ປະຊຸມ ສຳເຣັດ, ບັນຫາ ຍາກແກ້ໄຂໄດ້ ສຳເຣັດ

ຈຳປາທອງ
2021-11-19
Share
ປະຊຸມ ສຳເຣັດ, ບັນຫາ ຍາກແກ້ໄຂໄດ້ ສຳເຣັດ ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 9, ວັນທີ 17 ພຶສຈິກາ 2021.
ຮູບພາບຈາກ ວິດີໂອ: LNTV

ໃນພິທີປິດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 9 ໃນມື້ວັນທີ 17 ພຶສຈິກາ 2021 ນີ້ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກປະຊາຊົນປະຕິວັດລາວ, ປະທານສະພາແຫ່ງຊາດ ໄດ້ກ່າວເຖິງຜົລສໍາເຣັດຂອງກອງປະຊຸມວ່າ ເປັນການຜັນຂຍາຍກອງປະຊຸມໃຫຍ່ຄັ້ງທີ 11 ຂອງພັກ.

ຜົລສໍາເຣັດຂອງກອງປະຊຸມ ສມັຍສາມັນເທື່ອທີ 2 ຂອງສະພາແຫ່ງຊາດຊຸດທີ 9 ຄັ້ງນີ້ເປັນຜັນຂຍາຍກອງປະຊຸມໃຫຍ່ ຄັ້ງທີ 11 ຂອງພັກເຂົ້າສູ່ຊີວິດຕົວຈິງ.

ກອງປະຊຸມໄດ້ສຸມໃສ່ຫຼາຍບັນຫາ ໂດຍສະເພາະແມ່ນ 2 ວາຣະແຫ່ງຊາດໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ, ການເງິນ ແລະບັນຫາຢາເສບຕິດ ໄປຄຽງຄູ່ກັບການຈັດຕັ້ງປະຕິບັດມາດຕະການປ້ອງກັນໂຄວິດ-19 ທີີ່ຍັງລະບາດຫຼາຍຢູ່ນີ້. ກອງປະຊຸມເທື່ອນີ້ດໍາເນີນໄປໃນຂະນະທີ່ຊີວິດການເປັນຢູ່ຂອງປະຊາຊົນຍັງຫຍຸ້ງຍາກ ແລະການຜລິດຍັງຕໍ່າ ດັ່ງສະມາຊິກສະພາແຫ່ງຊາດທ່ານນຶ່ງກ່າວຕໍ່ກອງປະຊຸມວ່າ:

ອິງໃສ່ສະພາບຄວາມເປັນຈິງ ຂອງແຕ່ລະທ້ອງຖິ່ນ ເວົ້າລວມ ປະຊາຊົນຢູ່ເຂດຊົນບົດຫ່າງໄກ ສອກ ຫລີກ ເຫັນວ່າ ຍັງມີຄວາມທຸກຍາກຫຼາຍ ດໍາຣົງຊີວິດແບບປະຖົມປະຖານ ສະມັດຕະພາບຂອງການ ຜລິດນີ້ຖືວ່າຍັງຕໍ່າ.

IMG_8792.JPGໃນການພັທນາ ເສຖກິດ-ສັງຄົມແຫ່ງຊາດ ທ່ານ ຈອມສີ ລັດຕະນະປັນ ສະມາຊິກສະພາແຫ່ງຊາດ ເຂດເລືອກຕັ້ງທີ 5 ແຂວງ ບໍ່ແກ້ວ ໄດ້ສເນີໃນມື້ທໍາອິດ ຂອງກອງປະຊຸມ ໃຫ້ ຣັຖບານປັບປຸງ 3 ຈຸດ ຄືໃຫ້ປັບປຸງດ້ານນະໂຍບາຍ ສິດທິທາງການຜະລິດ ເປັນຕົ້ນການລົງທຶນ, ການສນອງແຫຼ່ງທຶນເຂົ້າໃນໂຄງການບຸຣິມະສິດຕ່າງໆ, ສົ່ງເສີມການຕລາດສົ່ງອອກ, ສົ່ງເສີມການຜະລິດພາຍໃນ, ຫຼຸດຜ່ອນການນໍາເຂົ້າ, ປັບປຸງນະໂຍບາຍ ການເງິນ-ເງິນຕຣາໃຫ້ຄ່ອງຕົວ. ໃນມື້ທີ 2 ຂອງກອງປະຊຸມ ທ່ານ ສຸວັນນີ ໄຊຊະນະ ສະມາຊິກສະພາແຫ່ງຊາດ ເຂດເລືອກຕັ້ງທີ 11 ແຂວງບໍຣິຄໍາໄຊ ກໍໄດ້ສເນີໃຫ້ຣັຖບານ ແກ້ໄຂ 2 ບັນຫາ ຄືນຶ່ງແມ່ນການພັທນາ ຊົນນະບົດ ລົບລ້າງຄວາມທຸກຍາກ ແລະວຽກງານ 3 ສ້າງ ຊຶ່ງໃນປີ 2021 ຣັຖບານ ໄດ້ສຸມທຶນໃສ່ເຖິງ 122 ຕື້ປາຍກີບ. ແຕ່ເນື່ອງຈາກ ສ່ວນໃຫຍ່ແມ່ນໂຄງການເດີມ ທີ່ບໍ່ສາມາດສ້າງ ເປັນໂຄງການໃໝ່. ແລະງົບປະມານນັ້ນ ສ່ວນໃຫຍ່ແມ່ນເນັ້ນໃສ່ ການຊໍາຣະສະສາງໂຄງການ ທີ່ປະຕິບັດສໍາເຣັດ ແລະກໍາລັງປະຕິບັດຢູ່. ແລະບັນຫາທີ 2 ແມ່ນກ່ຽວກັບການ ສົ່ງເສີມການຜະລິດ ແລະບັນຫາທີ່ຕ້ອງ ຊອກຫາທາງອອກ. ທ່ານເວົ້າວ່າ ການທີ່ວ່າໂຕເລກ GDP ບັນລຸໄດ້ 3% ນັ້ນ ເບິ່ງແນວນຶ່ງກໍໜ້າຊື່ນຊົມ ແຕ່ເມື່ອເບິ່ງໃນລາຍລະອຽດແລ້ວ ເຫັນວ່າເປັນພຽງຕົວເລກ ທີ່ຍັງບໍ່ທັນສ່ອງແສງເຖິງການ ເຕີບໂຕທີ່ແທ້ຈິງເທື່ອ ເພາະວ່າ ປັດໃຈທີ່ໄດ້ເພິ່ມ 3% ຂອງ GDP ນີ້ ແມ່ນມາຈາກການລົງທຶນວຽກງານກໍ່ສ້າງ ຊຶ່ງຂຍາຍຕົວເພີ່ມຂຶ້ນ 8.2% ແລະການລົງທຶນນັ້ນ ຄົງຈະແມ່ນການລົງທຶນໃສ່ຂົງເຂດກໍ່ສ້າງ ໂດຍສະເພາະແມ່ນທາງດ່ວນ, ທາງຣົດໄຟ, ເຂື່ອນໄຟຟ້າ 4.5% ໃນຂະນະທີ່ ຂົງເຂດການຄ້າ, ການບໍຣິການ, ບ້ານພັກ, ໂຮງແຮມ, ທ່ອງທ່ຽວ, ຂົນສົ່ງ ຫຼຸດລົງເຖິງ 28.3%. ພ້ອມກັນນັ້ນ ສູນກາງ ແນວລາວສ້າງຊາດ ກໍໄດ້ສເນີໃຫ້ແກ້ໄຂ 10 ບັນຫາ ຊຶ່ງໃນນັ້ນ ຍານາງ ຄໍາຈັນ ພົມແສງສະຫວັນ ຮອງປະທານສູນກາງ ແນວລາວສ້າງຊາດ ໄດ້ສເນີໃຫ້ສະພາແຫ່ງຊາດ ເພີ່ມການຕິດຕາມກວດກາ ແລະຊຸກຍູ້ການປະຕິບັດ ໂຄງການພັທນາ ຂອງຣັຖບານ, ບໍຣິສັດກ່ຽວຂ້ອງ ທີ່ປະຊາຊົນໄດ້ຮັບຜົລກະທົບ ແຕ່ບໍ່ທັນໄດ້ແກ້ໄຂ.

ໂຄງການກໍ່ສ້າງ ເຂື່ອນໄຟຟ້າຫ້ວຍເປາະ ຍັງບໍ່ທັນໄດ້ມີການຊົດເຊີຽ ເນື້ອທີ່ດິນທໍາການຜະລິດ ຂອງປະ ຊາຊົນ ຢູ່ບ້ານສັນທົ່ງ ເມືອງເລົ່າງາມ ແຂວງສາລະວັນ ແລະບໍຣິສັດເອກກະຊົນ ໄດ້ສໍາປະທານເນື້ອທີ່ດິນ ທໍາການຜລິດຂອງປະຊາຊົນ ຢູ່ບ້ານນາທັນ ເມືອງເລົ່າງາມ ແຂວງສາລະວັນ ເຊັ່ນກັນ.

ພ້ອມກັນນັ້ນ ຍານາງ ກ່າວຕື່ມອີກວ່າ ການຈ່າຍຄ່າແຮງງານ ໃຫ້ກັມມະກອນປຸກ ທີ່ພັກອາສັຍຂອງໂຄງການເຂື່ອນໄຟຟ້າ ນໍ້າທາ 1 ຢູ່ເມືອງນາແລ ແຂວງຫຼວງນໍ້າທາ ແຕ່ປີ 2015 ຍັງແຂ້ໄຂບໍ່ທັນໄດ້; ດິນປຸກສ້າງ ຂອງປະຊາຊົນເມືອງຊໍາໃຕ້ ແຂວງຫົວພັນ ທີ່ໄດ້ຮັບຜົລກະທົບ ຈາກການກໍ່ສ້າງເຂື່ອນ ໄຟຟ້ານໍ້າຊໍາ 1 ໂດຍສະເພາະແມ່ນປ່າຊ້າ 421 ຂຸມຝັງສົບ ຍັງບໍ່ທັນໄດ້ຮັບການຊົດເຊີຽ. ບັນຫາຂັດແຍ່ງທີ່ດິນ ລະຫວ່າງ ບໍຣິສັດນໍ້າທາ ກໍ່ສ້າງທາງ ກັບປະຊາຊົນຢູ່ບ້ານຊຽງດາ ເມືອງໄຊເສຖາ ນະຄອນຫຼວງວຽງຈັນ 126 ຄອບຄົວ ແກ່ຍາວມາຫຼາຍປີ ຖ້າບໍ່ໄດ້ຮັບການແກ້ໄຂ ຢ່າງສົມເຫດສົມຜົລ ອາຈເປັນບັນຫາກວ້າງຕື່ມ ແລະອື່ນໆ ອີກຫຼາຍບັນຫາ ທີ່ຣັຖບານຈະຕ້ອງໄດ້ແກ້ໄຂ. ເວົ້າເຖິງຄວາມຫຍຸ້ງຍາກ ທີ່ຣັຖບານປະເຊີນຢູ່ ທ່ານ ພັນຄໍາ ວິພາວັນ ນາຍົກຣັຖມົນຕຣີ ຣາຍງານຕໍ່ກອງປະຊຸມ ສະພາແຫ່ງຊາດ ໃນມື້ວັນທີ 1 ພຶສຈິການີ້ວ່າ ຄວາມຫຍຸ້ງຍາກ ແລະສິ່ງທ້າທາຍຕົ້ນຕໍ ຂອງປະເທດລາວແມ່ນ ບັນຫາໜີ້ສາທາຣະນະ, ບັນດາຣັຖວິສາຫະກິຈ ເກືອບທັງໝົດ ດໍາເນີນທຸຣະກິຈ ບໍ່ມີປະສິດທິພາບ, ຄວາມສາມາດ ຂອງກໍາລັງການຜະລິດຕໍ່າ, ການຈັດເກັບລາຍຮັບ ບໍ່ໄດ້ຕາມຄາດໝາຍ, ກົລໄກການບໍຣິຫານ ແລະການລົງທຶນ ຍັງບໍ່ທັນສອດຄ່ອງ, ການເຂົ້າຫາແຫຼ່ງທຶນຕ່າງປະເທດ ພົບຄວາມຫຍຸ້ງຍາກ, ອັດຕຣາແລກປ່ຽນເງິນຕຣາ ມີ ການເໜັງຕີງສູງ ໝາຍເຖິງເງິນກີບເຟີ້, ບັນຫາຢາເສບຕິດ ແລະການແຜ່ ຣະບາດຂອງໂຄວິດ-19. ການເກັບລາຍຮັບບໍ່ໄດ້ຄາດໝາຍ ອີງຕາມການຣາຍງານ ຂອງທ່ານ ບຸນໂຈມ ອຸບົນປະເສີດ ຣັຖມົນຕຣີກະຊວງການເງິນແລ້ວແມ່ນວ່າ:

ທີ່ເຮົາສູນ ເຮົາສູນເສັຽທີ່ສຸດກຫັ້ນແມ່ນ ການນໍາເຂົ້ານໍ້າມັນເຊື້ອໄຟເນາະ ຕາມສະຖິຕິ ທີ່ພວກເຮົາ ສົມທົບກັບພາກທຸຣະກິດນີ້ ຣະຫວ່າງຂໍ້ມູນສົ່ງອອກຂອງປະເທດ ເພື່ອນບ້ານ ມາຫາເຮົາ ນໍ້າມັນເຊື້ອໄຟເຮົານໍາເຂົ້ານີ້ ຈາກປະເທດໄທຍນີ້ ແມ່ນ 6 ໂຄງການ, ຈາກສະ ເພາະວຽດນາມນີ້ 2 ໂຄງການ ແຕ່ໂຕເລກເຂົ້າມາລາວເຮົານີ້ ຣະຫວ່າງແຈ້ງພາສີຕົວຈິງ ກັບຕົວເລກສົ່ງອອກ ຜິດດ່ຽງກັນປະມານ 200 ລ້ານລິດ ປະມານ 200 ລ້ານໂດລາຣ໌ ເຮົາສູນເສັຽໄປຊິປະມານ 1000 ຫາ 2000 ຕື້ ອັນນີ້ຕົວຈິງ.

ເວົ້າເຖິງໜີ້ສາທາຣະນະ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ກ່າວຕໍ່ກອງປະຊຸມ:

ພື້ນຖານເສຖກິດພາຍ ໃນຂອງພວກເຮົານີ້ ຍັງເພິ່ງອາສັຍຕ່າງປະເທດ ເປັນສ່ວນໃຫຍ່ ຊຶ່ງມີຄວາມຕ້ອງການເງິນຕຣາ ຕ່າງປະເທດ ເພື່ອຊໍາຣະສິນຄ້າທີ່ຈໍາເປັນ ຄ່າບໍຣິການ ແລະໜີ້ສິນຕ່າງປະເທດ ຈໍານວນຫຼວງຫຼາຍ ແຕ່ຣາຍຮັບເປັນເງິນຕຣາ ຕ່າງປະເທດ ຂອງພວກເຮົາຫັ້ນ ມີຈໍານວນຈໍາກັດ.

ສະພາແຫ່ງຊາດຕອນນຶ່ງວ່າ ກອງປະຊຸມສະພາແຫ່ງຊາດເທື່ອນີ້ ໄດ້ພິຈາຣະນາ ແລະຮັບຮອງເອົາຫຼາຍບັນຫາ ທັງບົດ ຣາຍງານຂອງ ຣັຖບານກ່ຽວກັບການປະຕິບັດ ແຜນພັທນາເສດຖະກິດ-ສັງຄົມແຫ່ງຊາດແລະອື່ນໆ ຮວມທັງບົດຣາຍງານກ່ຽວກັບ ການປະຕິບັດແຜນການເຄື່ອນໄຫວ ວຽກງານປະຈໍາປີ 2021 ແລະ ແຜນການປະຈໍາປີ 2022 ຂອງອົງການກວດກາ ແຫ່ງຣັຖ ແລະອົງການກວດສອບ ແຫ່ງຣັຖ ຊຶ່ງທີ່ຜ່ານມາວ່າ ຊອກເຫັນໄດ້ການລະເມີດວິໄນ ແຜນການ-ການເງິນ, ເກັບກູ້ງົບປະມານ ແລະຊັບສິນຂອງຣັຖຄືນມາໄດ້ຈໍານວນໜຶ່ງ, ແຕ່ຕາມຄໍາເວົ້າຂອງຊາວ ນະຄອນຫຼວງວຽງຈັນທ່ານນຶ່ງ ຕໍ່ ວິທຍຸເອເຊັຽເສຣີໃນມື້ວັນທີ 18 ພຶສຈິກາ ນີ້ແມ່ນວ່າ ເຫັນມີແຕ່ຣາຍງານ ແຕ່ບັນຫານັ້ນບໍ່ຖືກແກ້ໄຂຈັກເທື່ອ.

ມີແຕ່ມາຣາຍງານວ່າ ໂຄງການນັ້ນ ມີມູນຄ່າເທົ່ານັ້ນ. ໂຄງການນີ້ມູນຄ່າເທົ່ານັ້ນຫັ້ນນ່າ ແລ້ວບໍ່ໄດ້ຮັບການແກ້ໄຂຈັກເທື່ອ ຫັ້ນນ່າ ກໍມີແຕ່ຫົວຂໍ້ອັນເກົ່ານີ້.

ກອງປະຊຸມໄດ້ພິຈາລະນາຮັບຮອງເອົາ ບົດລາຍງານການຈັດຕັ້ງປະຕິບັດ ແຜນການເຄື່ອນ ໄຫວວຽກງານ ຂອງສານປະຊາຊົນສູງສຸດ ແລະອົງການໄອຍະການ ປະຊາຊົນສູງສຸດ ແລະໄດ້ພິຈາລະນາຮັບຮອງເອົາຮ່າງກົດໝາຍ 11 ສະບັບ, ໃນນັ້ນມີກົດໝາຍສ້າງໃໝ່ 4 ສະ ບັບ ຮວມທັງກົດໝາຍວ່າ ດ້ວຍຊາຍແດນແຫ່ງຊາດ, ກົດໝາຍວ່າດ້ວຍການສໍາຫຼວດ ວັດແທກ ແລະ ສ້າງແຜນທີ່ ແລະກົດໝາຍປັບປຸງ 7 ສະບັບ ຮວມທັງກົດໝາຍ ວ່າດ້ວຍຣັຖບານ, ກົດໝາຍວ່າດ້ວຍງົບປະມານແຫ່ງລັດ, ກົດໝາຍວ່າດ້ວຍການຄວບຄຸມຢາສູບ ຊຶ່ງປະທານສະພາແຫ່ງຊາດເວົ້າວ່າ ເປັນການເຮັດໃຫ້ຣັຖ ປົກຄອງດ້ວຍກົດໝາຍ ໃຫ້ເປັນຮູບພະທັມເທື່ອລະກ້າວ, ເຮັດໃຫ້ການຄຸ້ມຄອງຣັຖ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ນັບມື້ເປັນລະບົບຄົບຊຸດ ແລະມີປະສິດທິພາບ. ແຕ່ປະຊາຊົນລາວເວົ້າວ່າ ຢູ່ ສປປລາວ ເຖິງຈະມີກົດໝາຍຫຼາຍປານໃດກໍຕາມ, ແຕ່ປະຊາຊົນທັມມະດາ ສາມັນບໍ່ມີສິດຫຍັງເລີຍ, ຄົນທີ່ມີເງິນເປັນຜູ້ຊະນະ, ຢູ່ລອດ, ຄົນບໍ່ມີເງິນເປັນຜູ້ແພ້ ຕິດຄຸກ. ປະຊາຊົນເວົ້າວ່າ ກົດໝາຍທີ່ຖືກຮັບຮອງເອົານັ້ນ ປະຊາຊົນບໍ່ມີສ່ວນຮ່ວມແນວໃດ, ຂະບວນການຍຸຕິທັມຢູ່ປະເທດລາວ ບໍ່ມີຄວາມໂປ່ງໃສ, ພະນັກງານ-ຣັຖກອນຮັບສິນບົນຈາກຜູ້ບໍ່ປະຕິບັດຕາມກົດໝາຍ, ປະຊາຊົນບໍ່ສາມາດກວດສອບໄດ້ ດັ່ງຊາວ ນະຄອນຫຼວງວຽງຈັນ ທ່ານນຶ່ງ ທີ່ໄດ້ຕິດຕາມກອງປະຊຸມ ສະພາແຫ່ງຊາດຢ່າງໃກ້ຊິດກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນັ້ນວ່າ:

ກົດໝາຍເປັນພຽງແຕ່ເປັນອາຍາຊື່ໆເນາະ ອາຍາອິຫຍັງ ມັນມີແຕ່ຊື່ສຽງ ແຕ່ມັນຄວາມຈິງແທ້ຜູ້ໃດມີເງິນແລ້ວຜູ້ນັ້ນລອດ ມີບັນຫາແລ້ວ ຮີບແກ້ໄຂເຣື່ອງເງິນ ຖ້າບໍ່ມີເງິນກໍຕ້ອງເປັນຜູ້ຕິດຄຸກ.

ແຕ່ເຖິງແນວໃດກໍຕາມ ທ່ານ ຈະເລີນ ເຢັຍປາວເຮີ ຮອງປະທານສະພາ ແຫ່ງຊາດ, ປະທານກັມມາທິການ ກົດໝາຍ ຂອງສະພາແຫ່ງຊາດ ກໍໄດ້ກ່າວຕໍ່ກອງປະຊຸມ ສະພາ ວ່າກົດໝາຍ 11 ສະບັບນັ້ນແມ່ນຜົລສໍາເຣັດອັນສໍາຄັນ.

ຜົລສໍາເຣັດດັ່ງກ່າວນີ້ ເປັນການປະກອບສ່ວນສໍາຄັນ ສະກັດກັ້ນ ແລະຕ້ານບັນດາປາກົດການ ຂອງແນວຄິດອິສຣະເສຣີ ຕາມໃຈຊອບທີ່ຢູ່ເໜືອກົດໝາຍ ໃຫ້ເປັນຣັຖທີ່ປົກຄອງດ້ວຍກົດໝາຍ.

ເວົ້າເຖິງກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 9 ປະຊາຊົນລາວ ທັງຢູ່ນະຄອນຫຼວງວຽງຈັນ ແລະແຂວງຈໍາປາສັກ ຜູ້ຂໍສງວນຊື່ ແລະສຽງ ທີ່ວິທຍະເອເຊັຽເສຣີ ໄດ້ສໍາພາດ ທ່ານນຶ່ງເວົ້າວ່າ ບໍ່ໄດ້ຕິດຕາມກອງປະຊຸມສະພານັ້ນພໍເທົ່າໃດ ແລະຄົນອ້ອມຂ້າງ ບາງຄົນກໍສົນໃຈເລັກໆໜ້ອຍໆ ແລະອີກທ່ານນຶ່ງເວົ້າວ່າ ບໍ່ຮູ້ເຣື່ອງກອງປະຊຸມສະພາ ບໍ່ສົນໃຈ, ສົນໃຈໄປກໍຄືເກົ່າ. ເຂົາວ່າ ເຮົາເປັນຜູ້ຕາມກະແລ້ວໄປ, ຖືກກະເອົາ, ບໍ່ຖືກກະເອົາ, ມີຄວາມເຫັນກໍບໍ່ໄດ້. ແຕ່ເຖິງຢ່າງໃດກໍຕາມ ຜົລກອງປະຊຸມເທື່ອນີ້ ປະຊາຊົນຫຼາຍຄົນກໍຍັງບໍ່ໝັ້ນໃຈວ່າ ຈະໄດ້ຮັບການປະຕິບັດໃຫ້ເກີດຜົລເປັນຈິງໄດ້ ແທ້ຫຼືບໍ່ ຫຼືວ່າຍັງຈະໄດ້ຍົກຂຶ້ນມາ ເວົ້າໃນກອງປະຊຸມເທື່ອໜ້າຕື່ມອີກ.

ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 9 ໄດ້ເປີດຂຶ້ນໃນມື້ວັນທີ 1 ແລະໄດ້ປິດລົງໃນມື້ວັນທີ 17 ພຶສຈິກາ 2021 ນີ້. ສະບາຍດີ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ