເຊັນ. ຢູ່ແຂວງເຮົາ 50 ເປີເຊັນ ກໍມີ. ອື ບໍ່ປົກຕິໂຕນີ້ຫັ້ນນ່າ ກໍຄືບໍ່ໂປ່ງໄສ ພະນັກງານການເງິນ ເຂົາຈະໃຫ້ອອກໍມີ, ມີໆ ເຂົາໃຫ້ອອກການມີ.”

ກ່ຽວ​ກັບ​ເຣື່ອງນີ້, ໜ່ວຍ​ງານ​ທີ່​ກ່ຽວ​ຂ້ອງ ມີ​ແຜນ​ການ​ວ່າ ຈະ​ແກ້​ໄຂ​ບັນ​ຫາ​ກາ​ນ​ຮົ່ວ​ໄຫຼ ​ຂອງ​ລາຍ​ຮັບ​ດັ່ງ​ກ່າວນີ້ ດ້ວຍ​ການກວ​ດ​ກາ​ ພະ​ນັກ​ງານ​ເກັບ​ຄ່າ​ນ້ຳ​ປະ​ປາ​ ຢ່າງ​ເຂັ້ມ​ງວດ ພ້ອມ​ຈະ​ດໍ​າ​ເນີນ​ການ​ນໍ​າ​ໃຊ້​ເຄື່ອງວັດ​ແທ​ກ ປ​ຣິມານ​ທີ່​ຕົກ​ເຮັ່ຽ ແລະ ລາຍ​ຮັບທີ່ບໍ່​ທັນ​ເຂົ້າ​ລະ​ບົບ​ ໃຫ້​ມີ​ຄວາມ​ຈະ​ແຈ້ງ​ຫຼາຍກວ່າເກົ່າ.

ເຈົ້າ​ໜ້າ​ທີ່​ ຜ​ແນກ​ໂຍ​ທາ​ທິ​ການ ແລະ ຂົນ​ສົ່ງ​ຢູ່​ທາງ​ພາກ​ເໜືອ ທ່ານ​ດຽວ​ກັນ​ນີ້ ໄດ້​ກ່າວ​ວ່າ:

ເພິ່ນກໍເກັບເງິນນຳເຂົາ 5 ແມັດກ້ອນ ແຕ່ ເພິ່ນໄດ້ລາຍງານ ແຂວງ ມີແຕ່ 3 ແມັດກ້ອນ ຫັ້ນນ່າ. ເອີ 3 ແມັດ ກ້ອນນີ້ເຂົ້າເງິນ ເຈົ້າຂອງເງິນຂອງບໍຣິສັດ ເນາະ ຂອງຣັຖວິສາຫະກິຈ ນ້ຳປະປາຫັ້ນ ສ່າອີກ 2 ແມັດກ້ອນ ກໍເຂົາໂຕເອງຫັ້ນນ່າ. ກໍເພິ່ນກໍມີແຕ່ຊອກ ວິທີແກ້ໄຂ ອັນນຶ່ງກໍແມ່ນກວດກາພະນັກງານຫັ້ນ ນ່າ ກໍຜູ້ເກັບເງິນຫັ້ນຫວ່າ ອັນທີ່ສອງ ມາກໍວ່າ ຊອກຊື້ເຄື່ອງມາຕິດຕາມ ປະຣິມານນ້ຳເສັຽ ນ້ຳທີ່ເກັບເງິນບໍ່ໄດ້ ຫັ້ນນ່າ.”  

ຊາວລາວ ຈຳ​ນວນ​ຫຼາຍ ຮູ້​ວ່າມີ​ພະ​ນັກ​ງານ​ ຂອງວິ​ສາ​ຫະ​ກິຈ ນ້ຳ​ປະ​ປາລາວ ​ຫຼາຍ​ຄົນ​ດຳ​ເນີນ ກາ​ນ​ວັດ​ແທກ​ຄ່າ​ນ້ຳ​ປະ​ປາ​ແບບ ບໍ່​ຖືກ​ຕ້ອງ ແລະ ເກັບລາຍ​ຮັບ​ສ່ວນ​ນຶ່ງ​ຈາ​ກ​ຊາວ​ບ້ານໄວ້​ ເປັນຂອງ​ໂຕ​ເອງ ແຕ່​ ພວກເ​ຂົາ​ເຈົ້າ​ພັດ​ບໍ່​ຮູ້​ວ່າ ພະ​ນັກ​ງານ​ກຸ່ມ​ດັ່ງ​ກ່າວນີ້ ໃຊ້​ວິ​ທີ​ການ​ແນວ​ໃດ​ ໃນ​ກາ​ນ​ສໍ້ໂກງ​ຄ່າ​ນ້ຳ​ປະ​ປາ.

ຊາວເມືອງ​ໂພນ​ທອງ ແຂວງ​ຈຳ​ປາ​ສັກ ໄດ້​ກ່າວ​ວ່າ:

ແບບວ່າ ມີຄົນສໍ້ຣາສ ບັງຫຼວງ ເອົາເງິນໂຕທີ່ວ່າ ມັນກໍມີ ອັນນີ້ ກໍບໍ່ເຂົ້າໃຈຄືກັນ ເພາະວ່າ ເຮົາຈະບໍ່ໄດ້ຢູ່ອົງການນັ້ນເນາະ ເຮົາຈະບໍ່ຮູ້ວ່າ ວິທີເຂົາເຮັດແບບໃດໆ ແມ່ນນ້ຳປະປາ ຍັງມີແຕ່ວ່າ ຢູ່ເຂດໃນເມືອງຊື່ໆ ເຮົາເຂດນອກກໍບໍ່ມີເທື່ອ.”

ກົດ​ໝາຍ​ອາ​ຍາ ສະ​ບັບ​ປີ 2017 ລະ​ບຸ​ວ່າ  ການ​ສໍ້​ຣາສ​ບັງ​ຫຼວງ ແມ່ນ​ພຶດ​ຕິ​ກັມ​ຂອງ​ພະ​ນັກ​ງານ​ນຳ​ພາ, ພະ​ນັກ​ງານ​ຄຸ້ມ​ຄອງ, ພະ​ນັກ​ງານ​ວິ​ຊາ​ການ, ພະ​ນັກ​ງານ​ວິ​ສາ​ຫະ​ກິ​ຈ, ຣັ​ຖກອນ, ທະ​ຫານ, ຕຳ​ຣວດ ລວມ​ທັງ​ນາຍ​ບ້ານ ແລະ ຜູ້​ໄດ້​ຮັບ​ສິທ​ທິ​ ໜ້າ​ທີ່​ນຶ່ງ​ຈາກ​ທາງ​ການ ແລະ ພະ​ນັກ​ງານ​ຕ່າງ​ປະ​ເທດ ແລະ ພະ​ນັກ​ງານ​ອົງ​ການ​ຈັດ​ຕັ້ງ​ສາ​ກົນ ໂດຍ​ການ​ສໍ້​ຣາສບັງ​ຫຼວງ ປະ​ກອບ​ດ້ວຍ​ສະ​ຖາ​ນະ​ການ ​ກະ​ທຳ​ຜິດ ທັງ​ນີ້ ​ເປັນ​ການ​ກະ​ທຳ ​ທີ່​ສ້າງ​ຜົ​ລ​ເສັຽ​ຫາຍ 20 ລ້ານ ກີບ​ ຫາ ​ເກີນກວ່າ 2 ຕື້ ກີບ​ຂຶ້ນໄປ ຈະ​ຖືກ​ລົງ​ໂທດ​ຕັດ​ອິ​ສ​ຣະ​ພາບ ແຕ່ 1 ປີ ຫາ ຕ​ລອດ​ຊີ​ວິດ ແລະ ຖື​ກ​ປັບ​ໃໝ 1 ເປີ​ເຊັນ ຂອງ​ມູນ​ຄ່າ ​ຄວາມ​ເສັຽ​ຫາຍ.  

ປັດ​ຈຸ​ບັນ ຊາວ​ລາວ ຈຳ​ນວນ​ຫຼາຍ ຢູ່​ຫຼາຍ​ເມືອງ ແລະ ຫຼາຍ​ແຂວງຂອງ​ປະ​ເທດ ໂດຍ ສະ​ເພາະ​ພື້ນ​ທີ່​ເຂດນອກ ແລະ ຫ່າງ​ໄກ​ສອກ​ຫຼີກ ຍັງ​ບໍ່​ທັນ​ເຂົ້າ​ເຖິງ​ລະ​ບົບ​ນ້ຳ​ປະ​ປາເທື່ອ ໂດຍ​ຊາວ​ລາວ​ໃນ​ເຂດ​ພາກ​ເໜືອ ​ທີ່​ບໍ່​ສາ​ມາດ​ເຂົ້າ​ເຖິງ​ລະ​ບົບ​ນ້ຳ​ປະ​ປາໄດ້ ພັດ​ຕ້ອງ​ນຳ​ໃຊ້​ນ້ຳ​ລິນ​ຈາກ​ພູ​, ຈາກດອຍ ໂດຍບໍ່​ໄດ້​ຜ່ານ​ການກອງ​ນ້ຳ​ໃຫ້​ສະ​ອາດ ໃນ​ຂະ​ນະ​ທີ່ ຊາວ​ລາວບໍ່​ສາ​ມາດ​ເຂົ້າ​ເຖິງ​ລະ​ບົບ​ນ້ຳ​ປະ​ປາ ຢູ່​ທາງ​ພາກ​ໃຕ້ ພັດ​ຕ້ອງໃຊ້​ນ້ຳ​ບາ​ດານ ເຊິ່ງ​ກໍ​ຈຳ​ເປັນ​ຕ້ອງ​ເສັຽ​ຄ່າ​ໄຟ​ຟ້າ ປະ​ມານ​ຄອບ​ຄົວ​ລະ 43,000-84,000 ກີບ ຕໍ່​ເດືອນ.

ເຈົ້າ​ໜ້າ​ທີ່​ຣັ​ຖວິ​ສາ​ຫະ​ກິຈ​ໄຟ​ຟ້າ​ລາວ ຢູ່ ແຂວງ​ພາກ​ໃຕ້ ຜູ້​ທີ່ບໍ່​ປະ​ສົງ​ອອກ​ຊື່ ແລະ ຕຳ​ແໜ່ງ ໄດ້​ກ່າວ​ວ່າ:

ມັນກໍ ຄັນວ່າ ໃຊ້ນ້ຳບາດານ ເພິ່ນກໍໄດ້ເສັຽແຕ່ຄ່າໄຟເນາະ ຄັນວ່າ ເພິ່ນໄດ້ໃຊ້ສ້ຳປະປາ ເພິ່ນຕ້ອງໄດ້ເສັຽຄ່ານ້ຳປະປາ ເພາະວ່າ ນ້ຳປະປານຳເຮົາ ແມ່ນເພິ່ນຈະໄດ້ ເສັຽຄ່ານ້ຳນຳເຮົາ ແຕ່ວ່າ ຄັນວ່າ ເພິ່ນໃຊ້ນ້ຳບາດານ ແມ່ນບໍ່ໄດ້ເສັຽ ໂດຍ ທັງເຂດນອກແນ່ ໃນເມືອງນຳໃຊ້.”  

ທ່ານ ກ່າວ​ຕື່ມ​ວ່າ ປະ​ຊາ​ຊົນ​ຈຳ​ນວນ​ຫຼາຍ ພາຍ​ໃນ​ປະ​ເທດ​ລາວ ຍັງ​ບໍ່​ທັນ​ເຂົ້າ​ເຖິງ]ຣະ​ບົບ​ນ້ຳ​ປະ​ປາ​ປານ​ໃດ ແລະ ທີ່​ຜ່ານ​ມາ ຄ່າ​ໄຟ​ຟ້າ ແລະ ຄ່າ​ນ້ຳ​ປະ​ປາ ຢູ່​ແຂວງ​ຕ່າງໆ ບໍ່​ຄື​ກັນ ໂດຍ​ພື້ນ​ທີ່​ມີ​ປະ​ຊາ​ກອນ​ຈຳ​ນວນ​ຫຼາຍ ຄ່າ​ໄຟ​ຟ້າ ແລະ ຄ່າ​ນ້ຳ​ປະ​ປາ​ກໍ​ຈະ​ຖືກ​ລົງ ໃນ​ຂະ​ນະ​ທີ່ ພື້ນ​ທີ່​ຫ່າງ​ໄກ ແລະ ບ່ອນ​ທີ່​ບໍ່​ທັນ​ມີ​ປະ​ຊາ​ຊົນ​​ຫຼາຍ​ປານ​ໃດ ຄ່າ​ໄຟ​ຟ້າ ແລະ ຄ່າ​ນ້ຳ​ປະ​ປາ​ ຈະ​ສູງກວ່າ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.